Pronomes
En linguistica e gramatica, un pronom es un paroleta cual pote prende la rol de un Nom (gramatica) o formula nomin, spesial cuando la nom ia es identifiada a ante o es conoseda par la escutor. Esta usa es nomida anaforia.
La pronomes fundal es la pronomes personal "me" e "tu", cual indica, natural, la parlor e la escutor. Par estende, la plu de linguas ave formas plural de los, e multe linguas ave ance formas duple e an truple. Alga linguas ave formas separada per "me/nos e tu/vos" e "me/nos ma no tu/vos". La pronomes per "el" e "los" es trovada en la plu de linguas, ma alga linguas usa nomes diversa (como "la om", "la fem", "la cosa", etc) o pronomes de mostra ("esta", "acel", etc). Multe pronomes, incluinte la pronomes de mostra, es relatada a la determinantes. La plu de linguas ave ance pronomes de demanda ("ce", "ci", "cual", etc) e pronomes de relata, comun derivada de la pronomes de demanda.
Pronomes ia es tradisional regardada como un de la categorias sintatical, ma alga teoristes moderna no considera ce los formi un clase sola, par causa de la diversia de funsionas cual los fa. Suspesies inclui pronomes personal, pronomes refletante e resiproca, pronomes posesal, pronomes mostral, pronomes-sujunta, pronomes de demanda, e pronomes de nondefini.
La usa de pronomes envolve comun anaforia, en cuando la sinifia de la pronom depende de un presedente. Esta es aplicada spesial a pronomes personal en la person tre e a pronomes-sujuntas.
La ajetivo cual es asosiada con la pronom es pronomal.
Tipos
[edita | edita la fonte]Personal
[edita | edita la fonte]| Person | Numero | Pronom | |
|---|---|---|---|
| Prima | Singular | me | |
| Plural | nos | ||
| Du | Singular | tu | |
| Plural | vos | ||
| Tre | Singular | el | |
| lo | |||
| Plural | los | ||
Pronomes personal pote es clasida par person, cuantia, jenero e caso. Elefen ave tre persones (prima, du e tre) e du cuantias (singular e plural); la person tre singular ance ave formas distinguida per persones e animales grande ("el"), e per viventes simple, cosas e consetas ("lo").
Refletante e resiproca
[edita | edita la fonte]Pronomes refletante es usada cuando un person o cosa ata sur se, per esemplo, Joan talia se. En elefen, se es usada en la person tre, e singular e plural; per la person prima on usa simple me, e per la person du, tu (singular) o vos (plural).
Pronomes resiproca refere a un relata resiproca. Un esemplo en elefen es: Los no gusta lunlotra. En alga linguas, la mesma formas pote es usada como pronomes refletante e resiproca.
Posesal
[edita | edita la fonte]Pronomes posesal es usada per indica posese (en un sinifia larga). Alga es usada como formulas nomin autonom, e es presededa par la per indica esta: la mea, la nosa, la tua, la vosa, la sua. Un esemplo es: La mea es plu grande ca la tua. Otras debe es usada con un nom, como determinantes: mea, nosa, tua, vosa, sua, per esemplo: Me ia perde mea portamone. Sua es la forma posesal de el, lo, e los.