Color

De Vicipedia
Jump to navigation Jump to search
RGB CMYK 4.jpg

Color es la cualia de la persepi vidal de umanas cual es descriveda par categorias de color, con nomes como roja, blu, jala, verde, orania e purpur. Esta persepi de color deriva de la stimula de selulas cono en la oios de umanas par radia eletromagnetal en la spetro de lus. Categorias de color e spesifas fisical de color es asosiada con ojetos par la longia de onda de la lus cual es refletada de los. Esta refleta es governa par la cualias fisical de la ojeto, per esemplo asorbe de lus, spetros de emete, etc.

Par defini un spasio de color, colores pote es numeral definida par coordinas. La spasio de color RGB, per esemplo, es un spasio de color cual coresponde con tricromatisme umana e con la tre tipos de selulos cono cual responde a la tre bandas de lus: longias longa de onda cual culmina prosima a entre 564 e 580 nanometres (roja); longias media de onda cual culmina prosima a entre 534 e 545 nanometres (verde); e longias corta de onda cual culmina prosima a entre 420 e 440 nanometres (blu). Alga otra spasios de color ave plu ca tre dimensiones de color; per esemplo, en la sistem de colores CMYK, un de la dimensiones relata a la colorosia de colores.

La fotoresetantia de la oios de otra spesies ance varia notable de esta de umanas, e donce lo resulta persepis corespondente diferente de color cual no pote es fasil compara con lunlotra. Per esemplo, abeas e abeones ave vide tricromatica cual es sensosa a ultravioleta (un radia eletromagnetal con un longia de onda entre 10 nanometres e 400 nanometres, plu corta ca lus vidable ma plu longa ca raios X) ma no es sensosa a roja. Papilios ave ses tipos de fotoresetores e ave posible vide pentacromatica. La sistem de vide de color la plu complicada de animales ia es trovada en stomatopodas, cual ave tan multe como 12 tipos de resetores spetral; on pensa ce estas funsiona como unias dicromatica multiple.

La siensa de color es nomida a veses cromatica, colorimetria, o simple siensa de color. Lo inclui la persepi de color par la serebro e oio umana, la orijina de color en materias, la teoria de color en arte, e la fisica de radia eletromagnetal en la estende vidable (cual es refereda comun simple como lus).

Vide ance[edita | edita la fonte]


Colores cambia
Negra Gris Blanca Ros Purpur Blu Azul Verde Jala Orania Roja Brun