Iudi-espaniol (lingua)

De Vicipedia
Iudi-espaniol, scriveda en rashi e soletreo
Un mapa de locas de comunias sefardi, en cual iudi-espaniol ia es parlada

Iudi-espaniol (en la scrive ivri: גֿודֿיאו-איספאנייול‎), ance nomida ladino, es un de la linguas romanica derivada de espaniol vea. Orijinal lo ia es parlada en Espania e alora, pos la Proclama de Espulsa (de la iudis de Espania), lo ia sperde tra la teritorias pasada de la Impero Osmanian (la Balcanes, Turcia, Asia sude-ueste, e Africa norde) e ance Frans, Italia, Nederland, Magrib, e la Rena Unida. Aora, lo es parlada xef par minorias sefardi en plu ca 30 nasiones, con la plu de parlores abitante en Israel. An si lo no ave un state ofisial en cualce nasion, lo ia es reconoseda como un lingua de un minoria en Bosnia e Hersegovina, Israel, Frans, e Turcia. Lo es ance reconoseda formal par la Academia Real de Espania.

La cor de la vocabula de iudi-espaniol es espaniol vea, e lo ave multe elementos de tota linguas romanica vea de la penisola iberian: aragones vea, asturleones, catalan vea, galisian-portuges, e mozarabi. La lingua ia es plu ricida par turces osmanian e vocabula semitica de ivri, arami, e arabi, spesial en la campos de relijio, leges, e filosofia, e la plu de sua vocabula nova e moderne ia es adotada tra franses e italian. Plu, la lingua es influeda, an si a un grado min, par otra linguas local de la Balcanes, como elinica, balgarsce, e serbo-corvatsce.

Istorial, la scrive de Rashi e sua forma corente solitreo ia es la ortografias xef per scrive iudi-espaniol. Oji, lo es scriveda xef con la alfabeta latina, an si otra alfabetas como la alfabeta ivri e cirilica es ancora usada. Iudi-espaniol es conoseda par multe nomes diferente: español, judió, jidió, judesmo, sefaradhi, e haketia. En Turcia e en la Impero Osmanian pasada, lo ia es nomida tradisional iahudice en turces, pd la lingua iudi. En Israel, parlores de ivri nomi lo la lingua spanyolit o ladino.

Iudi-espaniol, a un eda la lingua de comersia en la Mar Adriatica, la Balcanes, e Asia sude-ueste, e famosa per sua leteratur rica, spesial en Salonica, es oji su la menasa seria de estingui. La plu de parlores nativa es vea, e la lingua no es transmeteda a sua enfantes o netes per razonas variosa. En alga comunias de sitadanes a stranjer en America latina e otra locas, lo es menasada par la asorbe de la dialeto en espaniol moderne. Ma lo ave un revive minor en comunias sefardi, spesial en musica.

Un esemplo de un canta en iudi-espaniol:

Adio, kerida
Tu madre kuando te pario

Y te kito al mundo,
Korason ella no te dio
Para amar segundo.
Korason ella no te dió
Para amar segundo.

Adio,
Adio kerida,
No kero la vida,
Me l'amargates tu.
Adio,
Adio kerida,
No kero la vida,
Me l'amargates tu.

Va, bushkate otro amor,

Aharva otras puertas,
Aspera otro ardor,
Ke para mi sos muerta.
Aspera otro ardor,
Ke para mi sos muerta.

Adio,
Adio kerida,
No kero la vida,
Me l'amargates tu.
Adio,
Adio kerida,
No kero la vida,
Me l'amargates tú.