Rio San Lorenzo

De Vicipedia
Un mapa de la Rio San Lorenzo
Barcasa a la via maral

La Rio San Lorenzo (engles: Saint Lawrence River. Franses: Fleuve Saint-Laurent) es un rio grande en la latitudes media de America Norde. Lo flue jeneral en un dirije norde-este, juntante la Lagos Grande con la Mar Atlantica e forminte la esflue de la basin de la lagos. Lo traversa la provinses canadian de Quebec e Ontario, e es un parte de la borda entre Ontario e la stato de la SUA de Nova York.

La Rio San Lorenzo comensa a la esflue de Lago Ontario e pasa tra Montreal e Quebec Site ante drenante en la Golfo San Lorenzo, la estuario la plu grande en la mundo. La rio deveni mareal un distante corta pos Quebec Site. La rio es 3058 km de sua fonte la plu distante a la boca, e 1197 km de la esflue de Lago Ontario. La fonte ultima es la Rio Norde en la Cadena Mesabi en Minnesota. Car la rio crusi tan multe lagos, lo ave multe cambias de nom. Un sistem de canales e clusas, nomida la Via Maral de San Lorenzo, ia es abrida ofisial en 1959 par Rena Elizabeth 2 e presidente Dwight D. Eisenhower. La via permete aora ce barcones de mar pote pasa a e de Lago Superior.

La esploror european prima ci ia naviga la Rio San Lorenzo ia es Jacques Cartier. Car el ia ariva a la estuario sur la dia de la festa de San Lorenzo, el ia nomi lo per el. A acel tempo, la pais longo la rio ia es abitada par la irocuoi. Otra grupos de americanes orijinal ia abita plu norde e ueste, de la familia algoncian. La europeanes cual visita frecuente ia es la euscara, ci ia veni a la golfo e rio xasante balenas en la sentenio 16 temprana. La euscaras ia intercambia con la americanes orijinal. Ultima, la area ia es prendeda par Frans, e continua tal asta la vinse par Britan en la sentenio 18.