Gramatica de lingua franca nova

La gramatica de lingua franca nova (elefen) es un simpli de la gramatica comun de alga linguas romanica: catalan, espaniol, franses, italian, e portuges. La resulta sembla la gramatica de la creoles romanica, como aitian, capoverdean, papiamento, e xavacano.

Spele e pronunsia

Alfabetas

Elefen usa la du alfabetas la plu comun conoseda en la mundo: la roman (o latina) e la cirilica.

Roman	a b c d e f g h i j l m n o p r s t u v x z
Roman, major	A B C D E F G H I J L M N O P R S T U V X Z
Cirilica	а б к д е ф г х и ж л м н о п р с т у в ш з
Cirilica, major	А Б К Д Е Ф Г Х И Ж Л М Н О П Р С Т У В Ш З

K, Q, W, e Y no apare en parolas comun. On usa los sola per conserva la formas orijinal de nomes propre e de parolas stranjer. Lo es simil per acel leteras de la alfabeta cirilica cual no es listada.

Ance H no es comun, ma on trova lo en alga termas tecnical e cultural.

Leteras major

On usa un letera major a la comensa de la parola prima en un frase.

On usa un letera major ance a la comensa de un nom propre. Cuando un nom propre conteni plu ca un parola, on dona un letera major a cada parola – ma no a parolas minor como la e de:

Persones	real o imajinada, e ance animales e cosas personida – Maria, San Paulo, Barack Obama, Jan de Hartog, Seniora Braun, Oscar de la Renta, Mickey Mouse
Organizas	pe: companias, asosias – Ikea, Nasiones Unida, Organiza Mundal de Sania
Areas political	pe: nasiones, statos, sites – Frans, Atina, Site de New York, Statos Unida de America
Locas jeografial	pe: rios, mares, lagos, montanias – la Alpes, Rio Amazon, Mar Atlantica
Leteras de la alfabeta	E, N

Ma con titulos de operas de arte e leteratur, on dona un letera major sola a la parola prima de la titulo (e a cualce nomes propre cual apare):

• Un sonia de un note de mediaestate
• La frates Karamazov
• Tocata e fuga en D minor

A veses, como en avertis, on usa leteras major per asentua parolas o frases intera.

Elefen usa leteras minor do alga linguas usa leteras major:

Dias de la semana	lundi, jovedi
Menses	marto, novembre
Festas e avenis simil	natal, ramadan, pascua
Sentenios	la sentenio dudes-un
Linguas e poplas	catalan, xines
Cortis	lfn, pf

Nomes de leteras

On usa la silabas seguente per nomi leteras en parla, per esemplo cuando on spele un parola:

a be ce de e ef ge hax i je ka el em

en o pe qua er es te u ve wa ex ya ze

Estas es nomes, e on pote plurali los: as, bes, efes.

En scrive, on pote presenta simple la letera mesma, en forma major, con -s ajuntada en la plural:

• La parola "matematica" ave tre As, du Ms (pronunsia: emes), e un E.

Vocales

On pronunsia la leteras A, E, I, O, e U como en espaniol o italian:

A	[a]	plata frontal abrida	ambasada
E	[e]	plata frontal medial	estende
I	[i]	plata frontal cluida	ibridi
O	[o]	ronda dorsal medial	odorosa
U	[u]	ronda dorsal cluida	cultur

La sonas de la vocales permete alga varia. Per esemplo, on pote pronunsia A como [ɑ], E como [ɛ] o [ej], e O como [ɔ] o [ow] sin causa malcomprendes.

Diftongos

Normal, cuando un vocal segue un otra, on pronunsia los en du silabas separada. Ma cuando la vocal du es I o U, la du vocales formi un diftongo:

AI	[aj]	pais
AU	[aw]	auto
EU	[ew]	euro
OI	[oj]	seluloide

La ajunta de un prefisa no crea un diftongo: reuni [re-uni], supraindise [supra-indise]. Per razonas simil, du silabas separada es ance normal en alga otra parolas: egoiste [ego-iste], proibi [pro-ibi]. La disionario indica tal parolas, pe: "proibi (o-i)".

La segue EI es rara. Lo es normal pronunsiada como du vocales separada: ateiste [ate-iste], feida [fe-ida], reinventa [re-inventa]. Ma si on trova ce esta pronunsia es difisil, on pote dise [ej] o an [e] en loca.

Cuando I o U presede un otra vocal, on redui lo a un semivocal – [j], [w] – en la casos seguente:

A la comensa de un parola	ioga [jo-ga], ueste [we-ste]
Entre du otra vocales	joia [ʒo-ja], ciui [ki-wi], veia [ve-ja]
CU, GU ante un vocal	acua [a-kwa], cual [kwal], sangue [san-gwe]

En otra casos – pe: emosia, abitual, plia – la I o U resta como un vocal plen. An si esta regulas defini la pronunsia normal per diftongos, on pote iniora los sin confusa.

Consonantes

La leteras seguente es consonantes:

B	[b]	esplodente bilabial con vose	bebe
C	[k]	esplodente velal sin vose	clica
D	[d]	esplodente dental/alveolal con vose	donada
F	[f]	fricante labiodental sin vose	fotografi
G	[g]	esplodente velal con vose	garga
H	[h]	fricante glotal sin vose	haicu
J	[ʒ]	fricante posalveolal con vose	jeolojia
L	[l]	prosiminte ladal dental/alveolal con vose	lingual
M	[m]	nasal bilabial con vose	mesma
N	[n]	nasal dental/alveolal con vose	negante
P	[p]	esplodente bilabial sin vose	paper
R	[r]	vibrante dental/alveolal con vose	rubarbo
S	[s]	fricante dental/alveolal sin vose	sistemes
T	[t]	esplodente dental/alveolal sin vose	tota
V	[v]	fricante labiodental con vose	vivosa
X	[ʃ]	fricante posalveolal sin vose	xuxa
Z	[z]	fricante dental/alveolal con vose	zezea

Nota la puntos seguente:

• C es "dur" (esplodente), e no ave la sona "mol" (fricante) de S.
• F es sin vose, e no ave la sona de V.
• G es "dur" (esplodente), e no ave la sona "mol" (fricante) de J.
• J es [ʒ] como en franses e portuges.
• N ante G o C ave la sona [ŋ] como NG en engles: longa, ance. NG final, como en bumerang, ave ance esta sona: la G es silente.
• R sona vibrante como en espaniol e italian.
• S es sin vose, e no ave la sona de Z.
• V es "mol" (fricante), e no ave la sona "dur" (esplodente) de B.
• X es [ʃ] como SH en engles, SCH en deutx, e CH en franses e portuges.
• Z es con vose, como en engles e franses.

Car alga consonantes es difisil per alga parlores, elefen permete la varias seguente:

J

On pote pronunsia lo ance como DJ [dʒ], como J en la parola engles "judge" o G en la parola italian "gente", si on prefere.

R

Otra sonas de R (como en franses, deutx, o engles) es asetable si los es clar distinguable de la otra sonas de elefen.

X

On pote pronunsia lo ance como TX [tʃ], como CH en la parola engles "church" o la parola espaniol "chico", o como C en la parola italian "ciao", si on prefere.

Z

On pote pronunsia lo ance como TS [ts], si on prefere.

haicu, bahamas

On pote omete la H en pronunsia, si on prefere: [aicu], [ba-amas].

blog, club

Alga parolas internasional fini con consonantes nonusual. On pote ajunta un E a la fini per fasili la pronunsia: [bloge], [klube].

spada, strada

Alga parolas comensa con S segueda par un consonante. Si un parlor trova ce esta es difisil, el pote ajunta un E a la comensa: [espada], [estrada].

gnostica, psicolojia

Alga parolas siensal comensa con combinas nonusual de consonantes, como FT, GN, MN, PS, o PT. On pote omete la consonante prima en pronunsia: [nostika], [sikoloʒia].

Leteras stranjer

Cuando leteras stranjer apare en un parola, los ave normal la pronunsias seguente:

K	[k]	como C
Q	[k]	como C
W	[u] o [w]	como U
Y	[i] o [j]	como I

En la alfabeta cirilica:

Ё	[jo]	como IO
Й	[i] o [j]	como I
Ц	[ts]	como TS
Ч	[tʃ]	como TX
Щ	[ʃtʃ]	como XTX
Ы	[i]	como I
Э	[e]	como E
Ю	[ju]	como IU
Я	[ja]	como IA

Asentua

An si la asentua de silabas no ave un rol multe importante en elefen, asi es alga sujestes cual on pote segue:

Natural, la monosilabas ave un asentua trivial:

• te

Si la parola fini en un consonante o un diftongo, la asentua senta sur la silaba ultima:

• abeon
• cacau

En la plu de otra casos, la asentua es sur la silaba ante la silaba ultima:

• casa
• maio
• produi
• idea
• tio

Si un parola (de plu ca du silabas) fini con ia, ie, io, ua, ue, o uo, la asentua es sur la silaba ultima min du (Nota ce estas es fasil recordada: i/u, segueda par a/e/o):

• varia
• rituo

La plural con -s o -es no altera la asentua orijinal de la parola:

• casas
• tios
• ideas

Nota ce cu e gu ante un vocale es sempre pronunsiada como [kw] e [gw]:

• acua
• segue

En alga casos, elefen pote reteni un asentua trovada en la linguas romanica:

• Alga parolas "peti" ave ance sua asentua a la silaba final: ala, asi, agu, aha, ami, enemi, axi, axu, ura, cafe, perce;
• Parolas composada ave la asentua a la parola xef: parario, suvia, tretia, diseno, etc.
• Alga parolas cual fini con -u, per esemplo, ave la asentua a la silaba final: bambu, barbecu, cacatu, cangaru, cazu, didjiridu, manitu, marabu, menu, ragu, tabu, tiramisu, xampu;

Denova: lfn no usa la asentua per distingui parolas, e on debe usa no asentua (como en japanes), un asentua minimal (como en franses e rusce), o an un asentua a la silaba prima (como en txesce).

Elefen no es un lingua tonal. An tal, per indica ce un frase es un demanda, un modo posible es fini con un tono asendente:

• Tu parla portuges? – con un tono asendente en la parola final
• Tu no parla portuges. – con un tono nivel o desendente

Fonotatica

La formas de parolas comun en elefen es constrinjeda par alga regulas.

Du esemplos de la mesma vocal (como aa) no pote sta a lado de lunlotra, estra cuando esta es la resulta de ajunta un prefisa: "re-envia", "co-opera". En esta casos, on pronunsia ambos vocales.

La segue ei es normal trovada sola en parolas cual ave un prefisa cual fini con e (como pre-istoria e re-incarne) e en parolas cual ave un sufisa cual comensa con i (como fe-in e ve-ida). La pronunsia normal de ei es como du vocales separada, ma on pote dise [ej] o [e] si on prefere.

Cuando un sufisa ta crea un mal segue de vocales, on sutrae la vocal du de la segue:

• comedia + -iste  >  (comediiste)  >  comediste

A la comensa de un silaba, on permete sola la grupos seguente de consonantes:

• pr-, br-, pl-, bl-, tr-, dr-
• cr-, gr-, cl-, gl-,
• sl-, sr-, sp-, st-, sc-
• fr-, fl-, sf-, pt-, ps-
• spr-, str-, scr-, spl-, scl-

A la fini de un silaba, on permete sola la consonantes seguente, e un vocal debe sta direta ante los:

• -f, -s, -x
• -m, -n, -l, -r

Un grupo de consonantes en la media de un parola es bon si on pote divide lo entre du bon silabas:

• encontrante = en-con-tran-te
• mostrablia = mos-tra-bli-a
• instinto = in-stin-to

Esta regulas no aplica a la nomes propre, e a alga parolas tecnical, internasional, e cultural.

Frases

La plu frases en elefen conteni un sintagma verbin cual indica comun la aveni de un ata. Un sintagma verbin es composada de un verbo e cualce elementos cual descrive lo, como averbos e sintagmas de preposada.

La plu frases conteni ance a la min un sintagma nomin, cual indica comun un person o un cosa. Un sintagma nomin es composada de un nom e cualce elementos cual descrive lo, como determinantes, ajetivos, e sintagmas de preposada.

La du sintagmas nomin la plu importante es los con la rol de sujeto e ojeto. Se sinifias esata depende de la verbo elejeda, ma on pote dise laxe ce la sujeto es la person o cosa cual fa la ata, e la ojeto es la person o cosa direta tocada par la ata.

En elefen, la sujeto presede e la ojeto segue sempre la verbo:

• La gato (sujeto) xasa (verbo) la scural (ojeto).
• La xica (sujeto) gusta (verbo) la musica (ojeto).
• La can (sujeto) dormi (verbo).

En alga casos, per stilo o clari, on vole pone la ojeto de la verbo a la comensa de la frase. En esta casos, la ojeto debe es segueda par un virgula, e un pronom per la ojeto es usada pos la verbo:

• la gatos, me no gusta los.

La plu verbos nesesa un sujeto, ma multe no nesesa un ojeto.

Un otra composante comun de frases es la completinte. Esta es un descrive ajuntada de la sujeto, e el pote segue verbos como es, deveni, pare, e resta:

• Computadores (sujeto) es (verbo) macinas (completinte).
• La aira (sujeto) pare (verbo) umida (completinte).
• La comeda (sujeto) deveni (verbo) fria (completinte).
• La patatas (sujeto) ia resta (verbo) calda (completinte).
• Nosa taxe (sujeto) es (verbo) reconstrui la mur (completinte: un frase suordinada).
• La idea (sujeto) es (verbo) ce tu canta (completinte: un frase suordinada).

Alga linguas permete ce ance la ojeto ave un completinte, como en *"los ia eleje el presidente". Esta spesie de completinte no esiste en elefen.

Un otra composante major de frases es la sintagma de preposada. El ajunta un detalia a un nom o verbo presedente, o a la frase intera:

• La om (sujeto) ia cade (verbo) tra sua seja (sintagma de preposada).
• En la note (sintagma de preposada), la stelas (sujeto) apare (verbo).
• Me (sujeto) dona (verbo) esta poma (ojeto) a tu (sintagma de preposada).
• Tu (sujeto) no aspeta (verbo) como tua foto (sintagma de preposada).

En ajunta a sintagmas, alga frases conteni proposas, cual sembla frases minor situada en la frase major. Los pote descrive sintagmas nomin, sintagmas verbin, o la intera de la frase major:

• La om ci ia abita asi ia vade a Nu Iorc.
• El va visita en julio, cuando la clima es bon.
• On no ia permete me fa la cosas como me ia desira.
• Me pensa ce el es bela.

Nomes

Comun, on introdui un nom (o sustantivo) con determinantes, e pote segue lo con ajetivos e sintagmas de preposada, per produi un sintagma nomin. Nomes tipal indica ojetos fisical como persones, locas, e cosas – ma nomes pote indica ance consetas plu astrata cual condui simil en gramatica.

On nom es la plu clar indicada par un determinante, spesial par la, un, o la -s o -es de pluralia. Un preposada indica ance ce un nom segue, an sin un determinante.

Plural

On ajunta -s a un nom per plurali lo. Si la nom singular fini con un consonante, on ajunta -es en loca. La sufisa plural no cambia la asentua de la parola:

• gato, gatos
• om, omes

Un ajetivo cual descrive un nom no cambia cuando la nom es plural. Ma cuando on usa un ajetivo como un nom, on pote plurali lo:

• la bones, la males, e la feas
• multe belas

Alga nomes cual es plural en alga linguas es singular en elefen:

• El regarda un sisor con un binoculo.
• On usa un bretela per suporta sua pantalon.
• Me ia compra esta oculo de sol en Nederland.

Nomes contable e noncontable

Como multe linguas, elefen distingui nomes contable e noncontable. Un nom contable pote es descriveda con un numero, e pote aseta la -s pluralinte. La nomes contable la plu tipal representa ojetos cual es clar cosas individua, como casas, gatos, e pensas. Per esemplo:

• un auto; la autos; cuatro autos
• un gato; multe gatos; un milion gatos

En contrasta, nomes noncontable (nomida "nomes de masa" a veses) no aseta jeneral la -s pluralinte. La nomes noncontable la plu tipal indica masas cual no ave individuas clar, como licuidas (acua, jus), polvos (zucar, arena), sustantias (metal, lenio), o cualias astrata (belia, lentia). Cuando on descrive los con un parola de cuantia, on ajunta frecuente un unia de mesura per claria. Per esemplo:

• la acua; alga acua; tre tases de acua
• lenio; multe lenio; du pesos de lenio

An tal, on pote usa nomes noncontable en un modo contable. Los indica alora esemplos o casos individua:

• Du cafes, per favore.
• Me ia proba multe cesos.
• On no pote compara la belias de Paris e Venezia.

Seso

Normal, nomes no indica sua seso. Per distingui la sesos, on usa la ajetivos mas e fema:

• un cavalo mas
• un cavalo fema

Ma en alga parolas per relatadas de familia, on distingui la femas con -a e la mases con -o:

• ava, avo
• fia, fio
• neta, neto
• sobrina, sobrino
• sposa, sposo
• tia, tio
• xica, xico
• cusina, cusino

On pote ance eleje usa formas "neutra" de alga de estas:

• avi
• fie
• nete
• sobrin
• spos
• tie
• xice
• cusin

On ave ance alga duples cual usa parolas diferente per la du sesos:

• dama, cavalero
• diva, dio
• fem, om
• madre, padre
• rea, re
• seniora, senior
• sore, frate

Estas ave formas "neutra" unica:

• nobil
• divin
• person
• jenitor
• renor
• sri
• conaseda

La sufisa rara -esa formi la varias fema de alga roles sosial en istoria:

• abade, abadesa
• baron, baronesa
• conte, contesa
• duxe, duxesa
• imperor, imperoresa
• marci, marcesa
• prinse, prinsesa
• tsar, tsaresa

Sintagmas nomin

Un sintagma nomin conteni un nom e sua descrives: determinantes, cual presede la nom, e ajetivos e sintagmas de preposada, cual segue lo.

La du sintagmas nomin la plu importante en un frase es la sujeto e la ojeto. La sujeto presede la verbo, e la ojeto segue la verbo. Otra sintagmas nomin es usual introduida par preposadas per clari sua rol.

Un sintagma nomin nesesa normal un determinante – cisa sola -s, la sufisa pluralinte. Ma esta regula no aplica a nomes propre, a la nomes de dias de semana, menses, e linguas, e a nomes noncontable:

• Desembre es calda en Australia.
• Nederlandes es me lingua orijinal.
• Me gusta pan.

On laxi frecuente la regula ance cuando un sintagma nomin segue un preposada, spesial en espresas fisada:

• El es la comandor de polisia.
• Me no gusta come bur de aracide.
• Nos vade a scola.
• Acel es un problem sin solve en matematica.
• Un virgula pare nesesada per claria.

Un ajetivo o determinante pote es descriveda par un averbo presedente. Car averbos aspeta como ajetivos, on separa normal plu ca un ajetivo con virgulas o e. En parla, la ritmo de la frase clari la difere:

• Sola un poma multe putrida ia resta.
• Me ia encontra un fem bela intelijente.
• Me ia encontra un fem bela, joven, e intelijente.

A veses, un nom es sola un simbol per cualce membro de sua clase. En tal casos, lo no es multe importante esce on usa la o un, o esce la nom es plural o singular:

• La arpa es un strumento musical.
• Un arpa es un strumento musical.
• Arpas es strumentos musical.

Un pronom es un caso spesial de un sintagma nomin. Normal, on no pote ajunta un descrive a un pronom.

Aposa

On dise ce du sintagmas nomin es en aposa cuando la un segue direta la otra, e ambos refere a la mesma person o cosa. En la plu casos, la sintagma du identifia la person o cosa:

• la rio Amazon
• la mar Pasifica
• la isola Skye
• la Universia Harvard
• la Funda Ford
• Re George 5
• San Jacobo major
• Piotr la grande
• me ami Simon
• la parola "inverno"
• la libro La prinse peti
• un arbor eucalipto

Acronimes e leteras simple pote segue direta un nom per descrive lo:

• La disionario es ance disponable como un fix PDF.
• El ia porta un camisa T blu de escota V.

A alga veses, du nomes conveni egal a un cosa o person. En esta casos, la nomes es juntada par un ifen:

• un produor-diretor
• un primador-scanador

En tota casos, la plural -s o -es es ajuntada a ambos nomes:

• la statos membros
• produores-diretores

Un caso spesial pertine a la verbo nomi:

• Nos ia nomi el Orion.
• Me nomi esta forma un obelisce.

Determinantes

Un determinante es un parola cual descrive un nom per espresa la refere de la nom, incluinte sua identia e cuantia. Con eseta de la sufisa pluralinte -s (cual on regarda como un determinante en elefen), la determinantes presede sempre la nom.

On ave clases variosa de determinante. Esemplos tipal de cada clase es: tota, la, esta, cual, cada, mea, multe, otra.

Predeterminantes

Tota indica la cuantia completa de la cosa indicada par la nom, cual debe es plural si lo es contable. Diferente de cada, tota refere a la cosa intera, no a la individuas separada cual composa lo:

• Tota linguas es asurda.
• Me va ama tu per tota tempo.
• La lete ia vade a tota locas.

On pote usa ambos en loca de tota cuando on sabe ce la cuantia completa es sola du. La nom debe es plural:

• Ambos gamas es debil.

Semantical, tota e ambos no difere de la determinantes de cuantia, ma on trata los como un clase separada par causa de sua sintatica: los presede tota otra determinantes en un sintagma de nom, incluinte la.

On pote usa los ance como pronomes.

Articles

Elefen ave du articles – la article de defini (la), e la article de nondefini (un). Asi, "defini" sinifia ce la cosa indicada par la nom es "ja conoseda", e donce ce lo no es un cosa nova.

La introdui un nom cual indica un person o cosa de cual la escutor es ja consensa. On usa lo en esta spesies de situa:

On ia refere ja a la cosa:

• Me ia compra un casa. La casa es peti.

La escutor pote divina fasil ce la cosa esiste:

• Me ia compra un casa. La cosina es grande.

La resta de la frase spesifa sufisinte bon la cosa:

• El ia perde la numeros de telefon de sua amis.

La escutor pote persepi direta la cosa:

• La musica es bela, no?

La cosa es bon conoseda a cadun. Esta inclui campos de studia e nomes consetal:

• La luna es multe distante de la tera.
• Me no comprende la matematica.
• El ama la cafe.
• La felisia es plu importante ca la ricia.

Un introdui un nom singular cual refere a un person o cosa cual la escutor no conose ja. On no usa lo con nomes plural o noncontable. (Lo servi ance como un determinante de cuantia.)

• Me vole leje un libro.
• Un gato ia veni en la sala.

Alga linguas ave un otra article per indica un cuantia nondefinida de un nom noncontable. Elefen usa la, o no article:

• Me gusta la cafe.
• Me gusta cafe.
• Me bevi cafe.

Determinantes de mostra

La determinantes de mostra dirije a la cosa indicada par la nom. Los loca lo en tempo o spasio, o en la testo mesma.

Esta es simil a la, ma lo dirije a un cosa cual es prosima a la parlor, o fisical o metafor:

• Me posese esta casa.
• Esta libros es merveliosa.
• Me gusta esta cafe.
• Esta mense ia es difisil.
• Esta frase conteni sinco parolas.

Acel es ance simil a la, ma lo dirije a un cosa cual es distante de la parlor, o a la min plu distante ca esta:

• Acel xico regarda acel xicas.
• Atenta denova en acel modo.
• Acel torta es noncomable.

On pote converti esta e acel a pronomes.

Determinantes de demanda

La determinantes de demanda es un modo de crea demandas.

Cual fa un demanda de identia o spesie:

• Cual animal es acel?
• Cual vejetales es la plu bon?
• Tu veni de cual pais?
• Cual fenetras es rompeda?
• Cual pinta tu prefere?

Cuanto fa un demanda de cuantia, o contable o noncontable:

• Cuanto casas es en tua strada?
• Cuanto pan tu pote come?

On usa cual e cuanto ance como pronomes.

Determinantes de eleje

La determinantes de eleje indica alga individuas entre otras:

• cada
• cualce
• alga
• no

Cada es simil a "tota", ma lo considera la cosas como individuas, la un pos la otra. La nom debe es contable ma singular:

• Cada can ave un nom.
• Me no ia leje cada parola.
• Tu fa la mesma era a cada ves.

Cualce indica ce lo no es importante cual on eleje: cada es egal bon. La nom es normal contable:

• Prende cualce carta.
• Cualce contenadores va sufisi.

Alga indica ce la identia de la cosa indicada es nonspesifada:

• Me ia leje acel en alga libro.
• Cisa me va reveni a alga dia.
• Alga cosa es rompeda.

Cuando on usa alga con un nom noncontable, o un nom contable e plural, lo indica ce no sola la identia es nonspesifada, ma la cuantia ance. On comprende jeneral ce la cuantia nonspesifada es relativa peti – si no, on ta dise multe – ma no tan estrema peti como con poca:

• Me va leje alga libros.
• Alga polvo ia cade de la sofito.
• El ave alga pan en sua sesto.

No indica la manca de la cosa indicada par la nom:

• Me ave no arbores en me jardin.
• Tu va senti no dole.
• No arbor es plu alta ca la tore Eiffel.
• Me ia encontra no person en la parce.

Sola sinifia ce no otras (o no otra cosa) esiste o pertine:

• El es la sola dotor en la vila.
• Estas es la sola du parolas cual nos no comprende.
• Me va destrui la mur con un sola colpa.

Esta determinantes, estra no e sola, pote es usada como pronomes. Los formi ance la pronomes spesial cadun, cualcun, algun, e nun, cual refere a persones. Per refere a cosas, on ajunta simple la parola cosa pos la determinantes.

Determinantes de posese

La determinantes de posese es mea, tua, nosa, e vosa:

• Mea gato ia come un mus.
• Me gusta multe tua dansa.
• Nosa ecipo va gania la premio.

On pote ance indica la posese con un sintagma como de me:

• Acel es la casa de tu.

La determinante de posese per la person tre es sua, egal per tota la pronomes el, lo, los, on, e se:

• La ipopotamo abri sua boca. (refletante)
• Nos regarda sua dentes. (nonrefletante)

Determinantes de cuantia

La determinantes de cuantia aida ce on espresa la cuantia de la cosa indicada par la nom:

• -s (sufisa pluralinte)
• un
• du, tre, cuatro...
• multe
• poca
• plu
• la plu
• min
• la min

La sufisa pluralinte -s es la plu fundal entre la determinantes de cuantia. Un sintagma nomin cual inclui un nom plural no nesesa un otra determinante:

• Me va leje libros.
• Me va leje la libros.

Un es no sola la article de nondefini, ma ance un numero. Lo indica un esemplo solitar de la cosa indicada par la nom. Donce la nom debe es contable ma singular:

• Me ave un frate e du sores.

Simil, la otra numeros cardinal – du, tre, cuatro, etc – es ance determinantes de cuantia.

• Me ave tre gatos obesa.
• Me ave cuatro plu anios ca mea frate.

Multe indica un cuantia grande, o contable o noncontable, de la cosa indicada par la nom:

• Esta casa ia sta asi per multe anios.
• La pijones come multe pan.

Poca es la antonim de multe. Lo indica un cuantia peti, o contable o noncontable:

• Me reconose poca persones. (vera no multe)
• El pote dona poca aida. (vera no multe)
• Compara: Me pote leje alga parolas. (un cuantia nonspesifada e peti, ma plu ca sola poca)

Plu indica un cuantia plu grande de la cosa indicada. On pote usa lo con nomes plural e nomes noncontable. La plu indica la majoria, un cuantia plu grande ca tota otras:

• Tu ave plu libros ca me.
• La plu linguas es bela.
• Plu pan es en la cosina.
• La plu fango es repulsante.

Min es la antonim de plu. Lo indica un cuantia plu peti, e on pote usa lo con nomes plural e nomes noncontable. La min indica la minoria, un cuantia plu peti ca tota otras:

• Me desira min vejetales ca el.
• Tu ia leje la min libros de cualcun ci me conose.
• El ave min interesa a cada dia.

Con eseta de no, on pote converti tota determinantes de cuantia a pronomes.

Determinantes de similia

Cuatro otra determinantes pertine a la consetas de similia e difere:

La mesma indica ce no difere importante esiste entre la cosa indicada par la nom e un otra cosa. La du es tan simil ce on no pote distingui los. Normal, on debe usa la ante mesma, ma on pote usa ance esta o acel:

• Tu porta la mesma calsetas como me.
• La gera ia comensa en la mesma anio.
• Nos va reveni a esta mesma tema pos un semana.

Otra indica ce la cosa indicada par la nom no es la mesma – un difere esiste, o lo es un esemplo nova:

• Nos ave aora esta tre otra problemes.
• La otra solve ia es plu bon.
• Tu ave otra pan?

Tal sinifia de esta spesie o de acel spesie:

• Me construi un macina de tempo.
  • Tal cosas es nonposible.
• Me xerca un abeor.
  • Me no conose un tal person.
• Tu vole jua futbal con nos?
  • Me prefere evita tal eserse.
• Tu ave plu libros como estas?
  • Si, me ave du otra tal libros.

Propre asentua la pertine de la cosa indicada par la nom a sua posesor. Lo es spesial usosa pos la determinante sua per clari ce la sinifia es refletante, pd: la cosa indicada parteni a la sujeto de la frase:

• Mea propre idea es an plu strana.
• El ia trova la xarpe de sua sposo e ia pone lo sirca sua propre colo.

Ordina de determinantes

La determinantes segue un ordina normal:

• La predeterminantes tota e ambos, si los es presente, presede tota otras.
• Alora on pone un article, un determinante de mostra, un determinante de demanda, un determinante de eleje, o un determinante de posese. On ave normal no plu ca un tal determinante en un sintagma nomin.
• Pos esta, on pote trova un o plu determinantes de cuantia o determinantes de similia.
• La ajetivos bon e mal, an si los mesma no es determinantes, presede usual la nom, seguente cualce determinantes.

Per esemplo:

• El ia colie sua poca posesedas e parti.
• Nos no ia tradui ancora acel otra cuatro frases.
• Tota la omes ia vade a la costa.

Pronomes

Un pronom es un parola cual sustitui per un sintagma nomin plu longa.

Pronomes de person

• me – la person ci parla
• tu – la person a ci on parla
• el – alga otra person
• lo – un cosa
• nos – me e tu, o me e vos, o me e el, o me e lo, o me e los
• vos – la persones a ci on parla
• los – alga otra persones o cosas

Tu es singular e vos es plural en tota situas, e formal e casual.

El es usada per refere a persones, e a animales como mamales e avias. On pote estende metafor la usa a otra viventes, robotes, la luna, tempestas, etc.

Lo es usada per refere a cosas, viventes simple, ideas, consetas, etc.

Los es usada como la plural de ambos el e lo.

Elefen no distingui la seso de el. Nomes propre, e sintagmas corta como la om, la fem, la xica, e la xico, es bon alternativas per pronomes cual indica la seso. (Alga parlores usa elo e ela, parolas nonofisial, per refere a un person mas e un person fema cuando ambos es presente en la situa.)

• Do es Joana? El / La xica es en la jardin.
• Do es me come de matina? Lo es en la cosina.

On pote segue un pronom de person con un suproposa ajetivin. Si la sinifia resta clar, on pote omete la pronom de person e lasa ce la pronom-sujunta fa un labora duple:

• El recorda sempre la nomes de los ci el ia encontra.
• Me respeta tu, ci es tan saja.
• El ci osa, gania.
• Ci osa, gania.

On es un pronom jeneral e nondefinida, como "on" en franses o "man" en deutx. Lo sinifia "persones jeneral" o "un person acaso e ipotesal". Lo evita frecuente la nesesa de un verbo pasiva:

• On dise ce tu va parti.
• On debe repete la verbo. (la verbo debe es repeteda)

Se es la pronom refletante per la person tre, e singular e plural. Lo refere a la sujeto de la verbo corente, ma lo mesma es nunca la sujeto.

• El limpi se.
• Los lava se.

La pronomes de posese es la determinantes de posese, presededa par la:

• Me ia trova me libros, ma tu no ia trova la tuas.
• Lo es ance plu grande ca la mea.
• No toca acel jueta! Lo no es la tua.

Pronomes determinante

Esata como on pote converti un ajetivo a un nom, on pote converti la plu de la determinantes a pronomes. La pronomes esta, acel, e otra aseta sempre la -s pluralinte. On pote ajunta -s ance a alga otra pronomes, si esta clari la sinifia.

• tota, totas
• ambos
• esta, estas
• acel, aceles
• cualce, cualces
• cada
• alga, algas
• cual
• multe, multes
• poca, pocas
• plu
• la plu
• min
• la min
• un/la otra, otras
• la mesma
• un tal

Esemplos:

• Estas aspeta bela!
• Prende cualce. (eleje un de la posibles)
• Me no vole judi, car me gusta egal cada.
• Me vole grasia cada de esta persones.
• Alga(s) pensa ancora ce la mundo es plata. (alga persones)
• Tu ia versa mal la vino. Alga es sur la table.
• Multe(s) de nos es programores.
• Me no ia regarda multe(s) de acel filmas.
• Me reconose poca(s) de la persones en la fola.
• Plu va ariva pronto.
• Alga parolas es clar, ma on no pote leje fasil la plu. (la plu parolas)
• Tu ave min ca me.
• Me vole bonveni tota(s) de vos.
• Me ia compra sinco libros nova, ma me ia lasa tota(s) en la bus. (tota libros)
• Ambos de la enfantes jua felis.

On pote usa la numeros cardinal como pronomes cual indica grupos de la grandia spesifada. Esta pronomes no aseta normal la -s pluralinte, e los no nesesa determinantes:

• Tre de mea amis va ariva a esta sera.
• Cuanto pizas tu ia come?
  • Cuatro!
• La cuatro de nos va come en junta.
• Un de mea gatos manca.
• La tre ia abita en la mesma aparte.

Per indica multiples nonesata de numeros como sento, mil, o milion, on ajunta la -s pluralinte:

• On ia vide miles de persones a la conserta.
• A cada anio, miliones migra a otra paises.
• On ia vacui miles de plu persones de locas inondada par la deluvias.
• On pote fatura plu sentos per servi.

On no pote converti la a un pronom. On usa el, lo, o los en loca:

• La casa de me padre es plu grande ca lo de me frate.
• Lo es ance plu grande ca lo cual me intende compra.

On no pote usa no como un pronom, ma lo jenera nun e no cosa. On pote usa ance la numero zero como un pronom.

La idiom la un la otra sinifia ce du persones o cosas ata mutua a se. Lo ave varias como la un o la otra, la un pos la otra, e la un sur la otra:

• La xicos colpa la un la otra. – (cada xico colpa un – o plu – otra xico)
• Me pila me crepes la un sur la otra. – (me pone un crepe sur un otra, cisa a plu ca un ves)

En alga frases, un pronom es direta segueda par un verbo e pote es malcomprendeda como un determinante segueda par un verbo reusada como un nom. Per esemplo, sin contesto, on no pote sabe serta esce acel veni de Italia sinifia la veni de Italia o lo veni de Italia. En la plu de casos, la intende es intera evidentida par la situa. Ma si on es un comensor en elefen, o on desira evita es malcomprendeda, on pote pone un nom simple – como person o cosa – pos la determinante en loca de converti lo a un pronom:

• Acel cosa veni de Italia.
• Recorda ce alga persones (o algas) abita en sua auto.

En alga casos, on vole clari ce la nom verbal no es un verbo. Con parolas como alga, multe, e poca, on pote ajunta de entre la determinante e la nom; la determinante deveni alora un pronom, ma la nom no deveni un verbo. Con otra determinantes, como esta e acel, on pote usa la ante la determinante:

• La profesor ia demanda alga de atende.
• Multe de labora pote es evitada.
• La esta deside no es un bon resulta.

Pronomes de demanda

Elefen ave du pronomes cual on usa per crea demandas direta:

• cual? (= cual cosa?)
• ci? (= cual person?)

Ci es sola un pronom, e on debe no usa lo como un determinante.

Cual es fundal un determinante, ma on usa comun lo ance como un pronom, si on aseta la risca rara de malcomprende de espresas como cual veni de Italia.

Esemplos:

• Cual tu gusta?
• Cual tu prefere, la rojas o la verdes?
• Ci vole es un milionor?
• Tu vade a la sinema con ci?
• Cual es en la caxa?
• Vos prefere cual?

On usa ci e cual ance en demandas reportada.

Pronomes-sujuntas

Cual e ci servi ance como pronomes-sujuntas, per introdui suproposas ajetivin:

• cual
• ci (= la person cual...)

La pronom-sujunta per un person o animal es ci. La pronom-sujunta per otra cosas es cual:

• Esta es la fem de ci me ia compra mea auto.
• La fem de ci me ia oblida sua nom es denova a la porte.
• A, vide la patetas ci segue sua madre!
• La libro cual me leje es tro longa.
• La casa en cual nos abita es tro peti.
• La superstisios – me gusta esta parola! – cual me ia investiga es riable.
• El esperia un sonia cual el teme. – El teme un sonia, e alora el esperia esta sonia.
• Compara: El esperia un sonia ce el teme. – El esperia un sonia, e en la sonia el ave un teme.

Con alga suproposas ajetivin, la frase xef omete la nom cual la proposa descrive. La pronom-sujunta mesma apare en loca de acel nom. Alora, on pote usa lo cual en loca de cual e el ci en loca de ci si on vole evita confusa:

• Acel es lo cual me ia comprende. – Me ia comprende acel informa.
• Me comprende lo sur cual on ia instrui me. – On ia instrui me sur alga cosa, e me comprende lo.
• Me no recorda (el) ci me ia vide. – Me ia vide el, ma me no recorda el.
• Me no recorda (el) a ci me ia parla. – Me ia parla a el, ma me no recorda el.

Otra pronomes

On ave cuatro pronomes spesial cual refere a persones. On usa los sola a modo singular:

• algun (= alga un, alga person)
• cualcun (= cualce un, cualce person)
• cadun (= cada un, cada person)
• nun (= no un, no person)

Esemplos:

• Algun entre nos es la asasinor.
• Dise acel broma a cualcun, e el va rie.
• Cadun debe reseta un premio.
• Me senta en la atrio per un ora, e nun ia parla a me.

La corespondentes de algun, cualcun, cadun, e nun per cosas es alga cosa, cualce cosa, cada cosa, e no cosa.

sintagmas pronomin

Normal, on no descrive pronomes con determinantes o ajetivos, ma on pote descrive los con sintagmas de preposada:

• Nos en la sindicato esije plu diretos.
• Tota de la lenio es danada.
• La plu de esta linguas es difisil.

Ajetivos

Un ajetivo es un parola cual altera la sinifia de un nom. Un ajetivo tipal indica un cualia de la person o cosa cual la nom indica.

En elefen, ajetivos no cambia per indica la cuantia o la seso.

Loca

La plu ajetivos segue la nom cual los descrive. Ma bon e mal presede normal la nom, estra cuando los mesma ave descrives:

• un bon can
• un can plu bon (descriveda par plu)
• la mal enfante
• un mal can bon instruida
• bon enfantes mal comprendeda

En la plu de casos, on pote ajunta plu ca un ajetivo pos la nom sin causa confusa. Ma en alga casos, un de la ajetivos pote ance es comprendeda como un averbo cual altera la sinifia de la ajetivo seguente. On pote pone e entre la ajetivos per evade la confusa:

• la nara vera longa (vera = averbo)
• la nara vera e longa (vera = ajetivo)
• la om grande, forte, e stupida (tre ajetivos)

En alga casos, on pote pone un ajetivo ante la nom: per stilo en poesias o naras, o cuando on ave du ajetivos con pesas simil:

• la peti casa bela
• un fea arbor vea

La ajetivos la plu conveninte per esta usa es la plu simples e cortas, como bela, fea, nova, vea, grande, e peti.

Compara

On formi ajetivos comparativa par ajunta la averbos plu e min. La preposada en un tal compara es ca:

• La cosina es plu calda ca la jardin.
• Esta leto es min comfortosa ca me ia previde.

On formi ajetivos superlativa par ajunta la averbos la plu e la min:

• La sol es la ojeto la plu calda en la sistem solal.
• El ia ave un fia la plu bela en la mundo. (la plu bela de tota fias en la mundo)

On pote combina numeros ordinal con la construi superlativa:

• Vega es la stela sinco la plu briliante en la sielo de note. (cuatro otra stelas es plu briliante ca lo)
• El ia deveni la om tre de la plu ricas en la mundo.

Comparas de egalia usa la combina tan... como...:

• La arbor ia es tan alta como un casa.
• On es tan joven como on senti.

Ajetivos como nomes

On pote reusa cualce ajetivo, sin cambia, como un nom per un person o cosa cual ave la cualia de acel ajetivo. La nom resultante obedi la regulas normal per nomes – lo aseta -s cuando plural, lo nesesa un determinante, e on pote an descrive lo con ajetivos:

• Esta anelo es perfeta sirculo. Lo es un sirculo perfeta.
• Marilyn es un blonde, e seniores prefere blondes.

Averbos

Esata como ajetivos es parolas cual descrive nomes, averbos es parolas cual descrive cuasi cualce otra cosa, per esemplo verbos, ajetivos, otra averbos, determinantes, preposadas, sintagmas de nom, e an frases completa. Usual, averbos informa sur locas, tempos, situas, causas, maneras, o grados.

Loca

En elefen, averbos e ajetivos ave la mesma forma. On clari la difere par la loca: ajetivos segue nomes; averbos segue verbos e presede otra parolas:

• La om ia studia atendosa la testo. (un averbo descrive un verbo)
• Me ia veni asi en un tren riable lenta. (un averbo descrive un ajetivo)
• La tren ia move asurda lenta. (un averbo descrive un otra)
• Me no oia multe bon tu. ("multe" descrive "bon", e "multe bon" descrive "oia")
• Cuasi sento persones ia espeta sur la plataforma. (un averbo descrive un determinante de cuantia)
• On ia escava un buco direta ante me porte. (un averbo descrive un preposada)
• Sola la manico es rompeda. (un averbo descrive un sintagma de nom)
• Strana, el ia porta un balde de pexes. (un averbo descrive un frase)

Un averbo (o sintagma averbin) cual descrive un verbo (o la frase completa) pote apare ance a la comensa de la frase. E si esta no causa confusa, on pote pone un averbo ance a la fini de la frase. Averbos es ance poneda pos la ojeto de la verbo, spesial si la ojeto es un pronom:

• El dansa bon.
• Pronto el va cade.
• Surprendente, el es un xico multe bon.
• Me leje felis la libro.
• Me leje lo felis.
• El regarda la fem frecuente pos vide el ier.

En alga casos, un averbo ante un ajetivo pote es liada par un ifen per clari la sinifia:

• la parolas nova-creada

On pote ance clari un sinifia averbal par dise en modo o a grado:

• La melodia es bela en modo surprendente.

Compara

On compara averbos esata como on compara ajetivos.

Averbos fundal

En ajunta a la cuantia vasta de averbos derivada de ajetivos, elefen ave alga parolas cual es sola averbos:

• cisa (posible)
• cuasi (prosiminte)
• tan (a un tal grado)
• tro (plu ca nesesada)
• asi (a esta loca)
• ala (a acel loca)
• an (contra la previdable)
• ance (en ajunta)
• ancora (continuante)
• aora (a esta tempo)
• alora (a acel tempo)
• donce (como un resulta lojical)
• ja (aveninte ante aora)
• nunca (a no tempo)
• sempre (a tota tempo)
• pronto (a un tempo prosima)
• ier (a la dia ante esta)
• oji (a esta dia)
• doman (a la dia pos esta)

Tan es usada en esclamas:

• Un vista tan bela!
• Tan stonante!

Averbos de cuantia

On pote converti alga determinantes de cuantia a averbos, per indica grados de veria.

• no
• alga
• multe
• poca
• plu
• min
• la plu
• la min

No como un averbo sinifia "a no grado". Lo nega la cosa cual lo descrive. En un caso spesial, cuando lo descrive un verbo, lo presede la verbo:

• Los no va comprende.
• Nos ave no sola un orania, ma ance du bananas.
• O, no esta problem denova!

Alga como un averbo sinifia "a alga grado":

• Acel es un caso alga spesial.
• Alga confusada, el ia cade en la lago.

Multe como un averbo sinifia "vera", "estrema", "a un grado alta", "en un cuantia grande":

• Me es multe coler.
• El ama multe la femes.

Poca como un averbo sinifia "no multe", "a un grado sola basa", "en un cuantia sola peti":

• Me es poca interesada.
• El core poca.

Plu e min como averbos sinifia "a un grado plu alta", "en un cuantia plu grande", "per un tempo plu longa", e "a un grado plu basa", "en un cuantia plu peti":

• Tu aspeta plu joven ca me.
• No parla plu.
• Me es min contente con la resulta ca me ta prefere.

La plu e la min como averbos sinifia "a la grado masima", "en la cuantia masima", e "a la grado minima", "en la cuantia minima":

• "Pardona" es la parola la plu difisil.
• El es la om la min interesante en la mundo.
• A la min, nos ave ancora la un la otra.

Averbos de demanda

On pote usa la averbos seguente en maneras diversa:

• cuando
• do
• como
• cuanto
• perce

Los crea demandas direta e reportada, e los introdui suproposas ajetivin. Par estende de sua usa en suproposas ajetivin, los condui ance como sujuntas per introdui suproposas averbin – cuando, per esemplo, es alora un corti de a la tempo cuando. On pote introdui los ance con preposadas.

Cuando sinifia "a cual tempo", "en cual tempo":

• Cuando nos va come?
• La enfante demanda cuando nos va come.
• En la anio cuando me ia nase, la clima ia es multe calda.
• Cuando nos ariva, me va dormi.
• Nos va canta ante cuando nos dansa. (canta ante dansa)
• Nos va dansa pos cuando nos canta. (dansa pos canta)
• Nos va dansa asta cuando nos adormi.

Do sinifia "a cual loca", "en cual loca". Cuando on usa lo con un verbo de move, do sinifia comun "a do", "en dirije a cual loca":

• Do es la can?
• Me no sabe do nos vade.
• En la pais do me ia nase, la clima es multe calda.
• El ia dormi do el sta.
• Me veni de do tu ia visita me.
• La polisior ia desinia un sirculo sirca do el ia trova la clave.

Como sinifia "en cual modo". Lo condui ance como un preposada cual sinifia "simil a" o "per esemplo":

• Como tu conose mea nom?
• Me no comprende como tu conose mea nom.
• La manera como tu pasea es riable.
• Me parla como me pensa.
• La descrive ia difere multe de como la loca aspeta vera.
• Tua oios es como los de un falcon.

Cuanto sinifia "en cual cuantia". Lo opera ance como un determinante de cuantia con la mesma sinifia:

• Cuanto la orolojo custa?
• Cuanto tu ia compra?
• Cuanto tu desira esta torta?
• Me va demanda cuanto ia ariva.
• Nos va aida cuanto nos pote.
• Tu sabe cuanto me ama tu?

Perce sinifia "par cual causa", "per cual razona", "con cual intende"). La sujuntas corespondente es car ("per la causa ce", "per la razona ce") e afin ("con la intende ce"). On usa sempre la parola spesial perce, no per cual:

• Perce tu core?
• La fem ia demanda perce la fenetra es rompeda.

Verbos

Un verbo tipal indica la aveni o la sesa de un ata (core, para), un relata (ave, perde), o un state (sta, fonde). En elefen, verbos no cambia per indica cosas como tempo o moda. En loca, on usa averbos – spesial la tre preverbos ia, va, e ta. On pote usa cada verbo sin cambia como un nom.

Tempo

Article xef: Preverbo

La tempo futur es indicada par va (un parola de orijina franses). La tempo pasada (incluinte la pasada e presente perfeta) es indicada par ia (de xavacano). Estas es averbos spesial cual presede la verbo. On no marca la tempo presente:

• Me canta.
• Me va canta.
• Me ia canta.

Naras descrive comun avenis en la pasada, un pasada imajinada, o un tempo cual no importa a la lejor. En esta casos, on pote lasa ia cade.

Elefen no distingui entre la modas perfeta e nonperfeta de la verbo. Ma on pote clari la segue de tempo de du atas par marca la ata plu temprana con ja:

• Cuando tu ia encontra nos, nos ia come ja.
• Si tu reveni doman, me va fini ja la labora.
• Sempre cuando me ateni la fini de un capitol, me oblida ja la titulo.

Elefen ave otra metodos per clari la segue tempal:

• Me ia come ante aora.
• Me ia come plu temprana.
• Me ia fini come.
• Me va come pronto.
• Me comensa come.
• Me va come pos acel.
• Me va come plu tarda.
• Me ia abitua come en la note.
• Me ia come abitual en la note.

Elefen ave ance ta, un parola elejable (de orijina en creol aitian), cual indica un moda nonreal, per esemplo cuando un situa es imajinal, dutada, desirada, o sola posible. Un frase con ta parla sur un mundo alternativa. En un tal frase con si, on inclui ta en la proposa xef, ma on omete normal lo en la proposa de si – ma sua inclui no es proibida. Ta pote sujesta un futur min probable ca lo de va. On pote ance usa ta per indica un demanda cortes o per "moli" parolas como vole, pote, e debe. On usa lo en situas variosa do multe linguas usa un moda dependente o sujuntiva:

• Si me ta rena la mundo, cada dia ta es la dia prima de primavera.
• Si lo no esiste, on ta debe inventa lo.
• Si tu canta, me va escuta.
• Si tu va canta, me va escuta.
• Si tu canta, me ta escuta.
• Si tu ta canta, me ta escuta.
• Me duta ce tu ta dise acel.
• Tu ta dona la sal, per favore?

Jeneral, on pote usa sola un de va, ia, e ta con un verbo. Un eseta es ia ta, cual sinifia lo cual la linguas romanica indica par la moda dependente en la pasada, e lo cual engles indica par "would have". Un esemplo es un declara divertinte par Richard Nixon:

• Me ia ta es un bon re. – "I would have made a good king."

Cuando on reporta la parla, on reteni la tempo de la dise orijinal:

• El ia dise ce la sala es fria. = El ia dise: "Oji, la sala es fria."
• El ia demanda esce la sala es fria. = El ia demanda: "Esce la sala es fria?"
• El ia pensa ce la sala ia es fria. = El ia pensa: "Ier, la sala ia es fria."

Comandas

On no marca la forma de verbos per un comanda. Lo difere de la tempo presente sola par la asentia de la sujeto. La sujeto ta es normal tu o vos – la person o persones a cual on dona la comanda. On usa ta ce si on nesesa inclui la sujeto:

• Para!
• Pardona me.
• Toca la tecla de spasio per continua.
• Vade a via, per favore!
• Ta ce tua rena veni!
• Ta ce nos dansa!

Negas

On nega un verbo con la averbo no, cual presede e la preverbos e la verbo:

• Me no labora oji, e me no va labora doman.
• El no ia pensa ce algun es asi.
• No traversa la strada sin regarda.

Partisipios

Un partisipio es un verbo usada como un ajetivo o averbo. On crea un partisipio ativa par ajunta -nte a la verbo, e un partisipio pasiva par ajunta -da a la verbo. Estas es ajetivos, ma los es egal bon usable como averbos o nomes. La partisipio ativa implica un ata continuante, e la partisipio pasiva sujesta ce la ata aveni en la pasada:

• Un ruido asustante ia veni de la armario. (ajetivo)
• La om creante scultas es amirable. (ajetivo; = la om ci crea scultas)
• El ia sta tremante en la porte. (averbo)
• Nos ia colie tota de la composantes. (nom)
• Per favore, no senta sur la seja rompeda. (ajetivo)
• El ia cade embarasada tra la seja. (averbo)
• Sua novela va es un bonvendeda. (nom)

La partisipio ativa pote ave un ojeto. Ance, lo pote es usada como un completinte de la verbo es per indica la moda continuante:

• Me es lenta asorbente la informa.
• Me no ia disturba tu, car tu ia es laborante.

Ma un construi con un partisipio es frecuente nonesesada. On ave otra metodos per espresa esta sinifia:

• Me asorbe lenta la informa.
• Vade a via: me labora.
• Me continua come.
• Me come continual.
• Me come tra la dia intera.

On pote usa la partisipio pasiva como la completinte de la verbos es o deveni, per produi un sinifia pasiva. On pote inclui par si on vole indica la sujeto orijinal:

• Esta sala ia es pintida par un bufon.
• La sala deveni pintida.
• Acel ponte ia es desiniada par un injenior famosa.
• Lo ia deveni conoseda ce el ia es un om perilosa.

Comun, on usa on o algun como la sujeto de un frase ativa en loca de un frase pasiva:

• On pinti la sala.
• On no conose cuanto persones teme aranias.
• Algun ia come lo.

La partisipio ativa de es es esente:

• Esente un bufon, el ia senta sur la seja rompeda.

Transitivia

Un verbo transitiva es un verbo cual pote es direta segueda par un nom (un ojeto), sin un preposada interveninte. Un verbo nontransitiva no ave un ojeto. Per esemplo:

• Me senta. (senta es nontransitiva)
• La patatas coce. (coce es nontransitiva)
• El usa un computador. (usa es transitiva)
• Los come bananas. (come es transitiva)

Transitivia es ajustable en elefen. Per esemplo, si on ajunta un ojeto pos un verbo nontransitiva, la verbo deveni transitiva. La ojeto coresponde semantical a la sujeto nontransitiva, e la verbo sinifia aora "causa ce (la ojeto) ...":

• Me senta la enfantes. (= Me causa ce la enfantes senta)
• Me coce la patatas. (= Me causa ce la patatas coce)

On pote omete la ojeto de un verbo transitiva si lo es ja evidente par la situa o la contesto:

• El canta un melodia. > El canta. (= El canta alga cosa)

Cuando la ojeto e la sujeto de un verbo es la mesma cosa, on pote usa un pronom refletante per la ojeto:

• Me senta me. (= Me deveni sentante)
• La porte abri se. (= La porte abri – ma con asentua ce lo pare ce nun abri lo; lo pare ce lo abri se mesma)

E on pote clari ce on usa un verbo en un modo transitiva par usa espresas con fa o causa:

• Me fa ce la enfantes senta. (= Me senta la enfantes)
• Me causa ce la fango adere a mea botas. (= Me adere la fango a me botas)

En alga linguas, la ojeto de un verbo transitiva pote ave un completinte. Elefen usa otra construis en loca:

• Los ia eleje el a presidente. (preposada de state resultante)
• Me ia pinti la casa a blanca. (preposada de state resultante)
• Me ia fa ce el es felis. (proposa nomin)
• El ia dise ce me es stupida. (proposa nomin)

La eseta unica es la verbo nomi. On regarda esta como un esemplo de aposa.

• La esplorores ia nomi la rio la Amazon. (= los ia dona la nom "la Amazon" a la rio)

Verbos con sujetos pupetin

Cada verbo finitiva en elefen ave un sujeto, an si lo es no plu ca un teniloca.

En alga linguas, on omete la sujetos de verbos cual refere a la clima o a la ambiente jeneral. En elefen, on usa lo:

• Lo neva.
• Lo va pluve.
• Lo es tro calda en esta sala.
• Lo es bon.

Un otra caso es cuando la sujeto vera es la proposa nomin cual segue la verbo. Car acel es posponeda, on usa lo como un sujeto pupetin:

• Lo pare ce tu es coreta.
• Lo es importante ce me no oblida esta.

Simil, con la verbo es, cuando la sujeto es un pronom (tipal el, lo, o los) segueda par un proposa ajetivin, on pote move la sujeto a la fini de la frase e usa lo como un pupetin:

• Lo es me ci ama Maria. = El ci ama Maria es me.
• Lo es Maria ci me ama. = El ci me ama es Maria.
• Lo es la bal blu cual me ia perde. = Lo cual me ia perde es la bal blu. = La bal blu es lo cual me ia perde.

On usa on ave per indica ce alga cosa esiste o es presente:

• On ave un serpente en la rua.
• On no ave pexes en esta lago.
• On ave multe persones asi oji.

Verbos como nomes

Elefen ave du modos per usa verbos como nomes: la infinitiva e la nom verbal. Ambos usa la verbo sin altera. La infinitiva no aseta un sujeto o indicante de tempo o modo, ma lo pote ave averbos e un ojeto. Normal, lo segue un otra verbo o un preposada. La nom verbal es un nom vera, e es presededa par la o un otra determinante. Lo pote ave ajetivos, ma on debe usa un preposada (frecuente de) si on vole inclui la ojeto.

Un usa de la infinitiva es como la ojeto de un otra verbo. En elefen, esta formi lo cual on nomi un cadena de verbos. La sujeto de la verbo prima debe es ance la sujeto de la verbo du, e la ojeto es poneda pos la verbo du. Pos la verbo prima, on pote inclui averbos cual altera acel verbo, e la parola no per nega la verbo du:

• Me espera ariva ante tua parti.
• Me ia gusta multe escuta oji mea musica.
• On pote nunca spele coreta mea nom.
• El teme no velia en la matina.

En ajunta a opera como la ojeto de un otra verbo, un verbo pote apare pos un preposada. Esta verbo pote aseta ancora no ante se, e averbos e un ojeto pos lo:

• Me viaja per vide la mundo.
• El ia mori pos nomi sua seguor.
• El ia abri la noza par colpa lo forte con un martel.
• On no pote pasea tra la mundo sin lasa impresas de pede.

Un nom verbal ave ance la mesma forma como la verbo, ma lo debe es presededa par la o un otra determinante, o debe es plural. La nom sinifia o un aveni de la ata de la verbo o sua resulta direta:

• Sua condui ia es vera xocante.
• La valsa e la samba es dansas.
• Esta va es un ajunta bela a la ragu.
• Me ia prepara du traduis de la testo.
• "Lfn" es un corti de "Lingua Franca Nova".
• La universo ia es estrema peti a la momento de sua crea.

Con un verbo como ajunta, la difere entre un ajunta e un ajuntada es minimal. Ma la traduida es la testo orijinal de cual on jenera la tradui, e un crea es un ata cual produi la creada. Esta segue de la sinifias de la ojetos de la verbos mesma: -da refere sempre a la ojeto. Con crea, la ojeto es ance la resulta de la ata; ma con tradui, la ojeto e la resulta es du cosas diferente. Con un pico de verbos, per esemplo dansa, do la ojeto e la ata es la mesma cosa, on parla de un dansa, no un dansada.

Un infinitiva usada como la sujeto de un frase pote es fasil confusada con un comanda. On pote evita esta confusa par cambia la verbo a un nom verbal par ajunta la o otra determinante ante la verbo, o par usa la plural:

• La nada es un bon eserse.
• La scrive de un bon libro es multe difisil.
• Eras es umana, pardonas es divin.

Preposadas

Un preposada introdui un sintagma de nom, e formi un sintagma de preposada. Tipal, un sintagma de preposada descrive un nom, pronom, ajetivo, o averbo presedente – o lo pote descrive un frase intera. La preposada indica como la sintagma de nom relata a la strutur cual conteni lo: lo mostra la rol cual lo ave en la descrive.

Elefen ave 22 preposadas:

A

A introdui un loca o tempo cual on regarda como un punto simple, o como un spasio o periodo jeneral, iniorante sua strutur interna:

• Nos senta a la table.
• Me va encontra tu a la crus de vias.
• La scala apoia a la mur.
• Tua casa es a lado de mea casa.
• El reposa a casa.
• Sudan es a sude de Misre.
• La barco es a mar.
• El ia fini la labora a la comensa de la anio.
• A medianote, on va vide focos de arte.
• Me debe parti a la ora des-ses.

On usa lo ance per introdui un punto de refere en un relata:

• Tu sta tro prosima a la borda.
• La forma de Italia es simil a un gama.
• Esta pen parteni a me.
• Cual aveni si on no conforma a la regulas?
• A la min tredes persones espeta.

Lo espresa ance la move en dirije a un punto. Esta inclui moves metafor, como envias a resetores e cambias a states nova:

• Me viaja a New York.
• Pone tua libros a via.
• El leva sua oios a la sielo.
• El ia dona un oso a la can.
• La sorsor ia cambia se a un capra.
• La seja ia cade a pesos.
• La xico ia ajunta sua nom a la lista.
• Dise a me tua nom.
• Me no va responde a acel demanda.
• Nos desira a tu un bon aniversario.
• Tua idea pare asurda a me.
• Me pasea longo la strada, de un fini a la otra.
• Tu irita me de tempo a tempo.
• La note progresa a la lus prima.
• De lundi a jovedi es cuatro dias.

En fato, cualce preposada cual indica un loca pote indica ance un move a esta loca. Per esemplo, en en me pone mea libros en mea saco indica evidente un move a la loca en me saco. Si on desira es plu clar en esta casos, on pote pone a ante la preposada:

• Core a la casa.
• Core en la casa.
• Core a en la casa.
• La gato salta sur la table.
• La gato salta a sur la table.

Un usa spesial de a es ante un otra preposada, per crea un averbo. Si la preposada refere a un loca, la combina sujesta un move en la dirije indicada. A ante e a pos es ance usada per refere a tempos plu temprana o plu tarda:

• La can core a ante.
• Tu pote pone tua saco a supra.
• La sumerjor ia vade a su.
• Vide a su.
• Me ia visita esta vila a ante.
• Nos pote reveni a pos.

Un otra usa spesial de a es per ajunta un completinte a la ojeto de un frase. (En alga casos, otra preposadas pote opera en la mesma modo.)

• El ia pinti sua casa a blanca.
• Me va servi la gambas a/en fria.
• Los ia eleje Maria a/per presidente.

La completinte pote es un infinitiva. On pote usa per en loca de "a", ma alora la sinifia es ce la sujeto de la verbo xef intende fa la ata de la infinitiva. A indica ce la sujeto intende ce la ojeto fa lo:

• El comanda la soldatos a ataca la fortres.
• Me va instrui vos a parla la lingua.

Ante

En spasio, ante indica un loca a la lado plu importante de un cosa spesifada. Cual lado es plu importante depende de la cosa e sua situa. Multe cosas ave un lado evidente fronte con cual los fasa la mundo; en otra casos, ante sinifia simple "a la lado plu prosima de". Sua antonim es pos:

• Mea peto es ante mea dorso.
• La jornales es ante la libros.
• Lo es tan oscur ce me no pote vide mea mano ante mea oios.
• Un can reposa ante la boteca.
• Nos ave multe labora ante nos.

En tempo, ante indica un punto cual presede un tempo spesifada:

• Janero veni ante febrero.
• Los intende fini la labora ante la reposa de sol.
• Verje a sinistra ante la fini de la strada.
• Nos esperia la lampo ante la tona.

Ante pote indica ance un move en dirije a la lado plu importante de un cosa (= a ante):

• On ia pone un monton de libros ante me.
• Me veni ante tu per demanda per tua pardona.

Ante cuando es un junta cual sinifia "ante la tempo cuando":

• Nos vide la lampo ante cuando nos oia la tona.

La antonim de ante es pos.

Asta

Asta indica un move cual fini a un loca o ojeta spesifada:

• El ia acompania me asta mea auto.
• La tera es covreda con neva asta la montania.
• Me es empapada asta mea pel.
• La preso ia cade asta sola un euro.
• El ia visita cada pais de Andora asta Zambia.
• Studia pajes dudes-sinco asta cuatrodes-du.

Esta gida a un sinifia tempal, en cual asta indica la tempo a cual un ata fini:

• El labora asta medianote.
• Espeta asta la estate.
• Asta doman!

Ca

Ca indica un punto de refere per un compara de nonegalia:

• Mea can es plu intelijente ca me.
• Acel es multe min interesante ca esta.
• La sielo e tera ave cosas plu ca tu imajina en tua filosofia.

Como

Como indica la punto de refere per un compara de egalia:

• El rie como un iena.
• Tua cor es dur como petra.
• Iogurte es como crema.
• Tu ia veni a la mesma conclui como me.
• Me pote salta tan alta como tu.
• Condui como un adulte.

Con

Con introdui un person, cosa, o state cual acompania. La antonim es sin:

• Me vide la xica con sua padre.
• Los vole come con nos.
• Nos bevi cafe con lete.
• On ia misca la zucar con sal.
• Los batalia con la elementos.
• No multe parolas comensa con X.
• El ia dona a me un libro con multe fotos.
• Elena es un xica con capeles roja.
• La om vea senta con un pipa en sua boca.
• Sua sposa regarda el con stona.
• Compara esta con la clima de ier.
• Tota cambia con la pasa de tempo.
• A cada dia, me leva con la sol.
• E con acel parolas, el ia desapare.

Con pote ance sinifia "par la usa de", ante un cosa cual on usa como un util:

• Me scrive con un pen.
• Nos oia con nosa oreas.
• La cavalo colpa con sua pede.
• El ia compra un casa con la mone cual el ia erita.

Cuando un ata aveni par la usa de alga cosa plu astrata o min simil a un util, on prefere par.

An con introdui un cosa cual fali impedi un ata, contra la espeta:

• Nos va fali an con tu aida.

Contra

Contra introdui un cosa cual fasa o move en la dirije oposante, en realia o en un modo metafor:

• Clui tua oios contra la lus.
• Esta camera es secur contra acua.
• La elinicas antica ia batalia contra Parsa.
• La scala es contra la sepe.
• El lisca e cade contra la mur.
• Nada contra la flue es difisil.
• Me es contra la gera.
• Tu ia ata contra mea desiras.

De

De presenta un cosa o loca como un orijina:

• Me es de New York.
• Me viaja de Paris a London.
• La paperes ia cade de la fenetra.
• Me ia reseta un letera de la re.
• La furor asconde sua fas de la cameras.
• La acua difere de la asida par sua cimica.
• La resulta depende de la metodo usada.
• Nos labora ja de la lus prima.
• Multe anios ia pasa de la gera.
• La table es fada de lenio.
• Tu gusta carne de oveta?

Par un estende metafor, de introdui un posesor – un person o cosa a cual alga cosa parteni:

• Acel es la auto de mea frate.
• Me gusta escuta la canta de la avias.
• El ia es impresada par la cuietia de la foresta.
• Dona un peso de torta a me, per favore.

Plu astrata, de indica frecuente un relata jeneral entre du cosas, o entre un cualia o ata e un cosa:

• Me ave tre caxas de libros per vende.
• El ia presta a me un tela de un color fea.
• La tore ave cuatro metres de altia.
• Esta balde es plen de pexes.
• Nos vole es libre de vos.
• La ora ia veni per parla de multe cosas.

Nomes composada en alga otra linguas es comun espresada par du nomes juntada par de en elefen:

• Mea oculo de sol es rompeda.
• La gavota es un avia de mar.
• Esta va es tua sala de dormi.
• Tu ia oblida aplica la freno de mano.
• Per sua come de matina, el bevi sola cafe.
• El es la campion de mundo de tenis de table.

De es la parte du en alga espresas fisada cual opera como preposadas complicada:

• Los ia ajunta tota ingredientes con eseta de la sal.
• Los ia usa zucar en loca de sal.
• Me es tarda par causa de un conjesta de trafica.
• La campaneria es a destra de la catedral.

On pote pone de ante un otra preposada per indica un move cual parti de un loca:

• La gato salta de sur la seja.
• Un arania rampe de pos la orolojo.
• La pasaros asende de entre la arbores.

Como a, de pote cambia un preposada a un averbo. La averbo sinifia "de la loca o tempo en la dirije indicada a via de la cosa sujestada par la situa":

• La monstro ia veni de su.
• La gidor ia cria de ante, ma me no ia pote oia.

De cuando es un junta cual sinifia "de la tempo cuando":

• De cuando me ia es un enfante, me desira sta sur la luna.

En

En indica un loca en spasio o tempo cual es intera o partal contenida par un otra cosa. Sua antonim es estra:

• Mea cor es en mea peto.
• La sol es en la sielo.
• Nos espeta en la auto.
• La plantas es en vasos.
• Sua ditos es fisada en la manico de un tas.
• Me ave alga pensas en mea mente.
• Gatos no gusta es en acua.
• Nos no vide la stelas en la dia.
• Beethoven ia nase en 1770.
• Nos ia visita la museo en febrero.
• El ia scrive la libro en tre semanas.

Metafor, la loca pote es un state, un ativia, o un modo:

• Me no vole viaja en esta clima.
• La construida es en foco.
• Nos es en peril.
• Esce nos es en acorda?
• En ajunta, me vide un problem nova.
• En fato, me vide du problemes.
• Nos ia pasa un ora en conversa.
• La enfantes senta en un sirculo.
• Me va repete esta en elinica.
• La presos es en euros.

En pote indica ance un move a la interna de un cosa (= a en):

• El ia cade en la rio.
• Pone la dejeto en la baldon.
• Un bon idea ia veni en sua testa.
• Me ia tradui la article en franses.
• Nos pasa en un eda nova.

En cuando sinifia "a un punto en la tempo cuando":

• Lo ia comensa pluve forte en cuando la reportor ia parla.

Entre

Entre sinifia ce un loca o tempo es ensircada par du o plu otras:

• Mea testa es entre mea oreas.
• La table es entre la seja e la mur.
• Txesco es entre Deutxland, Osteraic, Slovenia, e Polsca.
• El viaja entre Paris e Madrid a cada semana.
• Tu es entre amis asi.
• La bal ia cade entre la flores.
• Cual es la difere entre un mur e un sepe?
• Elefen promove comunica entre poplas.
• On va ave un interval de des minutos entre la du atas.
• El ia nase entre la geras.
• Me velia usual entre sete e oto.
• On debe paia entre des e dudes euros.

Estra

Estra indica un loca cual no es contenida par alga otra cosa. Sua antonim es en:

• Mea sapato es estra mea calseta.
• El abita estra la site.
• On no ave aira estra la barcon.
• Tu es aora estra peril.
• No telefoni estra la oras de labora.

Estra pote indica ance un move a un tal loca (= a estra):

• La enfantes core estra la casa.

Como un metafor, estra pote sinifia "esetante", "con eseta de":

• El recorda no cosa estra sua nom.

Longo

Longo indica la via cual alga cosa segue cuando lo move:

• Me pasea longo la strada.
• La balsa ia flota longo la rio.
• La xico lisca longo la ramo.
• Un arania rampe longo mea gama.

Par estende, lo pote ance sinifia "seguente la opina de" cuando on refere a lo cual algun ia dise o scrive:

• Longo la predise, oji va es an plu calda.
• La viaja tra tempo es posible, longo esta fisiciste.

Par

Par indica la ator de un verbo pasiva, o la faor de un obra:

• El ia es colpada par un bal de neva.
• Me es surprendeda par tua reata.
• Suiz es ensircada par otra paises.
• Hamlet es un teatral par Shakespeare.

Par estende, lo indica ance un ata o metodo per fa un cosa:

• Me ia viaja asi par tren.
• Roberto es mea fio par sposi.
• La botelas es codigida par color.
• Nos ia descovre tua secretas par nos spiores.
• La prisonida ia evade par desembla se como un porte.
• Me va destrui la sepe par sola un colpa de pede.
• On no pote solve esta problem par negosia.

Cuando on converti un verbo transitiva a un nom, e la sujeto e ojeto de la verbo es de spesie simil (per esemplo, ambos es persones), on usa par per indica la sujeto e de o a per indica la ojeto:

• La ama par la madre. – La madre ama.
• La ama de/a la madre. – On ama la madre.
• La ataca de la troianes par la elinicas. – La elinicas ataca la troianes.

Per

Per introdui un gol o resetor intendeda:

• Nos labora per mone.
• Tases es usada per bevi.
• Me viaja per vide la mundo.
• Tu es vestida per un sera de dansa.
• Me va vade a la botecas per tu.
• El ia scrive la libro per sua madre.
• La viaja va es perilosa per tu.
• Me batalia per mea vive.
• Per esta razona, me no pote parla longa.
• Per esemplo, considera la balena.

Par estende, lo indica ance un cosa cual on intercambia per un otra:

• Tu ia paia tro per acel computador.
• Me ia compra lo per mil euros.
• Grasias per tua carta postal.

Lo pote indica un periodo de tempo intendeda:

• Nos vade a Colorado per un semana.
• Me no va retarda tu per plu ca un minuto.

Como un caso spesial, per pote introdui un cosa cual on favore, o cual on representa en parla:

• Me ia vota per la proposa, ma tu ia vota contra lo.
• Car tu no ia es ala, me ia parla per tu.

Pos

En spasio, pos indica un loca a la lado min importante de un ojeto spesifada. Sua antonim es ante:

• Mea dorso es pos mea peto.
• La aparatos es pos un porte securida.
• La xicos turbosa ia asconde pos la cabana.

En tempo, pos indica un punto cual segue un tempo spesifada:

• Desembre veni pos novembre.
• Los va comensa bevi pos la reposa de sol.
• Verje a destra pos la eglesa.
• Me va reveni pos tre dias.

Pos pote indica ance un move a un punto a la lado min importante (= a pos):

• La serpente ia desapare pos la arbor.

Pos cuando es un junta cual sinifia "pos la tempo cuando":

• Nos oia la tona pos cuando nos vide la lampo.

Sin

Sin indica un cosa cual es asente:

• Tua sposa gusta sua cafe sin lete.
• Me ia pasea tra la pluve sin parapluve.
• On ave no fuma sin foco.
• Me va decora la casa intera sin aida.
• Tu es tota sin compatia.
• El ia adormi sin intende.
• La rexercor ia sorti sin descovre la responde.
• La depinta ia cade sin causa evidente.

Sirca

Sirca introdui un cosa cual es ensircada o encluida par alga otra cosa:

• La campores fa cantas sirca la foco.
• Mea mano es cluida sirca mea diton.
• Edera crese sirca la tronco.
• On ave pinta verde sirca la fenetras.

Lo pote indica ance un move longo un via ensircante:

• La luna vade sirca la tera, e la tera vade sirca la sol.
• Nos intende viaja sirca la mundo par cavalo.
• El vaga sirca la jardin e ole la flores.

En espresas de tempo o cuantia, sirca indica ce la valua no es esata, e ce la valua vera es a alga punto en la estende ensircante:

• Me ave sirca sincodes anios.
• Me pote pensa a sirca sento razonas per no revela mea eda.
• La conserta ia comensa sirca dui pos dudes.
• Sirca la lus prima, me ia oia tua can abaiante.

Su

Su indica un loca cual es plu basa ca un otra, fisical o metafor:

• La neva craci su mea pedes.
• La solo es su la sofito.
• Antilopes ia reposa su la arbores.
• On ave un table de sanduixes su la fenetra.
• Tu pare su la influe de la vino.
• Me no pote labora su tua regulas.

Par estende, su pote indica ance cualce loca cual es fisical covreda par alga cosa, o vera plu basa o no:

• La color vera de la sofito es apena vidable su esta pinta fea.
• Me ave un paceta su mea braso.
• El ia porta un sueter su sua jaca.

Su pote indica ance un move a un tal loca (= a su):

• La acua ia vade su la mobilas.

Supra

Supra indica un loca cual es plu alta ca un otra, fisical o metafor:

• La nubes es supra mea testa.
• La teto es supra la sofito.
• El ia apoia supra la table per ateni la sal.
• Un tempesta enorme developa supra la mar.

Supra implica un spasio entre la du cosas. Si no spasio esiste, on usa sur en loca.

Par estende, supra pote indica ance cualce cosa cual covre fisical alga otra cosa, o vera plu alta o no:

• La montania lansa un ombra supra nosa casa.
• El ia porta un covretota supra sua otra vestes.

Supra pote indica ance un move a un loca plu alta (= a supra):

• La sol leva supra la tera.

Sur

Sur indica un loca a la surfas de un cosa, o tenida ala par gravita, o fisada a lo par un otra modo:

• Mea xapo es sur mea testa.
• No senta sur la seja rompeda.
• Si on sta sur la balcon, on vide la mar.
• La asfalto sur la strada fonde en la caldia.
• Esce la vive esiste sur Marte?
• Me va pende esta depinta sur la mur.
• La om ia besa la fem sur sua jena.

Sur pote indica ance un move a un tal loca (= a sur):

• Pone tua cartas sur la table.
• Un roca cual cade sur la tera es nomida un meteorite.
• El ia pone un dital sur sua dito.

Como un metafor, sur sinifia "consernante", "a la tema de":

• La teatral es sur la gera.
• Me ia leje multe libros sur la tema.
• La xica plora sur sua popa perdeda.

Tra

Tra indica un loca en cual un move aveni, pasante de un lado a la otra:

• Acua flue tra la tubos.
• La enfantes ia core tra la vileta.
• La pluve ia trova un via tra mea saco.
• La tren vade de Milano a Roma tra Bologna.
• Un rueta gida tra la campos a la lago.
• Me regarda la stelas tra la fenetra abrida.
• Los ia resta juntada tra la anios.
• El ia senta en un sejon tra la note.
• On ia oia la esplode tra la site.

Ultra

Ultra indica un loca a la otra lado de alga cosa:

• La scola es ultra la eglesa.
• Ultra la ponte es un vista merveliosa.
• Esta taxe es ultra mea capasia.

Lo pote indica ance un move a un tal loca (= a ultra):

• La esplorores ia viaja ultra la montanias.
• Los ia remi un barceta ultra la lago.

Juntas

Un junta es un parola cual lia du cosas la un a la otra. On ave du spesies: conjuntas e sujuntas.

Conjuntas

Un conjunta lia du composantes de la mesma spesie, per produi un composante plu grande de acel spesie. Per esemplo, du sintagmas nomin juntada par e produi un sintagma nomin plu grande.

Elefen ave cuatro conjuntas:

• e (ambos composantes es egal pertinente)
• o (un de la composantes pertine; posible ambos pertine)
• no (la composante prima pertine; la composante du no pertine)
• ma (ambos composantes pertine, ma los contrasta la un con la otra)

Esemplos:

• La om e la fem vade a la casa.
• Tu es multe vea e saja. (probable multe saja, car si no, la frase ta es tu es saja e multe vea)
• El ia labora ante e pos sua vacanse.
• Sua aniversario es en marto o april.
• Tu desira cafe o te?
• On pote visita la museo a lundi o jovedi. (= o ambos)
• On ia eleje tu, no me.
• Me ia conta no sola la oveas ma ance la capras.

Con listas de plu ca du cosas, un virgula sustitui per la conjunta, ma no entre la du cosas final. Frecuente en tal listas, on inclui ance un virgula ante la conjunta:

• Nos va viaja tra Italia, Suiz, Osteraic, e Deutxland.

Per asentua, on pote dupli e, o, e no, e pone ance un de los ante la composante prima. Un o duple elimina la posablia ce ambos composantes es pertinente:

• e... e
• o... o
• no... no

Esemplos:

• E Luis e Maria vade a scola.
• O tu o me gania, ma no ambos.
• Me ave no la tempo no la desira per leje plu.

E, o, e ma pote ance lia du proposas o frases:

• Me ia vade a la biblioteca, e tu ia visita la museo.
• O nos solve esta problem, o la mundo va fini.
• Ma acel es difisil.

La averbos donce e alora es ance usada en esta modo, como cortis de e donce e e alora:

• Me pensa, donce me esiste.
• Nos no ave un mapa, donce nos es perdeda.
• Me fini mea come, alora me lava la platos.

Sujuntas

Un sujunta lia un suproposa a la proposa major, per indica la rol de acel suproposa en la frase.

On ave tre spesies: la pronomes-sujuntas, la averbos-sujuntas, e la sujuntas spesial.

Pronomes-sujuntas

La pronomes de demanda cual e ci pote funsiona ance como sujuntas per introdui suproposas ajetivin:

• La om ci ia abita asi ia vade a New York.
• La poma cual ia cade de mea saco es aora noncomable.
• La fem de ci nos parla labora a mea ofisia.
• Tua libro, en cual me ia scrive sua nom, es sur la table.

Los refere normal a un nom presedente. A veses, on omete acel nom. Alora, on pote ajunta un pronom per clari la intende:

• Esta es lo cual parteni a tu.
• La auto blu es lo en cual nos vole viaja.
• Acel es el ci me ia vide.
• Tu es el a ci me ia parla ier.
• Ci osa, gania.

La usa de cual e ci en demandas reportada es multe simil.

Averbos-sujuntas

La averbos de demanda – do, cuando, cuanto, como, e perce – pote funsiona como sujuntas per introdui suproposas averbin:

• Nos parla como nos pensa.
• Me dormi cuando me pote.
• Me va esplica cuanto me comprende.
• Nos abita do la du rios encontra.
• Me ia fini la taxe en cuando tu ia parla a me.
• Nos va core a do la vias encontra.

On pote usa los ance pos un nom, como sujuntas cual introdui suproposas ajetivin:

• Me labora en Paris, do me abita.
• El va visita en Julio, cuando la clima es bon.
• Acel es la razona perce Juan ia parti.

E on usa los ance en demandas reportada (un spesie de suproposa nomin).

Sujuntas spesial

La sujuntas spesial ce e esce introdui suproposas nomin. Ce introdui un informa reportada, e esce introdui un demanda reportada sur la veria de un informa:

• Me pensa ce tu nesesa un vacanse.
• Me no sabe esce el va veni.

On pote usa los pos alga nomes, ajetivos, e preposadas per completi la sinifia:

• La idea ce la Sol orbita la Tera es un era.
• Nos es surprendeda ce vos no ia cexa.
• Me es felis ce tu ia susede.
• Los no ia es serta esce la tren ia parti ja.
• La gato ia entra la sala sin ce algun vide el.

On pote ance usa ce per introdui alga suproposas cual espresa un resulta:

• El ia es tan fatigada ce el no ia pote pensa.
• El ia es tan fame ce el ia pote oia la ronca de sua stomaco.

La sujuntas spesial afin, car, si, e ca introdui suproposas averbin:

• Me va veni si tu clama.
• Me labora afin mea enfantes pote come.
• Lo es calda car la sol brilia.
• Esta es plu labora ca me ia espeta.

Demandas

On ave tre spesies de demanda: los a cual on pote responde simple con "si" o "no"; los cual presenta un lista de elejes posible; e los cual xerca un informa spesifada.

Plu, demandas pote es direta ("Do nos vade?") o reportada ("Me ia demanda a tu do nos vade", "Me no sabe ci me es"). Demandas direta fini con un sinia de demanda (?).

Demandas de "si" o "no"

On pote cambia un frase a un demanda de "si" o "no" par ajunta esce a la comensa de la frase:

• Esce tu parla deutx?
• Esce tu ia come la salada?

On ave ance du otra metodos. En parla, en demandas cual proposa un posible e xerca mera un confirma de lo, on pote ajunta si? o no? a la fini de la frase. E en demandas multe simple, on pote fa no plu ca alti la melodia de sua vose a la fini de la frase:

• Tu ia come la salada, si?
• Tu ia come la salada, no?
• Tu ia come, si?
• Nos es perdeda, no?
• Vos comprende?

On responde a un tal demanda con la parola si o no. Si dise ce la posible espresada en la demanda es vera; no dise ce lo es falsa:

• Tu desira bir?
  • Si, per favore. (me desira bir)
  • No, grasias. (me no desira bir)

Si la demanda ave un forma negativa, si e no indica la mesma sinifias como si la demanda no ta es negativa. Ma esta pote es confusante. Donce, on pote responde plu clar con un frase completa:

• Tu no desira bir?
  • Si. – Yes. (me desira bir)
  • No. – No. (me no desira bir)
  • Si, me desira bir.
  • No, me no desira bir.

Demandas entre posibles

Estas demanda mera ce la escutor eleje un de alga posibles, comun espresada como un lista liada par la junta o:

• Tu desira te, cafe, o bir?
  • Cafe, per favore.
• Tu ia veni par auto, o par bisicle, o tu ia pasea?
  • Par auto, probable.

Otra demandas

Otra demandas usa determinantes, pronomes, o averbos de demanda, per esemplo cual, ci, cuando, cuanto, como, do, e perce. La plu comun, la parola de demanda es moveda a la comensa de la frase, ma lo pote ance resta a la loca do sua responde ta apare:

• Cual libro tu leje? = Tu leje cual libro?
• Ci es tua autor prefereda? = Tu autor prefereda es ci?
• Cual es acel musica fea? = Acel musica fea es cual?
• Cuando tu dormi? = Tu dormi cuando?
• Cuanto tu ia paia? = Tu ia paia cuanto?
• Como vos ia evade? = Vos ia evade como?
• Do nos es? = Do es nos? = Nos es do?
• Perce tu core? = Tu core perce?
• Con cual tu come la salada? = Tu come la salada con cual?
• Cual force tu usa per come la salada? = Tu usa cual force per come la salada?
• Con cual force tu come la salada? = Tu come la salada con cual force?
• Como rapida tu pote come la salada? = Tu pote come la salada como rapida?

Demandas reportada

Demandas reportada (ance nomida "demandas nondireta") es espresada como suproposas nomin, cual conteni normal la mesma serie de parolas como la demanda direta ta ave, incluinte la mesma tempo de la verbo. En demandas reportada, la parola de demanda sta sempre a la comensa de la suproposa:

• Vos va demanda: "Ci tu ia vide?"  >  Vos va demanda ci me ia vide.
• Me no recorda: "A ci me ia parla?"  >  Me no recorda a ci me ia parla.
• Los no sabe: "Cual nos va fa?"  >  Los no sabe cual cosa los va fa.
• Me vide: "Do me va senta?"  >  Me vide do me va senta.
• Me no ia sabe: "Cuando nos va parti?"  >  Me no ia sabe cuando nos va parti.

Demandas de "si" o "no" reportada usa sempre esce:

• El no sabe: "Esce los ia parti?"  >  El no sabe esce los ia parti.
• El ia demanda: "Esce tu pote aida?"  >  El ia demanda esce me pote aida.

En alga casos, la difere entre un demanda reportada e un suproposa ajetivin es multe sutil:

• (a) Me ia descovre cual cosa ia es en la caxa. (un demanda reportada)
• (b) Me ia descovre lo cual ia es en la caxa. (un suproposa ajetivin)

En esemplo (a), me ia descovre la identia de la cosa en la caxa, an si me no ia vide o toca lo direta. En esemplo (b), me ia descovre lo, la cosa fisical.

Proposas

Como un frase, un proposa conteni un sujeto e un verbo, ma lo es un parte de un frase completa.

Cada frase conteni un proposa major. On pote altera esta en modos variosa con un o plu suproposas (proposas suordinada) . Si un suproposa altera un sintagma nomin, lo es nomida un suproposa ajetivin. Si lo altera un verbo o la proposa major completa, lo es nomida un suproposa averbin. E si lo ave la rol de un nom, lo es nomida un suproposa nomin.

Plu, un frase pote conteni plu ca un proposa major.

Suproposas

Suproposas ajetivin

Un suproposa ajetivin es un suproposa cual altera un nom. Suproposas ajetivin segue la nomes cual los altera, e los comensa normal con un de la pronomes de demanda, ci e cual, usada como un sujunta (un "pronom-sujunta"):

• La om ci ia abita asi ia vade a New York.
• La poma cual ia cade de mea saco es aora noncomable.

Per claria, un suproposa ajetivin pote es separada de la resta de la frase par virgulas, spesial si lo es longa o complicada:

• La poma, cual ia cade de mea saco en la fango a matina ier, es aora noncomable.

Alga proposas ajetivin no es esensal per la sinifia de la frase, ma ajunta mera un comenta en pasante. Tal suproposas es sempre separada par virgulas:

• La can, ci ave manxas negra, ia morde la polisior.
• Mea padre, ci ia jubila, abita en Mexico.
• Esta jus, cual Ana ia fa, ave un bon sabor.

Ci e cual pote opera como o la sujeto o la ojeto de la suproposa ajetivin. Ojetos segue normal la verbo, ma cuando un de esta pronomes es la ojeto, lo presede e la sujeto e la verbo de la suproposa ajetivin:

• La fem ci me ama veni de Frans.
• La robot cual me ia construi no opera.
• Nos ta vade a mea casa, cual es prosima.

Cuando un pronom-sujunta es la ojeto de un preposada, la preposada vade prima:

• La fem de ci nos parla labora a mea ofisia.
• Tua libro, en cual me ia scrive sua nom, es sur la table.

Cuando de ci o de cual introdui un nom poseseda en la suproposa ajetivin, esta nom es normal introduida par sua per claria:

• Esta fem, de ci sua sposo labora en la banco, es un cocor eselente.
• La fem, de ci tu conose sua sposo, labora a me ofisia.
• La fem, de ci tu ia dona la letera a sua sposo, es encantante.
• Mea auto, de cual sua motor es rompeda, es aora dejetada.

En alga linguas, un suproposa ajetivin pote refere a la intera de la proposa presedente. En elefen, si acel ta es ambigua, on pote dise e lo, e esta, o e acel (o un espresa simil) en loca:

• El pote salta a un metre alta, e esta ia surprende me.
• Los studia la pragmatica, e acel es per dise la rol de contesto en la comprende de frases.

Un otra modo per comensa un suproposa ajetivin es con un averbo de demanda, usada como un sujunta (un "averbo-sujunta"):

• Me labora en Paris, do me abita.
• El va visita en Julio, cuando la clima es bon.
• Acel es la razona perce Juan ia parti.

Tal suproposas ajetivin es frecuente simil a suproposas averbin:

• Me labora do me abita.
• El va visita cuando la clima es bon.

Suproposas averbin

Un suproposa averbin altera o la verbo de la proposa major o la proposa major mesma. Un suproposa averbin es introduida par un de la averbos-sujuntas (como, cuando, cuanto, do) o un de la sujuntas spesial si, car, afin, e ca:

• Me no teme la can, car el es multe peti.
• Si los redui tro rapida sua pesa, los va regania lo.
• Me core afin la rinoseros no catura me.
• El ia scrive cuando sua madre ia demanda.
• El dise ce el es felis do el abita.
• On no ia permete ce me fa la cosas como me ia desira.
• Esta es plu labora ca me ia previde.

Suproposas averbin cual es introduida par la averbo-sujuntas (como, cuando, cuanto, do) pote es regardada como suproposas ajetivin. Per esemplo, on pote espresa la tre esemplos final a supra en la modo seguente:

• El ia scrive a la ora cuando sua madre ia demanda.
• El dise ce el es felis a la loca do el abita.
• On no ia permete ce me fa la cosas en la modo como me desira.

Suproposas nomin

Un suproposa nomin ave la rol de un nom: lo pote es la sujeto o la ojeto de un verbo o preposada. Suproposas nomin pote es introduida par la sujuntas spesial ce o esce, par un de la pronomes-sujuntas ci e cual, par un de la determinantes de demanda cual e cuanto, o par un de la averbos-sujuntas.

Per proba esce un suproposa es vera un suproposa nomin, sustitui "el", "lo", o "los" per la suproposa. Si la resulta es un bon frase, la suproposa es un suproposa nomin. Suproposas nomin es comun ojetos de verbos de pensa, sensa, o emosia:

• Me vide do tu es.
• Cuando me va parti, me no sabe.
• Me sabe de do tu veni.
• Me sabe ci ia dise acel.
• Me ia oia cual tu ia dise.
• Me pote divina cual libro el leje.

Multe suproposas nomin es introduida par la sujuntas spesial ce o esce:

• Me pensa ce el es bela.
• Me pensa ce el pote salta a un metre alta.
• Me pensa ce si.
• Me duta esce el pote salta a un metre alta.

Suproposas nomin es comun usada per sita dises e per reporta pensas o demandas. En tota casos, la tempo de la verbo en la suproposa nomin resta la mesma como en la dise, pensa, o demanda orijinal:

• Me ia dise: "Me veni de London."  >  Me ia dise ce me veni de London.
• El pensa: "La tren ia es tarde."  >  El pensa ce la tren ia es tarde.
• El ia demanda: "Cuando nos va parti?"  >  El ia demanda cuando nos va parti.
• Me va vole sabe: "Do la selebra es?"  >  Me va vole sabe do la selebra es.

Suproposas ajetivin o averbin es comun confusable con suproposas nomin. Per clari ce on intende un suproposa ajetivin o averbin, ajunta un nom o pronom ante cual o ci:

• Me no comprende la ata cual tu intende.
• Me ia oia lo cual tu ia dise.
• Me no conose el ci tu ia indica.
• Me vide la loca do tu es.
• Me no sabe la ora cuando me va parti.

Proposas coordinada

Du proposas major pote es liada par conjuntas per deveni sola un frase. On inclui frecuente un virgula ante la conjunta:

• Me ia desira la auto, ma me no ia ave la mone.
• Me desira un bon carera e me vole ance trova un sposa bela.

Tal proposas pote sta como frases autonom, con o sin conjuntas:

• El ia vole canta e el ia vole dansa, ma el ia teme.
• El ia vole canta. E el ia vole dansa. Ma el ia teme.
• El ia vole canta. El ia vole dansa. El ia teme.

Numeros

Numeros cardinal

La numeros fundal es:

• zero – 0
• un – 1
• du – 2
• tre – 3
• cuatro – 4
• sinco – 5
• ses – 6
• sete – 7
• oto – 8
• nove – 9
• des – 10
• sento – 100
• mil – 1000
• milion – 1 000 000

On scrive cada numero asta 999 como sola un parola cual pote conteni asta tre composantes, liada par ifenes. Cada composante representa un dijito, e es fada de un numero cardinal entre un e nove, con des o sento ajuntada a la fini si la dijito representa un multiple de 10 o 100. Per un multiple solitar de 10 o 100, on dise simple des e sento, sin usa un. On omete completa la composantes per multiples asente (como la "0" en "209").

• des-un – 11
• des-du – 12
• des-nove – 19
• dudes – 20
• dudes-un – 21
• dudes-sinco – 25
• sento-un – 101
• sento-des-du – 112
• tresento-dudes-un – 321
• cuatrosento – 400
• novesento-sinco – 905

On scrive mil e milion sempre como parolas individua cual separa cada grupo de tre dijitos:

• mil setesento-sesdes-tre – 1763
• du mil un – 2001
• tre mil des-cuatro – 3014
• cuatrodes-sinco mil sessento-setedes-oto – 45 678
• novesento-otodes-sete milion sessento-sincodes-cuatro mil tresento-dudes-un balones roja – 987 654 321 balones roja

Cuando on scrive numeros en dijitos en elefen, on pone un spasio entre cada grupo de tre dijitos, como mostrada a supra. On scrive la sinia desimal como o un punto o un virgula, seguente sua prefere, e simil on pronunsia lo como o punto o virgula. Dijitos pos la sinia desimal es simple listada:

• tre punto un cuatro un ses – 3.1416
• du virgula zero nove – 2,09

On espresa numeros negativa con min:

• min sinco grados – -5 grados

Miles de miliones

La parola "bilion" pote sinifia o 1 000 000 000 o 1 000 000 000 000, dependente de la cultur. "Trilion", "cuadrilion", etc ave problemes simil. Per evita confusa, elefen prefere espresa tal numeros a modo plen:

• mil milion – 1 000 000 000 (un con nove zeros, 10⁹)
• milion milion – 1 000 000 000 000 (10¹²)
• mil milion milion – 1 000 000 000 000 000 (10¹⁵)

La parolas bilion, trilion, cuadrilion, etc esiste en elefen, ma un parlor ci usa los debe serti ce el clari la sinifia intendeda.

En scrives siensal, la eleje la plu clar es usa la prefisas internasional:

• deca- (da) – 10
• hecto- (h) – 100
• cilo- (k) – 10³
• mega- (M) – 10⁶
• giga- (G) – 10⁹
• tera- (T) – 10¹²
• peta- (P) – 10¹⁵
• exa- (E) – 10¹⁸
• zeta- (Z) – 10²¹
• iota- (Y) – 10²⁴

Numeros ordinal

Cuando un numero presede un nom, lo es un numero cardinal, e lo indica un cuantia:

• tre omes e cuatro femes

Ma cuando un numero segue un nom, lo es un numero ordinal, e lo indica un loca en un segue:

• la om tre
• la pato ses
• la paje un

Prima es un alternativa comun per un ordinal, ma on no pote usa lo per ordinales plu alta cual fini acaso con la dijito "1":

• la paje prima
• sala sento-un

On pote usa numero como un nom vacua per suporta un numero ordinal:

• El es numero tre.
• A cual paje tu es? Me es a numero setedes.
• Numero tre, me vole grasia la furnores de come.

Fratos

Un usa de la sufisa -i es per formi parolas per numeros fratal:

• dui – ½
• tri – ⅓
• cuatri – ¼
• desi – 1/10
• des-dui – 1/12
• cuatrodesi – 1/40
• senti – 1/100
• tresento-sesdeso-sinci – 1/365
• mili – 1/1000
• dudes-mili – 1/20 000

Fratos segue la regulas per nomes comun:

• un tri de la tarte = 1/3 de la tarte
• du tris de la tarte = 2/3 de la tarte
• esta tri ardeda de la tarte = esta 1/3 ardeda de la tarte
• un cuatri de un sentenio = 1/4 de un sentenio
• tre tredes-duis de un diton = 3/32 de un diton

On ave ance alga otra metodos per indica fratos:

• tre e un dui oras = 3 1/2 oras
• tre oras e un dui = 3 1/2 oras
• sete e un dui milion anios = 7 500 000 anios
• des persentos de la popla = 10% de la popla
• des sentis de la popla = 10% de la popla
• du punto sete sinco oto metres = 2.758 metres

Per scrive siensal, prefisas internasional es disponable:

• desi- (d) – 1/10
• senti- (c) – 1/100
• mili-(m) – 10^-3
• micro- (μ) – 10^-6
• nano- (n) – 10^-9
• pico- (p) – 10^-12
• femto- (f) – 10^-15
• ato- (a) – 10^-18
• zepto- (z) – 10^-21
• iocto (y) – 10^-24

Multiples

La sufisa -uple formi parolas per multiples numeral:

• duple
• truple
• cuatruple

sintagmas con ves o veses espresa la frecuentia de avenis:

• a un ves
• a du veses
• a tre veses

Ves no espresa la multipli aritmetical.

Aritmetica

On espresa ajuntas con plu o e:

• Un plu un es du. – 1 + 1 = 2
• Du e du no es sinco. – 2 + 2 ≠ 5

On espresa sutraes con min:

• Ses min tre es tre. – 6 - 3 = 3

On espresa multiplis con multiplida par, comun simplida a sola par:

• Du multiplida par tre es ses. – 2 × 3 = 6
• Ses par cuatro es dudes-cuatro. – 6 × 4 = 24

On espresa divides con divideda entre, comun simplida a sola entre:

• Des divideda entre du es sinco. – 10 / 2 = 5
• Sinco entre du es du e un dui. – 5 / 2 = 2½
• Sinco entre du es du punto sinco. – 5 / 2 = 2.5
• Sinco entre du es du virgula sinco. – 5 /2 = 2,5

On espresa potias con a potia e un numero ordinal. Cuadrida e cubida es alternativas per a potia du e a potia tre:

• Tre a potia du es nove. – 3² = 9
• Tre cubida es dudes-sete. – 3³ = 27
• des a potia min nove – 10^-9
• des a potia sento – 10¹⁰⁰

On espresa radises con a radis e un numero ordinal:

• 256 a radis cuatro es 4. – ⁴√256 = 4
• La radis cuadral de 64 es 8. – √64 = 8
• La radis cubo de 27 es 3. – ³√27 = 3

Mesuras

On pote espresa mesuras fisical en modos variosa:

• Cuanto alta es la tore?
• Cuanto de altia la tore ave?
• La tore es cuanto alta?
• La tore ave cuanto de altia?
• La tore es 40 metres alta.
• La tore ave 40 metres de altia.
• La tore es un metre plu alta ca la casa.
• La tore ave un metre plu de altia ca la casa.
• La tore es du veses plu alta ca la casa.
• La tore ave du de la altia de la casa.
• La casa ave un dui de la altia de la tore.
• La tore es duple plu alta ca la casa.
• La tore ave duple la altia de la casa.

Un prinsipe fundal es ce on ave altia ma es alta.

40 metres alta sinifia leteral ce la metres mesma es alta, ma par estende natural lo oteni la sinifia "con 40 metres de altia".

La mesma posibles es usada con otra mesuras, como:

• larga, largia
• grande, grandia
• pesosa, pesa
• longa, longia
• longa, tempo
• vea, eda
• basa, basia
• profunda, profundia
• frecuente, frecuentia
• rapida, rapidia
• densa, densia

Crea de parolas

En elefen, on pote formi parolas nova par ajunta prefisas o sufisas a parolas esistente, o par combina du parolas esisente como un nom composada.

On pote ance reusa direta un ajetivo como un nom, e un verbo como un nom, sin ajunta un afisa.

Un cuantia peti de ajetivos de color (per esemplo ambar e orania) es direta derivada de nomes de cosas, sin afisa.

Prefisas

Anti- formi ajetivos e nomes per cosas oposante o oposada:

• sosia → antisosial – no obedinte costumes sosial
• avion → antiavion – usada per ataca aviones enemi
• proton → antiproton – un varia de proton con carga negativa

Auto- formi nomes, verbos, e ajetivos cual indica atas automatida o fada par algun a se mesma:

• respeta → autorespeta – respeta per se mesma
• flue → autoflue – flue automatida a la linia seguente (en refere a un parola tapeda a la fini de un linia)
• adere → autoaderente – aderente ja par se mesma (sin otra cola)

Des- formi verbos cual sinifia la reversa de un ata. Lo simpli a de- ante S, Z, X, o J:

• botoni → desbotoni
• infeta → desinfeta
• jela → dejela
• sifri → desifri

Inter- formi nomes, verbos, e ajetivos cual indica atas o states mutua:

• cambia → intercambia
• nasional →; internasional

Media- formi nomes cual indica la punto media de un cosa:

• note→ medianote
• estate → mediaestate
• punto → mediapunto

Non- formi ajetivos e nomes cual indica la reversa o manca de un cualia. Lo simpli a no- ante N:

• justa → nonjusta
• ativa → nonativa
• nativa → nonativa
• nesesada → nonesesada
• crede noncrede

Pos- formi nomes, verbos, e ajetivos cual refere a un tempo (o loca) cual es situada pos un otra:

• graduada → posgraduada
• media → posmedia
• alveolo → posalveolal

Pre- formi nomes, verbos, e ajetivos cual refere a un tempo (o loca) cual es situada ante un otra:

• graduada → pregraduada
• istoria → preistoria
• judi → prejudi

Re- formi verbos cual indica un ata repeteda, o un ata en un dirije reversada:

• comensa – → recomensa – comensa denova
• pleni – → repleni – pleni denova
• paia – → repaia – paia per compensa un otra paia
• veni – → reveni – veni denova / veni a la loca de comensa pos un viaja

Su- formi nomes, verbos, e ajetivos cual indica un punto min alta en un ierarcia:

• teninte → suteninte
• divide → sudivide
• consensa → suconsensa
• indise → suindise
• campion → sucampion

Supra- formi nomes, verbos, e ajetivos cual indica un punto plu alta en un ierarcia:

• computador→ supracomputador
• pasa → suprapasa
• dramosa → supradramosa
• fem → suprafem
• natural → supranatural

Vis- formi nomes cual indica ofisiores suordinada:

• presidente → vispresidente
• re →visre

Bon- e mal- formi varias bon e mal (o erante) de ajetivos e verbos, a veses en un modo metafor:

• parla → bonparlante – capas de parla fluente e convinsente
• vende → bonvendeda – tal ce on vende multe copias
• dise → bondise – clama la favore divin a
• veni → bonveni – saluta amin
• acusa → malacusa – fa declaras falsa cual dana la reputa de un person
• comprende → malcomprende – comprende erante
• nomida → malnomida – erante nomida
• odorosa → malodorosa – con un odor forte e mal

On usa numeros e fratos como prefisas con alga parolas. Con membros de la familia, numeros indica jeneras sempre plu distante:

• avo → duavo – la patro de la avo o ava
• neta treneta – la fia de la fia o fio de la neta o neto
• pede → cuatropede – con cuatro pedes
• sore →duisore – un sore con ci on ave sola un jenitor comun
• galon → cuatrigalon – un cuatri de un galon

Sufisas

Multe sufisas comensa con un vocal. Cuando on ajunta un tal sufisa a un parola cual fini ja con un vocal, on sutrae la vocal esistente, estra cuando lo ia es la vocal solitar en la parola orijinal:

• fruta  >  frutosa
• jua  >  jueta
• fe  >  fein

Do un sufisa ta crea un mal segue de vocales, on sutrae la vocal du de la segue:

• comedia + -iste  >  (comediiste)  >  comediste

Esta regulas ave du esetas:

• tre + -i  >  tri
• tre + -uple  >  truple

Sufisa cual formi verbos

Esata como otra verbos, on pote usa la verbos produida par esta sufisa en modos transitiva e nontransitiva, o como nomes.

On ajunta -i a nomes e ajetivos per formi verbos cual sinifia "(fa) deveni ...", "(fa) cambia a ...". Como un caso spesial, esta inclui ance verbos cual sinifia "emete un sustantia o un parte nova":

• arco  >  arci
• roja  >  roji
• umida  >  umidi
• duple  >  dupli
• saliva  >  salivi
• flor  >  flori

-i crea ance verbos cual sinifia "usa ..." (comun en la modo de un util o aparato), o "aplica ..." (un sustantia o costum):

• boton  >  botoni
• telefon  >  telefoni
• sponja  >  sponji
• pinta  >  pinti
• nom  >  nomi

Sufisas cual formi ajetivos

Esata como otra ajetivos, on pote reusa la ajetivos produida par esta sufisas como nomes cual indica persones o cosas cual ave la cualia spesifada.

On ajunta -in a un nom per crea un ajetivo cual sinifia "simil a ...":

• ami  >  amin
• enfante  >  enfantin
• fantasma  >  fantasmin
• menta  >  mentin
• monstro  >  monstrin
• serpente  >  serpentin

On ajunta -osa a un nom per formi un ajetivo cual sinifia "plen de ..." o "fada de ...":

• zucar  >  zucarosa
• oro  >  orosa
• capel  >  capelosa
• festa  >  festosa
• melma  >  melmosa
• jua  >  juosa
• caos  >  caososa

On ajunta -al a un nom per crea un ajetivo jeneral cual sinifia "pertinente a ..." o "relatada a ..."

• fotografia  >  fotografial
• nasion  >  nasional
• siensa  >  siensal
• averbo  >  averbal
• erita  >  erital
• mito  >  mital
• monce  >  moncal

On ajunta -iste a un nom cual indica un crede, como un relijio o un filosofia, per formi un ajetivo jeneral. Si la nom fini con -isme, -iste prende sua loca. En alga parolas do la radis es un nom propre, on reteni la vocal final de la nom, si esta produi un parola plu internasional:

• bigamia  >  bigamiste
• otimisme  >  otimiste
• puria  >  puriste
• Mitra  >  mitraiste

On ajunta -an a alga nomes cual indica estendes de spasio o tempo (locas e edas), per formi ajetivos jeneral:

• suburbe  >  suburban
• Victoria  >  victorian

-an es ance un de la sinco sufisas normal per formi ajetivos cual indica linguas e poplas. La otra cuatro es -es, -ica, -i, e -sce. Per esta ajetivos, elefen usa parolas cual sona tan simil como posible a la nomes nativa: en resulta, alga nomes aseta un sufisa propre e spesial, o simple no sufisa, e on cambia ance la radis en alga casos:

• Africa  >  african
• Frans  >  franses
• Elas  >  elinica
• Arabia  >  arabi
• Rusia  >  rusce
• Europa  >  european
• Deutxland  >  deutx
• Britan  >  brites

On ajunta -ica a un nom cual indica un problem medical, psicolojial, o simil, per formi un ajetivo per descrive un person ci esperia la problem:

• catalesia  >  catalesica
• xenofobia  >  xenofobica

On ajunta -nte a un verbo per crea la partisipio ativa, un ajetivo cual sinifia "tal ce lo fa (la ata spesifada)". La partisipio ativa de la verbo es es esente:

• ama  >  amante
• depende  >  dependente
• dormi  >  dorminte
• obedi  >  obedinte
• pare  >  parente
• es  >  esente

On no usa nomes cual fini con -nte como nomes de atas:

• La covrente es sur la caxa. (la cosa cual covre la caxa)
• Covre la caxa es un bon idea. (la ata de covre la caxa)

On ajunta -da a un verbo per formi la partisipio pasiva, un ajetivo cual sinifia "tal ce on (ia) fa ... a lo":

• ama  >  amada
• clui  >  cluida
• conose  >  conoseda
• jela  >  jelada
• nesesa  >  nesesada
• putri  >  putrida

On no usa -da per indica la tempo pasada de verbos:

• La caxa es covreda par la tela. (aora, la tela covre la caxa)
• La tela ia covre la caxa. (en la pasada, la tela ia covre la caxa)

On ajunta -able a un verbo per crea un ajetivo cual sinifia "tal ce lo pote es ...da" o "tal ce lo merita es ...da":

• ama  >  amable
• come  >  comable
• infla  >  inflable
• loda  >  lodable
• nota  >  notable
• titila  >  titilable

Sufisas cual formi nomes

Cuando on ajunta -or a un verbo, lo formi un nom cual sinifia un person ci fa la ata spesifada, en multe casos en un modo frecuente o abitual. Cuando on ajunta lo a un nom, lo formi un nom cual sinifia un person ci labora con la cosa spesifada, o jua la sporte spesifada:

• aida  >  aidor
• deteta  >  detetor
• dirije  >  dirijor
• fumi  >  fumor
• gania  >  ganior
• jogla  >  joglor
• parla  >  parlor
• pexa  >  pexor
• carne  >  carnor
• vaso  >  vasor
• futbal  >  futbalor
• tenis  >  tenisor

-ador crea nomes cual sinifia un util o macina cual fa la ata spesifada, o labora con la cosa spesifada:

• caldi >  caldador
• computa  >  computador
• fax  >  faxador
• lava  >  lavador
• parla  >  parlador
• surfa  >  surfador
• umidi  >  umidador

On ajunta -eria a un nom o verbo per crea un nom cual sinifia un loca, comun un boteca, asosiada con la ata o cosa spesifada:

• cafe  >  caferia
• pan  >  paneria
• beli  >  beleria
• campana  >  campaneria
• fruto  >  fruteria
• monce  >  monceria
• planeta  >  planeteria
• xef  >  xeferia

-ia formi nomes consetal cual servi como la nomes de cualias. Cuando on ajunta -ia a un parola cual fini con -ia, la parola no cambia:

• ajil  >  ajilia
• felis  >  felisia
• jelosa  >  jelosia
• neutra  >  neutria
• madre  >  madria
• enfante  >  enfantia
• sultan  >  sultania
• fria  >  fria
• vea  >  veia

Parolas como enfantia e sultania pote indica tempos o locas en cual un cualia pertine.

La nomes de multe campos de studia fini ance en ia (o ica) ma esta es un parte de la radis, e no un sufisa. On formi la nomes de la praticores corespondente con -iste. On usa -iste ance per formi la nomes de credores en un relijio o filosofia (como derivada de la sufisa ajetival -iste), la nomes de musicistes, e la nomes de alga otra persones cual fini internasional con "-ist-":

• jeografia  >  jeografiste
• psicolojia  >  psicolojiste
• cimica  >  cimiciste
• eletrica  >  eletriciste
• musica  >  musiciste
• Crixna  >  crixnaiste
• ideal  >  idealiste
• gitar  >  gitariste
• solo  >  soliste
• jornal  >  jornaliste
• sicle  >  sicliste

-isme formi la nomes de sistemes de crede. On sustitui lo per -iste en la nom de la credor. Lo apare ance en alga otra parolas cual fini internasional con "-ism-":

• dauiste  >  dauisme
• altruiste  >  altruisme
• raziste  >  razisme
• sindicatiste  >  sindicatisme
• turiste  >  turisme
• simbol  >  simbolisme
• canibal  >  canibalisme

Sufisas min produosa

La sufisas seguente es usada sola con parolas spesifada, como definida en la disionario.

On ajunta -eta a alga nomes per crea un nom per un varia de un cosa cual es reduida en un modo spesial. Esta inclui la nomes de animales joven e vestes interna. Simil, on pote ajunta -eta a alga verbos e ajetivos per formi parolas per varias reduida de atas o cualias:

• bebe  >  bebeta – un bebe multe joven
• caro  >  careta – un caro peti con un rota, du gamas, e du manicos
• imaje  >  imajeta – un imaje reduida per aida reconose la imaje plen
• lente  >  lenteta – un lente plastica cual on pone direta sur la oio
• mone  >  moneta – un disco de metal usada como mone
• orolojo  >  orolojeta – un orolojo peti cual on porta sur sua polso
• bove  >  boveta – un bove joven
• ovea  >  oveta – un ovea joven
• calsa  >  calseta – un calsa corta
• camisa  >  camiseta – un camisa interna, o un camisa de forma simil
• jaca  >  jaceta – un spesie de jaca sin colar e sin mangas
• pluve  >  pluveta – pluve poca par gotas peti
• rie  >  rieta – rie poca en un modo ansiosa o bobo
• parla  >  parleta – parla nonformal e amin
• bela  >  beleta – con aspeta amable ma no vera bela

On ajunta -on a alga nomes per crea un nom per un varia de un cosa cual es aumentada en un modo spesial. Esta inclui la nomes de vestes esterna:

• abea  >  abeon – un abea grande e capelosa
• caxa  >  caxon – un caxa grande per transporta benes
• dente  >  denton – un dente longa e agu
• dito  >  diton – acel dito de la mano cual on pote oposa a la otra ditos
• padre  >  padron – un om ci ave la rol de padre en un organiza
• sala  >  salon – un sala en un casa en cual on diverti visitores, regarda la TV, etc
• seja  >  sejon – un seja grande e comfortosa con reposabrasos
• calsa  >  calson – un veste simil a du calsas liada a la taie
• jaca  >  jacon – un jaca longa cual on porta estra casa

-eta e -on no es sinonimes de peti e grande: on pote ave fasil un careta grande o un salon peti. En loca, los formi parolas con sinifias nova cual es spesifada, e cual on pote descrive laxe como varias plu peti o grande de la orijinal.

On ajunta -o e -a a alga nomes cual indica membros de la familia, per cambia la sinifia entre mas e fema (en acel ordina):

• tio, tia

On formi la nomes de alga arbores par cambia la -a final de la nom de la fruta o noza a -o:

• pera  >  pero

On ajunta -esa a alga nomes cual indica roles sosial de istoria per nomi la fema corespondente:

• prinse  >  prinsesa

Afisas tecnical

Termas siensal e medical internasional es formida de fontes latina e elinica par ajunta multe prefisas e sufisas tecnical. On usa esta afisas ance en elefen, e los segue la regulas de transcrive de elefen.

La sufisas -i e -uple es usada per nomi fratos e multiples.

Nomes composada

On pote formi un nom composada par combina un verbo con sua ojeto, en acel ordina. La resulta sinifia un person o cosa cual fa la ata spesifada a la ojeto spesifada:

• corti, ungia  >  cortiungia – un util per corti ungias
• covre, table  >  covretable – un tela per covre un table
• fura, bolsa  >  furabolsa – un person ci fura de poxes e sacos
• lansa, petra  >  lansapetra – un util per lansa petras
• para, morde  >  paramorde – un aparato poneda sur la beco de un animal afin el no morde persones
• para, pluve  >  parapluve – un aparato pliable e portable per proteje un person contra la pluve
• pasa, tempo  >  pasatempo – un ata cual on fa frecuente per diverti
• porta, mone  >  portamone – un contenador pliable per porta biletas e cartas
• porta, vose  >  portavose – un person ci parla e representa un organiza
• brinca, dorso  >  brincadorso – un jua en cual on salta sur la dorsos de otra persones (vera la nom de un juor, ma usada metaforal per la jua)

Cuando la ojeto comensa con un vocal, on reteni lo, estra cuando lo es la mesma como la vocal final de la verbo, como en portavion.

Elefen no permete nomes composada de du nomes. En loca, on debe usa un preposada entre la du nomes. Per esemplo:

• avia de mar
• casa per avias
• xef de polisia

A veses noncomun, un tal espresa ave un sinifia spesial e nonleteral, e on debe regarda lo como un parola fisada. Per esemplo, un leon-de-mar no es un leon. En tal casos, la parolas es juntada par ifenes, e ajetivos debe segue la nom du. On pote usa ifenes ance per composadas plu leteral, si esta aida la claria:

• un leon-de-mar grande
• un leon grande de mar (un leon ci veni de la mar, e no un leon-de-mar)
• un avion grande de mar (car un avion de mar es ancora un avion leteral)
• un avion-de-mar grande (alternativa)
• un avion de mar grande (ambigua, car lo pare vole dise ce la mar es grande)

Cortis

On usa alga cortis en elefen. On no scrive los con puntos.

On corti alga parolas o sintagmas comun. Estas no reseta un letera major, estra a la comensa de un frase:

• acc – ance conoseda como
• aec – ante la eda comun
• ec – de la eda comun
• etc – e tal cosas, e tal continuante
• lfn – lingua franca nova
• n – numero
• nb – nota bon
• ovn – ojeto volante nonidentifiada
• p – paje / pajes
• pe – per esemplo
• pf – per favore
• ps – pos scrive
• tv – televisa, televisador
• v – vide (per introdui un refere a un otra testo)

Elefen reteni de otra linguas ance alga cortis cual on reconose internasional, incluinte la cortis normal per la unias metral:

• cd – disco compata
• pc – computador personal
• cm – sentimetre
• km – cilometre
• mg – miligram
• μm – micrometre
• MB – megabait

La formas cortida de nomes propre e titulos usa leteras major. Ma on no inclui en la corti la parolas minor como la e de – a cual on no dona un letera major en la forma plen de la nom. On introdui frecuente tal nomes con la, an cuando cortida:

• dr – dotor (como parte de la nom de un person)
• sr – senior (como parte de la nom de un person)
• sra – seniora (como parte de la nom de un person)
• la NU – la Nasiones Unida
• la RU – la Rena Unida
• la SUA – la Statos Unida de America

Internasional, alga nomes propre es la plu bon conoseda como cortis nontraduida, e on reteni estas en elefen:

• IBM – International Business Machines Corporation
• KGB – Комитет государственной безопасности ('Komitét gosudárstvennoy bezopásnosti') (Comite per Securia de Stato)

Puntua

Jeneral, elefen lasa la scrivores eleje sua puntua – la normas solitar es ce on ta es clar e coerente. An tal, alga abituas fundal esiste, e estas es la mesma como en la plu linguas european.

La parola prima en un frase comensa con un letera major.

Sinias major

Un frase comun fini con un punto ( . ).

Si un frase es un demanda direta, lo fini con un sinia de demanda ( ? ).

On pote pone un sinia de esclama ( ! ) a la fini de un frase cual ta ave un intensia emosial en parla.

Un virgula ( , ) indica un pausa natural en un frase, o a veses on inclui lo sola per separa clar un parte de un frase (como un proposa) de un otra. On usa virgulas ance per separa la cosas en un lista.

Cuando on scrive un cuantia en dijitos, on pote usa o un virgula o un punto per indica la comensa de la parte fratal. On pote usa un spasio per separa grupos de tre dijitos.

La dupunto ( : ) introdui un presenta plu detaliosa de la cosa cual presede lo. Pos un dupunto, usa un letera major si la seguente es un frase completa, ma no si lo es sola un lista o un parte de un frase.

On pote usa la punto-virgula ( ; ) en loca de un punto entre du frases cual refleta o ecuilibra prosima la un la otra. Un punto-virgula pote separa ance la cosas en un lista, si estas es longa o conteni sua propre virgulas.

No scrive un spasio ante un sinia de puntua major. Ma scrive un spasio a pos, estra a la fini de un paragraf.

Sinias de sita

Un sinia de sita apare a la comensa e fini de parolas cual on presenta como un sita direta. Ave formas variosa de sinia de sita en la mundo, incluinte ' " ‹...› «...».

En elefen, on usa normal la forma ", cual es clar, fasil tapable, e internasional. Cuando un sita apare en un otra sita, on pone ' sirca la sita interna – ave un esemplo a su. En bon tipografia, como en libros, la formas curva “” e ‘’ es usada, ma estas no es nesesada en comunicas comun. No pone spasios entre la sinias de sita e la testo sitada.

En alga linguas, on scrive un sinia de junta longa ( — ) en media de un dialogo cuando un person nova comensa parla, en loca de sinias de sita. Nos recomenda evita esta en elefen, car lo es min clar, e pote es confusada con otra usas de sinias de junta.

Cuando on sita la parolas de un carater en un nara, on acompania comun la sita con un indica de la parlor e sua manera. Per tal frases en elefen, on prefere pone un sinia de junta entre esta indica e cada parte de la sita. En esta modo, on reteni fasil la puntua esata de la frase orijinal:

• La vendor murmura – "Ma lo no es tan simple, mea ami."
• "Me acorda." – la om responde felis.
• "Perce tu es asi?" – la fem demanda.
• "Cisa" – la bonvolor sujesta – "me pote aida."
• "Me ave un ami nomida Freda," – el esplica – "ci es un tortuga."

Cuando on scrive sur linguas e sita un parola o espresa per refere a lo, on usa sola sinias de sita:

• Me gusta la parola "xuxa".
• Sua sposa ia comenta – "Me gusta la parola 'xuxa'."

Sinias minor

La trepunto ( … ) sujesta un pausa, o indica ce on ia omete alga parolas.

Sinias de junta longa ( –  o  — ) e brasetas ( (...) ) ensirca comentas cual on introdui en la flue normal de un frase.

La sinia de elidi ( ' ) indica ce on ia omete un vocal. Normal, esta aveni sola en poesias e cantas.

En elefen, on scrive sinias de mone (€, ¥, £, $, etc) ante o pos la dijitos de un preso, dependente de la costum de la pais consernada.

Ancora otra sinias de puntua esiste, ma sua usas relata apena a la regulas de elefen.

Lias esterna

• Descarga esta gramatica como un fix PDF.

Lingua franca nova

Introdui • Istoria • Gramatica • Disionario • Disionario enlinia • Curso • Fontes de vocabulo • Espresa de tempo • Leteratur en elefen • Linguas derivada • Asosia de elefen • Aora oji • Elefeniste • Bandera • Vicipedia de elefen • Vici de elefen