Lagos Grande

De Vicipedia
Jump to navigation Jump to search
Vista de la Lagos Grande de spasio
Vista de Toronto de Lago Erie

La Lagos Grande (engles: the Great Lakes. franses: les Grands-Lacs) es un serie de lagos interliada de acua dulse, locada xef en la rejion norde-este e norde-central de America Norde, a la borda entre Canada e la SUA, e cual lia a la Mar Atlantica par la Rio San Lorenzo. Los es composada (de ueste a este) de Lago Superior, Lago Michigan, Lago Huron, Lago Erie, e Lago Ontario.

La Lagos Grande es la grupo de lagos de acua dulse la plu grande a Tera par area, e la grupo du par volum, conteninte 21% de la acua surfas de acua dulse par volum. La surfas es 244,106 km2, e la volum es 22,671 km3, un cuantia pico min ca la volum de Lago Baikal (23,615 km3). Par sua cualias marin (ondos rolante, ventas continuante, corentes forte, profundas grande, e orizones distante), la sinco Lagos Grande ia es comun refereda como mares interna. Lago Superior es la lago du de grandia en la mundo par area, e Lago Michigan es la lago la plu grande cual es tota sola en un nasion.

La Lagos Grande ia comensa formi a la fini de la periodo glasial final sirca 14,000 anios a ante, cuando la glasias retirante ia esposa la basines cual lo ia escava en la tera, cual alora ia pleni par la acua de la jelo fondente. La lagos ia es un via major per transporta, migra, e comersia, e los es la abitada de un cuantia grande de spesies acual. Multe spesies invadente ia es introduida par comersia, e alga menasa la biodiversia de la rejion.

La rejion cual ensirca la lagos es nomida la rejion de la Lagos Grande, e lo inclui la mega-urba de la Lagos Grande. La mega-urba inclui sites grande como Chicago, Buffalo, Cleveland, Milwaukee, Rochester, e Duluth en la SUA, e Toronto, Hamilton, e Thunder Bay en Canada.