Jala

De Vicipedia

Jala es la color de limones matur, eliantos, e oro. Lo es entre verde e orania en la spetro de lus vidable. Lus jala ave un longia de onda entre sirca 570 e 590 nanometres. Lo es un de la colores xef en la sistem sutral de colores, incluida en depinta (con blu e roja) e en primi (con sian, majenta, e negra). En la model de colores RGB, cual es usada per crea cada de la colores sur scermos de computadores e televisadores, jala es un color suordinada cual es creada par combina roja e verde a intensias egal. Diseda par sondas en Europa e la SUA, jala es la color la plu asosiada con diverti, jentilia e spontania, ma ance con engana, invia, avaria e, en la SUA, con coardia. En Iran lo ave conotas de maladia, ma ance sajia e comuta. Lo ave un rol importante en cultur asian, spesial en Xina, do on regarda lo como la color de felisia, gloria, sajia, armonia e cultur.

Istoria, arte e moda[edita | edita la fonte]

Preistoria[edita | edita la fonte]

Jala, en la forma de la pigmento de ocer jala cual es creada de arjilia, ia es un de la colores usada prima en arte preistorial de cava. La cava Lascaux ave un imaje de un cavalo cual es colorida con jala. On estima ce esta imaje ia es creada 17 300 anios en la pasada.

Istoria antica[edita | edita la fonte]

En Egipte antica, jala ia es asosiada con oro, cual ia es considerada como nonputrable, eterna e nondestruable. On ia crede ce la pel e la osos de la dios ia es composada de oro. La egipsianes multe ia usa jala en depintas en tombas; los ia usa o ocer jala o la pigmento briliante orpimento, an si lo ia es creada de arsenico e donce ia es multe nosiva. Un caxa peti de depinta con orpimento ia es trovada en la tomba de Re Tutankhamun. Omes ia es sempre mostrada con fases brun, en cuando femes ia es mostrada con fases ocer o oro.

La romanes antica ia usa jala en sua depintas per mostra oro e tinjes de pel. Lo es trovada comun en la depintas mural de Pompei.


Colores cambia
Negra Gris Blanca Ros Purpur Blu Azul Verde Jala Orania Roja Brun