Jesus Cristo

Jesus Cristo

La Cristo Pantocrator de la Monceria de San Catalina de Monte Sinai a Monte Sinai, sentenio 6 ec

Informa personal

Nase: 6 a 4 aec, rena de Herod, Impero Roman
Mori: 30 o 33 ec, Ieruxalim, Iudea, Impero Roman

Otra informas

Profesa: carpentor, predicor iudi

Jesus (s 6 a 4 aec - 30 o 33 ec), ci on nomi ance Jesus Cristo,, Jesus de Nazaret e otra nomes e titulos variosa, ia es un predicor iudi e xef relijiosa de la sentenio prima en la provinse roman Iudea. El es la figur sentral de cristianisme, la relijio la plu grande de la mundo. La plu de ramos de cristianisme regarda Jesus como la incarne de Dio la Fio e la Maxia o Cristo espetada. La Evanjelios, spesial la cuatro Evanjelios canonal de la Atesta Nova, conteni la naras de la vive de Jesus. De la Lumina, rexerca academial ia produi vistas diversa sur la fidablia istorial de la Evanjelios e la grado a cual los refleta la Jesus istorial, ma cuasi tota eruditas moderna de anticia acorda ce Jesus ia esiste istorial.

Longo la tradision cristian, como la Evanjelios e la Atas de la Apostoles representa lo, sua jenitores ia sircoside Jesus a eda de oto dias e ia presenta el a la Templo de Ieruxalim a 40 dias. Joan la Batizor ia batiza el cuando el ia es un adulte joven, e, pos 40 dias e notes de juna en la tera savaje, el ia comensa sua servi publica. El ia es un ensenior vagante ci, longo la credes de sua seguores, ia posese autoria divin per interprete la lege iudi. Frecuente Jesus ia debate con otra iudis, la plu comun la fariseos e saduseos, sur la modo la plu bon per segue Dio. El ia remedia maladas, ia ensenia par parabolas, e ia colie seguores, de ci el ia asinia 12 per es sua apostoles. Longo la naras de la Atesta Nova, la autoriosas ia aresta el en Ieruxalim e la Sanhedrin ia litiga el. Los ia dona el a la autoriosas roman, e Pontio Pilato, la prefeto roman de Iudea, ia comanda ce on crusi el. En la teolojia cristian, Cristo ia revive de la mores a la dia tre pos sua mori, e esta funda de crede ia developa a la Eglesa cristian temprana, cual ia estende a un promove mundal.

La teolojia cristian inclui la credes ce la Spirito Santa ia consepi Jesus, ce un virjin nomida Maria ia pari el, ce el ia fa miracles, ia fundi la Eglesa cristian, ia mori par crusi como un sacrifia per espia pecas, ia revive de la mores a la dia tre, e ia asende a Sielo, de do el va reveni. Cristianes crede comun ce Jesus capasi ce la popla reconsilia con Dio. La Crede de Nisea afirma ce Jesus va judi la viventes e la mores, o ante o pos lor revive corpal, un aveni cual escatolojia cristian asosia con la Ariva Du de Jesus. Multe ramos de cristianisme regarda Jesus como la incarne de Dio la Fio, la person du de la tre persones de la Trinia. A cada anio, tipal a 25 desembre, on selebra la nase de Jesus en Betlehem como natal. On onora sua crusi a venerdi santa e sua revive a soldi de pascua. La eda de calendario cual la mundo usa la plu vasta, en cual la anio presente es 2026 ec, es fundida tradisional sur la data aprosima de la nase de Jesus.

Iudisme tradisional rejeta la crede ce Jesus ia es la maxia espetada, afirmante ce el no ia reali la predises maxial, ce nun ia unje legal el, e ce el ia es no divin no reviveda. Par contrasta, islam regarda Jesus como la maxia e un profeta de Dio, ci Dio ia envia a la ivris e ci va reveni a Tera ante la Dia de Judi. Muslimes crede ce la virjin Maria ia pari Jesus, ma ce el ia es no Dio no la fio de Dio. La plu de muslimes no crede ce on ia mata o ia crusi el, ma ce Dio ia leva el a Sielo en cuando el ia es ancora vivente. La credores de bahaisme, durzi e rastafarisme venera ance Jesus.

Nom

Un person iudi en la tempo de Jesus ia ave tipal sola un nom, pos cual on ia ajunta a veses un espresa padral en la forma "fio de [nom de padre]", o la vila de orijina de la person. Donce, en la Atesta Nova, on nomi comun Jesus como "Jesus de Nazaret". La visinas de Jesus en Nazaret ia nomi el "la carpentor, la fio de Maria e frate de Jacobo e Joses e Judas e Simon", "la fio de la carpentor", o "la fio de Josef"; en la Evanjelio de Joan, la disiplo Filipo refere a el como "Jesus, fio de Josef, de Nazaret".

La nom Jesus es la transleteri (tra la latina Iesus) de la elinica antica Ἰησοῦς, cual es la varia elinica de la nom ivri Joxua (יְהוֹשֻׁעַ‎ Yehoxua). La nom ivri/arami ia es comun entre iudis judean a la tempo de la nase de Jesus, an si a acel periodo popla ia corti ja lo de יְהוֹשֻׁעַ‎ (Yehoxua) a יֵשׁוּעַ (Yexua); la corti ia aveni ja en libros biblial plu tarda como Nehemia, en cual on nomi Joxua como Yexua.

La nom sinifia "Dio salva" en ivri, leteral "Iaue salva", de la radis ישׁע (y-š-ʿ, 'salva') e la nom יְשׁוּעָה (yexuah, 'salva'). La Evanjelio de Mateo afirma direta la sinifia etimolojial de la nom de Jesus en la predise de la anjel a Josef sur sua nase: "tu va nomi el Jesus (Ἰησοῦς), car el va salva sua popla de lor pecas".

Comentores ia dona un sinifia teolojial a la fato ce Joxua, la susedor de Moxe, porta la mesma nom como Jesus en la elinica, ivri, e arami orijinal, car on trasa frecuente un paralel entre la du xefes e la etimolojia de lor nom compartida ('salva'): Joxua gida la iudis a en la Tera Prometeda, en cuando la teolojia cristian dise ce Jesus salva e iudis e noniudis de lor pecas.

Jesus Cristo

De la sentenio prima, cristianes nomi comun Jesus como "Jesus Cristo". La parola Cristo no es un nom individual ma ia es orijinal un titulo o posto ("la Cristo"), sinifiante "la Maxia". La terma deriva de la elinica Χριστός (Christos), un tradui prestada de la parola ivri משיח (maxiakh), transleteri a elefen como maxia. La terma ivri sinifia "unjeda", de la verbo מָשַׁח (maxaḥ), "frota con olio, unje". En la Septuajinta, la traduores ia usa la parola elinica χριστός (christos), sinifiante "unjeda", de la verbo χρίω (chrio), "frota con olio, unje". En iudisme biblial, pretes ia usa olio santa per unje persones e ojetos spesial santa como parte de lor indui relijiosa.

Cristianes temprana ia nomi Jesus como "la Cristo" car los ia crede ce el es la Maxia de ci la ariva es prediseda en la Biblia ivri (Atesta Vea). En usa posbiblial, la popla ia comensa regarda Cristo como un nom — un parte de "Jesus Cristo". La parola cristian, sinifiante un seguor de Cristo, es en usa de la sentenio prima.

Vive e instruis en la Atesta Nova

Evanjelios canonal

Un papiro elinica de sentenio 3 de Evanjelio de Lucas

La cuatro evanjelios canonal (Mateo, Marco, Lucas, e Joan) es la fontes xef per la vive e mesaje de Jesus. Otra partes de la Atesta Nova inclui ance referes a episodios clavin en sua vive, como la Come Ultima en 1 Corintianes 11:23-26. Atas de la Apostoles refere a la servi temprana de Jesus e la previde de lo par Joan la Batizor. Atas 1:1-11 furni plu detalias sur la Asende de Jesus ca la evanjelios canonal. En la leteras nondisputada de Paulo, cual el ia scrive plu temprana ca la evanjelios, el sita a alga veses la parolas o instruis de Jesus.

Alga grupos cristian temprana ia ave descrives separada de la vive e instruis de Jesus cual la Atesta Nova no inclui. Estas inclui la Evanjelio de Tomas, la Evanjelio de Petro, la Evanjelio de Judas, la Apocrifa de Jacobo, e multe otra scrivedas apocrifa. La plu de eruditas conclui ce autores ia scrive esta testos plu tarda, e ce los es min istorial fidable ca la evanjelios canonal.

Autoria, data, e fidablia

La evanjelios canonal es cuatro naras, e la tradision atribui cada a un autor diferente. La eruditas regarda jeneral la autores de la evanjelios como usante nomes falsa. La tradision atribui los a la cuatro evanjelistes, cada asosiada con Jesus o sua seguores prosima: Marco a Joan Marco, un acompanior de Petro; Mateo a un de la disiplos de Jesus; Lucas a un acompanior de Paulo notada en alga leteras; e Joan a un otra de la disiplos de Jesus, la "disiplo amada".

Seguente la primia de Marco, la evanjelio prima cual on ia scrive ia es la Evanjelio de Marco (60-75 ec), segueda par la Evanjelio de Mateo (65-85 ec), la Evanjelio de Lucas (65-95 ec), e la Evanjelio de Joan (75-100 ec). La plu de eruditas acorda ce la autores de Mateo e Lucas ia usa Marco como un fonte per lor evanjelios. Car Mateo e Lucas comparti ance alga contenida no trovada en Marco, multe eruditas dedui ce los ia usa un fonte ipotesal Q en ajunta a Marco, en cuando un cuantia cresente suporta la ipotese de Farrer o la Posterioria Matean, en cual Mateo e Lucas ia usa direta lunlotra. Lucas e Mateo trata lor fontes plu conservante ca otra istoristes antica como Diodoro de Sisilia, an si la paraleles e varias de la evanjelios sinotica es tipal de biografias istorial antica.

Un aspeta importante de la studia de la evanjelios es la jenero leteratural a cual los parteni. La jenero "es un costum clavin cual gida e la composa e la interprete de scrivedas". Esce la autores de la evanjelios ia intende scrive novelas, mitos, istorias, o biografias ave un efeto sinifiante sur como on debe interprete lor obras. Alga studias ia sujesta ce on debe regarda la evanjelios como un forma de biografia antica. An si criticistes esiste, la vista ce la evanjelios es un tipo de biografia antica representa la acorda jeneral entre la eruditas oji.

Consernante la esatia de la naras, la puntos de vista varia entre regarda los como descrives nonerante de la vive de Jesus, asta duta lor fidablia istorial a puntos diversa, e asta regarda ce los furni multe poca informa istorial sur sua vive ultra la fatos fundal.

Strutur e contenida comparativa

On nomi Mateo, Marco e Lucas la Evanjelios Sinotica, de la elinica σύν (syn, 'en junta') e ὄψις (opsis, 'vista'), car los es simil en contenida, ordina de nara, lingua e strutur de paragrafes, e on pote pone fasil los a lado de lunlotra per un compara sinotica. Eruditas acorda tipal ce lo es nonposible trova cualce relata leteratural direta entre la Evanjelios Sinotica e la Evanjelio de Joan. Multe avenis — como la batiza de Jesus, sua crusi, e la interatas con sua apostoles — apare en la Evanjelios Sinotica, ma avenis como la muta e la esorsi de demones par Jesus no apare en Joan, cual difere ance sur otra temas, como la purga de la Templo.

La Sinoticas asentua aspetas diferente de Jesus. En Marco, Jesus es la Fio de Dio, de ci sua obras potiosa demostra la presentia de la Rena de Dio. La autor portrae el como un faor nonfatigable de miracles e la servor de e Dio e umanas. Esta evanjelio corta rejistra un cuantia relativa peti de la parolas o instruis estendeda de Jesus. La Evanjelio de Mateo asentua ce Jesus es la reali de la vole de Dio como revelada en la Atesta Vea e la Senior de la Eglesa. Lo presenta el como la "Fio de David", un "re", e la Maxia. Lucas presenta Jesus como la salvor divin-umana ci mostra compatia a la povres. La testo depinta el como la ami de pecores e escluidas, ci ia veni per xerca e salva la perdedas. Esta evanjelio inclui parabolas bon conoseda, como la Bon Samaritan e la Fio Perosa.

La prologa de la Evanjelio de Joan identifia Jesus como un incarne de la Parola divin (Logos). Como la Parola, la testo descrive Jesus como eterna presente con Dio, ativa en tota la crea, e la fonte de la natur moral e spirital de umanas. En esta evanjelio, Joan portrae Jesus como no sola plu grande ca cualce profeta umana pasada, ma plu grande ca cualce profeta ta pote es: el no sola parla la Parola de Dio; el es la Parola de Dio. En la Evanjelio de Joan, Jesus revela publica sua rol divin e on depinta el como la Pan de Vive, la Lus de la Mundo, la Vite Vera, e plu.

La autores de la Atesta Nova ia mostra jeneral poca interesa a fundi un cronolojia asoluta de la vive de Jesus o a sincroni la episodios de sua vive con la istoria secular de la eda. Como Joan 21:25 declara, la evanjelios no alega furni un lista completa de la avenis de la vive de Jesus. La autores ia scrive la naras xef como documentos teolojial en la contesto de cristianisme temprana, considerante la linias de tempo como minor. La evanjelios dedica sirca un tri de lor testo a la semana final de la vive de Jesus en Ieruxalim, cual on nomi la Pasion. Los no furni sufisinte detalias per sasia la esijes de istoristes moderna consernante datas esata, ma on pote estrae de los un imaje jeneral de la istoria de la vive de Jesus.

Jenealojia e nase

Jesus ia es iudi, e Maria, la sposa de Josef, ia pari el. La Evanjelios de Mateo e Lucas ofre du naras diferente de sua jenealojia. Mateo trasa la asendentes de Jesus a Abraham tra David, en cuando Lucas trasa la asendentes de Jesus tra Adam a Dio. La listas es identica entre Abraham e David ma difere forte pos acel punto; Mateo ave 27 jeneras de David a Josef, en cuando Lucas ave 42, cuasi sin coaveni entre la nomes en la du listas. Eruditas ia proposa teorias variosa per esplica perce la du jenealojias es tan diferente.

Adora par la Pastores par Gerard van Honthorst, 1622

E Mateo e Lucas descrive la nase de Jesus, spesial ce un virjin nomida Maria ia pari el en Betlehem per reali la profetida. La nara de Lucas asentua la avenis ante la nase de Jesus e foca a Maria, en cuando lo de Mateo covre xef avenis pos la nase e foca a Josef. Ambos naras declara ce Maria ia es prometeda a un om nomida Josef, ci ia es un desendente de la Re David e no ia es la padre biolojial de Jesus. Ambos suporta la dotrina de la nase virjin de Jesus, longo cual la Spirito Santa ia consepi miraclosa Jesus en la utero de Maria cuando el ia es ancora un virjin. A la mesma tempo, on ave atestas, a la min en la Atas de la Apostoles par Lucas, ce persones ia pensa ce Jesus ia ave, como multe figures en anticia, un padria dual, car on declara ala ce el ia desende de la seme de David. Par aseta Jesus como sua propre fio, on comprende ce Josef dona a el la desende nesesada de David. Alga eruditas sujesta ce Jesus ia ave un erita levita de Maria, fundida sur sua relata de sangue con Elizabeth.

La sircoside par Giovanni Bellini, sirca 1500. La obra depinta la sircoside de Jesus.

En Mateo, Josef es turbada car Maria, sua prometeda, es ensinta, ma en la prima de la cuatro sonias de Josef, un anjel serti a el ce el no debe teme sposi Maria, car la Spirito Santa ia consepi sua enfante. En Mateo 2:1-12, sajas o majos de la Este trae donadas a la Jesus joven como la Re de la Iudis. Los trova el en un casa en Betlehem. Herode la Grande oia sur la nase de Jesus e, volente mata el, comanda la mata de tota bebes mas en Betlehem e sua visineria. An tal, un anjel averti Josef en sua sonia du, e la familia fuji a Ejipte, plu tarda reveninte e abitante en Nazaret.

En Lucas 1:31-38, Maria aprende de la anjel Gabriel ce el va consepi e pari un enfante nomida Jesus tra la ata de la Spirito Santa. Cuando Maria es a punto de pari, el e Josef viaja de Nazaret a la casa asendente de Josef en Betlehem per enscrive en la conta de abitores comandada par Cesar Augusto. Ala, Maria pari Jesus, e car los ia trova no sala en la otel, el pone la bebeta en un portafeno. Un anjel anunsia la nase a un grupo de pastores, ci vade a Betlehem per vide Jesus e a pos sperde la novas sirca la rejion. Lucas 2:21 raconta como Josef e Maria fa ce on sircoside lor bebe a la dia oto pos la nase e nomi el Jesus, como Gabriel ia comanda a Maria. Pos la presenta de Jesus a la Templo, Josef, Maria, e Jesus reveni a Nazaret.

Vive temprana, familia e profesa

Trova de la Salvor en la Templo par William Holman Hunt, 1860

La Evanjelios de Lucas e Mateo identifia la site de la enfantia de Jesus como Nazaret, un vila en Galilea en la Israel moderna, do el ia abita con sua familia. An si Josef apare en descrives de la enfantia de Jesus, la testos no nota el a pos. La Evanjelios e otra fontes nota sua otra membros de familia, incluinte sua madre Maria; sua cuatro frates, Jacobo, Joses (o Josef), Judas, e Simon; e sua sores nonomida. La Evanjelio de Jacobo nomi la avis madral de Jesus como Joachim e Ana. La Evanjelio de Lucas rejistra ce Maria ia es un relatada de Elizabeth, la madre de Joan la Batistor. Alga fontes contempora e estrabiblial regarda Jesus e Joan la Batistor como cusinos de grado du, fundida sur la crede ce Elizabeth ia es la fia de Sobe, la sore de Ana.

La Evanjelio de Marco reporta ce, a la comensa de sua servi, Jesus ave un conflita con sua visinas e familia. La madre e frates de Jesus veni per prende el car la popla dise ce el es loco. Jesus responde ce sua seguores es sua familia vera. En la Evanjelio de Joan, Jesus e sua madre atende un rituo de sposi en Cana, do el fa sua miracle prima pos la solisita de sua madre. Plu tarda, el es presente a sua crusi, e Jesus espresa conserna per sua bonstate.

En Marco 6:3 on nomi Jesus un τέκτων (tektōn), un terma cual on comprende tradisional como "carpentor" ma cual pote ance refere a fabricores de ojetos en materias diversa, incluinte construores. Considerante la estende semantical larga de la terma e "la realia sosioistorial de un τέκτων comun nazaretan", Matthew K. Robinson, un prete e erudita, prefere tradui τέκτων como 'construor-artisan'. La Evanjelios indica ce Jesus ia pote leje, parafrase e debate testos santa, ma esta no sinifia nesesada ce el ia reseta instrui formal de scrivistes.

La Evanjelio de Lucas reporta du viajas de Jesus e sua jenitores en Ieruxalim en sua enfantia. Los veni a la Templo en Ieruxalim per la presenta de Jesus como un bebe, acordante con la Lege iudi, do un om nomida Simeon profeti sur Jesus e Maria. Cuando Jesus, a la eda de des-du anios, perde se a un peregrina a Ieruxalim per pesah, sua jenitores trova el en la Templo, sentante entre la instruores, escutante los e fante demandas, e la popla es stonada par sua comprende e respondes. Maria reproxa Jesus per perde se, a cual Jesus responde ce el debe "es en la casa de sua Padre".

Batiza e tenta

La Batiza de Cristo par Joan la Batizor, par Almeida Júnior, 1895

La evanjelios sinotica descrive la batiza de Jesus en la Rio Urdun e la tentas cual el ia fasa tra 40 dias en la Deserto Iudean como un prepara per sua servi publica. En cada de esta naras, informa sur Joan la Batizor presede la naras de la batiza de Jesus. Los portrae Joan predicante la repenti per la pardona de pecas, corajinte carita a la povres, batizante persones en la rejion de la Rio Urdun sirca Perea, e predisente la ariva de algun "plu potiosa" ca el.

Jesus e la Diablo depintida en La tenta de Jesus, par Ary Scheffer, 1854

En la Evanjelio de Marco, Joan la Batizor batiza Jesus, e cuando Jesus sorti de la acua el vide la Spirito Santa desendente a el como un pijon, e un vose veni de la sielo e declara el como la Fio de Dio. Esta es un de la du avenis descriveda en la Evanjelios en cual un vose de Sielo refere a Jesus como "Fio", e la otra es la Muta. A pos, la Spirito forsa el a en la tera savaje, do Satan tenta el. Pos la aresta de Joan, Jesus comensa sua servi en Galilea.

En la Evanjelio de Mateo, cuando Jesus veni a Joan per reseta la batiza, Joan protesta, disente, "Me nesesa ce tu batiza me." Jesus instrui el a continua con la batiza "per reali tota la virtua". A pos, Mateo nara tre tentas spesifiada cual Satan ofre a Jesus en la tera savaje. En la Evanjelio de Lucas, la Spirito Santa desende en forma fisical como un pijon pos cuando Joan ia batiza ja tota la persones e en cuando Jesus prea. Plu tarda, Joan reconose nonesplicada Jesus par envia sua seguores per fa demandas sur el. Lucas descrive ance tre tentas cual Jesus ia esperia en la tera savaje ante el comensa sua servi en Galilea.

La Evanjelio de Joan no nara la batiza e tenta de Jesus. En loca, Joan la Batizor atesta ce el ia vide la Spirito desende e resta sur Jesus. Joan proclama publica Jesus como la Ovea de Dio, e alga seguores de Joan deveni disiplos de Jesus. Ante cuando la autoriosas prisoni Joan, Jesus gida sua seguores per batiza, e los batiza plu persones ca Joan.

Servi publica

Sermon sur la Monte, par Carl Bloch, 1877, depinta la parla importante de Jesus.

La Sinoticas depinta du locas jeografial xef en la servi de Jesus. La prima aveni en Galilea, a norde de Iudea, do Jesus gida un servi multe susedosa; la du aveni en Ieruxalim, do la autoriosas rejeta e mata el. Frecuente nomida "rabi", Jesus presenta sua mesaje par parla. En esta naras, el proibi ce los ci reconose el como la maxia — incluinte persones ci el remedia e demones cual, como on dise, el esorsi — parla sur lo (vide Secreta Maxial). Par contrasta, la Evanjelio de Joan portrae la servi de Jesus como aveninte xef en e sirca Ieruxalim en loca de en Galilea, e on proclama e reconose plu abrida sua natur divin.

Eruditas divide comun la servi de Jesus a grados variosa. La servi galilean comensa cuando Jesus reveni a Galilea de la Deserto Iudean pos resiste la tentas de Satan. A pos el predica tra Galilea, e en Mateo 4:18-20, sua disiplos prima — ci va formi plu tarda la nucleo de la Eglesa temprana — encontra el e comensa segue el. Esta periodo inclui la Sermon sur la Monte, un de la parlas major de Jesus, como ance la calmi de la tempesta, la nuri de la 5000, pasea sur acua, e otra miracles e parabolas diversa. Lo conclui con la Confesa de Petro e la Muta.

En cuando Jesus viaja en dirije a Ieruxalim, en lo cual on nomi frecuente la servi perean, el reveni a la rejion do el ia es batizada, a sirca un tri de la distantia a su de la Mar de Galilea longo la Rio Urdun. La fase final de sua servi, en Ieruxalim, comensa con sua entra vinsal a en la site a soldi de palmas. En la Evanjelios Sinotica, en acel semana Jesus espulsa la intercambiores de la Templo Du, e Judas negosia per tradi el. Esta periodo culmina en la Come Ultima e, en la nara par Joan, la Parla de Adio.

Disiplos e seguores

La recomenda a la apostoles, par James Tissot, portrae Jesus parlante a sua des-du disiplos.

Prosima a la comensa de sua servi, Jesus asinia des-du apostoles. En Mateo e Marco, Jesus clama sua cuatro apostoles prima, ci es pexores, e la testo descrive ce los abandona direta lor redes per segue el. En Joan, la du apostoles prima de Jesus es a prima disiplos de Joan la Batizor; la Batizor vide Jesus e nomi el la Ovea de Dio, e la du, oiante esta, comensa segue Jesus. En ajunta a la Des-du Apostoles, la introdui a la Sermon sur la Plano en Lucas identifia un grupo multe plu grande de persones como disiplos. En Lucas 10:1-16, Jesus envia 70 o 72 de sua seguores en duples per prepara vilas per sua visitas futur; el instrui los a aseta ospitia, remedia maladas, e proclama la Rena de Dio.

Instruis e miracles

Jesus e la joven rica par Heinrich Hofmann, 1889

En la Sinoticas, Jesus ensenia multe — comun en parabolas — sur la Rena de Dio. Jesus parla ance sur la "Fio de Umana", un figur apocalisal ci va veni per colie la elejedas. Jesus clama la popla a repenti de lor pecas e dedica se intera a Dio. El instrui sua seguores a obedi la lege iudi, an si alga contemporas persepi ce el mesma ia rompe la lege, per esemplo en relata a la obedi a la sabat. Cuando on demanda de el cual es la comanda la plu grande, Jesus responde: "Tu va ama la Senior tua Dio con tota tua cor, e con tota tua spirito, e con tota tua mente... E la du es simil: 'Tu va ama tua visina como tu mesma.'" Otra instruis etical cual on atribui a Jesus inclui ama enemis, asteni de odia e desira sesal, ofre la otra jena, e pardona los ci ia peca contra on.

La Evanjelio de Joan presenta la instruis de Jesus no mera como sua propre predica ma como revela divin. Joan la Batizor, per esemplo, declara en Joan 3:34: "El ci Dio ia envia parla la parolas de Dio, car el dona la Spirito sin mesura." En Joan 7:16, Jesus dise, "Mea instrui no es de me ma de el ci ia envia me." El repete esta en Joan 14:10: "Tu no crede ce me es en la Padre e la Padre es en me? La parolas cual me dise a tu, me no dise de me mesma; ma la Padre ci abita en me fa sua obras."

La reveni de la fio perosa par Pompeo Batoni, 1773

Sirca 30 parabolas composa sirca un tri de la instruis rejistrada de Jesus. La parabolas apare e en sermones plu longa e a locas diversa en la nara. Los conteni comun simbolisme e relata tipal aspetas de la mundo fisical a realias spirital. Temas comun inclui la compatia e jenerosia de Dio, como ance la periles e resultas de peca. Alga parabolas, como lo de la Fio Perosa, es relativa simple, en cuando otras, como la Seme Cresente, es plu complicada, profonda, e difisil per interprete. Cuando sua disiplos demanda perce el parla a la popla en parabolas, Jesus responde ce Dio ia permete ce la disiplos elejeda "sabe la secretas de la rena de sielo", no como la resta, ajuntante: "Car a el ci ave, on va dona plu e el va ave en abunda. Ma a el ci no ave, on va priva el an plu", e el continua par dise ce la plu de lor jenera ia developa "cores lente" e no es donce capas de comprende.

Jesus remediante la leprosa, mosaica medieval de la Catedral de Monreale, de sentenios 12 a 13

En la naras de evanjelio, Jesus dedica un parte major de sua servi a fa miracles, spesial remedias. On clasi comun esta miracles a du categorias xef: miracles de remedia e miracles natural. La miracles de remedia inclui la remedia de maladias fisical, esorsis, e la revive de mores. La miracles natural demostra autoria supra la mundo natural e inclui muta acua a vino, pasea sur acua, e calmi un tempesta, entre otras. Jesus atribui sua miracles a un fonte divin. Cuando oposores acusa el de espulsa demones par la potia de Belzebub, la prinse de demones, el responde ce el fa esta par la "Spirito de Dio" (Mateo 12:28) o la "dito de Dio", argumentante ce lo ta es nonlojical ce Satan dana sua propre rena; el ance demanda, si el esorsi par Belzebub, "par ci vosa fios espulsa los?" En Mateo 12:31-32, el declara ance ce, an si Dio pote pardona tota spesies de peca, incluinte "insultas contra Dio" o "insultas contra la Fio de Umana", Dio va pardona nunca blasfema contra "La Spirito Santa", e los ci es culpable de lo porta permanente lor peca.

En Joan, la testo descrive la miracles de Jesus como "sinias", fada per evidenti sua mision e identia. En la Evanjelios Sinotica, cuando alga instruores de la lege e fariseos demanda de el un sinia miraclosa per validi sua autoria, Jesus refusa, disente ce Dio va dona no sinia a un jenera mal e dejenerada, con eseta de la sinia de la profeta Jona. En la Sinoticas, la folas responde tipal a sua miracles con stona e presa el per remedia lor maladas, ma en Joan, on depinta Jesus como min restrinjeda par la folas, ci responde frecuente a sua sinias con crede e fida. Un cualia comun a tota naras de miracles es ce Jesus fa los libre e no solisita o aseta paia. Frecuente la naras de miracles es entretexeda con instruis, e la miracles mesma porta comun un dimension instruinte. Multe asentua la importa de fida: en la remedia de des leprosas e la revive de la fia de Iairo, per esemplo, Jesus dise a la beneficadas ce lor fida es la causa de lor remedia.

En A Marginal Jew, erudita John P. Meier argumenta ce "la tradisiones de miracles sur la servi publica de Jesus es ja atestada tan vasta en fontes diversa" ce cualce "fabrica intera par la eglesa temprana es, en modo pratical, nonposible". El fundi esta alega sur fontes leteratural como la Evanjelios de Mateo, Lucas, e Joan, como ance sur la scrivedas de la istoriste Josefo. Meier argumenta ce la "criterio de atestas multiple de fontes e formas" suporta la conclui ce Jesus ia fa "obras estracomun" cual sua contemporas ia regarda como miracles.

Erudita Paul J. Achtemeier argumenta ce tal miracles no ia es unica a Jesus en la mundo antica e ce an atestores ia persepi los como ambigua. El nota ce probable Jesus ia fa atas cual on ia comprende como esorsis, cual "ia es asetada como realia par sua contemporas", ma ce on no debe vide estas como avente "valua demostrante consernante Jesus," car atestores ia pote alega ce el ia labora o con Satan o con Dio. Erudita Gregory Sterling oserva ce, en la caso de la esorsis alegada fada par Jesus, "Per galileanes de la sentenio prima ci ia crede a la presentia personal de malia en forma de demones, la ata de Jesus ia es un validi de sua servi."

Proclama, Muta, e Semana de Pasion

La Muta de Jesus, depintida par Carl Bloch, sentenio 19

Aprosima a la media de cada de la tre Evanjelios Sinotica, la autores nara du avenis sinifiante: la Confesa de Petro e la Muta de Jesus — cual la Evanjelio de Joan no nota. En la Confesa de Petro, Petro declara a Jesus, "Tu es la Maxia, la Fio de la Dio vivente"; Jesus afirma ce esta es un veria divin revelada. Pos esta confesa, Jesus comensa parla a sua disiplos sur sua sufri, mori, e revive prosiminte. En la Muta, Jesus trae Petro e du otra apostoles a la culmina de un monte nonomida, do "el ia es mutada ante los, e sua fas ia brilia como la sol, e sua vestes ia deveni briliante blanca". Un nube briliante covre los, e un vose de la nube proclama, "Esta es mea Fio, la Amada; con el me es multe plaseda; escuta a el."

La descrive de la semana final de la vive de Jesus — comun nomida la Semana de Pasion — ocupa aprosima un tri de la nara en la evanjelios canonal. Esta parte comensa con la entra vinsal de Jesus a Ieruxalim e conclui con sua crusi.

Fadas en Ieruxalim

Un depinta de la la entra ultima de Jesus a Ieruxalim, par Jean-Léon Gérôme, 1897

En la Evanjelios Sinotica, la semana final en Ieruxalim conclui la viaja tra Perea e Iudea cual Jesus ia comensa en Galilea. Jesus entra a Ieruxalim montante un asino joven, evocante la motif de la asino de la Maxia de la Libro de Zecaria, en cual la re umil de la Iudis ariva a la site en esta modo. En cuando el avansa, popla sperde capas e ramos peti de arbores (plumas de palma) sur la strada ante el e canta linias de Salmo 118:25-26.

Pos esta, Jesus espulsa la intercambiores de la Templo, acusante los de cambia lo a un asconderia de furores par lor comersia. La plu de eruditas acorda ce lo es multe probable ce Jesus ia fa alga cosa en la templo e ia nota sua destrui. En Joan, la Purga de la Templo aveni a la comensa de la servi de Jesus en loca de a la fini. Praticas antica de composa ia inclui tal deslocas e compresas cronolojial, e an biografistes fidable como Plutarco ia usa los.

Jesus ave conflitas con la veas iudi, per esemplo cuando los demanda sur sua autoria e cuando el critica los e nomi los ipocritas. Judas Iscariot, un de la des-du apostoles, fini un negosia secreta con la veas iudi, prometente tradi Jesus a los per 30 monetas de arjento.

La Evanjelio de Joan raconta du otra festas en cual Jesus ia ensenia en Ieruxalim ante la Semana de Pasion. En Betania, un vileta prosima a Ieruxalim, Jesus revive Lazaro de la mores. Esta sinia potiosa grandi la tensa con la autoriosas, ci conspira per mata el. Maria de Betania unje la pedes de Jesus, predisente sua entera. A pos, Jesus fa sua entra maxial a Ieruxalim. La folas aclamante ci saluta Jesus cuando el entra a Ieruxalim grandi la enemia entre el e la xefes ofisial. En Joan, Jesus ia purga ja la Templo Du en un visita a Ieruxalim en un pesah plu temprana. A pos, Joan raconta la Come Ultima de Jesus con sua disiplos.

Come Ultima

La Come Ultima, depintida par Juan de Juanes, sirca 1562

La Come Ultima es la come final cual Jesus ia comparti con sua des-du apostoles en Ieruxalim ante sua crusi. Tota cuatro evanjelios canonal nota la Come Ultima; la Epistola Prima a la Corintianes par Paulo refere ance a lo. En la come, Jesus predise ce un de sua apostoles va tradi el. An pos ce cada Apostol afirma ce el no va tradi el, Jesus repete ce la trador va es un de los ci es presente ala. Mateo 26:23-25 e Joan 13:26-27 identifia Judas como la trador.

En la Sinoticas, Jesus prende pan, rompe lo, e dona lo a la disiplos, disente, "Esta es mea corpo, cual es donada per vos." A pos el fa ce los tota bevi de un copa, disente, "Esta copa cual es versada per vos es la alia nova en mea sangue." La rituo cristian de la Eucaristia es fundida sur esta avenis. An si la Evanjelio de Joan no inclui un descrive de la rituo de pan-e-vino en la Come Ultima, la plu de eruditas acorda ce Joan 6:22-59 (la Parla sur la Pan de Vive) ave un natur eucaristial e resona con la naras de institui en la Evanjelios Sinotica e en la scrivedas de Paulo sur la Come Ultima.

En tota cuatro evanjelios, Jesus predise ce Petro va nega conose el a tre veses ante la gal cria en la matina seguente. En Lucas e Joan, el fa la predise en la Come. En Mateo e Marco, el fa la predise pos la Come; Jesus predise ance ce tota sua disiplos va abandona el. La Evanjelio de Joan furni la sola nara de Jesus lavante la pedes de sua disiplos pos la come. Joan inclui ance un sermon longa par Jesus, preparante sua disiplos (aora sin Judas) per sua parti. Capitoles 14-17 de la Evanjelio de Joan es conoseda como la Parla de Adio e es un fonte sinifiante de contenida cristolojial.

Angusa en la Jardin, tradi, e aresta

Un depinta de la besa de Judas e aresta de Jesus, par Caravaggio, sirca 1602

En la Sinoticas, Jesus e sua disiplos vade a la jardin Getsemani, do Jesus prea per evita sua esperia difisil prosiminte. A pos Judas veni con un fola armada, enviada par la pretes xef, scrivistes e veas. El besa Jesus per identifia el a la fola, cual aresta alora Jesus. En un atenta a para los, un disiplo nonomida de Jesus usa un spada per talia a via la orea de un om en la fola. Pos la aresta de Jesus, sua disiplos vade per asconde, e Petro, cuando demandada, nega a tre veses ce el conose Jesus. Pos la nega tre, Petro oia la gal cria e recorda la predise de Jesus sur sua nega. Alora Petro plora amarga.

En Joan 18:1-11, Jesus no prea per evita sua crusi, car la evanjelio portrae el como apena tocada par tal debilia umana. La persones ci aresta el es soldatos roman e gardores de la Templo. En loca de es tradida par un besa, Jesus proclama sua identia, e cuando el fa esta, la soldatos e ofisiales cade a la tera. La evanjelio identifia Petro como la disiplo ci ia usa la spada, e Jesus reproxa el per lo.

Litigas par la Sanhedrin, Herodes, e Pilato

Pos sua aresta, la fola prende Jesus tarda en la note a la casa privata de la prete xef, Caiafas, ci la presedor de Pilato, la procurator roman Valerio Grato, ia instala a ante. La Sanhedrin ia es un asembla judal iudi. La naras de evanjelio difere sur la detalias de la litigas. En Mateo 26:57, Marco 14:53, e Lucas 22:54, la gardores prende Jesus a la casa de la prete xef, Caiafas, do persones burla e bate el a acel note. Temprana en la matina seguente, la pretes xef e scrivistes gida Jesus a en lor consilio. Joan 18:12-14 declara ce la gardores prende Jesus a prima a Anas, la padre par sposi de Caiafas, e a pos a la prete xef.

Ecce homo! la depinta de 1871 par Antonio Ciseri de Pontio Pilato presentante Jesus a la publica

En la litigas Jesus parla multe poca, presenta no defende, e dona respondes multe rara e nondireta a la demandas de la pretes, causante ce un ofisial palmi el. En Mateo 26:62, la asentia de responde de Jesus causa ce Caiafas demanda el, "Tu ave no responde?". En Marco 14:61, la prete xef demanda alora a Jesus, "Esce tu es la Maxia, la Fio de la Bon-Diseda?". Jesus responde, "Me es", e alora predise la ariva de la Fio de Umana. Esta provoca ce Caiafas lasera sua propre roba con coleria e acusa Jesus de blasfema. En Mateo e Lucas, la responde de Jesus es plu ambigua: en Mateo 26:64, el responde, "Tu ia dise tal", e en Lucas 22:70 el dise, "Tu dise ce me es."

La veas iudi prende Jesus a la Corte de Pilato e demanda a la governor roman, Pontio Pilato, ce el judi e condena Jesus per alegas variosa: suverti la nasion, oposa la paia de tribui, alega es Cristo, un re, e alega es la fio de Dio. La usa de la parola "re" es sentral a la discute entre Jesus e Pilato. En Joan 18:36, Jesus declara, "Mea rena no es de esta mundo", ma el no nega sin ambiguia ce el es la Re de la Iudis. En Lucas 23:7-15, Pilato reali ce Jesus es galilean, e donce veni su la autoria de Herodes Antipas, la tetrarca de Galilea e Perea. Pilato envia Jesus a Herodes per litiga, ma Jesus dise cuasi no cosa en responde a la demandas de Herodes. Herodes e sua soldatos burla Jesus, pone un roba custosa sur el per fa ce el aspeta como un re, e redona el a Pilato, ci clama alora en junta la veas iudi e anunsia ce el ia "no trova esta om culpable".

Oservante un costum de pesah de la tempo, Pilato permete la relasa de un prisonida elejeda par la fola. El dona a la popla un eleje entre Jesus e un omisidor nomida Barabas (בר-אבא o Bar-abbâ, "fio de la padre", de la nom comun Abba: 'padre'). Convinseda par la veas, la fola eleje relasa Barabas e crusi Jesus. Pilato scrive un sinia en ivri, latina, e elinica cual dise "Jesus de Nazaret, la Re de la Iudis" (cortida como INRI en depintas) per es afisada a la crus de Jesus, e alora flajeli Jesus e envia el per es crusida. La soldatos pone un corona de spinas sur la testa de Jesus e burla el como la Re de la Iudis. Los bate e burla el ante prende el a Calvario, ance nomida Golgota, per crusi.

Crusi e entera

La depinta de Diego Velázquez de la crusi, sirca 1632

Tota cuatro evanjelios canonal descrive la crusi de Jesus. Pos la litigas, la gardores gida Jesus a Calvario en cuando el porta sua crus; on nomi la via cual el ia prende probable la Via Dolosa. La tre Evanjelios Sinotica indica ce Simon de Cirene aida el, forsada par la romanes a fa tal. En Lucas 23:27-28, Jesus dise a la femes en la fola grande ci segue el ce los no debe plora per el ma per se mesma e lor enfantes. A Calvario, un person ofre a Jesus un sponja empapada en un misca tipal ofreda per lejeri dole. Longo Mateo e Marco, el refusa lo.

Alora la soldatos crusi Jesus e lansa dados per sua vestes. Supra la testa de Jesus a la crus, on pone la enscrive multilingual par Pilato, "Jesus de Nazaret, la Re de la Iudis." Soldatos e pasores burla el sur lo. Soldatos crusi du furores condenada con Jesus. En Mateo e Marco, ambos furores burla Jesus. En Lucas, un de los reproxa Jesus, en cuando la otra defende el. Jesus dise a la seguor: "oji tu va es con me en Paradiso." La cuatro evanjelios nota la presentia de un grupo de disiplos fema de Jesus a la crusi. En Joan, Jesus vide sua madre Maria e la disiplo amada e dise a el a cura el.

En Joan 19:33-34, soldatos roman rompe la gamas de la du furores per aselera lor mori, ma no los de Jesus, car el es ja mor. En loca, un soldato perfora la lado de Jesus con un lansia, e sangue e acua flue a estra. La Sinoticas reporta un periodo de oscuria, e la cortina pesosa en la Templo lasera cuando Jesus mori. En Mateo 27:51-54, un trematera abri tombas. En Mateo e Marco, asustada par la avenis, un senturion roman declara ce Jesus ia es la Fio de Dio.

A la mesma dia, Josef de Arimatea, con la permete de Pilato e con la aida de Nicodemo, sutrae la corpo de Jesus de la crus, envolve lo en un stofa limpa, e entera lo en un tomba nova escavada en roca. En Mateo 27:62-66, a la dia seguente la pretes xef iudi demanda a Pilato per securi la tomba, e con la permete de Pilato la pretes pone selos sur la roca grande cual covre la entra.

Revive e asende

Apare de Jesus Cristo a Maria Magdalena par Alexander Andreyevich Ivanov, 1835

La Evanjelios no descrive la momento de la revive de Jesus. Los descrive la descovre de sua tomba vacua e alga apares de Jesus, con diferes clar en cada nara.

En la cuatro Evanjelios, Maria Magdalena vade a la tomba a soldi matina, solitar o con un o plur otra femes. La tomba es vacua, con la roca rolada a via, e on ave un o du anjeles, dependente de la naras. En la Sinoticas, un anjel dise a la femes ce Jesus no es asi e ce el ia revive. En Marco e Mateo, la anjel instrui ance ce los dise a la disiplos a encontra Jesus en Galilea. En Lucas, Petro visita la tomba pos cuando algun dise a el ce lo es vacua. En Joan, el vade ala con la disiplo amada. Mateo nota gardores roman a la tomba, ci reporta a la pretes de Ieruxalim lo cual ia aveni. La pretes soborna los afin los dise ce la disiplos ia fura la corpo de Jesus en la note.

Poi la cuatro Evanjelios descrive apares diversa de Jesus en sua corpo reviveda. Jesus revela se prima a Maria Magdala en Marco 16:9 e Joan 20:14-17, con "la otra Maria" en Mateo 28:9, en cuando en Lucas la apare prima reportada es a du disiplos viajante a Emaus. Poi Jesus revela se a la des-un disiplos, en Ieruxalim o en Galilea. En Lucas 24:36-43, el come e mostra a los sua feris tocable per demostra ce el no es un spirito. El mostra ance los a Tomas per fini sua dutas, en Joan 20:24-29. En la Sinoticas, Jesus comanda la disiplos a sperde la mesaje de la evanjelio a tota nasiones, en cuando en Joan 21, el dise a Petro a cura sua oveas.

Lucas 24:50-53, Atas 1:1-11, e 1 Timoteo 3:16 nota o descrive la asende de Jesus a Sielo. En la Atas de la Apostoles, 40 dias pos la Revive, cuando la disiplos regarda, "un potia ia leva el a supra, e un nube ia prende el a estra lor vide". 1 Petro 3:22 declara ce Jesus ia "entra a sielo e es a la destra de Dio".

La Atas de la Apostoles descrive alga apares de Jesus pos sua Asende. En Atas 7:55, Stefano regarda la sielo e vide "Jesus stante a la destra de Dio" apena ante sua mori. Sur la via a Dimaxco, la Apostol Paulo converti a cristianisme pos vide un lus abliante e oia un vose disente, "Me es Jesus, ci tu persegue." En Atas 9:10-18, Jesus comanda Ananias de Dimaxco en un revela a remedia Paulo. La Libro de Revela inclui un revela de Jesus consernante la dias final de Tera.

Cristianisme temprana

Depinta de Jesus de la sentenio 3 de Jesus como la Bon Pastor

Pos la vive de Jesus, sua seguores, como descriveda en la capitoles prima de la Atas de la Apostoles, ia es tota iudis par nase o par converti, per cual la testo usa la terma biblial "proselite", e istoristes refere a los como cristianes iudi. La mesaje temprana de la Evanjelio ia es sperdeda par parla, probable en arami, ma cuasi direta ance en elinica. La Atas de la Apostoles e la Epistola a la Galatianes en la Atesta Nova rejistra ce la comunia cristian prima ia es sentrida en Ieruxalim e sua xefes ia inclui Petro, Jacobo, la frate de Jesus, e Joan la Apostol.

Pos sua converti, Paulo la Apostol ia sperde la instruis de Jesus a comunias noniudi diversa tra la rejion este de la Mediteraneo. On dise ce la influe de Paulo sur la pensa cristian es plu sinifiosa ca lo de cualce otra autor de la Atesta Nova. A la fini de la sentenio prima, cristianisme ia comensa es interna e esterna reconoseda como un relijio separada de iudisme cual mesma ia es refinada e ia developa plu en la sentenios pos la destrui de la Templo Du.

Sitas cuantiosa en la Atesta Nova e otra scrivedas cristian de la sentenios prima indica ce cristianes temprana ia usa e amira jeneral la Biblia ivri (la Tanakh) como un testo relijiosa, xef en la traduis elinica (Septuajinta) o arami (Targum). Cristianes temprana ia scrive multe obras relijiosa, incluinte los incluida en la canon de la Atesta Nova. Autores ia scrive probable la testos canonal, cual ia deveni la fontes xef usada par istoristes per atenta comprende la Jesus istorial e testos santa en cristianisme, entre 50 e 120 ec.

Vistas istorial

Ante la Lumina, eruditas ia regarda usual la Evanjelios como naras istorial esata, ma de alora eruditas ia emerje ci duta la fidablia de la Evanjelios e distingui entre la Jesus descriveda en la Evanjelios e la Jesus de istoria. De la sentenio 18, tre xercas erudita separada per la Jesus istorial ia aveni, cada con cualias distinguinte e fundida sur criterios de rexerca diferente, cual eruditas ia developa comun en la xerca cual ia aplica los. An si un acorda vasta erudita esiste sur la esiste de Jesus, e un acorda fundal sur la contorno jeneral de sua vive, la portraes de Jesus construida par eruditas diversa difere comun de lunlotra, e de la imaje portraeda en la naras de evanjelio.

Prosimis a la reconstrui istorial de la vive de Jesus ia varia de la prosimis "masimaliste" de la sentenio 19, en cual eruditas ia aseta la naras de evanjelio como atestas fidable a cada loca posible, a la prosimis "minimaliste" de la temprana de la sentenio 20, do los ia aseta cuasi no cosa sur Jesus como istorial. En la desenio de 1950, cuando la xerca du per la Jesus istorial ia aselera, la prosimis minimaliste ia desapare, e en la sentenio 21, minimalistes como Price es un minoria peti. An si on no pote suporta istorial un crede en la natur nonerante de la Evanjelios, multe eruditas de la desenio de 1980 manteni ce, ultra la poca fatos regardada como istorial serta, alga otra elementos de la vive de Jesus es "istorial probable". Rexerca erudita moderna sur la Jesus istorial foca donce a la identifia de la elementos la plu probable.

Iudea e Galilea en la sentenio prima

Iudea, Galilea es sua visineria a la tempo de Jesus

En 6 ec, Iudea, Idumea, e Samaria ia es mutada de un stato-cliente de la Impero Roman a un provinse imperal, ance nomida Iudea. Un prefeto roman, no un renor-cliente, ia governa la tera. La prefeto ia governa de Cesarea Maritimal, lasante ce la Prete Xef de Israel gida Ieruxalim. Con la eseta ce la prefeto ia veni a Ieruxalim en festas relijiosa, cuando zelo relijiosa e patriota ia inspira a veses turba o revoltas. Galilea con Perea ia es un stato-cliente herodian su la rena de Herodes Antipas de 4 aec. Evidente Galilea ia es florinte, e povria ia es sufisinte limitada ce lo no ia menasa la ordina sosial. Filipo (m 34 ec), duifrate de Herodes Antipas, ia rena como Tetrarca an un otra stato-cliente herodian a norde e este de la mar de Galilea cual ia inclui Gaulanitis, Batanea, e Iturea; lo ia es xef noniudi. A sude de esta a la riva este de la Urdun ia es la Decapoli; un colie de site-statos eliniste cual ia es clientes de la Impero Roman. A norde de Galilea ia es la sites de Tiro e Sidon cual ia es en la provinse roman de Suria. An si teras noniudi ia ensirca la teritorios xef iudi de Iudea e Galilea, lege e pratica roman ia permete ce iudis resta separada legal e cultural.

Esta ia es la eda de Iudisme eliniste, cual ia combina la tradision relijiosa iudi con elementos de la cultur eliniste. Asta la cade de la Impero Roman Ueste e la concistas muslim de la Mediteraneo Este, la sentros xef de Iudisme eliniste ia es Alexandria (Ejipte) e Antiocia (aora Turcia Sude), la du colonias elinica xef de la area de Asia Sude-Ueste e Africa Norde, ambos fundida a la fini de la sentenio 4 aec pos la concistas de Alexandro la Grande. Iudisme eliniste ia esiste ance en Ieruxalim en la Periodo de la Templo Du, do conflita ia aveni entre elinistes e tradisionalistes (a veses nomida iudistes). Traduores ia tradui la Biblia ivri de Ivri Biblial e Arami Biblial a la Elinica Iudi Coine; traduores ia crea ance la traduis Targum a arami en esta eda, ambos par causa de la declina de sabe de ivri.

Iudis ia fundi lor fe e pratica relijiosa sur la Tora, sinco libros de cual los ia dise ce Dio ia dona los a Moxe. La tre partitos relijiosa importante ia es la fariseos, la esenios, e la saduseos. En junta esta partitos ia representa sola un frato peti de la popla. La plu de iudis ia espeta un tempo cuando Dio ta libri los de lor renores pagan, cisa par gera contra la romanes.

Fontes

Un edita de 1582 de la obras de Josefo, un iudi roman e istoriste ci ia refere a Jesus

Eruditas de la Atesta Nova fasa un defia enorme cuando los analise la Evanjelios canonal. La Evanjelios no es biografias en la sensa moderna, e la autores esplica la sinifia teolojial de Jesus e raconta sua servi publica ma omete multe detalias de sua vive. James Dunn ia argumenta ce transmete bocal ia conserva a prima la naras de sua instruis e vive, cual ia es la fonte de la Evanjelios scriveda. Eruditas regarda comun la Evanjelios como leteratur cual fundi se sur tradisiones bocal, predica cristian, e esejese de la Atesta Vea con la acorda ce los es un varia de biografia elinica-roman; simil a otra obras antica como la Memorias de Socrate par Xenofonte.

La reportas de avenis supranatural asosiada con la mori e revive de Jesus fa ce la defia es an plu difisil. Eruditas regarda la Evanjelios como fontes de informa suminada car la scrivores ia es atentante glori Jesus. Ed Sanders argumenta ce fontes testal survivente furni detalias plu fidable per la pensas de Jesus ca per la pensas de Alexandro la Grande, car la testos discutente Jesus ia es scriveda plu prosima en tempo a la avenis a cual los refere. Obras de biografistes scriveda sur Alexandro la Grande en sua propre vive (ci ia vive 330 anios plu temprana) ia es tota perdeda, ma on conose los tra referes en biografias scriveda par autores plu tarda. An si la testos sur Jesus conteni ideas de e Jesus e sua seguores plu tarda, lo es posible distingui cual partes orijina de la vista propre de Jesus, e cual ia es ideas de sua seguores plu tarda.

Eruditas usa criterios diversa, como la criterio de atesta nondependente, la criterio de coere, e la criterio de noncontinua per judi la veria istorial de avenis. La veria istorial de un aveni depende ance de la fidablia de la fonte; serta, la Evanjelios es rejistras no nondependente e no coerente de la vive de Jesus. Eruditas regarda la Sinoticas, spesial Marco, la evanjelio scriveda la plu temprana, como la fontes de informa la plu fidable sur Jesus tra multe desenios. Joan, la evanjelio scriveda la plu tarda, difere multe de la Evanjelios Sinotica, e on regarda lo como min fidable, an si alga eruditas regarda la evanjelio de Joan como avente plu fidablia ca los ia pensa a ante o a veses an plu fidable ca la sinoticas pos la xerca tre.

Alga eruditas (como la Seminar de Jesus) crede ce la Evanjelio de Tomas noncanonal ta pote es un atestor nondependente per multe de la parabolas e aforismes de Jesus. Per esemplo, Tomas confirma ce Jesus ia bondise la povres e ce esta diseda ia sirculi nondependente ante es combinada con disedas simil en la fonte Q. La majoria de eruditas es setica sur esta testo e crede ce on debe dati lo a la sentenio 2 ec. Otra testos cristian noncanonal elejeda pote ance ave valua per rexerca sur la Jesus istorial.

Fontes noncristian temprana cual atesta la esiste istorial de Jesus inclui la obras de la istoristes Josefo e Tasito. La erudita sur Josefo, Louis Feldman, ia declara ce "poca persones ia duta la autenticia" de la refere de Josefo a Jesus en libro 20 de la Anticias de la Iudis, e sola un cuantia peti de eruditas disputa lo. Tasito ia refere a Cristo e sua esecuta par Pilato en libro 15 de sua obra Anales. Eruditas regarda jeneral la refere de Tasito a la esecuta de Jesus como e autentica e de valua istorial como un fonte roman nondependente.

Fontes noncristian es valuosa car los mostra ce an partitos neutra o enemin ia mostra nunca cualce duta ce Jesus ia esiste. Los presenta un imaje ru de Jesus cual es acordable con trovadas en la fontes cristian: ce Jesus ia es un ensenior, ia ave un reputa como faor de miracles, ia ave un frate Jacobo, e ia mori violente.

Arceolojia aida eruditas a comprende plu bon la mundo sosial de Jesus. Per esemplo, lo indica ce Capernaum, un site importante en la servi de Jesus, ia es povre e peti, an sin un foro o un agora. Esta descovre arceolojial resona bon con la vista erudita ce Jesus ia promove la comparti mutua entre la povres en acel area de Galilea.

Cronolojia

Jesus ia es un iudi galilean, naseda sirca la comensa de la sentenio prima, ci ia mori en 30 o 33 ec en Iudea. La acorda jeneral erudita es ce Jesus ia es un contempora de Joan la Batistor e ce la governor roman Pontio Pilato, ci ia ocupa ofisia de 26 a 36 ec, ia comanda ce on crusi el.

La Evanjelios ofre alga indicas consernante la anio de la nase de Jesus. Mateo 2:1 asosia la nase de Jesus con la rena de Herodes la Grande, ci ia mori sirca 4 aec, e Lucas 1:5 nota ce Herodes ia es sur la trono pico ante la nase de Jesus, an si esta evanjelio asosia ance la nase con la Conta de Quirinius cual ia aveni a des anios plu tarda. Lucas 3:23 declara ce Jesus ia ave "sirca tredes anios" a la comensa de sua servi, cual longo Atas 10:37-38 la servi de Joan la Batistor ia presede, cual Lucas 3:1-2 ia rejistra como comensante en la anio 15 de la rena de Tiberio (28 o 29 ec). Par ordina la naras de evanjelio longo datos istorial e usante otra metodos diversa, la plu de eruditas conclui un data de nase per Jesus entre 6 e 4 aec, ma alga persones proposa estimas cual inclui un estende plu larga.

Eruditas ia calcula la estende de datas per la servi de Jesus usante prosimis diversa. Un de estas aplica la refere en Lucas 3:1-2, Atas 10:37-38, e la datas de la rena de Tiberio, cual es bon conoseda, per dona un data de sirca 28-29 ec per la comensa de la servi de Jesus. Un otra prosimi calcula un data sirca 27-29 ec par usa la declara sur la templo en Joan 2:13-20, cual afirma ce construores ia es construinte la templo en Ieruxalim en sua anio 46 a la comensa de la servi de Jesus, con la declara de Josefo ce Herodes la Grande ia comensa reconstrui la templo en la anio 18 de sua rena. Un otra metodo usa la data de la mori de Joan la Batistor e la sposi de Herodes Antipas e Herodias, fundida sur la scrivedas de Josefo, e corelata lo con Mateo 14:4 e Marco 6:18. Vidente ce la plu de eruditas dati la sposi de Herodes e Herodias a 28-35 ec, esta furni un data de sirca 28-29 ec.

Eruditas ia usa prosimis diversa per estima la anio de la crusi de Jesus. La plu de eruditas acorda ce el ia mori en 30 o 33 ec. La Evanjelios declara ce la aveni ia aveni en la prefetia de Pilato. La data per la converti de Paulo (calculada como 33-36 ec) ata como un limita masima per la data de Crusi. On pote determina la datas per la converti e servi de Paulo par analise la epistolas paulal e la Atas de la Apostoles. Astronomistes ia atenta estima la data esata de la Crusi par analise move lunal e calcula datas istorial de pesah, un festa fundida sur la calendario ivri lunisolal. La datas la plu vasta asetada derivada de esta metodo es 7 april 30 ec, e 3 april 33 ec (ambos julian).

Referes

Fontes

• Hare, Douglas (1993). Matthew (en engles). Westminster John Knox Press. ISBN 978-0-664-23433-1.{{cite book}}: Manteni de CS1: data autotraduida (link)
• Blomberg, Craig L. (2009). Jesus and the Gospels: An Introduction and Survey (en engles). B&H. ISBN 978-0-8054-4482-7. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Boring, M. Eugene; Craddock, Fred B. (2004). The People's New Testament Commentary (en engles). Westminster John Knox Press. ISBN 978-0-664-22754-8. Arcivida de la orijinal en 4 janero 2014. Consultada en 14 agosto 2015.{{cite book}}: Manteni de CS1: data autotraduida (link)
• Brown, Raymond E. (1977). The Birth of the Messiah: A Commentary on the Infancy Narratives in Matthew and Luke (en engles). Doubleday. ISBN 978-0-385-05907-7.{{cite book}}: Manteni de CS1: data autotraduida (link)
• Brown, Raymond E. (1978). Mary in the New Testament. Paulist Press. ISBN 978-0-8091-2168-7. Arcivida de la orijinal en 17 setembre 2014. Consultada en 14 agosto 2015.{{cite book}}: Manteni de CS1: data autotraduida (link)
• Brown, Raymond E. (1988). The Gospel and Epistles of John: A Concise Commentary (en engles). Liturgical Press. ISBN 978-0-8146-1283-5.{{cite book}}: Manteni de CS1: data autotraduida (link)
• Brown, Raymond E. (1997). An Introduction to the New Testament (en engles). Doubleday. ISBN 978-0-385-24767-2.{{cite book}}: Manteni de CS1: data autotraduida (link)
• Carter, Warren (2003). Pontius Pilate: Portraits of a Roman Governor (en engles). Liturgical Press. ISBN 978-0-8146-5113-1. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Chilton, Bruce; Evans, Craig A. (1998). Studying the Historical Jesus: Evaluations of the State of Current Research (en engles). Brill. ISBN 978-90-04-11142-4. Arcivida de la orijinal en 4 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Bowman Jr., Robert M.; Komoszewski, J. Ed (2019). Komoszewski, J. Ed; Bock, Darrell L. (eds.). Jesus, Skepticism & The Problem of History: Criteria and Context in the Study of Christian Origins (en engles). Zondervan. ISBN 978-0-310-53476-1.{{cite book}}: Manteni de CS1: data autotraduida (link)
• Cox, Steven L.; Easley, Kendell H. (2007). Harmony of the Gospels (en engles). B&H. ISBN 978-0-8054-9444-0. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Cross, Frank L.; Livingstone, E. A., eds. (2005). The Oxford Dictionary of the Christian Church (en engles). Oxford University Press. ISBN 978-0-19-280290-3. Arcivida de la orijinal en 15 maio 2019. Consultada en 8 otobre 2020.{{cite book}}: Manteni de CS1: data autotraduida (link)
• Crossan, John D.; Watts, Richard G. (1999). Who Is Jesus?: Answers to Your Questions About the Historical Jesus (en engles). Westminster John Knox Press. ISBN 978-0-664-25842-9.{{cite book}}: Manteni de CS1: data autotraduida (link)
• De Smet, Daniel (2016). "Les racines docétistes de l'imamologie shi'ite". In Amir-Moezzi, Mohammad Ali; De Cillis, Maria; De Smet, Daniel; Mir-Kasimov, Orkhan (eds.). L'Ésotérisme shi'ite, ses racines et ses prolongements – Shi'i Esotericism: Its Roots and Developments. Bibliothèque de l'Ecole des Hautes Etudes, Sciences Religieuses (en franses). Vol. 177. Turnhout: Brepols. pp. 87–112. doi:10.1484/M.BEHE-EB.4.01163. ISBN 978-2-503-56874-4.{{cite book}}: Manteni de CS1: data autotraduida (link)
• Dickson, John (2008). Jesus: A Short Life (en engles). Kregel Publications. ISBN 978-0-8254-7802-4.{{cite book}}: Manteni de CS1: data autotraduida (link)
• Dillenberger, John (1999). Images and Relics: Theological Perceptions and Visual Images in Sixteenth-Century Europe (en engles). Oxford University Press. ISBN 978-0-19-976146-3.{{cite book}}: Manteni de CS1: data autotraduida (link)
• Donahue, John R.; Harrington, Daniel J. (2002). The Gospel of Mark (en engles). Liturgical Press. ISBN 978-0-8146-5804-8. Arcivida de la orijinal en 3 janero 2014. Consultada en 8 otobre 2020.{{cite book}}: Manteni de CS1: data autotraduida (link)
• Doninger, Wendy (1999). Merriam-Webster's Encyclopedia of World Religions (en engles). Merriam-Webster. ISBN 978-0-87779-044-0.{{cite book}}: Manteni de CS1: data autotraduida (link)
• Dunn, James D. G. (2003). Jesus Remembered (en engles). Wm. B. Eerdmans. ISBN 978-0-8028-3931-2.{{cite book}}: Manteni de CS1: data autotraduida (link)
• Eddy, Paul R.; Boyd, Gregory A. (2007). The Jesus Legend: A Case for the Historical Reliability of the Synoptic Jesus tradition (en engles). Baker. ISBN 978-0-8010-3114-4. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Ehrman, Bart (1999). Jesus: Apocalyptic Prophet of the New Millennium (en engles). Oxford University Press. ISBN 978-0-19-983943-8.{{cite book}}: Manteni de CS1: data autotraduida (link)
• Ehrman, Bart D. (2009). Jesus, Interrupted: Revealing the Hidden Contradictions in the Bible (and Why We Don't Know About Them) (en engles). HarperOne. ISBN 978-0-06-117393-6.{{cite book}}: Manteni de CS1: data autotraduida (link)
• Ehrman, Bart D. (2014). How Jesus Became God (en engles). HarperCollins. ISBN 978-0-06-225219-7.{{cite book}}: Manteni de CS1: data autotraduida (link)
• Ehrman, Bart (2011). Forged: Writing in the Name of God – Why the Bible's Authors Are Not Who We Think They Are (en engles). HarperCollins. ISBN 978-0-06-207863-6.{{cite book}}: Manteni de CS1: data autotraduida (link)
• Ehrman, Bart D. (2012). Did Jesus Exist?: The Historical Argument for Jesus of Nazareth (en engles). HarperOne. ISBN 978-0-06-208994-6. Arcivida de la orijinal en 3 agosto 2020. Consultada en 8 otobre 2020.{{cite book}}: Manteni de CS1: data autotraduida (link)
• Evans, Craig A. (2003). The Bible Knowledge Background Commentary: Matthew–Luke (en engles). Victor (Cook Communications Ministries). ISBN 978-0-7814-3868-1.{{cite book}}: Manteni de CS1: data autotraduida (link)
• Evans, Craig A. (2012a). Jesus and His World: The Archaeological Evidence (en engles). Westminster John Knox Press. ISBN 978-0-664-23413-3. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Evans, Craig A. (2012b). Matthew (New Cambridge Bible Commentary) (en engles). Cambridge University Press. ISBN 978-0-521-01106-8.{{cite book}}: Manteni de CS1: data autotraduida (link)
• Finegan, Jack (1998). Handbook of Biblical Chronology (en engles). Hendrickson Publishers. ISBN 978-1-56563-143-4.{{cite book}}: Manteni de CS1: data autotraduida (link)
• Freedman, David N. (2000). Eerdmans Dictionary of the Bible (en engles). Amsterdam University Press. ISBN 978-0-8028-2400-4. Arcivida de la orijinal en 3 agosto 2020. Consultada en 8 otobre 2020.{{cite book}}: Manteni de CS1: data autotraduida (link)
• Friedmann, Yohanan (1989). Prophecy Continuous: Aspects of Ahmadi Religious Thought and Its Medieval Background (en engles). Berkeley: University of California Press. ISBN 978-0-520-05772-2.{{cite book}}: Manteni de CS1: data autotraduida (link)
• Funk, Robert W.; Hoover, Roy W.; The Jesus Seminar (1993). The Five Gospels (en engles). Scribner. ISBN 978-0-02-541949-0.{{cite book}}: Manteni de CS1: data autotraduida (link)
• Green, Joel B.; McKnight, Scot; Marshall, I. Howard (1992). Dictionary of Jesus and the Gospels (en engles). InterVarsity. p. 442. ISBN 978-0-8308-1777-1. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Grudem, Wayne (1994). Systematic Theology: An Introduction to Biblical Doctrine (en engles). Grand Rapids, Michigan: Zondervan. ISBN 978-0-310-28670-7.{{cite book}}: Manteni de CS1: data autotraduida (link)
• Harris, Stephen L. (1985). Understanding the Bible (en engles). Mayfield.{{cite book}}: Manteni de CS1: data autotraduida (link)
• Houlden, J. Leslie (2006). Jesus: The Complete Guide (en engles). Continuum. ISBN 978-0-8264-8011-8. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Humphreys, Colin J.; Waddington, W. G. (1992). "The Jewish Calendar, a Lunar Eclipse and the Date of Christ's Crucifixion" (PDF). Tyndale Bulletin (en engles). 43 (2): 331–151. doi:10.53751/001c.30487. S2CID 189519018. Arcivida (PDF) de la orijinal en 21 april 2019. Consultada en 21 april 2019.{{cite journal}}: Manteni de CS1: data autotraduida (link)
• Keener, Craig S. (2009b). The Gospel of Matthew: A Socio-Rhetorical Commentary (en engles). Wm. B. Eerdmans. ISBN 978-0-8028-6498-7.{{cite book}}: Manteni de CS1: data autotraduida (link)
• Keener, Craig S. (2009). The Historical Jesus of the Gospels (en engles). Wm. B. Eerdmans.{{cite book}}: Manteni de CS1: data autotraduida (link)
• Keener, Craig S. (2012). The Historical Jesus of the Gospels (en engles). Wm. B. Eerdmans. ISBN 978-0-8028-6292-1.{{cite book}}: Manteni de CS1: data autotraduida (link)
• Köstenberger, Andreas J.; Kellum, L. Scott; Quarles, Charles L. (2009). The Cradle, the Cross, and the Crown: An Introduction to the New Testament (en engles). B&H. ISBN 978-0-8054-4365-3. Arcivida de la orijinal en 27 julio 2020. Consultada en 8 otobre 2020.{{cite book}}: Manteni de CS1: data autotraduida (link)
• Lawson, Todd (2009). The Crucifixion and the Qur'an: A Study in the History of Muslim Thought (en engles). Oxford: Oneworld. ISBN 978-1-85168-635-3.{{cite book}}: Manteni de CS1: data autotraduida (link)
• Lee, Dorothy A. (2004). Transfiguration (en engles). Continuum. ISBN 978-0-8264-7595-4. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Levine, Amy-Jill (2006). "Introduction". In Levine, Amy-Jill; Allison, Dale C.; Crossan, John D. (eds.). The Historical Jesus in Context (en engles). Princeton University Press. ISBN 978-0-691-00992-6. Arcivida de la orijinal en 10 april 2014. Consultada en 8 otobre 2020.{{cite encyclopedia}}: Manteni de CS1: data autotraduida (link)
• Levine, Amy-Jill (2007). The Misunderstood Jew: The Church and the Scandal of the Jewish Jesus (en engles). HarperCollins. ISBN 978-0-06-174811-0.{{cite book}}: Manteni de CS1: data autotraduida (link)
• Licona, Michael R. (2010). The Resurrection of Jesus: A New Historiographical Approach (en engles). InterVarsity. ISBN 978-0-8308-2719-0. Arcivida de la orijinal en 18 febrero 2020. Consultada en 29 julio 2015.{{cite book}}: Manteni de CS1: data autotraduida (link)
• Maier, Paul L. (1989). "The Date of the Nativity and Chronology of Jesus". In Finegan, Jack; Vardaman, Jerry; Yamauchi, Edwin M. (eds.). Chronos, Kairos, Christos: Nativity and Chronological Studies (en engles). Eisenbrauns. ISBN 978-0-931464-50-8. Arcivida de la orijinal en 7 setembre 2015. Consultada en 14 agosto 2015.{{cite encyclopedia}}: Manteni de CS1: data autotraduida (link)
• Majerník, Ján; Ponessa, Joseph; Manhardt, Laurie W. (2005). The Synoptics: Matthew, Mark, Luke (en engles). Emmaus Road. ISBN 978-1-931018-31-9. Arcivida de la orijinal en 19 agosto 2020. Consultada en 8 otobre 2020.{{cite book}}: Manteni de CS1: data autotraduida (link)
• McGrath, Alister E. (2006). Christianity: An Introduction (en engles). John Wiley & Sons. pp. 4–6. ISBN 978-1-4051-0899-7. Arcivida de la orijinal en 10 setembre 2015. Consultada en 14 agosto 2015.{{cite book}}: Manteni de CS1: data autotraduida (link)
• Meier, John P. (1991). A Marginal Jew: The Roots of the Problem and the Person (en engles). Yale University Press. ISBN 978-0-300-14018-7.{{cite book}}: Manteni de CS1: data autotraduida (link)
• Meier, John P. (2006). "How do we decide what comes from Jesus". In Dunn, James D. G.; McKnight, Scot (eds.). The Historical Jesus in Recent Research. Eisenbrauns. ISBN 978-1-57506-100-9. Arcivida de la orijinal en 8 otobre 2020. Consultada en 14 agosto 2015.{{cite encyclopedia}}: Manteni de CS1: data autotraduida (link)
• Melton, J. Gordon (2010). "Ahmad, Mirza Ghulam Hazrat". In Melton, J. Gordon; Baumann, Martin (eds.). Religions of the World: A Comprehensive Encyclopedia of Beliefs and Practices (en engles). Vol. 1 (ed. 2nd). Santa Barbara: ABC-CLIO. pp. 54–56. ISBN 978-1-59884-203-6. Arcivida de la orijinal en 21 otobre 2016. Consultada en 14 agosto 2015.{{cite book}}: Manteni de CS1: data autotraduida (link)
• Mills, Watson E.; Bullard, Roger A. (1998). Mercer Dictionary of the Bible (en engles). Mercer University Press. ISBN 978-0-86554-373-7. Arcivida de la orijinal en 18 otobre 2017. Consultada en 14 agosto 2015.{{cite book}}: Manteni de CS1: data autotraduida (link)
• Morris, Leon (1992). The Gospel According to Matthew (en engles). Wm. B. Eerdmans. ISBN 978-0-85111-338-8. Arcivida de la orijinal en 2 agosto 2020. Consultada en 8 otobre 2020.{{cite book}}: Manteni de CS1: data autotraduida (link)
• Niswonger, Richard L. (1992). New Testament History (en engles). Zondervan. ISBN 978-0-310-31201-7.{{cite book}}: Manteni de CS1: data autotraduida (link)
• Pannenberg, Wolfhart (1968). Jesus: God and Man (en engles). S. C. M. Press. ISBN 978-0-334-00783-8. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Powell, Mark A. (1998). Jesus as a Figure in History: How Modern Historians View the Man from Galilee (en engles). Westminster John Knox Press. ISBN 978-0-664-25703-3.{{cite book}}: Manteni de CS1: data autotraduida (link)
• Rahner, Karl (2004). Encyclopedia of Theology: A Concise Sacramentum Mundi (en engles). Continuum. ISBN 978-0-86012-006-3. Arcivida de la orijinal en 27 julio 2020. Consultada en 8 otobre 2020.{{cite book}}: Manteni de CS1: data autotraduida (link)
• Rausch, Thomas P. (2003). Who Is Jesus? An Introduction to Christology (en engles). Liturgical Press. ISBN 978-0-8146-5078-3. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Redford, Douglas (2007). The Life and Ministry of Jesus: The Gospels (en engles). Standard Publishing. ISBN 978-0-7847-1900-8. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Reed, Jonathan L. (2002). Archaeology and the Galilean Jesus: A Re-examination of the Evidence (en engles). Continuum. ISBN 978-1-56338-394-6. Arcivida de la orijinal en 4 maio 2016. Consultada en 8 otobre 2020.{{cite book}}: Manteni de CS1: data autotraduida (link)
• Robinson, Neal (1991). Christ in Islam and Christianity (en engles). Albany: State University of New York Press. ISBN 978-0-7914-0559-8.{{cite book}}: Manteni de CS1: data autotraduida (link)
• Robinson, Neal (2005). "Jesus". In McAuliffe, Jane Dammen (ed.). Encyclopaedia of the Qurʾān (en engles). Brill. doi:10.1163/1875-3922_q3_EQCOM_00099.{{cite encyclopedia}}: Manteni de CS1: data autotraduida (link)
• Sanders, E. P. (1993). The Historical Figure of Jesus (en engles). Allen Lane Penguin Press. ISBN 978-0-14-192822-7. Arcivida de la orijinal en 18 april 2017. Consultada en 8 otobre 2020.{{cite book}}: Manteni de CS1: data autotraduida (link)
• Theissen, Gerd; Merz, Annette (1998). The Historical Jesus: A Comprehensive Guide (en engles). Fortress Press. ISBN 978-1-4514-0863-8. Arcivida de la orijinal en 5 agosto 2020. Consultada en 8 otobre 2020.{{cite book}}: Manteni de CS1: data autotraduida (link)
• Theissen, Gerd; Winter, Dagmar (2002). The Quest for the Plausible Jesus: The Question of Criteria (en engles). Westminster John Knox Press. ISBN 978-0-664-22537-7. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Twelftree, Graham H. (1999). Jesus the Miracle Worker: A Historical & Theological Study (en engles). InterVarsity. p. 95. ISBN 978-0-8308-1596-8.{{cite book}}: Manteni de CS1: data autotraduida (link)
• Van Voorst, Robert E. (2000). Jesus Outside the New Testament: An Introduction to the Ancient Evidence (en engles). Wm. B. Eerdmans. ISBN 978-0-8028-4368-5. Arcivida de la orijinal en 19 agosto 2020. Consultada en 8 otobre 2020.{{cite book}}: Manteni de CS1: data autotraduida (link)
• Vine, William E. (1985) [1940]. Expository Dictionary of New Testament Words (en engles). Fleming H. Revell. ISBN 978-0-916441-31-9.{{cite book}}: Manteni de CS1: data autotraduida (link)
• Vermes, Geza (1981). Jesus the Jew: A Historian's Reading of the Gospels. Philadelphia: First Fortress. ISBN 978-0-8006-1443-0. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Walvoord, John F.; Zuck, Roy B. (1983). The Bible Knowledge Commentary: New Testament (en engles). David C. Cook. ISBN 978-0-88207-812-0. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)
• Witherington, Ben (1997). The Jesus Quest: The Third Search for the Jew of Nazareth (en engles). InterVarsity. ISBN 978-0-8308-1544-9. Arcivida de la orijinal en 8 otobre 2020. Consultada en 8 otobre 2020.{{cite book}}: Manteni de CS1: data autotraduida (link)