Istoria de la vicinges

Eda de la vicinges

La periodo de la atacas la plu temprana recordada en la desenio de 790 asta la concista de England par la normandes en 1066 es conoseda como la eda de la vicinges. Los usa la Mar Norsce e la Mar Baltica per vias a la sude: La normandes ia es desendeda de vicinges ci ia reseta rena feudal de areas en Frans norde (la Duxia de Normandia) en la sentenio 10. En acel respeta, la desendentes de la vicinges continua influe Europa norde. Simil, Re Harold Godwinson, la re anglosason final de England, ia ave antesedentes dansce. Du vicinges an asende a la trono de England: Sweyn Barbaforcida (1013 - 1014) e sua fio Cnut la Grande (1016 - 1035).

Jeografial, la eda de vicinges pote es asiniada a no sola pais scandinavian, ma ance a la teritorios de paises germanica norde, xef la Danelaw, incluinte partes de York, Mercia, e Anglia este. Navigores vicing ia abri la via a paises nova a la norde, ueste, e este, resultante en la funda de colonias autonom en la isolas Shetland, Orkney, e Faroe, Island, Gronland, e L'Anse aux Meadows (un colonia tempora en Newfoundland, sirca 1000). La colonia en Gronland ia es instituida sirca 980, entre la periodo calda medieval, e sua ruina en la media de sentenio 16 ia es partal causada par un cambia de clima. La dinastia de Rurik ia prende controla de teritorios en areas slavica e fino-ugrica de Europa este; Los propri Ciiv en 882 como la capital de la Rus de Ciiv.

Tan temprana como 839, cuando representores svensce ia visita prima Bizantion, scandinavianes ia ata como mersenarios enper la Impero Bizantian. En la sentenio 10 tarda, un grupo nova de la gardores personal de la impero ia formi. Tradisional conteninte cuantias grande de scandinavianes, lo ia es conoseda como la Garda Varangian. An si la nom ia orijina en norsce vea, en slavica e elinica, lo ia refere a o scandinavianes o francos. La scandinavian la plu famosa cual ia partisipa en la Garda Varangian ia es Harald Hardrada, ci plu tarda institui se como re de Noria (1047 - 1066).

Evidentes arceolojial esiste ce la vicinges ia ateni Baghdad, la sentro de la Impero Islamica. La norsces regular via a la rio Volga con sua benes per intercambia: pelos, dentones, gras de oterios per selinte de barcones, e sclavos. Portos de comersia importante en esta periodo inclui Birca, Hedebi, Caupang, Jorvik, Staraia Ladoga, Novgorod, e Ciiv.

Jeneral, la norsces estende se a la norde e ueste a locas como Er, Scotland, Island, e Gronland; la dansces a England e Frans (en la Danelaw e Normandia); e la svensces a la este, como la Rus de Ciiv. Entre la petras de runas svensce cual discute misiones a stranjer, cuasi dui nara de la atacas e viajas a la ueste, e seguente la sagas de Island, multe vicinges norsce ia viaja ance a Europa este. En la eda de la vicinges, la nasiones moderna de Noria, Sveria, e Danmarc no ia esiste, ma ia es omojen e simil en cultur e lingua, an si alga distinguida jeografial. La nomes de la res scandinavian es conoseda vera sola per la parte tarda de la eda de vicinges. Pos la fini de la eda, la renas separada ia oteni sua identias separada como nasiones, cual ia ariva en la mesma tempo ce sua cristiani. Donce, la fini de la eda de vicinges per la scandinavianes ance marca la comensa de sua eda Medieval corta.

Estendes de la vicinges

La coloni de Island par vicinges norsce ia comensa en la sentenio nove. La fonte prima cual nota la esiste de Island e Gronland apare en un letera papal de 1053. 20 anios plu tarda, los ia es notada en la Gesta de Adam de Bremen. Lo no es asta pos 1130, cuando la isolas ia deveni cristian, ce naras de la istoria de la isolas ia es scriveda de la punto de vista de la abitantes, en sagas e arcivos. La vicinges ia esplora la isolas e costas norde de la Mar Atlantica norde, viaja a sude a Africa norde, e este a Rusia, Bizantion, e Asia ueste. Los ataca e saca, comersia, ata como mersenarios, e crea colonias vastida. Vicinges temprana ia reveni probable a sua paises propre pos sua atacas, ma plu tarda, los ia comensa coloni en otra paises. Vicinges cual ia segue Leif Ericson, la eritor de Eric la roja, ia ateni America Norde e institui colonias tempora en L'Anse aux Meadows en Newfoundland, Canada. Esta estende ia aveni entre la periodo calda medieval.

La estende de la vicinges a Europa continental ia es limitada. Sua rena ia es bordada par cultures potiosa a la sude. Temprana, lo ia es la Sasones, en Sasonia Vea en lo cual es aora Deutxland norde. La sasones ia es un ferose e potiosa popla cual ia disputa comun con la vicinges. Per oposa la agresa de la sasones e per solidi sua propre presentia, la dansce ia construi un fortres multe grande de Danevirce e sirca Hedebi. La vicinges ia atesta pronto la concista violente de la sasones par Carlos la grande, en la Geras Sason de 30 anios (772 - 804). La defeta de la sasones ia resulta en la cristiani forsada de la sasones e la asorbe de Sasonia Vea par la Impero de Carlo.

La teme de la francos ia causa un estende plu de Danevirce, e la construis defendente ia resta usada tra la eda de vicinges e an asta 1864. La costa sude de la Mar Baltica ia es dominada par la obotrites (slavicas norde-ueste), ci es fidosa a la Impero de Carlo. La vicinges - gidada par re Gudfred - ia destrui la site Reric de la obotrites a la costa sude de la Baltica en 808, e ia move la mercatos e comersiores a Hedebi. Esta atas ia securi sua supremia en la Mar Baltica tra la eda de vicinges.

Motivas

Dances a mar atacante England - un imaje de la "Colie de scrives sur la vive de San Edmund

La motivas de la vicinges per sua estende es multe discuteda en la istoria de Scandinavia. Un teoria comun sujesta ce Carlos la grande ia usa forsa e teror per cristiani tota paganes, resultante en batisme e converti o esecuta, e per esta razona, la vicinges e otra paganes ia resiste e ia desira venja.

Un otra esplica es ce la vicinges ia esplota un momento oportun de debilia en la rejiones ensircante. England ia sufri de divides interna e ia es un preda fasil, spesial vidente la prosimia de multe vilas a la mar o a rios navigable. La asentia de oposa organizada a la mares de Europa ueste ia permete ce la barcones de la vicinges viaja libre, atacante o intercambiante cuando la oportunia permeteda. La declina de la profitosia de vias vea de comersia ia pote ave un rol. Comersia entre Europa ueste e la resta de Eurasia ia sufri un colpa grave cuando la Impero Roman ia cade en la sentenio sinco. La estende de Islam en la sentenio sete ia afeta ance la comersia con Europa ueste.

Atacas en Europa no ia es sin presedentes e ia aveni multe anios ante la ariva de la vicinges. La jutes de Danmarc ueste ia invade la Isolas Brites tre sentenios plu temprana ca la vicinges dansce. La sasones e angles ia fa la mesma, de Frisia e Sasonia costal. La atacas par la vicinges ia es, an tal, la primas cual es notada en scrives par atestores, e los ia es multe plu grande e frecuente ca los de edas temprana.

La vicinges mesma ia continua estende se. An si sua motivas no es clar, istoristes crede ce la recursos mancante ia es un fator. Vicinges ia desira la saca de la rica e per deveni un clase dominante. En la prosedes, los sclavi multe e ia vende los ultra la mares. La "via xef de sclavos" ia es un espresa usada per descrive la via cual la vicinges ia trova per un via direta de Scandinavia a Bizantio e Baghdad cuando los viaja a la Mar Baltica. Con the bonis de sua barcones en la sentenio nova, la vicinges ia pote naviga a Rusia e otra partes plu distante.

La fini de la eda de vicinges

Entre la eda de vicinges, omes e femes scandinavian ia viaja a multe partes de Europa e ultra, en un diaspora cultural cual ia afeta paises de Newfoundland a Bizantion. Esta periodo de ativia energiosa ia ave un afeta forte en la paises propre de la scandinavianes, cual ia reseta un varia de influes nova. En la 300 anios de la sentenio 8 tarda, cuando scrivores ia nota prima la apare de atacores vicinge, a la fini de la sentenio 11, Scandinavia ia vide cambias cultural profonda.

A la sentenio 11 tarda, dinastias real cual ia es legalida par la eglesa catolica (cual ia ave no multe importa en Scandinavia 300 anios a ante) ia mostra sua potia con autoria e aspiras cresente, e la tre renas - Danmarc, Noria, e Sveria - ia comensa formi. Sites ia apare cual funsiona como sentros de dirije secular e eglesal con areas comersial, e economias usante mones ofisial ia comensa, fundida sur la modeles engles e deutx. La enflue de arjento islamica de la este ia es asente per plu ca un sentenio, e la enflue de arjento engles ia para en la media de la sentenio 11. Cristianisme ia crese en Danmarc e Noria, con la institui de bispias en la sentenio 11, e la relijio nova ia comensa organiza e espresa se en Sveria. Eglesores stranjer e elites nativa ia es enerjiosa en promove la interesas de cristianisme, e ideas e moda de vive vea ia es cambiante. Ante 1103, la arcibispia prima ia es fundida en Scandinavia, a Lund en Scania, alora parte de Danmarc.

La asorbe de la rena nasente de Scandinavia a en la corente major de cristianisme european ia cambia la aspira de le renores scandinavianes e de scandinavianes ci ia es capas de viaja ultra mar, e ia cambia sua relatas con sua visinas. Un de la fontes xef de profita per la vicinges ia es la prende de sclavos. Car la eglesa medieval ia crede ce cristianes no ta debe posese otra cristianes como sclavos, sclavia ia diminui como un ativia tra Europa norde. Esta ia desmotiva de atacas, an si sclavi nonfrecuente ia continua a la sentenio 11. La preda par Scandinavia en paises cristian sirca la Mar Norde e la Mar Eres ia diminui multe.

La res de Noria ia continua mostra sua potia en partes de Britan norde e Er, e la atacas ia continua a la sentenio 12, ma la aspiras militar de renores scandinavian ia es aora dirijeda plu a vias nova. En 1107, Sigurd un de Noria ia veli a la Mediteraneo este con crusadores per batalia per la rena nova de Jerusalem, e la dansces e svensces ia partisipa enerjiosa en la crusadas baltica de la sentenios 12 e 13.