Sistem limfal

De Vicipedia
Jump to navigation Jump to search
Sistem limfal de la umana

La sistem limfal es un parte de la sistem vascular el un parte importante de la sistem de imunia, composada de un rede de dutos cual porta un licuida nomida limfa (de latina, lympha, cual sinifia "acua") en la dirije de la cor, cual inclui multe nodos limfal e otra organos limfal. La sistem limfal ia es prima descriveda en la sentenio 17, separada par Olaus Rudbeck e Thomas Bartholin. No como la sistem de sirculi, la sistem limfal no es un sistem cluida. La sistem de sircula umana trata sirca 20 litres de sangue per dia tra filtri capilar, cual estrae plasma sin estrae la selulas sangual. Sirca 17 litres de la plasma filtrida es reasorbada direta a la dutos sangual, e la tre litres resta interstisial. Un de la funsiones major de la sistem limfal es la furni un via de reenvia aidante a la sangua per esta tre litres.

La otra funsion major es la defende en la sistem de imunia. Limfa es multe simil a plasma sangual e conteni limfosites. Lo conteni ance dejetadas selulal, baterias, e protenas. Organos asosiada composada de teseda limfal es locas de produi de limfosites. La spleno e la timo es ance organos limfal de la sistem de imunia. La tonsiles es organos limfal asosiada con la sistem de dijesta. Tesedas limfal conteni ance tota strutures cual produi e sircula limfosites, cual inclui la medula de osos e la texedas limfal de la sistem de dijesta.

Sangue no contata direta la selulas e texedas funsional en la corpo (estra en la caso de un feri cual causa la rompe de un o plu dutos de sangue), ma composantes de la sangue sorti prima la dutos microvascular (capilares, arterietas, e venetas) e deveni la licuida interstisial cual contata la selulas de la dutos microvascular de la corpo. Limfa es la licuida cual es formida cuando la licuida interstisial entra la dutos limfal inisial de la sistem limfal. La limfa es alora moveda longo la rede limfal par o la contratas propre de la dutos limfal, o par la compresas esterna de la dutos par texedas esterna (pe la contratas de musculos sceletal), o par cores limfal en alga animales. La organiza de la nodos e drena limfal segue la organiza de la corpo en rejiones esterna e interna; donce, la drena limfal de la testo, membros, e la mures de la cavetas corpal segue la via esterna, e la drena limfal de la torax, adomen, e cavetas de la pelvis segue la via interna. Ultima, la dutos limfal descarga en la dutos limfal grande, cual drena en un de la du venos suclaviculal, prosima a sua junta con la venos jugulal interna.