Panteisme

De Vicipedia
Jump to navigation Jump to search
Spinoza

Panteisme es la crede ce realia es identica con dio o la divin. Tota cosas, la universo, es no diferente ca lo cual nos vide como divin, e la material es no diferente ca la spirital. Panteisme orijina miles de anios ante la presente, e elementos panteiste pote es notada en relijios e filosofias variosa. Panteisme ia es popularida en cultur de la ueste como un teolojia e filosofia fundida sur la obras de la filosofiste de la sentenio 17 Baruch Spinoza, spesial en sua libro Etica. Un crede simil ia es marcada en la scrives de la filosofiste de sentenio 16, Giordano Bruno. Lo es interesante ce Spinoza ia es escluida par sua sinagoga, e ce Bruno ia es ardeda a la palo en la Campo de' Fiori (plaza de flores) en Roma en 1600. Panteisme no ia es tolerada par la relijios de la mundo ueste.

Spinoza ia oposa la dualisme de mente e corpo famosa de Rene Descartes, la teoria ce la corpo e la spirito es separada. Spinoza ia prefere la vista moniste ce la du es la mesma, e esta monisme ia es un parte fundal de sua filosofia. El ia es descriveda como un "om enebriada con Dio", an si el ia usa la parola Dio per descrive la unia de tota sustantia. Sua filosofia ia influe multe filosofistes e otra pensores como George Hegel, ci ia dise "On es o un spinoziste o tota no un filosofiste."

En un letera scriveda a Eduard Busching pos ce el ia envia un edita de sua libro Es gibt keinen Gott ("On ave no Dio"), Albert Einstein ia scrive "Nos seguores de Spinoza vide nosa Dio en la ordina e lege merveliosa de tota cual esiste e en sua spirito (Beseeltheit) como lo revela se en umanas e animales". On debe nota ce Einstein ia atenta clari sua panteisme par dise ce la idea de un Dio personal, como descriveda en la relijios de la mundo ueste, es asurda e un produi de la limitas de la inteleto umana.

On ave alga filosofias cual ave similes con panteisme, ma no es identical:

  • Adora de natur o misticisme natural es comun confusada con panteisme. En adora de natur, natur es definida como la mundo estra umanas, e tipal inclui ideas per redui la efeto de tecnolojia e otra creas umana a esta natur. Ambientisme, per esemplo, ave plu relata a adora de natur ca panteisme. Adora de natur pote acorda con panteisme, ma lo pote acorda con teisme, deisme, ateisme, etc.
  • Panenteisme ia es un atenta per sintese filosofial entre teisme tradisional e panteisme, disente ce Dio es presente en la universo fisical ma ance esiste esta la universo como sua creor e sustor. Pandeisme es simil a panenteisme: lo proposa ce un creor ia esiste distinguida de la universo, ma alora deveni identical con lo.
  • Panpsicisme es la crede filosofiste tenida par alga panteistes ce consensa, mente, o spirito es un cual universal de tota cosas. Esta es simil a panvitalisme (o hilozoisme), cual sujesta ce tota cosas es vivente, e a animisme, cual crede ce tota cosa ave un spirito.
  • Monisme neutral es un filosofia asosiada con William James, la psicolojiste/filosofiste american. Lo ia dise ce la realia ultima es sola un tipo de sustantia, cual no es esata fisical o spirital, ma "neutra", e ce lo es videda como material o mental par causa de nosa sensas e razona limitada.
  • Un idea simil es realisme de cualias, cual sujesta ce la universo es composada no de materia e no de spirito, ma de cualias, pd colores, formas, sonas, etc cual esiste autonom de la mente. En esta teoria, tota la universo es intera composada de esta cualias, e no de cualce cosa "neutra".

Per comprende vera la idea de panteisme, on debe leje atendente la Etica de Spinoza.