Verde

De Vicipedia

Verde es la color entre blu e jala en la spetro de lus vidable. La oios de umanas persepi verde cuando los vide lus con un longia de onda entre 495 e 570 nanometres. En la sistem de colores sutral, verde es creada par combina jala e blu en depinta, e jala e sian en primi. Verde es un color xef de la model de colores RGB (con roja e blu) cual es usada per crea cada de la colores sur un scermo de un televisador o computador.

Lo es la color de erba e folias vivente, e donce lo es la color la plu asosiada con primavera, crese e natur. La contribuor la plu grande de verde en natur es clorofila, la cimical cual capasi plantas a fotosintese. Multe viventes ia ajusta a sua ambientes verde par adota un tinje verde per camofla. Alga minerales ave un color verde, incluinte esmeralda, cual es verde par causa de sua cromo.

Diseda par sondas en Europa e la SUA, verde es la color la plu asosiada con natur, vive, sania, jovenia, primavera, espera e invia. Verde ave relatas variosa cual pare contrasta; en Europa e la SUA, lo es asosiada a veses con mori, maladia o la diablo, ma en Xina sua relatas es multe positiva, como la simbol de fertilia e felisia.

En la eda medieval e la Renase, cuando la color de vestes ia mostra la prestijia sosial de sua posesor, verde ia es portada par mercatores, bancores e clases alta, e roja ia es la color de nobiles. La Mona Lisa par Leonardo da Vinci porta verde, mostrante ce el no ia es de un familia nobil. La bancas en la Salon Basa brites es verde; los en la Salon Alta es roja. Verde es ance la color tradisional de securia e permete; un lus verde sinifia ce on pote vade, e un carta verde permete on abita permanente en la SUA. Lo es la color la plu importante en islam. Lo ia es la color de la bandera de Muhammad e es trovada en la banderas de cuasi cada pais muslim, e representa la plantas densa de paradiso. Lo es ofte asosiada con la cultur de Er celta, e lo es un color de la bandera de Er. Par causa de sua relata con natur, lo es la color de la promove ecolojial. Grupos political ci promove la proteje de la ambiente e justia sosial descrive se como un parte de la promove verda, nominte se partitos verde. Esta ia indui campanias simil de anunsias comersial, e companias vende produidas verde (o ecolojial sana).


Colores cambia
Negra Gris Blanca Ros Purpur Blu Azul Verde Jala Orania Roja Brun