Animisme

De Vicipedia
Jump to navigation Jump to search
Xamanes es un marca comun de un sosia animiste
Arbores es comun adorada en sosias primitiva
An rocas pote es persepida como avente spirito

Animisme (de la latina anima, "respira, spirito, vive") es la crede relijiosa ce ojetos, locas, e viventes tota posese un esense spirital distinguida. Potential, animisme perspepi tota cosas - animales, plantas, rocas, rios, sistemes de clima, ojetos fabricada, e an parolas - como animada e vivente. Animisme es usada en la antropolojia de relijio como un terma per la sistem de crede de multe popla primitiva*, spesial contrastada con la developa relativa resente de relijios organizada.

An si cada cultur ave sua propre mitolojias e rituos diferente, "animisme" es videda como descrivente la esense la plu comun e fundal de la perspetiva "spirital" o "supranatural" de popla primitiva. Esta perspetiva animiste es tenida tan jeneral e inerente per la plu de popla primitiva ave comun no un parola en sua linguas cual coresponde a "animisme" o an "relijio"; la terma es un construi antropolojial.

Como un resulta de la diferes etnnolinguistica e cultural, opina ia difere sur si animisme refere a un modo de esperi antesedente comun a tota popla primitiva de la mundo, o un relijio completa en sua propre modo. La defini corente asetada de animisme ia es developada sola en la sentenio 19 tarde - spesifica 1871 - par antropolojiste Edward Tylor, ci ia crea lo como un de la consetas la plu temprana de antropolojia.

Animisme inclui la crede ce tota fenomenos material ave ajentia, ce un distingui forte entre la mundo spirital e fisical no esiste, e ce spirito no esiste sola en umanas, ma ance en otra animales, plantas, e cosas jeografial como montes o rios, etc. Animisme pote plu atribui un forsa de vive a consetas astrata como parolas, "nomes vera", o la metafores en mitos. Alga membros de la mundo moderna e non-tribal vide se mesma como animistes, como multe aderentes de relijos pagan o neopagan, adorores de natur, e panteistes o panpsicistes.

  • Nota: La usa de la parola "primitiva" en refere a alga poplas no es intendeda per diminui la capasias de persones o la ricia de sua cultures; lo refere sola a popla ci vive estra la mundo moderne con sua sites, industria, nasiones, tecnolojia, etc. Popla primitiva abita tipal areas como forestas, desertos, tundra, en sosias organizada a la nivel de tribus o an bandas, e suporta se par cultiva, la doma e eleva de animales, xasa, e colie. Aora, poplas como esta es menasada par estingui, ma alga milenias en la pasada, tota umanas ia es "poplas primitiva".