Franco

De Vicipedia

La francos ia es un colie de popla germanica, de ci sua nom ia es prima notada en fontes roman de la sentenio tre, e asosiada con la tribus a la Rio Reno basa e media a la borda de la Impero Roman. Plu tarde, la nom es asosiada con la dinastias germanica romanida en la impero colasante, cual ia rena plu tarde la rejion intera entre la rios Loire e Reno, e cual ia domina renas pos-roman e popla germanica, e ultima ia es reconoseda par la Eglesa Roman Catolica como la susedores de la renores antica de la Impero Roman Ueste.

An si la nom franco sola ia apare en la sentenio tre, a min alga de la tribus franco ia es conoseda par sua nomes propre a la romanes, e como alias furninte soldatos e como enemis. La nom nova apare prima cuando la romanes e sua alias ia perde controla de la rejion de la Reno. La francos ia es prima notada como opera con lunlotra per ataca su la romanes de estra sua area frontera, per esemplo par la sasones, e un desira par tribus de la frontera per move a en teritorio roman, con cual los ia ave sentenios de contata prosima.

Poplas franco abitante en la frontera roman ia es la francos de la Reno basa ci, de sua apare prima, ia es permeteda abita en teritorio roman, e la francos de la Reno media ci, pos multe atentas, ultima concista la site roman Colonia (moderne Kohl, Deutxland) a la frontera e ia prende la riva sinistra de la Reno. Plu tarde, en un periodo de desacorda entre fratas en la desenios 450 e 460, Cilderic 1, un franco, ia es un de alga xefes militar comandante fortes roman con asosias variosa etnica en Galia roman (aprosima France moderne). Cilderic e sua fio Clovis 1 ia fasa compete de Aegidius, un xef roman, per la rena de la francos asosiada con la fortes roman de la Loire. Esta nove tipo de reia, posible inspirada par Alaric 1, represente la comensa de la dinastia Merovian, cual ia susede en concista la plu de Galia en la sentenio ses, e ance institui sua xefia sur tota la renas franco sur la frontera de la Reno. Sur esta funda de esta impero Merovian, la carolanes avansante ta deveni ultima la imperores de Europa ueste en 800.

En la eda medieval, la nom "franco" ia comensa es usada como un sinonim per european ueste, car la francos carolan ia es la renores de la plu de Europa ueste, e ia institui un ordina political cual ia es la funda de la rena antica european cual fini sola con la Revolui Franses. Europeanes ueste ia parti sua fida con la Eglesa Roman Catolica e ia labora como alias en la Crusadas estra Europa en la Levante, do los continua refere a se mesma e la prinsias cual los institui com franco. Esta ia resulta ce multe linguas usa derivas de la nom per europeanes ueste.

De la comensa, la renas franco ia es political e legal divideda entre un parte este, cual ia es franco-germanica, e un parte ueste, cual ia es franco-roman. La rena este ia deveni cual on ia nomi la Impero Santa Roman e cual ia es comun refereda como Germania. En la este, los ia continua parla un forma de latina e, asta oji, es comun refereda como Frans - la abitada de la francos.