Declara de autonomia de la Statos Unida de America

La Declara de autonomia de la Statos Unida de America es un declara adotada par la Congresa Continental a 4 julio 1776, cual ia anunsia ce la Des-tre Colonias american en gera con Britan es aora statos autonom e, donce no parteni a la Impero Brites.

Lo ia es scriveda par Thomas Jefferson e lo es un esplica de la razonas sur cual la Congresa ia vota a 2 julio sur la autonomia de Britan.

La nase de la Statos Unida de America es selebrada a cada 4 julio, la dia a cual la Declara ia es aprobada par la Congresa.

Testo

La Declara de Autonomia

En Congresa, 4 Julio, 1776

La declara unida de la des-tre statos unida de America: cuando en la curso de avenis umana, deveni nesesada ceun popla deslia la lias politica cual ia junta los con un otra, e ce los prende, entre la potias de la tera, la state separada e egal cual los merita par la leges de natur e de la Dio de natur, un respeta virtuosa a la opinas de umania nesesa ce los ta declara la causas cual move los a la separa.

Nos crede ce esta veras es autoevidente: ce tota persones es creada egal; ce sua creor ia dona a los alga diretos nonalienable; ce entre esta diretos es vive, libria, e la xerca de felisia; ce, per securi esta diretos, governas es instituida entre omes, governas cual deriva sua potias justa de la acorda de la governada; ce cuando cualce forma de governa deveni destruinte de esta finis, es la direto de la popla ce los altera o aboli lo, e institui un governa nova, construinte sua fundas sur tal prinsipes e organiza sua potias en tal forma, afin pare a los ce los va resulta la plu probable en sua securia e felisia. Cautia, vera, va prescrive ce governas cual ia dura longa no ta debe es cambiada per causas lejera e tempora, car tota esperia ia mostra ce umania es plu disposada a sufri, cuando malias es sufrable, ca coreta se mesma par aboli la formas a cual los ia abitua.

Ma cuando un segue longa de maltratas e saisis, cual xasa sempre la mesma ojeto, mostra un intende per redui los su tirania asoluta, es la sua direto, es la sua obliga, ce los dejeta tal governa, e ce los furni defendes nova per la sua securia. - tal ia es la sufri pasiente de esta colonias; e tal es aora la nesesada cual forsa ce los altera sua sistem pasada de governa. La istoria de la re presente de Britan Grande es un istoria de feris e usurpas repeteda, tota de cual con la gol direta per la fundi de un tirania asoluta supra esta statos. Per demostra esta, lasa fatos es presentada a un mundo franca.

El ia refusa sua acorda con leges la plu virtuosa e nesesada per la benefica publica.

El ia proibi ce sua governores aproba leges con importa direta e urjente, sin ce los pospone sua opera asta cuando sua aproba ta es otenida; e cuando los es tal posponeda, el ia descura tota atende a los.

El ia refusa aproba otra leges per la conveni de distritos grande de popla, sin ce acel popla ta sede la direto de representa en la legeria, un direto nonestimable a los, e menasante sola a tiranos.

El ia comanda la asembla de corpos de legeria a loca nonormal, noncomfortosa, e distante de la arciveria de la sua arcivos publica, sola per fatiga los a segue con sua medias.

El ia disolve repetente la casas de representores, per oposa, con firmia mas, sua invades a la diretos de la popla.

El ia refusa per un tempo longa, pos tal disolve, causa ce otras ta es elejeda; donce la potias de legeria, no capas de elimina, ia reveni a la popla desponable per sua pratica; en la tempo media, la stato resta esposada a tota la periles de invade de estra, e convulsa de en.

El ia atenta preveni la popla de esta statos; per esta gol, el ia impedi la leges per la naturali de stranjeres; el ia refusa aproba otra leges per coraji migras asi, e ia grandi la restrinjes per prendes nova de paises.

El ia impedi la dirije de justia, par refusa sua acorda a leges per la institui de potias de judi.

El ia fa ce judores es dependente sola de sua vole, per la periodo de sua ofisias e la cuantia e paia de sua salarios.

El ia institui un multia de ofisias nova, e ia envia asi xamas de ofisiores per molesta nosa popla e come de sua nesesas.

El ia reteni entre nos, en periodos de pas, armadas preparada sin la acorda de nosa legerias.

El ia causa ce la militar es autonom de e superior a la potias sivil.

El ia conspira con otras per carga nos a un autoria cual es stranjer a nosa constitui, e no reconoseda par nosa leges; e ia dona sua acorda a la sua atas de legeria finjente.

Per dona la abita de grupos grande de soldatos con armas entre nos.

Per proteje los, par prosedes falsa, de puni per cualce matas cual los ta fa a la abitores de esta statos.

Per talia nosa comersia con tota partes de la mundo.

Per forsa impostas a nos sin nosa acorda.

Per priva nos en multe casos, de la bones de prosedes con juria.

Per transporta nos ultra la mares per prosedes per ofendes finjeda.

Per aboli la sistem libre de leges engles en un provinse visina, en esta modo institui un governa acaso, e grandi la sua bordas per crea a un ves un esemplo e un strumento conveninte per introdui la mesma rena asoluta en esta colonias.

Per sutrae nosa constituis, aboli nosa leges la plu valuada, e altera fundal la formas de nosa governas.

Per interompe nosa legerias, e per declara ce los posese la potia de legi per nos en tota casos, sin eseta.

El ia renunsia governa asi, par declara ce nos es estra sua proteje, e par declara gera contra nos.

El ia saca nosa mares, ruina nosa costas, arde nosa vilas, e destrui la vives de nosa popla.

El es, a esta ora, transportante armadas grande de mersenarios stranjer per fini la laboras de moria, ruina, e tirania, ja comensada con casos de cruelia e tradi apena egalida par acel en la eda la plu barbar, e tota no meritada par un xef de un nasion sivilida.

El ia constrinje nosa sitadanes fratin, caturada sur la mares altas, porta armas contra la sua pais, deveni esecutores de la sua amis e frates, o los mesma cade par la sua manos.

El ia provoca rebelas interna entre nos, e ia atenta trae la abitores de nosa frontera, la savajes indian sin compatia, de cual sua regula conoseda de gera es la destrui nondistinguinte de tota edas, sesos, e situas.

En cada grado de esta opresas, nos ia suplica per remedia en parolas la plu umil. nosa suplicas repeteda ia es respondeda sola par feri repeteda. Un prinse de ci sua carater es tal indicada par alga ata cual pote defini un tirano, no conveni per es la renor de un popla libre.

E nos no manca en la atende de nosa frates brites ance. Nos ia averti los a alga veses de la atentas par la sua legeria per estende un autoria nonmeritada supra nos. Nos ia sujesta ce los recorda la caso de nosa migra e coloni asi. Nos ia apela a la sua senti nativa de justia e jenerosia, e nos ia suplica a los, par la lias de nosa relata comun, per nega esta finjes cual ta interompe nonevitable nosa lias e coresponde. Los ance ia es sorda a la vose de justia e de lias de sangue. Nos debe, donce, nesesa sede, cual denunsia nosa separa, e regarda los, como nos regarda la resta de umania, como enemis en gera e amis en pas.

Donce, nos, la representores de la statos unida de America, en congresa jeneral, asemblada, suplica a la judor suprema de la mundo per la virtua de nosa intendes, en la nom e par la autoria de la bon popla de esta colonias, declara e publica seria, ce esta colonias es, e par direto debe, es statos libre e autonom; ce los es remeteda de tota alia a la corona brites, e ce tota lias entre los e la stato de Britan grande, es e debe es tota disolveda; e ce, como statos libre e autonom, los ave la potia plen per declara gera, negosia pas, contrata alias, institui comersia, e fa tota otra atas e cosas per cual statos autonom ave la direto. E per la suporta de esta declara, con un depende firma de la proteje de favore divin, nos promete mutua nosa vives, ricias, e onora santa.

(Suscriveda par 56 representores de la 13 colonias.)