Poplas slavica
La popla slavica es los ci abita en Europa este e sentral, la Balcanes, e Asia norde e sentral. La slavicas inclui la rusces, la bielarusces, la ucrainsces, la polsces, la txesces, la slovensces, la balgarsces, la slovenianes, la serbsces, la corvatsces, e la bosnianes. La rusces es la grupo la plu grande, segueda par la polsces e la ucrainsces.
Alga otra poplas abita prosima a la slavicas ma no es mesma slavica: la lietuvisces e latvisces es de un grupo relatada; otra indoeuropeanes inclui la deutxes, la elinicas e la romanianes; nonindoeuropeanes inclui la popla uralica, suomis e magiares.
La popla slavica ia veni orijinal de un area norde e norde-este de la Montes Carpato, en cual es aora Polsca sude, Bielarus sude e Ucraina norde. La popla baltica, ci es relatada a la slavicas, abita a norde de los, a la costa sude de la Mar Baltica. La romanes ia nota los pos 500 ec, spesial como tre tribus: la antes, la sclaveni, e la veneti.
Sirca 500 ec, cuando la germanicas de la area de Polsca ia vade a ueste e sude-ueste, la slavicas ia migra a la paises cual la germanicas ia abandona sirca la Rio Oder e la Rio Danubio. La xefes de la slavicas ia alia comun con o la impero de la Francas o la impero de Bizantio. En 681, la impero prima de Balgaria ia deveni la pais la plu potiosa. Los contribui multe a la sperde de cristianisme e alfabetisme a la slavicas.
La linguas slavica es nativa parlada par plu ca 300 milion persones. Lo es divideda entra tre ramos: la slavica este (rusce, bielarusce e ucrainsce), la slavica ueste (polsce, txesce e slovensce), e la slavica sude (slovenian, corvatsce, serbsce, bosnian, macedonsce e balgarsce). Seguente linguistes, corvatsce, serbsce e bosnian es no plu ca dialetos de serbocorvatsce, e macedonsce es un dialeto de balgarsce. Ma la nasionalistes de cada nasion insiste vide los como linguas separada.
On ave multe poplas istorial peti, como Lusitania, Rusin, Kaxubia, etc. Aora, Rusia es la nasion la plu potiosa, ma en la sentenio 10, la Txesco ia es la plu potiosa, e en la sentenio 16, Polsca.
