Linguas paleoeuropean
Linguas paleoeuropean (ance nomida linguas european vea o linguas preindoeuropean) es la linguas cual ia es parlada en Europa, per la plu parte nonconoseda, spesial ante la sperde de la linguas indoeuropean.[1]
La linguas preistorial de xasores-coliores de la paleolitica e mesolitica no es atestada par scrives. Nosa sola asede a los es la nomes la locas, spesial rios, trovada tra Europa sentral e ueste, e alga parolas posible emprestada par linguas plu tarde, o la influes sur sua strutures.
La linguas paleoeuropean atestada e sustratos reconstruida
[edita | edita la fonte]Linguas paleoispanica
- Linguas vasconica
- Euscara - la sola lingua paleoeuropean cual ia survive[1]
- Acuitanian - un relata prosima o antesedente de euscara[1]
- Iberian - posible relatada a la linguas vasconica, ma no confirmada[1]
- Tartesian - nonclasida; posible relatada a iberian o an indoeuropean.[1]
- Otra linguas paleoispanica pote es nondireta identifiada sola tra la nomes de locas, persones, o dios sitada par scrivores elinica e roman; la plu de enscrives ia usa la alfabetas fenisia e elinica, o derivas de los.
Linguas paleoeuropean de Italia
- Linguas tirena
- Paleosardinian - posible relatada a un lingua iberian estinguida[1]
- Pisene norde - en la rejion este-sentral de Italia[1]
- Sicana - en Sisilia sentral[1]
Linguas paleoeuropean de la rejion ejean
- Sustrato preelinica - posible relatada a minoan
- Minoan - en Criti
- Eteocriti - un desendente posible de minoan
- Ciprominoan - en Cipros, usante la silabario minoan
- Eteociprominoan - un desendente posible de ciprominoan
- La lingua de la disco Festo, posible un de la linguas presedente
Linguas paleoeuropean de Europa norde
- Sustrato pregermanica - un ipotese
- Sustrato preceltica - un ipotese
- Picta - posible un de la du linguas picta
- Sustratos prefinougrica
- Sustrato presami - un o plu linguas sustratal de la linguas sami
- Sustrata prefinica - posible relatada a presami
A veses, la linguas de la Caucasos es ance incluida en paleoeuropean, an si la rejion es comun videda como en Asia estra Europa.
No evidentes direta de la linguas parlada en la neolitica esiste. Atentas a estende la metodos de linguistica istorial a la eda de petra no es multe suportada. Donald Ringe, un spesialiste en la campo, critica teorias cual proposa sola un cuantia peti de familias de linguas en la neolitica, sperdeda tra areas grande de Europa. En loca, el sujeste ce la natur tribal de la sosias indica ce Europa ia es un loca de diversia grande de linguas, con multe familias con no oservable lias a lunlotra, simil a la situa en America Norde ueste ante la coloni par europeanes. A la otra lado, on pote sujeste ance ce la situa en America Norde este pote indica ce familias grande pote es vera sperdeda tra areas grande.
La linguas indoeuropean temprana es comun suposada como orijinal de la popla de la cultur de vasos de bandas o la cultur de vasos embutin de la eda calcolitica o la eda de bronze temprana. Los es suposada como veninte de la Balcanes, la stepe de Ucraina, o Anatolia. La idronimia de Europa vea es videda par Hans Krahe como la refleta la plu vea de la presente temprana de indoeuropean en Europa.
Teorias de linguas preindoeuropean en Europa es construida sur poca evidentes. Euscara es la aspiror la plu bon per un desendente de un de tal linguas, ma car lo es un lingua isolida, on ave no evidente comparante per plu teoria. Theo Vennemann ia sujeste un familia vasconica (cual el ia crede coesistente con un "atlantica" relatada a linguas semitica). La teoria es rejetada par la plu linguistes. Un otra aspiror es la linguas tirena, cual pote posible deveni etrusca e retica en la eda de fero, e ance posible linguas de la Ejean como minoan en la eda de bronze.
En la norde, un situa simil a lo de indoeuropean pote es avenida, con la linguas uralica estendente de la este. Spesial, la linguas sami de la popla nativa de Scandinavia parteni a la familia uralica, ma mostra multe influe de un sustrato cual represente posible un o plu linguas estinguida. Alga trasas de linguas orijinal en la rejion baltica es suspetada en la linguas finica, ma los es min clar. On ave parolas emprestata de linguas nonidentifiada en otra linguas uralica en Europa.
Referes
[edita | edita la fonte]- ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 Haarmann, Harald (2014). "Ethnicity and Language in the Ancient Mediterranean". In McInerney, Jeremy (ed.). A Companion to Ethnicity in the Ancient Mediterranean (en engles). Chichester, UK: John Wiley & Sons, Inc. pp. 17–33. doi:10.1002/9781118834312.ch2. ISBN 9781444337341.
{{cite book}}: Manteni de CS1: data autotraduida (link)