Asia este

De Vicipedia
Asia Este

Asia este es la parte este de la continente de Asia, cual pote es descriveda en termas o jeografial o cultural. En termas jeografial e jeopolitical, lo conteni Xina (Jonguo), Mongol, Corea Norde (Txoson), Corea Sude (Tehan), Japan (Nion), Taiuan, Hongkong e Macau; lo ave un area de sirca 12 000 000 km2, cual es aprosima 28% de la continente de Asia.

On ave plu ca 1.5 bilion asianes este. Sirca 38% de la cuantia de abitores de Asia e 22% (plu ca un sinci) de tota de la persones en la mundo abita en Asia este. An si la areas costal e rival de la rejion es alga de la locas con la plu cuantia de abitores en la mundo, la cuantia de abitores de Mongol e Xina ueste (ambos de cual es ensircada par tera) es nondensa; Mongol ave la densia de popla la min de cualce stato autonom. La densia jeneral de popla de Asia este es 133 abitores per cilometre cuadrida, sirca la promedia de la mundo (45/km2) multiplida par tre.

Istorial, sosias en Asia este ia es un parte de la sfera de cultur xines, e vocabulo e sistemes de scrive asian este es comun derivada de xines clasica e la sistem de scrive xines. Relijios major inclui budisme (per la plu parte mahaiana), confuzisme o neo-confuzisme, dauisme e relijio de folclor xines en Xina e Taiuan, xinto en Nion, e xamanisme corean en Corea. Xamanisme es ance pratica par mongoles e otra poplas nativa de la norde de Asia este. La calendario xines es la radis de cual multe otra calendarios asian este es derivada.

Istoria[edita | edita la fonte]

La dinastias xines ia domina esta rejion en modos cultural e militar per un periodo de tempo longa. Intercambia cultural e relijal entre la xines e otra dinastias e renas rejional ia aveni.

En cuando lias con la munda ueste ia forti, la potia de Xina ia comensa diminui. Sirca la tempo mesma, Nion ia solidi se como un stato nasional. En la Gera Mundal Du, tota de Corea, Taiuan, multe de Xina este, Hongkong e Vietnam ia deveni controlada par Nion. Pos la defeta de Nion en la gera, la penisola corean ia deveni autonom, ma a pos lo ia divide se a en du statos oposante; en cuando Taiuan ia deveni la teritorio xef de la stato par fato de la Republica de Xina pos la perde de Xina continental a la Republica de la Popla de Xina en la Gera Interna de Xina.