Orzo

De Vicipedia
Jump to navigation Jump to search
Orzo.jpg

Orzo (Ordeo vulgar) es un grano sereal anial cual es usada como un comeda per bestias, e, en cuantias plu poca, per bir e pan. El es un membro de la familia Poal ("erbas vera"). Orzo es la colieda como la sereal cuatro en grandia en la mundo. El desende de orzo savaje (Ordeo spontaneo).

La plu vea caso de doma es en areas neolitica en Asia sude-ueste (pe Suria e Irac), un area de acua relativa abundante, e prosima a la rio Nilo. Lo es tan vea como trigo ungran e trigo dugran. Orzo savaje es trovada de Africa norde e Crita a la ueste, a Tibet en la este. Seguente alga espertas, La evidentes la plu vea de orzo savaje en un contesto arceolojial veni de la epipaleolitica a Ohalo 2 a la fini sude de la Lago Tiberia. La restas ia es datida a sirca 8500 aec. Otra espertas ia scrive ce la evidentes la plu temprana veni de Jarmo en Curdistan (en Irac moderne).

La sperde de tipos de orzo de 9000 a 2000 aec

Un de la cultivedas la plu importante en la mundo, orzo ia es domada prima en Asia sude-ueste sirca 9000 aec. Lo ia es un cultivada forte, capas de es cultivada en ambientes variosa e marjinal, como en la rejiones alta e plu norde. La evidentes arceobotanial mostra ce orzo ia sperde tra Eurasia par 2000 aec. Par la usa de analise jenetical, espertas ia pote trasa la sperde tra alga vias diferente, separada en tempo e spasio.

Un reporta de rasionas de orzo donada mensal a adultes (30 o 40 otigalones) e enfantes (20 otigalones) scriveda en cuneforma sur un tableta de arjila en la anio 4 de Re Urukagina (sirca 2350 aec), de Girsu, Irac. Alga espertas crede ce orzo domada ia sperde orijinal de Asia sentral a India, Persia, Mesopotamia, Suria, e Egipte. Algas de la orzo domada la plu temprana aveni a locas neolitica nonseramica en Asia sude-ueste como trovada a Tell Abu Hureyra en Suria. Pos 4200 aec, orzo domada aveni tan distante como Suomi este, e ia ateni Elas e Italia sirca la sentenio 4 aec. Orzo ia es cultivada en Corea de la periodo de vasos de Mumun temprana (sirca 1500-850 aec), con otra cultivas como trigo, milio, e legumes.

Orzo (nomida Yava en Sanscrito vedica e clasica) es notada multe veses en la Rigveda e otra scrives de India como un de la granes xef en India antica. Indicas de la cultiva de orzo ia es ance trovada en la eda de bronze en la sivilia Harapan de 3700-1300 aec.

Bir de orzo ia es probable un de la bevidas alcolosa prima developada par umanas neolitica. Bir de orzo ia es an usada como un forma de mone. Lo ia es nomida akiti en Sumer. En Mesopotamia, un tronceta de orzo ia es la simbol xef de la diva Shala. Con trigo dugrano, orzo ia es la sereal multe sinifiante de Egipte antica, do lo ia es usada per produi bir e pan. La nom jeneral per orzo en Egipte ia es jt (pron. "it"), e šma (pron. "xema") es la orzo de Egipte superior, e es la simbol de acel rejion. Seguente Deuteronomio 8:8, orzo es un de la "sete spesies" de cultivadas cual marca la fertilia de la pais prometeda Canan, e lo ave un rol importante en la sacrifias par la israelis descriveda en la Tora. Un importa relijiosa estendeda a la eda medieval en Europa.

Rasionas de orzo per laborores apare en la tablets en linial B a Knoso e a Pilo misenean. En Elas, la sinifia en rituos de orzo dati posible a la misterios eleusian. La bevida de la comensantes, preparada de orzo e erbas, ia refere en un imno par Homer a Demeter, de ci sua nom alga espertos crede sinifia "madre de orzo". La tradision ia es per seca la orzo craseda e rosta los ante prepara la gaza, seguente la Istoria Natural de Plinio la Vea. Esta produi un malta cual fermente pronto e deveni cuasi alcolosa.

Plinio ia nota ance ce orzo ia es un comeda spesial per la gladiatores, ci ia es nomida la hordearii ("comores de orzo"). Ma, el ia ajunta, a la eda roman, trigo ia repone orzo como un comeda sentral.

Orzo tibetan ia es un comeda sentral en cosina tibetan de la sentenio 5 ce. Esta gran, con la clima fria cual ia permete reserva, ia produi un sivilia cual ia es capas de eleva armadas grande. Lo ia es preparada como un farina nomida tsampa cual es ancora aora un comeda importante en Tibet. La farina es rostada e miscada con bur e te de bur per forma un pasta rijida cual es comeda en bales peti.

En Europa medieval, pan fabricada de orzo e segal ia es videda como la comeda de campanianes, e produidas de trigo ia es comeda par la clases superior. Patatas ia repone orzo en Europa este en la sentenio 19.