Ren

De Vicipedia
anatomia de la ren: 1. Piramide renal; 2. Arteria interlobal; 3. Arteria renal; 4. Vena renal; 5. Hilo renal; 6. Pelvis renal; 7. Ureter; 8. Calix minor; 9. Capsula renal; 10. Capsula renal inferior; 11. Capsula renal superior; 12. Vena interlobal; 13. Nefron; 14. Sinus renal; 15. Calix major; 16. Papila renal; 17. Colona renal.

La renes es du organos cual sembla favas, trovada en vertebratos. Los es locada a la sinistra e la destra en la spasio retroperitoneal, e en umanas adulte los es sirca 11 cm en longia. Los reseta sangue de la duple de arterias renal; sangue sorti en la duple do venas renal. Cada ren es liada a un ureter, un tubo cual condui urina a la vesica.

La parte xef, strutural e funsional, de la ren es la nefron. Cada ren de un adulte conteni sirca un milion nefrones. La nefron usa cuatro prosedes per cambia la plasma sangual cual flue a lo: filtri, reasorbe, secreta, e escrete. La ren partisipa en la controla de la volum de compartes variosa de fluente, la osmolalia de fluente, la ecuilibra de asidas e alcalines, consentras de eletrolitos variosa, e la estrae de toxinas. Filtri aveni en la glomerulo: un sinci de la volum de sangue cual entra la renes es filtrida. Reasorbedas inclui acua sin disolvedas, sodio, bicarbonato, glucosa, e aminoasida. Secretedas inclui idrojen, amonio, potasio, e asida urica. La renes ance ave funsionas autonom de la nefron: per esemplo, los cambia un presedente de vitamina D a sua forma ativa, calsitriol, e sintese la ormones eritropoietin e renin.

Fisiolojia renal es la studia de la funsion de renes. Nefrolojia es la spesiali medical cual conserna maladias de renes, incluinte maladia renal cronica, sindrom nefritica e sindrom nefrotica, dana acuta de renes, e pielonefrite. Urolojia conserna maladias de la anatomia de la renes e la curso urinal: estas inclui canser, sistes renal, calculos de renes o ureteres, e bloci de la curso urinal.

La metodos usada per trata maladias de la renes inclui esamina de urina (urinalise) par cimicas e microscopios, mesura de funsion renal par estima la rapidia de filtri par la glomerulos (usante sero creatinina), e biopsia renal e tomografia computada per determina anatomia nonormal. Dialise e transplanta de renes es usada per trata fali renal; un o ambos de estas es cuasi sempre usada cuando funsion renal cade a su 15%. Nefrectomia es comun usada per remedia carsinoma de selulas renal.