Linguas franca

De Vicipedia
Jump to navigation Jump to search
Un testo en tre linguas - xines, melaiu, e engles - cada de cual es ance un lingua franca per multe miliones de persones

Un lingua franca (ance conoseda como un lingua pontin, lingua comun, lingua comersal, lingua aidante, lingua veculin, o lingua liante) es un lingua o dialeto usada per fa ce comunica es posible entre popla ce no comparti un lingua o dialeto nativa, spesial cuando lo es un lingua tre distinguida de ambos de la linguas nativa de la parlores.

Linga francas ia developa tra la mundo tra istoria umana, a veses per razonas comersial, ma ance per razonas cultural, relijiosa, diplomatal, e governal, e como un modo de intercambia informa entre siensistes e otra eruditas de nasionalias diferente. La espresa es prendeda de la lingua franca de la Mediteraneo, un pijin (o creol) usada par mercatores e marinores european en la milenia du. Un lingua internasional, parlada tra la mundo par un cuantia grande de persones, es un lingua cual pote funsiona como un lingua franca global.

An ce la plu de linguas es linguas nativa de un comunia spesifada, un lingua franca es usada estra la bordas de sua comunia orijinal. Per esemplo, engles es la lingua nativa de la Rena Unida, ma lo es usada como un lingua franca en la Pilipinas. Arabi, franses, putong (xines), espaniol, portuges, e rusce, servi un rol simil como lingua francas de industria o educa, tra bordas rejional e nasional.

La usa de linguas franca ia esiste de anticia. La prima esemplo, ante elinica e latina, ia es arami. Latina e elinica ia es linguas franca de la Impero Roman e la cultur elenica. Arami ia rest la lingua comun per un parte grande de Asia sude-ueste tra multe imperos.

En alga nasiones, la lingua franca es ance un lingua nasional. Indonesian ia ave esta rol en Indonesia, an si djava ave plu parlores nativa. An tal, Indonesian es la sola lingua ofisial e es parlada tra la nasion. Simil, farsi es ambos la lingua franca de Iran e sua lingua nasional.

La lingua Hindustani, composada de hindi e urdu, du linguas multe simil ma scriveda cada con sua propre alfabeta, es la lingua franca de Pacistan e India norde, e es un de la linguas ofisial de India, cual la plu de persones aprende con sua lingua nativa (e, comun, engles).

Linguas aidante internasional, como esperanto e lingua franca nova no ia ave un grado grande de adota internasional, e donce no pote es descriveda como lingua francas global susedosa. Ma sua intendes es esata tal.