Blu

De Vicipedia
Jump to navigation Jump to search
Color icon blue.svg

Blu es un color de la spetro otical de lus vidable, entre violeta e verde. La oios de umanas persepi blu cuando los vide lus con un longia de onda entre 450 e 495 nanometres. Blus con un frecuentia plu alta, e donce un longia de onda plu basa, apare gradal plu violeta, en cuando blus con un frecuentia basa e un longia de onda plu longa apare gradal plu verde. Blu pur, en la media, ave un longia de onda de 470 nanometres. En depinta e la teoria de colores tradisional, blu es un de la colores xef de pigmentos, con roja e jala, cual on pote misca per crea un multe colores diversa; blu e roja miscada crea purpur, blu e jala miscada crea verde. Blu es ance un color xef de la model de colores RGB, con roja e verde, cual es usada per crea cada de la colores sur un scermo de un televisador o computador.

La sielo clar e mar profonda apare blu par causa de un efeto otical cual es nomida sperde de Rayleigh. Cuando lus de sol pasa tra la atmosfera, la longias de onda blu es sperdeda plu vasta par la moleculas de osijen e nitrojen, e plu de blu entre a la oios de viventes. An efeto otical, cual es nomida la efeto Tyndall, cual es simil a sperde de Rayleigh, esplica oios blu; oios no ave pigmentos blu. Ojetos distante apare plu blu par causa de un otra efeto otical cual es nomida perspetiva atmosferal.

Blu ia es usada en arte e decora de cuando la eda antica. La petra semivaluosa lapislazuli, de minerias en Afganistan, ia es usada en Egipte antica per joalas e ornas, e a pos, en la Renase, per crea la pigmento blu ultramar, la plu custosa de cada pigmentos. Lo es la color la plu importante en iudisme. En la eda medieval, blu de cobalto ia es usada per colori la fenetra de vitro colorida de catedrales. Ia comensa en la sentenio 9, artistes xines ia usada blu de cobalto per crea porselana blanca e blu. Tinjentes blu per vestes ia es creada de erba de pastel en Europa e de indigo en Asia e Africa. En 1828, un pigmento artifis de blu ultramar ia es creada, e tinjentes e pigmentos artifis blu ia recambia gradal pigmentos mineral e tinjentes vejetal. Pierre-Auguste Renoir, Vincent van Gogh e otra depintores de la tarda de la sentenio 19 ia usa blu ultramar e blu de cobalto no sola per depinta natur, ma ance per crea umores e emosias. En la tarda de la sentenio 18 e en la sentenio 19, blu ia deveni un color popular per uniformas militar e uniformas de la polisia. En la sentenio 20, car blu ia es asosiada comun con armonia, lo ia es elejeda como la color de la banderas de la Nasiones Unida e la Uni European. Prosima de la fini de la sentenio 20, blu oscur recambia gris oscur como la color la plu comun per completas de negosia; sondas ia dise blu ia es la color la plu asosiada con masinia, ante apena de negra, e ance ia es la color la plu asosiada con intelijentia, sabe, calmia, e consentra.

Sondas en Europa e la SUA mostra ce blu es la color la plu comun asosiada con armonia, fida, sertia, distantia, infinitia, imajina, fria, e a veses con tristia. En sondas de opina publica SUA e European, lo es la color la plu popular, elejeda par cuasi dui de ambos de omes e femes como sua color prefereda.


Colores cambia
Negra Gris Blanca Ros Purpur Blu Azul Verde Jala Orania Roja Brun