Mar Norde

De Vicipedia
La Mar Norde, de spasio

La Mar Norde (o Mare Germanicum en latina) es un parte de la Mar Atlantica situada entre Britan, Scandinavia, Deutxland, Nederland, Beljia, e Frans. Lo es supra la plano continental european e juntada a la Mar Atlantica par la Manga en la sude e la Mar Norsce en la norde. Lo es plu ca 970 km en longia e 580 km en largia, con un area de sirca 570,000 km2.

La Mar Norde ia es, per un tempo longa, la loca de vias de comersia maral, e ance un area per pexa comersial sinifiante. Lo es un area popular per recrea e turisme en la paises bordante e es plu resente un fonte rica de recurso de enerjia, incluinte combustables de fosil, enerjia de venta, e enerjia de ondas.

En istoria, la Mar Norde ia jua un rol major en la politica e ativias militar, spesial en Europa norde. Lo ia es la sentro de la potia de la vicinges. Pos los, la Alia de Hansa, Nederland, e Britan ia atenta domina la Mar Norde e donce la entra a la mercatos e recursos de la mundo. Como la sola entra a la mar per Deutxland, la mar ia es importante en Gera Mundal 1, Gera Mundal 2, la Gera Fria, e oji.

La costa de la Mar Norde presente un diversia de cualias jeolojial e jeografial. En la norde, fiordos profunda e falses alta marca la costas de Noria e Scotland. En la sude, la costa es composada xef de plaias arenosa e pantanas larga. Car la area ave un popla densa, industria major, e usa de la mar e tera prosima, la mar ia ave problemes ambiental cual ia afeta la ecosistemes de la mar. Problemes como suprapexa, dejeta industrial e cultival, draga, etc, ia resulta en un cuantia de atentas per preveni la degrada de la mar, an cuando ancora usante la mar per suporta la economia de la area.