Dio

De Vicipedia
Jump to navigation Jump to search

En credes monteiste, Dio es comprendeda como un esente suprema, un divin creor, e la ojeto prinsipe de fide. La consetas de Dio como descriveda par teolojistes inclui comun la cualias de omnisientia (tota sabente), omnipotia (tota potiosa), omnipresenti (tota presente, e como avente un esiste eterna e nesesada. Dependente de la tipo de teisme on ave, esta cualias es usada o como metafores o en un modo leteral. Dio es plu comun videda como nonfisical, un spirito; ma alga credores vide el como un tipo de om o fema, con alga cualias de umanas ma multe plu potiosa.

Dio es videda como o personal o nonpersonal. En teisme, Dio es la creor e mantenor de la universo, sempre interatante con la mundo; en deisme, Dio es sola la creor, e ce, pos la crea, el no interfere con la avenis fisical o umana. En panteisme, Dio es la universo mesma, o la aspeta spirital de la mundo material. En ateisme, on ave un asentia de crede en Dio. En agnosticisme, la esiste de Dio es videda como nonconoseda o nonconosable. Dio ia es ance videda como la fonte de tota obligas moral, e la esistente la plu bon consetable. Multe filosofistes notable ia developa razonas per e contra la esiste de Dio.

Per ideas sur dios e divas estra la tradisiones de monoteisme, vide "divines". Per divines consetida en la forma (leteral o metaforal) de femes, vide "diva".

La crea de Adam, par Michelangelo, 1512

Dio en zoroastrisme[edita | edita la fonte]

Zoroastristes crede en un dio, Ahura Mazda, ci ia crea la universo, incluinte un colie de aidores nomida Amesha Spentas, tra ci la adora de dio es diretada. La prima de estas es Spenta Mainyu (la bon spirito), ci oposa un enemi, Angra Mainyu e sua fortes de malia, ci ia es creada par "pensa mal".

Dio en induisme[edita | edita la fonte]

Multe induistes ave un crede de Dio en cual Dio ave tre aspetas: Brahma, Vishnu, e Shiva – el es la trimurti. Per multe induistes, la otra dios e divas es formas de esta tre. Ma induisme es un relijio multe diversa: alga persones es politeistes, otras es monoteistes, e otras es panteistes, etc.

Dio en budisme[edita | edita la fonte]

Orijinal, la popla de India ia crede en multe dios e divas. Ma Buda ia dise ce esta divines, como tota esentes, es mortal, cual multe persones no crede como un cualia de un dio. Budisme moderne inclui popla ci reteni ideas de dios antica, consepida como metafores o leteral; otras es esensal ateistes. La ideas sentral de budisme conserna la nesesa de un vive moral, cual ultima pote relasa la spirito de la mundo material, un state nomida nirvana.

Dio en jainisme[edita | edita la fonte]

Jainisme no suporta un crede en un dio creosa. Seguente sua credes, la universo e sua contenidas - spiritos, materia, spasio, tempo, la prinsipes de move, etc - ia esiste sempre. Tota es governada par la leges universal de natur. Cada spirito umana es unica e eterna, e los ci pote destrui sua carmas e desiras ateni nirvana. Recompensas e punis no es la obras de un divin, ma un resulta de un ordina moral en la universo, un mecanica autoregulante par cual un person colie la frutas de sua atas tra la opera de carma.


Dio en iudisme[edita | edita la fonte]

Iudistes crede en sola un Dio, "Iaue" o "Adonai", cual ia es revelada en la Biblia, composada de la mitos, istoria, e scrives de la popla iudi. Alga iudistes prefere no usa la nom de Dio, per respeta El. Dio es la fonte de la leges de iudisme, spesial la Des Comandas, cual ia es asetada ance par cristianes.

Dio en cristianisme[edita | edita la fonte]

En cristianisme, Dio ave tre aspetas (la trinia): la Padre (Iaue), la Fio (Jesus) e la Spirito Santa. La idea de la trinia es nomida "la misterio de Dio" car nos no pote comprende la paradox de tre persones en un Dio.

Dio en arianisme[edita | edita la fonte]

Arianisme]] ia es un crede cual ave un sola Dio. Lo es simil a islam en sua conseti de Dio. La arianisme es un parte de cristianisme, ma ambos de estas dise ce la otra no es cristian. En arianisme, Jesus es un fio de jenitores normal – el no es Dio o de Dio, ma el es favoreda de Dio. La arianisme no crede en la trinia, contra cuasi tota otra setos de cristianisme.

Dio en islam[edita | edita la fonte]

En la crede de islam la Dio es la un e sola Dio, la Xahada es "La illaha il Allah, Muhammadan rasul Allah" (en elefen: "On ave no otra dio ma Allah, e Muhammad es sua mesajor"). Allah es la nom de la Dio en islam. Multe pensores muslim vide la idea cristian de la trinia un forma de politeisme.

Dio en mormonisme[edita | edita la fonte]

En mormonisme, Dio es tre persones, ma no como cristianisme, la persones no es un Dio: en mormonisme los es tre dios. La dios de mormonisme es la Padre o Jehova, la Fio o Jesus, e la Spirito Santa. En mormonisme, Jehova e Jesus ave un corpo fisical, ma la Spirito Santa no ave aora un corpo fisical, ma en tempo El va ave ance un corpo fisical. La dios en mormonisme es unida en ama, ma los no es la mesma dio. En mormonisme, Jehova ia nase de un otra dio e diva, e Jesus ia nase de Maria e Jehova en un copula normal – en mormonisme, Jesus es la fio fisical de la Padre.

Dio en sicisme[edita | edita la fonte]

Sices crede en un Dio singular cual ia esiste de la comensa de tempo e va surive eterna. Dio es nonjenero, sin teme, sin forma, no cambiante, no comprendable, autosufisinte, omnipotente, e nonmortal. La sicistes crede en fide en Dio, medita sur el, e en la egalia de tota umanas.

Dio en bahaisme[edita | edita la fonte]

Bahais crede ce Dio es singular e omnipotente, e ce relijio es revelada tra la profetas ci es la fundores de la relijios major de la mundo tra istoria: Buda, Jesus, Muhammad, e plu resente la Bab e Bahaullah, cual instrui ce tota popla es unida e egal.

Dio en uica[edita | edita la fonte]

En uica, la Dio ave un lado fema - la Div - cual es regardada como egal, o an superior. Alga credores adora sola la Diva. La ideas de uica veni de tradisiones antica de la celtas, ma ance de scrivores de la sentenio 19, ci ia crea un relijio inspirada ma no identical con los de popla antica, e incluinte multe ideas de otra tradisiones, vea e moderne.

Vide ance[edita | edita la fonte]