Algoncian (popla)

De Vicipedia
Jump to navigation Jump to search
Un mapa de la estende temprana de la popla algoncian
Un depinta de un vila de algoncianes de Carolina Norde
Un depinta de algoncianes de Nova England, encontrante Roger Williams, la fundor de Rhode Island

La popla algoncian es un de la grupos de americanes orijinal la plu poplosa e estendeda. Oji, miles de persones identifia se con esta popla. Istorial, la poplas ia es importante longo la costa de la Mar Atlantica e la rivas de la Rio San Lorenz e sirca la Lagos Grande. La grupo es definada par sua linguas algoncian.

Ante la europeanes ia veni e contata los, la plu de colonias algoncian ia vive par xasa e pexa, an si multe ia aumenta sua dieta par cultiva maises, favas, e zucas, cual los nomi "la tre sores". La odjibua (de la norde-ueste de la Lagos Grande) ance ia cultiva ris savaje.

La algoncianes de Nova England ia ave un economia saisonal. La unia sosial funda ia es la vila: alga sentos de persones relatada par un strutur familial. La vilas ia es tempora e movable. La popla ia move a locas cual ia ave la plu bon reserva de comedas, comun dividente enre unias plu peti o asembla en grupos plu grande si la situa nesesa. Esta costum ia resulta en un grado de movablia intertribal, spesial en edas difisil.

En tempos calda, los ia construi uiguames portable, un tipo de cabana de ramos e bastones con portes de peles de servos. En la inverno, los ia construi casas longa plu masosa, en cual plu ca un clan pote abita. Los ia reserva comedas en strutures semisutera plu permanente.

En la primavera, cuando la pexes ia ovipari, los ia parti de sua campas de inverno per construi vilas a locas costal e prosima a cascades. En marto, los ia catura pexes peti en redes e pararios, usante canoas de la cortex de betul per move. En april, los ia catura pexes plu grande, como alosas, sturiones, e salmones. En maia, los ia pexa trutas, percas, e bambolas con linias e oncas en la mar o la estuarios e rios. A mar, la omes ia xasa balenas, focas, otra mamales. La femes e enfantes ia colie petenes, mules, bivalvos, e crabes, ancora multe comeda en la area oji. De april tra otobre, la algoncianes ia xasa avias migrante, como gansos e pijones, e sua ovos. En julio e agosto, los colie bacas e nozes. En setembre, los ia divide en grupos peti per xasa servos, alces, renos, e castores.

En desembre, cuando la neva comensa, los ia crea campas grande en locas protejente, do los ia construi o reconstrui sua casas longa. Februa e marto ia es menses difisil: la tribus en Nova England sude ia debe depende de comedas reservada. Los plu norde ia developa un pratica de no come per dias a un ves.

La algoncianes sude de Nova England ia depende per la plu parte sur cultiva de talia e arde. Los prepara campos par arde per un o du anios de cultiva, pos cual la vila ia move a un otra loca. Per esta razona, la colonistes engles ia trova multe areas ja preparada per planta. Par usa spesies variosa de maises, favas, e zucas, la algoncianes sude ia es capas de boni sua dieta a un grado ce sua cuantia de popla ia crese e los ateni un densia de 287 persones per 100 miles cuadrida (259 km2), en cuando la tribus de la norde ia ateni sola 41 persones per la mesma area.

An con la turna de recolies par move, la vilas sude ia es min movante ca los a la norde. Los ia continua sua ocupa saisonal ma tende move a vilas fisada prosima a sua campos. Los ia ajusta a la cambia partal par developa un divide de labor par seso, en cual la femes ia cultiva la recolies e la omes ia pexa e xasa.