John Locke

De Vicipedia
John Locke

John Locke (~djan lac; 29 agosto 1632 – 28 otobre 1704) ia es un filosofiste e mediciste engles, videda como un de la pensores la plu influente de la Lumina european. Sua obras ia afeta forte la developa de epistemolojia e filosofia political, influente la pensores de Frans, Scotland, e la revoluistes en America Norde. Sua influes es refletada en la Declara de Autonomia de la Statos Unida de America.

La teoria de mente cual Locke ia developa es comun sitada como la orijin de la consetas moderne de identia e personia, e ta influe otra filosofistes como David Hume, Jean-Jacques Rousseau, e Immanuel Kant. El ia es la filosofiste prima ci ia defini la person tra un continui de consensa. El ia sujeste ce, a nase, la mente es un tabula rasa (latina per "tableta vacua"). Contra la filosofia de Descartes, cual es fundida sur la idea de consetas pre-esistente, el ia dise ce conose es determinada sola par esperia derivada de persepi par la sensas.

Sua padre, ance nomida John Locke, e sua madre Agnes Keene ia es puritanes. El ia nase a 29 agosto 1632, en un casa rustica a lado de la eglesa en Wrington, Somerset, en England. El ia es batizada a la mesma dia. Pronto pos sua nase, la familia ia move a la vileta de Pensford, sete milias a sude de Bristol, England, do Locke ia crese.

En 1647, Locke ia es enviada a la Scola Westminster en London, un scola prestijial, sponsorida par Alexander Popham, un membro de Parlamente e la comandor pasada de sua padre. Pos completi sua studias ala, el ia es asetada a Christ Church, Oxford, en autono de 1652, a 20 anios.

Locke ia reseta un diploma laural en febrero 1656 e un diploma mestral en juno 1658. El ia oteni un diploma laural en medica en febrero 1675, pos studia estendosa medica en sua tempo a Oxford e labora con siensistes notable de la eda. El ia cura la duxe de Shaftesbury de un maladia de la figato, e ia deveni bon asosiada con la duxe.

Shaftesbury, como la fundor de la promove de la Whiges, ia ave un influe sur la ideas political de Locke. Locke ia deveni envolveda en politica cuando Shaftesbury ia deveni la Lord Chancellor ("senior canselor") en 1672. Con suporta de Shaftesbury, Locke ia composa la parte major de Du tratas de governa, cual furni razonas jeneral contra un monarcia asoluta, e per acorda individua como la funda de legalia political. An si Locke ia es asosiada con la Whiges, sua ideas sur diretos natural e governa es videda revoluiste per acel periodo en la istoria de England.

John Locke

Algas vide John Locke como "la padre de la lumina". El ia nase 29 agosto 1632, la mesma anio como Spinoza. Sua padre ia es un avocato e un puritan, ci ia ensenia a sua fio la valua de representa e libre relijiosa. La padre de John ia mori de tuberculose cuando John ia ave 29, e el ia resta un erita peti a John.

Locke ia reseta un diploma laural en febrero 1656 e un diploma mestral en juno 1658. El ia oteni un diploma laural en medica en febrero 1675, pos studia estendosa medica en sua tempo a Oxford e labora con siensistes notable de la eda. El ia cura la duxe de Shaftesbury (avo de la filosofiste con la mesma titulo) de un maladia de la figato, e ia deveni bon asosiada con la duxe como suadotor personal.

Comensante en 1675, Locke ia studia en Frans. Cuando el ia reveni a England, el ia trova ce la clima political su re James 2 ia deveni min ca bonveninte. En 1683, Locke ia fuji a Nederland, do Locke ia ave la tempo per reveni a sua scrives. Locke ia reveni a England pos la Revolui Gloriosa, acompaniante Mary 2 en 1688. La plu de la publica de sua obras aveni pos sua reveni de esclui. La Esajo sur comprende umana, la Du tratas sur governa sivil, e la Letera sur tolera ia apare en susede rapida. Ala el ia scrive sua obra grande de psicolojia, Esajo sur comprende umana. En 1691, el ia retira a un cason de un ami, e ia mori en 1704 con 72 anios.

Sua Tratas solitar ta garantia sua seda en istoria prosima a la plu alta. En los, el ia trasa la fundas de governa representante, inclui diretos natural, la acorda de la governada, la proteje de propria, tolera relijiosa, separa de eglesa e stato, e la sertis e ecuilibra entre la ramos esecutante e legal. Sua ideas ta deveni la funda de la Declara de autonomia, la Constitui american, spesial la Declara de diretos, e la Declara de la diretos de umanas de Frans. No mal.

Contra Hobbes, Locke ia vide persones como avente un natur positiva, un cual conteni instintos per la bon sosial e la capasia de razona. Car nosa natur es positiva, nos debe permete nos e otras la libria per developa acel natur. Per esta razona, cada de nos debe sede alga grado de libria afin otras pote es simil libre per developa sua potensias.

Leges ia es creada, no per restrinje nos de destrui lunlotra, ma per permete ce nos espresa nosa natures positiva e razonante. E donce un governa es asetable sola si sua leges promove lo cual es nosa natur - libria e razona. E lo pote fa esta sola si lo es fundida sur la acorda de la governada. Si Hobbes remente tu de Skinner, Locke debe remente tu de Carl Rogers.

Sua Esajo sur comprende umana ia ataca un otra idea popular de sua eda: Multe eruditas ia crede ce la idea de Dio e la ideas de bonia e malia es inata en nosa mentes a nase, posible par Dio mesma. Ma cuando Locke ia regarda la varia grande de credes, noncredes, e moralias, el ia conclui ce esta cosas no pote posible es inata.

El ia aseta, natural, ce on ave reflexes e instintos e simil, ma esta es no plu ca segues fisiolojial de move, no ideas. On ave alga ideas, aprendeda par esperia, cual es aprendeda tan temprana e reforti tan coerente ce los ave la apare de nonata. Ma lo es sola un apare!

En la curso de razona ce on no ave ideas inata, el ia construi ance la stadio per du razonas futur, prendeda par Berkeley e Hume. Prima, el ia nota ce, si nos atenta trova materia, nos pote vide no cosa ma cualias cual nos atribui a materia - ma nunca materia mesma. La idea de materia no es empirical! Esta ta es esplicada par Berkeley.

Punto du, el ia nota ce si nos atenta trova mente, no pote vide no cosa ma la cualias nos atribui a mente. Nos vide nunca, empirical, un mente! Esta ta es esplicada par Hume.

Locke no ia fa la saltas cual Berkeley e Huma ta fa. El ia es tro pratical per acel. El ia dise ce nos es, sin duta, coreta en credente en materia e mente. Vive no pote es razonable sin los. Ma ancora, los no es empirical sertida. El ia es a veses nomida un agnostica metafisical: El crede ce on ave mente e materia (e ce los interata, en un modo nonconoseda), ma nun pote demostra sua esiste.

La ideas cual Locke ia introdui ia es adotada zelosa par filosofistes franses e ance la pensores engles e american. Los ta tradui el como un revoluiste, e sua filosofia de natur umana como sensisme e mecanicisme. En fante estas, los ia perde multe de la profondia de Locke.

John Locke ia mori a 28 otobre 1704, e ia es enterada en la semetero de la vileta de High Laver, este de Harlow en Essex, do el ia vive en la casa de Francis Masham de 1691. Locke ia sposi nunca e ia ave no enfantes.