Uzbecistan

Uzbecistan
Informa jeneral
Capital:	Taxcent
Lingua ofisial:	uzbec, caralpac
Dirije
Governa:
- Xef de stato:	Xavcat Mirziyoyev
- Xef de governa:	Abdulla Aripov
Otras
Area:	448 978 km²
Popla:	34 588 900 (2021)
Densia:	74,1
PIB:
Mone:	Usbec Som
Zona de ora:	UTC+5 (UZT)
Numero de telefon:
Interede:

Uzbecistan (ofisial la Republica de Uzbecistan) es un de sola du paises en la mundo cual es sin costa e ensircada par otra paises sin costa. Locada en Asia sentral, lo es un republica constitual unial secular, composada de 12 provinses, un republica autonom e un site capital. Uzbecistan es bordada par sinco paises sin costa: Cazacstan a la norde, Tadjicistan a la sude-este, Cirgistan a la norde-este, Afganistan a la sude, e Turcmenistan a la sude-ueste.

Lo cual es aora Uzbecistan ia es antica un parte de la rejion Transoxiana, xef parlante farsi, en cual sites como Samarcand ia deveni rica par causa de la Via de Seda. Plu tarda, la area ia es concistada par un serie de invadores, incluinte la Califia Arabia e statos turcica como la hania Göktürk, pos cual la mongoles ia destrui lo. La site Shahrisabz ia es la loca do Timur ia nase. La rejion ia es concistada en la temprana de la sentenio 16 par nomadas este de lingua turcica, e ia deveni gradal asorbeda en la Impero Rusce en la sentenio 19. En 1924, la republica composante de la Uni Soviet conoseda como la Republica Sosialiste Soviet Uzbec ia es creada. Pos la desintegra de la Uni Soviet, lo ia declara autonomia como la Republica de Uzbecistan a 31 agosto 1991 (ofisial selebrada a la dia seguente).

Uzbecistan ave un erita cultural diversa, par causa de sua istoria e loca stratejial. Sua lingua ofisial es uzbec, un lingua turcica scriveda en la alfabeta latina e nativa parlada par aprosima 85% de la popla. Rusce es vasta usada; lo es la lingua du de la plu vasta enseniadas. Tadjici es la lingua tre. Uzbeces formi 81% de la popla, segueda par rusces (5,4%), tadjicis (4%), cazaces (3%) e otras (6,5%). Un majoria de uzbeces es muslimes nonramal. Uzbecistan es un membro de la Comunia de Statos Autonom, la Organiza per Securia e Coopera en Europa, la Nasiones Unida e la Organiza Shanghai de Coopera. An si lo es ofisial un republica democrata, en 2008 organizas nongovernal de diretos umana ia defini Uzbecistan como "un stato autoritar con diretos sivil limitada". Pos la mori de Islam Karimov en 2016, la presidente seguente – Xavcat Mirziyoyev — en sua anio prima ia aboli sclavia de coton e visas per sorti, e ia amnestia multe prisonidas political.

La economia de Uzbecistan depende xef de la produi de benes, incluinte coton, oro, uranio e gas natural. An con la gol declarada de cambia a un economia mercatal, sua governa continua manteni controlas economial par cual on importa cosas en loca de crea sustituis interna per los.

La area es 448 978cilometres cuadrida. La popla, en la anio 2020, ia conteni sirca 34 588 900 persones.

La site capital es Taxcent.