Cultur de la vicinges
Fontes variada lumina la cultur, ativias, e credes de la vicinges. An si los ia es jeneral un cultur non-alfabetiste cual no ia produi un lega de leteratur, los ia ave un alfabeta de ia descrive se sur la petras de runas. La plu de scrives sur la vicinges veni de otra cultures cual ia interata con los. De la media de la sentenio 20 media, arceolojia ia construi un comprende plu completa e verosa de la vives de la vicinges. La arcivo arceolojial es spesial rica e variada, e mostra informa sur sua abitas, campanian e urban, sua artisania e produis, barcones e aparatos militar, redes de comersia, e sua ojetos e rituos relijiosa - pagan e cristian.
Leteratur e lingua[edita | edita la fonte]
La fontes propre la plu importante sur la vicinges es testos de sua eda de Scandinavia e rejiones do la vicinges ia es ativa. Scrive en leteras latina ia es introduida a Scandinavia a la introdui de cristianisme, donce fontes nativa es rara sur Scandinavia ante la sentenios 11 tarda e 12 temprana. La scandinavianes ia scrive sur petras usante runas, ma los es tipal corte e formulin. La plu de fontes contempora es composada de testos scriveda en comunias cristian e muslim estra Scandinavia, comun par autores ci ia es afetada negativa par la atas de la vicinges.
Scrives plu tarda sur la vicinges pote es ance importante per comprende la vicinges, an si on debe trata los con cura. Pos la institui de la eglesas, fontes nativa ia comensa apare, en latina e norsce vea. En la colonia vicing de Island, un leteratur multe spesial ia flori en la sentenios 12 tra 14, e multe tradisiones asosiada con la eda de vicinges ia es notada per la ves prima, en la sagas islansce. Un interprete leteral de esta naras es dutable, ma multe elementos spesifada resta meritosa de considera, per esemplo, la descrive de familias, autodescrives, valuas e moralia, etc.
Nondireta, la vicinges ia presenta ance modos per vide sua lingua, cultur, e ativias, tra la multe nomes de locas en norsce vea. Per esemplo, nomes como Egilsay (la isola de Eigil), Ormskirk (eglesa de Orm), Meols (dunas), Snaefell (cade de neva), Ravenscar (roca de la corvon), Vinland (pais de bacas de vin), Kaupanger (porto de mercato), Tórshavn (porto de Tor), e Odense (loca a cual Odin ia es adorada). La influe de la vicinges pote ance es videda en consetas como la parlamento de Tynwald a la Isola Man oji.
Norsce vea ia influe otra linguas, spesial engles, ma ance franses (spesial lo de Normandia), nederlandes, deutx (spesial lo de la norde), suomi, esti, latvisce, lietuvisce, polsca, e rusce.
Petras de runas[edita | edita la fonte]
La scandinavianes pote leje e scrive en un alfabeta nomida la runor (runas). No multe restas de scrive en runas sur paper esiste, ma miles de petras con enscrives ia es trovada. Tipal, los es monumentos a la morida, an si no sempre locada a la tombas propre. La usa de la runas ia survive a en la sentenio 15, paralel usada con la alfabeta latina.
La plu de enscrives de la eda de vicinges es trovada en Sveria e es de la sentenio 11. La petra la plu vea ia es trovada en Norsce e es de la sentenio cuatro, cual sujesta ce enscrives ia comensa plu temprana ca la eda de vicinges. Multe petras recorda la nomes de partisipores en atacas par la vicinges. Per esemplo, la petra de runas de Kjula nara sur gera estendeda en Europa ueste, e lo de Turinge nara sur un grupo de gerores en Europa este. Otra petras nota la omes ci ia mori en la esploras de la vicinges. Entre estas es sirca 25 petras de Ingvar en la distrito de Mälardalen en Sveria, per onora la membros de un mision desastrosa a en la rejion de Rusia en la sentenio 11 temprana.
La petras de Jelling es de un data entre 960 e 985. La petra plu vea e plu peti ia es erijeda par re Gorm la vea, la re pagan final de Danmarc, como un monumento onorante rea Thyrve. La petra plu grande ia es erijeda par sua fio, Harald denteblu, per selebra la concista de Danmarc e Noria e la converti de la dansces a cristianisme. Lo ave tre lados: un con un imaje de un animal, un con un imaje de Jesus Cristo, e un con la enscrive seguente:
- Re Harald ia comanda ce esta monumento es fabricada per recorda Gorm, sua padre, e per recorda Thyrve, sua madre;
- e ce Harald ia gania per se mesma tota de Danmarc e Noria, e ia fa ce la dansces deveni cristian.
La petras de runas atesta ance la viajas a locas como Bath, Elas, Hvarazm, Jerusalem, Italia (Langobardland), Serkland (pd la mundo muslim), England (incluinte London), e locas variosa en Europa este.
Entera[edita | edita la fonte]
Multe tombas es asosiada con la vicinges tra Europa - en Scandinavia, England, Scotland, Er, la Isolas Faro, Deutxland, la paises de la Baltica, Rusia, etc. La formas de entera de la vicinges ia es multe variada, de enteras simple en la tera, a tumulos, e a veses incluinte la enteras de barcones.
Seguente fontes scriveda, la plu de funeras aveni a mar. La funeras inclui o entera o seni, dependente a la costum de la area. Tumulos es un de la indicas de prestijia en la eda de vicinges. La cosas enterada con la mor dona indicas per cual ia es importante per la vive pos moria. Nos no sabe cual rituos los usa per enfantes mor.
Barcones vicing[edita | edita la fonte]
Arceolojistes ia trova un cuantia de barcones de tota grandias, cual dona sabia de la artisania eselente par cual los ia es fabricada. On ave multe tipos de barcones, ma la plu conoseda es probable la barcon longa. La barcones longa ia es intendeda per gera e esplora, desiniada per sua rapidia e ajilia, e ia es furnida con remos per aida la velas, cual permete naviga autonom de la venta. La barcones longa ia es usada multe par la Leidang, la marinas cual defende Scandinavia.
La vicinges ia construi multe otra tipos de barcones, comun usada per taxes plu pasosa. La knarr ia es un barcon de comersia, desiniada per porta carga pesosa. Lo ia ave un casco larga cual senta plu profonda en la acua, e un cuantia peti de remos (usada per manobra en portos). Un inova par la vicinges ia es la beitass, un verga afisada a la vela per naviga efetosa contra la venta. Barcones trae comun barcos plu peti per pasa ecipos e carga de la barcon a la costa.
Barcones ia es un parte importante en la cultur de la vicinges. Los ia permete la transporta dial ultra mares e rios, la esplora de paises nova, concistas, e comersia con cultures visina. Los ia ave ance un importa major relijiosa. Persones con prestijia alta ia es a veses enterada en un barcon con sacrifias de animales, armas, furnis, e otra cosas. Esemplos inclui la barcones a Gokstad e Oseberge en Noria, e lo a Ladby en Danmarc. Vicinges ia usa ance enteras con barcones en otra paises, per esemplo la barcones de Salme en Este.
Restas bon conservada de sinco barcones de vicinges ia es escavada de la fiordo Roskilde en la desenio de 1960, con ambos barcones longa e la knarres. La barcones ia es afonda ala en la sentenio 11 per bloci un canal de naviga e proteje Roskilde, alora la capital dansce, de un ataca de mar. La restas de esta barcones es esibida a la Museo de Barcones Vicing en Roskilde.
Sosia[edita | edita la fonte]
.jpg)
La sosia de la vicinges ia es divideda entre tre clases sosioeconomia: þræl (~tral), karl (carl), e jarl (iarl). Esta es descriveda vivosa en la poesia Rígsþula, cual esplica ance ce la dio Ríg - ance conoseda como Heimdall, la creor de umania - crea la tre clases. Arceolojia ia confirma esta strutur sosial.
La þræl ia es de la clase la plu basa, cual es per dise, sclavos. Sclavia ia es multe importante en la sosia vicing, per taxes dial e construis grande e ance per comersia e la economia. Sclavos ia es servores e laborores a la cultiverias e casas de familias grande, e los ia es usada per construi fortreses, rampas, canales, montones, ruas, e laboras simil. Seguente la Rígsþula, la sclavos ia es despetada. Sclavos nova ia es furnida par la fios e fias de sclavos, o par catura en paises stranjer. Sclavos ia es emportada par barcon o usada a la loca per fabrica construidas nesesada, o an vendeda a la arabis per arjento.
Karles ia es campanianes e laborores libre. Los ia posese cultiverias, tera, e bestias. Sua laboras inclui aradi la campos, prende lete, construi casas e vagones, ma usa la sclavos per multe taxes plu. Los ia es simple omes libre.
La jarles ia es la aristocrates de la sosia de la vicinges. Los ia es rica e poseseda proprias grande con casas longa, cavalos, e multe sclavos. La sclavos labora a la plu de taxes dial, en cuando la jarles dirije e governa, xasa, jua sportes, visita otra jarles o vade a misiones variosa. Cuando un jarl ia mori e ia es enterada, sua sclavos de casa ia es a veses matada como sacrifias e enterada con la jarl, como multe escavas ia mostra.
En vive dial, on ave multe roles a la media en la strutur sosial, e lo es posible ce alga movablia sosial ia esiste. La detalias no es clar, ma titulos e roles como hauldr, thegn, landmand, etc, mostra alga movabilia entre la karles e la jarles.
Otra strutures sosial inclui la comunias de félag (sindicato) en sferas e sivil e militar, a cual sua membros ia es obligada. Un félag pote es sentrida sirca un artisania, la posese comun de un barcon, o un obliga militar su un xef spesifada. On ave ance comunias ofisial en vilas e sites per la defende, relijio, la sistem legal, e la thing.
Femes ia ave un state relativa libre en Scandinavia. La tia padral, la sobrina padral, e la neta (tota nomida odalkvinna) ia ave la direto per erita propria de un om morida. Si no relatas mas esiste, un fem nonsposida pote erita propria e la rol de xef de la familia de un padre o frate morida. Un tal fem ia es clamada un baugryg, e el ia ave tota diretos de un xef de familia - pe la direto per comanda e reseta multas per la mata de un membro de la familia - asta ce el sposi, cuando sua diretos es pasada a sua sposo nova.
A la eda de 20, un fem nonsposida, nomida maer o mey, ia ateni adultia legal, e ia ave la direto per deside sua loca de abitua e ia es videda como sua person propre en la lege. Un eseta de sua autonomia ia es la direto per eleje un om per sposi, car sposis ia es normal ordinada par la familia. Viduas ia ave la mesma state autonom como femes nonsposida.
Un fem sposida ia pote divorsa sua sposo e resposi. Lo ia es ance sosial asetable ce un fem libre ta coabita con un om e ave enfantes con el sin sposi el, an si la om es sposida; un fem como esta ia es nomida un frilla. La enfantes naseda su esta situa no ia es distinguida de los parida par un fem sposida. La distingui entre enfantes "legal" e "nonlegal" no ia esiste.
Femes ia ave autoria relijiosa e ia es ativa como pretes fema (gydja) e oraculos (sejdkvinna). Los es ativa en la artes como poesistes (skalder) e mestres de la runas, e como mercadores e medicas. Posible, los ia es ativa militar: la naradas sur "femes de scermo" no es confirmada, ma alga descovres arceolojial sujesta ce a min alga femes ia ave autoria militar. Esta librias ia desapare lente pos la introdui de cristianisme, e pos a sentenio 13, los no es plu notada.
Joala[edita | edita la fonte]
La tre clases ia es fasil reconosable par sua apares. Omes e femes de la jarles ia ave stilos de capeles bon ordinada, e los ia mostra sua ricia e prestijia par porta vestes cara (comun de seda), con joalas bon fabricada, fibias de sintures, broxes, e anelos de brasa. Broxes ornada de arjento e colaretas con perletas de vitro colorida ia es portada par femes de la karles e jarles. La plu de la joalas ia inclui desinias unica de la vicinges. Ma anelos de la ditos ia es rara, e orealetas no ia es usada an nunca (los ia es videda como la ornas de la slavicas). La plu de karles e sua femes ia espresa modas simil, ma plu simple.
Cosina[edita | edita la fonte]
La sagas nara sur la cosina de la vicinges, e evidentes como posos de cloaca, montones de dejetada de cosina, e dejeterias ofre plu informa. La evidentes de este fontes variosa sujeste un cosina e ingredientes diversa. Carne de tota tipos, fumida, secida, salosa, e conservada con sero, salsixes, pesos fresca de carne bolida o fritada, ia es preparada e comeda. On ave cuantias grande de comedas de mar, pan, gaxa de avena, produidas de la leteria, vejetales, frutas, bacas, e nozes. Bevidas de alcol como bir, idromel, bjórr (un vin forte de fruta), e per la ricas, vin importada, ia es servida.
Alga bestias ia es tipal e unica per la vicinges, incluinte la cavalos islansce, boves islansce, un abunda de razas de oveas, la gales dansce, e la gansos dansce. La vicinges en York ia come xef bove, ovea, e porco, con cuantias peti de cavalo. La plu de la osos de boves e cavalos ia es trovada duida longa, per estrae la medula. La oveas e porcos ia es taliada a juntas de gamas e spalas. La restas comun de cranios de porcos e osos de pedes trovada sur la solos de casas indica ce la serebro e carne de pedes ia es ance popular. Gales ia es elevada per e sua carne e ovos, e la osos de avias xasada como la fasianes galin, pluviales oro, patos savaje, e gansos ia es ance trovada.
Comedas de mar ia es importante, e en alga locas an plu ca carne. balenas e morsas ia es xasada per come en Norsce e la partes norde-ueste de la rejion de la Atlantica norde, e focas ia es xasada en cuasi tota locas. Ostras, mules, e gambas ia es comeda en cuantias grande, e gados e salmones ia es pex popular. En la rejiones plu sude, arenges ia es ance importante.
Lete e sero de bur ia es popular, como ingredientes per coce e como bevidas, ma no ia es sempre disponable, an en cultiverias. Lete es prendeda de boves, capras, e oveas, bur e ceso ia es produida, e lete fermentada, pe skyr o surmjölk.
La vicinges comun usa sal o otra spises, algas importada (como peper negra), e otras cultivada en jardines de erbas o recolieda a tera savaje. Spises cultivada ia inclui carvi, mostarda, seleri, tim, baca de juniper, mirto dulse, milfolia, ruta, lepidio, aneto, coriandro.
Vicinges ia recolie e come frutas, bacas, e nozas. Pomos savaje, prunos, e serisas ia es un parte de sua dieta, e ance fruta de la rosa, frambosa, fresa, mora, sambuco, sorbo, spinablanca, e otra bacas savaje. Nozas propre e nozetas ia es importante.
La inventa e introdui de la arado con inversador ia cambia cultiva en Scandinavia e ia capasi cultiva an en tera povre. En Ribe, per esemplo, granes de segal, orzo, avena, e trigo de la sentenio oto ia es trovada e esaminada, e pare es cultivada local.
Granes e farina ia es usada per gaxas, algas coceda con lete, otras coceda con fruta o dulsida con miel, e ance per tipos variosa de pan. Restas de pan de Birka en Sveria ia es fada de orzo e trigo. Lo no es clar si la norsces ia usa fermentante, ma sua fornos e utiles de forni sujesta ce si.
Lino ia es un cultiva importante per la vicinges. Lo ia es usada per estrae olio, per come, e la plu importante, la produi de stofa. Plu ca 40 persento de tota stofa descovreda de la eda de vicinges es de lino. Esta sujesta un persento an plu grande, car stofa de lino no es fasil conservada, comparada con lana, per esemplo.
La cualia de la comedas per la popla comun no ia es sempre multe bon. Rexerca mostra ce la vicinges de York ia fabrica pan de farina intera - probable e trigo e segal - ma con la semes de malerbas incluida. Agrostema ia fa ce la pan deveni plu brun, ma la semes es venenosa, e persones ci come la pan pote deveni malada.
Semes de carota, pastinaca, e col ia es ance descovreda, ma los ia es esemplos povre e ia tende de veni de carotas blanca e col amarga. La molines de mano comun usada ia lasa fratas peti de petra (comun basalto) en la farina, cual, cuando comeda, gasta la dentes. La efetos de esta pote es videda a la resta sceletal de la periodo.
Sportes[edita | edita la fonte]
Sportes ia un parte comun en la vive de la vicinges. Sportes con armas e combate ia es popular. Estas inclui lansa de lansias e petras, e la developa de fortia par luta, boxe, e la leva de petras. En areas con montes, la trepa de los ia es sporte. Ajilia e ecuilibria ia es developada par core e salta per sporte, e un esemplo spesial ia es la salta de un remo a un otra estra la rel de la barcon en cuando lo ia remida.
Nada ia es un sporte popular e Snorri Sturluson ia descrive tre tipos: tufa, nada de distantia longa, e competes en cual competores atenta sumerji lunlotra. Enfantes ia partisipa comun en alga sportes, e femes ia es notada como nadores, an si lo no es clar si los ia compete. Re Olaf Tryggvason ia es lodada como un mestre de trepa de montes, salta entre remos, e la arte de jogla coteles.
Sci e patini ia es la sportes prima de inverno per la vicinges. Ski ia es ance usada como un modo de transporta en inverno e en la rejiones plu fria de la norde.
Combate entre cavalos ia es un sporte, ma la regulas no es clar. Posible lo inclui du cavalos mas combatente con lunlotra, con la odor e vista de cavalos fema prosima en un coral. Esta combates ia resulta comun en la mor de un de la cavalos mas.
Fontes islansce refere a un sporte nomida knattleik. Lo ia es un jua de bal simil a oci, ma con un baston e bal peti e dur, e juada sur un campo lisa de jelo. La regulas no es clar, ma lo ia es popular con adultes e enfantes, an si lo resulta comun en feris. Knattleik ia es juada sola en Island, do lo ia atrae multe vidores.
Xasa como un sporte ia es limitada a Danmarc, do lo no ia es videda como un ocupa multe importante. Avias, servos, lepres, e volpes ia es xasada con arco e lansias e plu tarda con balestas. La tecnicas inclui trasa, trapa, e xasa con manadas de canes.
Juas e divertis[edita | edita la fonte]
Juas de table e de dados ia es juada como un pasatempo popular a tota grados de sosia. Pesos e tables conservada mostra tables construida de lenio e pesos de petra, lenio, o oso. Alga trovas inclui tables estravagante siselida e pesos de vitro, ambar, corno de servo, o denton de morsa, e materias de orijinas stranjer, como ivor.
La vicinges ia jua varias de juas nomida tafl (tafel), pd table: hnefatafl, nitavl (jua de la molin), e la min comun kvatrutafl (trictrac temprana). A la fini de la eda de vicinges, xace deveni popular. Hnefatafl ia es un jua de gera. Ordinada en la media de un table de 11 par 11 cuadros es un peso nomida la re e sua 12 soldatos. Ordinada a la borda de la table es 24 soldatos atacante. La gol per la 24 es la catura de la re par ensirca lo con cuatro soldatos, e la gol per la lado de la re, move el a un de la bordas. La sagas sujesta ce mone o otra valuadas ia es comun un parte de la jua.
A festas, naradas, poesias, musica, e alcol (como bir e idromel) ia contribui a la ambiente. Musica ia es videda como un arte, e capasia per musica ia es espetada per un om de cultur. La vicinges ia jua strumentos como arpas, violines, liras, e lutos.