Nitrojen

De Vicipedia
Nitrojen licuida

Nitrojen es la elemento cimical con la simbol N e la numero atomal 7. Lo ia es prima descovreda e isolida par la mediciste scotes Daniel Rutherford en 1772. An con Carle Wilhelm Scheele e Henry Cavendish ia fa la mesma a sirca la mesma tempo, Rutherford es jeneral atribuida como la descovre car sua labora ia es prima publicida. La nom, de franses Nitrogène, ia es prima sujestada par la cimiciste franses Jean-Antoine-Claude Chaptal en 1790, cuando el ia trova ce nitrojen ia es presente en asida nitrica e nitrato. Antoine Lavoisier ia sujesta la nom azote, de la elinica ἀζωτικός (azoticos, "no vive") car lo es un gas asfixiante; esta nom es usada un alga linguas, como franses, rusce, romanian e turces, e lo apare en la nomes per alga composadas de nitrojen como idrazina, azidas, e composadas azo.

Nitrojen es la membro la plu lejera de grupo 15 de la table de elementos. Lo es un elemento comun en la universo, estimada a sirca numero 7 en abunda en nosa galasia e la sistem solal. A un temperatur e presa normal, du atomes de nitrojen lia per formi dinitrojen, un gas sin color e odor con la formula N2. Dinitrojen es sirca 78% de la atmosfera de tera. Nitrojen aveni en tota organismes, xef en asidas amino (e donce en protenas), en la asidas nucleal (ADN e ARN) e en la molecula de transfere adenosin trifosfato. La corpo umana conteni sirca 3% nitrojen par masa, numero 4 pos osijen, carbono, e idrojen. La sicle de nitrojen descrive la move de la elemento de la aira a la biosfera e composadas organica, e alora a retro a la atmosfera.

Multe composas importante en industria, como amonia, asida nitrica, nitratos organica (propulsantes e esplodentes), e sianidos, conteni nitrojen. La lia truple multe forte en nitrojen elemental, la lia du en fortia de cualce molecula diatomal pos monosido de carbono, domina la cimica de nitrojen. Esta causa difisilias per organismes e industria en cambia N2 a composadas usosa, ma a la mesma ves, sinifia ce arde, esplode, e descomposa composas de nitrojen per formi gas de nitrojen relasa cuantias grande de enerjia comun usosa. Amonia e nitratos produida par sintese es fertilintes industrial, e la nitratos en fertilintes es contaminantes clavin en la eutrofici de sistemes de acua.

Estra sua usa en fertilintes e conservas de enerjia, nitrojen es un composante de composas organica tan diversa como la Kevlar usada en stofa de fortia alta e la sianoacrilato usada en colas superior. Nitrojen es un composante de cada clase de medisines, incluinte antimicrobiales. Multe medisines es mimas o prodrogas de moleculas sinialinte conteninte nitrojen, per esemplo, la nitratos organica como nitrogliserina e nitroprusido, cual controla presa sangual par metaboli a osido nitrica. Multa drogas cual conteni nitrojen, como cafina e morfina o la amfetaminas sinteseda, ata sur resetadores de neurotransmetadores animal. [[Categoria:Elementos}}