Renase

De Vicipedia
David, par Michelangelo Buonarroti (Accademia di Belle Arti, Firenze, Italia) es un obra mestral de arte de la Renase e de la mundo.

La Renase ia es un promove cultural cual ia nase en Europa ueste en la sentenios 15 e 16. Lo ia es un periodo de traversa de la eda medieval a la eda moderna. Sua avansas xef ia es en la artes e en la renovi de la siensas. La site Firenze ia es la loca de nase de esta promove, cual ia estende tra la intera de Europa ueste. Lo ia marca la comensa de la eda moderna temprana.

La fundas inteletal de la Renase ia es sua propria varia inventada de umanisme, derivada de la redescovre de la filosofia elinica clasica, como lo de Protagora, ci ia dise ce "la om es la mesura de tota la cosas". Esta pensa nova ia deveni mostrada en arte, arciteta, politica, siensa e leteratur. Esemplos temprana ia es la developa de perspetiva en depinta con olio e la sabe resiclida de fabrica beton. An si la inventa de tipo movable metal ia aselera la difusa de ideas en la tarda de la sentenio 15, la cambias de la Renase no ia es uniforma esperiada tra Europa.

Como un promove cultural, la Renase ia inclui la flori inovosa de latina e linguas demotica. Lo comensa con la renovi en la sentenio 14 de aprende fundida en fontes clasica, cual contemporas ia atribui a Francesco Petrarca; la developa de perspetiva linial e otra tecnicas per rendere un realia plu natural en depinta; e la reformi gradal ma vasta de educa. En politica, la Renase ia contribui a la developa de costumes e praticas de diplomatia, e en siensa lo ia contribui a un depende grandida sur oserva e razona induinte. An si la Renase ia esperia revoluis en multe ativias inteletal, e ance cambiones sosial e political, lo es la plu conoseda per la developas e contribuis artal par eruditas como Leonardo da Vinci e Michelangelo Buonarroti, ci ia inspira la terma "om de la Renase".

La Renase ia comensa en Firenze, en la sentenio 14. On ia proposa teorias diversa per considera la orijinas e cualias de la Renase. Los foca a un varia de fatores, incluinte la stranias sosial e munisipal de Firenze a esta tempo; la strutur political de lo; la sponsoria de la familia dominante de lo, la familia Medici; e la migra de eruditas e testos elinica a Italia pos la cada de Constantinopoli a la turceses osmanian. Otra sentros major ia es sites-statos italian norde como Venezia, Jenoa, Milano, Bologna, e a fini Roma en la papia de la Renase.