Impero Bizantian

De Vicipedia
Constantino e Helena
La fende de la Impero Roman, 395 ec
La Impero Bizantian en sua estende masima, su Justiniano la Grande.
La Impero Bizantian, 1180 ec

La Impero Bizantian (ance nomida Impero Roman Este), ia es la continua de la Impero Roman en la este, en la anticia tarda e la eda medieval, cuando sua capital ia es Constantinopoli. Lo ia survive la frati de la Impero Roman e la cade de la Impero Roman Ueste en la sentenio 5 ec, e ia continua sua esiste tra mil plu anios asta sua cade en 1453 contra la osmanianes. En sua esiste, la Impero Bizantian ia es la fortia economial, cultural e militar la plu potiosa de Europa. Ambos "Impero Bizantian" e "Impero Roman Este" es termas creada per istoriografistes, sua sitadanes ia continua refere a sua impero como la Impero Roman (elinica: Βασιλεία τῶν Ῥωμαίων, Basileia tôn Rhōmaiōn; latina: Imperium Romanum), o Romania (Ῥωμανία), e ia nomi se mesma "romanes".

Avenis variosa de la sentenios 4 a 6 ec marca la periodo de cambia, en cuando la Impero Roman ia fende a la Impero Roman Ueste e la Impero Roman Este (o la Impero Bizantian) Constantino 1 (renante 324-337) ia reorganiza la impero, fa ce Constantinopoli ia deveni la site capital nova, e ia legali la relijio cristianisme. Su Teodosio 1 (renante 379-395), cristianisme ia deveni la relijion ofisial de la stato e otra formas de relijio ia es proibida. Final, su la rena de Harclio (renante 610-641), la militaria e governa de la impero ia es restruturida, e la lingua elinica ia es adotada per usa ofisial en loca de latina. Donce, an si la stato Roman ia continua e sua tradisiones ia es mantenida, istoriste moderne distingui Bizantia de Roma antica como lo ia es sentrida a Constantinopoli, orientada a la cultur elinica en loca de lo de latina, e marcada par cristianisme este ortodox.

La bordas de la impero ia evolui sinifiante tra sua esiste, e lo vade ta alga sicles de declina e recovre. En la rena de Justinian 1 (renante 527-565), la impero ia ateni sua estende la plu grande pos la reconcista de multe de la costa de la Mediteraneo istorial roman, incluinte Africa norde, Italia, e Roma mesma, cual Bizantia ia rena per du plu sentenios. La Gera Bizantian-Sasanian de 602-628 ia consuma la recursos de la impero e ia contribui a perdes grande de teritorio en la concista temprana par la muslimes de la sentenio 7, cuando lo ia perde sua provinses la plu rica, Egipte e Suria, a la Califia Arabi. En la dinastia macedonian (sentenios 10 a 11), la impero ia estende denova e ia esperi un renasa macedonian de du sentenios, cual ia fini con la perde de multe de Anatolia a la turces seldjuc pos la Batalia de Manzikert en 1071. Esta batalia ia abri la via per la coloni de Anatolia par la turces.

La impero ia recovre en la restora comnenian, e per la sentenio 12, Constantinopoli ia es la site european la plu grande e la plu rica. Ma lo ia reseta un colpa matante en la crusada 4, cuando Constantinopoli ia es sacada en 1204, e la teritorios cual la impero ia governa ia es divideda entre renas competente de la elinicas e la latinas. An ce Constantinopoli ia recovre ultima en 1261, la Impero Bizantian ia resta sola un de alga statos peti en la area per la du sentenios final de sua esiste. Sua teritorios restante ia es proprida par la osmanianes tra la sentenios 14 e 15. La cade de Constantinopoli a la Impero Osmanian en 1453 fini la Impero Bizantian. La stato final cual ia survive de la impero ia es la Impero de Trebizond peti, cual ta es concistada par la osmanianes oto anios plu tarde en la aseja de Trebizond en 1461.