Blanca

De Vicipedia

Blanca es la color la plu pal. Como negra e gris, lo es un color acromata, pd lo es "sin color". Cuando lus entra a la oio de un umana, si la lus stimula tota de sua tre tipos de selulas cono par cuantia cuasi egal, la resulta es blanca. Blanca es un de la colores la plu comun en natur, la color de lus de sol, neva, lete, creta, calcario e otra minerales comun. En multe de cultures, blanca representa o sinifia puria, nonculpablia, e lus, e lo es la simbolin oposada de negra, o oscuria. Diseda par sondas en Europa e la SUA, blanca es la color la plu asosiada con perfetia, bones, onestia, limpia, la comensa, novia, neutria, e esatia.

En Egipte antica e Roma antica, pretesas ia porte blanca como un simbol de puria, e romanes ia porta un toga blanca como un simbol de sitadania. En la eda medieval e la Renase, un unicorno blanca ia simboli virjinia, e un oveta blanca ia simboli sacrifia e puria; la viduas de res ia vesti se en blanca en loca de negra como la color de lamenta. Lo a veses simboli reia; lo ia es la color de la res franses (negra ia es la color de la reas franses) e de la promove monarciste pos la Revolui Franses, como ance de la promove nomida la Rusces Blanca (no confusa lo con Bielarus, o "Rusia Blanca") ci ia batalia la bolxevistes en la Gera interna de Rusia (entre 1917 e 1922). Templos elinica e roman ia es covreda con marmo blanca, e ia comensa en la sentenio 18, con la ariva de arciteta clasica nova, blanca ia deveni la color la plu comun de eglesas nova, capitolios e otra construidas governal, spesial en la SUA. Lo ance ia es usada comun en arciteta moderna de la sentenio 20 como un simbol de modernia, simplia e fortia.

Blanca es un color importante per cuasi tota relijios mundal. La pape, la xef de la eglesa catolica, ia portada blanca de cuando 1566 como un simbol de puria e sacrifia. En islam e la relijio xinto de Nion, lo es portada par peregrinores; e par la bramanes en Barat. En cultures ueste e en Nion, blanca es la color la plu comun per robas de sposi, simboli puria e virjinia. En multe de cultures asian, blanca es ance la color de lamenta.

En la sistem de colores RGB, cual es usada per crea cada de la colores sur un scermo de un televisador o computador, blanca es creada par misca lus roja, verde, e blu de intensias egal.


Colores cambia
Negra Gris Blanca Ros Purpur Blu Azul Verde Jala Orania Roja Brun