Shiva

De Vicipedia
Jump to navigation Jump to search
Shiva como la dio de la dansa

Shiva (sanscrito: शिव, "la fortunosa"), ance conoseda como Mahadeva ("la dio la plu grande"), es un de la dios xef de induisme. El es la esente suprema en shaivisme, un de la tradisiones major de induisme moderne.

Shiva es conoseda como la destruor en la trimurti, la trinia indu cual inclui ance Brahma e Vishnu. En la tradision de shaivisme, el es la esente supreme ci crea, proteje, e muti la universo. En la tradision de shaktisme, la diva es descriveda como suprema, ma la trimurti es ance adorada. Un diva es la enerjia e potia creosa (shakti) de cada, con Parvati la egal de Shiva.

Seguente la shaivistes, la forma la plu alta de Shiva es sin forma, sin limita, transendente e noncambiante, la Brahman asoluta, e la Atman (spirito) de la universo. On ave multe depintas de Shiva, alga bonvolente e otras asustante. Como un bonvolente, el es mostrada como un iogi omnisiente ci ave un vive asetica sur Monte Kailash con sua sposa Parvati e sua enfantes Ganesha e Kartikeya. Como un ferosa, el es comun mostrada matante demones. El es regardada como la dio padron de ioga, medita, e la artes.

En representas, el ave comun un serpente sirca sua colo, un luna cresente, la Rio Ganga fluente de sua capelas marianada, un oio tre a sua fronte, un tridente como sua arma, e un tambur damaru. El es tipal adorada en la modo de un linga (penis), cual sinifia la potia creosa mas, con sua sposa representada par un yoni (utero) con la sinifia de la potia creosa fema. Shiva es adorada vasta par indus, en India, Nepal, e Srilanca.