Scrive xines

De Vicipedia
Jump to navigation Jump to search
La Lantingji Xu (par Wang Xizhi), copiada par Feng Chengsu (馮承素) en la dinastia Tang, entre 627 e 650 ec; comun regardada de la copia la plu bela de la testo

Scrive xines (xines: 中文; zhōngwén) es composada de la sinias xines (xines: 汉字/漢字; hànzì, letera "sinias xines") usada per representa la lingua xines. La Sinias xines no es un alfabeta o un silabario. Lo es comun clasida, con ieroglifos e cuneforma, como un logografia, ma la sistem es cuasi logosilabal. Un sinia representa tipal un silaba de xines parlada e pote es un parola individua o un parte de un parola polisilabal. La sinias se mesma es comun composada de partes cual pote represente ojetos fisical, ideas astrata, o pronunsia. Alfabetisme nesesa la memori de un cuantia grande de sinias. Un person xinese debe conose sirca 4000. La cuantia de sinias ia resulta partal par la adota de alfabetas de la mundo ueste como un modo aidante de represente xines, spesial la sistem nomida piniin.

Sinias variosa de sinias xines pote es trasada a la dinastia Xang, sirca 1200 a 1050 aec, ma la prosede de crea la sinias ia comensa alga sentenios plu temprana. Pos un periodo de varia e evolui, la sinias xines ia es normida en la dinastia Txin (221 a 206 aec). En la milenias, esta sinias ia evolui a stilos bon developada de caligrafia. En la diverje de la varias de xines, un situa de diglosia ia developa, en cual parlores de varias noncomprendable entre lunlotra ia es capas de comunica par usa la scrive de xines clasica. En la sentenio 20 temprana, xines clasica ia es recambiada per esta rol par scrive xines demotica, corespondente a la lingua normal parlada (putong o "mandarin"). An ce la plu de otra varias de xines no ave sua propre scrive, on ave tradisiones de scrives per la linguas guandong (o yue, "cantones"), zanhe ("shanghaian"), banlam ("hokkien"), e otras.

Alga sinias xines ia es adotada per usa en otra sistemes de scrive en linguas visin, pe japanes, corean (sude), e viet. Viet es aora scriveda sola con un scrive fundida sur la alfabeta latina.

Seguente la Shuowen Jiezi (un manual sur scrive, par Xu Shen sirca 120 ec), la sinias xines ia developa usante ses principes fundal. La du prima produi sinias simple, nomida 文 wén:

象形 xiàngxíng: glifos, en cual la sinia es un imaje de la ojeto cual lo represente.

  • Esemplos: 人 rén "person", 日 rì "sol", 木 mù "arbor/lenio".

指事 zhǐshì: ideogrames, en cual la sinia represente un idea astrata.

  • Esemplos: 上 shàng "a alta", 下 xià "a basa", 三 sān "tre".

La cuatro prinsipes restante produi sinia complicada, nomida istorial 字 zì (un terma usada aora per refere a tota sinias). Du refere a sinias composada de partes simple:

會意/会意 huìyì: composadas lojical en cual du o plu partes es usada per sua sinifia, cual dona un sinifia composada cual pote es aplicada a la sinia nova.

  • Esemplo: 東/东 dōng "east", cual represente la sol levante en arbores.

形聲/形声 xíngshēng: composadas fonetical, en cual un parte (comun nomida la radis) indica un categoria jeneral de sinifia, como "relatada a acua" o "relatada a la oio", e la otra parte es usada per sua valua fonetical.

  • Esemplo: 晴 qíng "clar, bon clima: composada de 日 rì "sol", and 青 qīng "blu/verde", cual es usada per sua sona.

Sirca 95% de sinias xines es en la forma de esta du prinsipes. An plu, alga composadas fonetical ia composada de glifos simple cual ia es plu tarde aumentada par la junta de un radis semantical. Per esemplo, 炷 zhù "candela" (aora videda como anticin, sinifiante "mexa de un lampa"), ia es orijinal la glifo 主, un sinia aora pronunsiada zhǔ e sinifia "ospitor", cual ia es ajuntada a la sinia 火 huǒ "foco".

La du prinsipes final no produi formas nova. En loca, los pasa sinifias nova a formas esistente:

轉注/转注 zhuǎnzhù: estende, en cual un sinia, comun con un sinifia simple e concreta, adota un sinifia plu estende o astrata.

  • Esemplo: 網/网 wǎng "rede", ia es orijinal un glifo mostrante un rede de pexa. Lo ia developa un sinifia estendeda per cualce grilia, como an un rede de computadores.

假借 jiǎjiè: reusa, en cual un sinia es usada, o con intende o par acaso, per alga cosa tota diferente.

  • Esemplo: 哥 gē "frate plu vea", cual es scriveda con un sinia cual sinifia orijinal "canta", aora scriveda 歌 gē; orijinal no sinia per "frate plu vea" ia esiste, donce un sinia nonrelatada ma con la pronunsia coreta ia es emprestada per acel sinifia.

Sinias xines es scriveda per cabe en un cuadro, an si composada de du formas plu simple scriveda lado a lado o alta a fondo. En alga casos, cada forma es compresada per cabe la sinia intera en un cuadro.

Sistemes de scrive model
Logografias Cuneforma | Ieroglifes | Xines | Canji | Maia
Silabarios Tsalagi | Canadianes orijinal | Catacana | Hiragana | Linial B
Abjades Alfabeta orijinal | Arabi | Fenisia | Arami | Ivri | Nabatea | Suri
Abugidas Bangla | Brami | Calinga | Canada | Caxmiri | Devanagari | Granta | Gujurati | Gupta | Gurmuci | Itiopian | Mianmar | Odia | Sindi | Sinhales | Tai | Tamil | Telugu | Tengwar | Tibetan
Alfabetas completa Bopomofo | Cartuli | Cirilica | Copta | Deseret | Deutx | Elinica | Eres | Etrusca | Glagolitica | Goto | Haieren | Hangul | Latina | Mandaia | Mongol | Ogam | Runas | Shaw | Uigur
Otra cosas Scrive corente | Stenografia | Transcrive | Alfabeta Fonetical Internasional (AFI) | Unicode