Simon Davies

Simon Davies

Informa personal

Nase: 1971
Pais: England

Otra informas

Profesa: Programor

Simon Davies es un programor e linguiste engles, multe ativa en la comunia de lingua franca nova tra plu ca un desenio. El ia es educada en scolas en Winchester e Guildford, e a la Universia de Oxford, do el ia studia la linguas latina e elinica. Aora el labora como un mantenor de compiladores usada per programi bancos de datos spesialida. El es multe interesada par la teoria de linguas de programi e la desinia de linguas construida.

Esperantiste

Davies ia aprende esperanto pos descovre un libro sur lo en un biblioteca local en 1987, e ia deveni ativa como esperantiste a universia en 1989.

De 1991 a 1995, el ia es la editor de Saluton!, un jornal de la Esperantistes Brites Joven, e entre 2001 e 2017 el ia es la tipografiste per La Brita Esperantisto, la jornal dumensal de la Asosia Esperanto de Britan.

El ia tradui de engles La manual xenofobica sur la nederlandeses per la Congresa Universal de Esperanto en Rotterdam en 2008, ia scrive un gramatica peti de esperanto en 2010, e ia aida tecnical con la publici de sirca des otra libros diversa en e sur esperanto tra la anios.

El es ancora un esperantiste ativa.

Elefeniste

Davies ia aprende lingua franca nova en 2008.

El ia labora multe con George Boeree (la creor de elefen) per elimina noncoeres en la vocabulo, per ajunta parolas mancante, e per presenta la disionario como un xercador enlinia e ultima un libro fisical.

El ia partisipa ance multe en discutes sur problemes minor en la gramatica elefen, e ia convinse Boeree a dejeta la coda -r cual verbos infinitiva ia ave en la varia orijinal de la lingua. El ia scrive un gramatica detaliosa en elefen, engles e esperanto, traduida a sinco otra linguas par otra persones a pos.

Davies ia tradui multe naras e otra testos a elefen, incluinte La cade de la Casa de Usor par Edgar Allan Poe, Un canta de natal par Charles Dickens, Alisia en la pais de mervelias e Tra la miror par Lewis Carroll, Un studia en scarlata par Arthur Conan Doyle, e la libro prima de la Eneida. La aventuras de Alisia en la pais de mervelias ia deveni la libro prima publicida en elefen.

De 2013, el scrive la blog Aora oji, cual publici un article de novas internasional, en elefen, a un ves per dia.

El ia aida la institui de la vicipedia elefen par tradui tota la mesajes cual apare en la interfas.

Davies ia dise:

___

Elefen es la lingua prima par cual me ia es tan saisida ce me ia desira partisipa ativa en sua evolui: lo es simple, bela, espresosa, e – en alga modos – estrema natural.

___

Lias

• Paje de usor en la Vicipedia
• Paje de usor en la Vici de LFN
• Traduis par Davies
• La blog Aora oji, scriveda par Davies

Lingua franca nova

Introdui • Istoria • Gramatica • Disionario • Disionario enlinia • Curso • Fontes de vocabulo • Espresa de tempo • Leteratur en elefen • Linguas derivada • Asosia de elefen • Aora oji • Elefeniste • Bandera • Vicipedia de elefen • Vici de elefen