Charles Lutwidge Dodgson

De Vicipedia
Jump to navigation Jump to search
LewisCarrollSelfPhoto.jpg

Charles Lutwidge Dodgson ("txarlz látwidj dódson", 1832–1898), plu bon conoseda su la nom falsa Lewis Carroll ("lúis cárol"), ia es un autor, matematiciste, lojiciste, anglicaniste e fotografiste engles. Sua obras la plu famosa es La aventuras de Alisia en la pais de mervelias e sua seguente Tra la miror, como ance la poesias La xasa de la snarc e Bocragonia. Tota de estas es esemplos de la jenero de leteratur asurda.

On nota Dodgson per sua capasias en juas de parolas, en lojica, e en fantasia. En multe partes de la mundo, on ave organizas dedicada a la gusta e promove de sua obras e a la investiga de sua vive.

Vive[edita | edita la fonte]

Dodgson ia nase a 27 janero 1832 en un casa peti en Daresbury en Cheshire, en England norde-ueste. El ia es la fio la plu vea de un familia de des-un enfantes. La nom de sua madre ia es Frances Lutwidge. Cuando Dodgson ia ave 11 anios, sua padre, ance nomida Charles, ia deveni la prete de Croft, en England norde-este.

En sua jovenia, on ia instrui Dodgson a sua casa. La libros cual el ia leje atesta un inteleto temprana matur: per esemplo, a sete anios, el ia leje La progresa de la peregrinor. Como sua frates e sores, el ia sufri un balbuta cual ia influe sempre sua vive sosial. A la eda de dudes, on ia envia el a un scola peti privata en Richmond, do el ia es felis. Ma en 1846, el ia move a la Scola de Rugby, cual el ia odia. An tal, el ia esele ala en sua labora academial.

El ia lasa Rugby a la fini de 1849 e, pos un interval nonesplicada, el ia progresa a la Universia de Oxford en janero 1851, do el ia es un membro de Christ Church, la scola vea de sua padre. Pos sola du dias, el ia debe revade a casa, car sua madre ia mori de un "inflama de la serebro".

Sua carera academial temprana ia osila entre prometes alta e destraes nonresistable. El no ia labora sempre forte, ma el ia es spesial talentosa. En 1852 el ia reseta un diploma de la grado prima – ma alga plu tarda, el ia fali oteni un posto de scolor par causa de sua noncapasia de aplica se a studia. An tal, sua talento ia gania per el la posto de Lesonor Matematical de Christ Church, cual el ia reteni tra la dudes-ses anios seguente. La paia ia es bon, ma la labora ia noia el. Multe de sua aprendores ia es plu vea e rica ca el, e cuasi nun de los ia es interesada en matematica.

El ia abita a Christ Church asta sua mori par pneumonia a 14 janero 1898 en la casa de sua sores en Guildford, en la sude de England. El es enterada en Guildford.

Leteratur[edita | edita la fonte]

De un eda joven, Dodgson ia scrive poesias e naras corta, cual el ia publici privata per sua familia e a pos ance en alga jornales publica. La plu de esta obras ia es umorosa, an satira a veses, ma sua prinsipes de scrive ia es sever e esijente. En 1856, el ia publici prima un obra – un poesia romantica, nomida "Solitaria" – su la nom "Lewis Carroll". "Lewis" es la spele englesida de "Ludovicus", la forma latina de "Lutwidge", e "Carroll" es un nom familial simil a "Carolus", la forma latina de "Charles".

Ance en 1856, un decano nova, Henry Liddell, ia ariva a Christ Church con sua familia joven. Dodgson ia deveni un ami prosima de Lorina, la sposa de Liddell, e sua enfantes, spesial la tre sores Lorina, Edith e Alice. El ia prende la fias en multe viajas en barcetas de remo sur la rios sirca Oxford. En un tal viaja, a 4 julio 1862, Dodgson ia inventa la funda de la nara cual ia deveni ultima sua susede comersial prima e la plu grande. Alice Liddell ia demanda ce el scrive la raconta, e, final, Dodgson ia presenta a el un manoscrito scriveda e ilustrada par mano, titulida La aventuras de Alisia su la tera, en novembre 1864.

Ma ja ante esta, la familia de un ami George MacDonald ia leje la manoscrito noncompleta, e la zelo de la enfantes ia coraji Dodgson a publici el. Final, la libro ia es publicida como La aventuras de Alisia en la pais de mervelias en 1865, con desinias par Sir John Tenniel, un artiste profesal. Par la susede enorme de la libro, Dodgson ia comensa gania mone sustantial. An tal, el ia continua en sua posto noiante a Christ Church. On raconta – ma Dodgson ia nega esta pos desenios – ce Rea Victoria ia gusta la libro tan multe ce el ia sujesta ce Dodgson dedica sua libro seguente a el, e el ia obedi... en un obra matematical oscur.

A la fini de 1871, Dodgson ia publici un libro seguente, Tra la miror e lo cual Alisia ia trova a ultra. El ave un umor alga plu sombre, cual refleta cisa un cambia en la vive de Dodgson. La mori de sua padre en 1868 ia depresa el tra alga anios. En 1876, Dodgson ia produi sua obra grande final, La xasa de la snarc, un poesia asurda e fantasin cual esplora la aventuras de un ecipo bizara ci vade xerca la animal nomida en la titulo.

Misterio[edita | edita la fonte]

En sua enfantia, on ia prepara Dodgson per deveni ultima un prete. Ma a fini, el no ia desira esta posto. El ia deveni un decano a 22 desembre 1861, ma pos un plu anio, cuando la momento ia ariva per deveni un prete, Dodgson ia apela a Henry Liddell per es permeteda de no prosede. La nonprosede ta rompe la regulas de la scola, e Liddell ia avisa Dodgson ce el debe consulta la dirijores de la scola, espetante ce la dirijores va esclui Dodgson de la universia como resulta. Ma, per razonas nonconoseda, Liddell ia cambia subita sua opina, e ia permete ce Dodgson resta a la scola, en defia de la regulas.

On no sabe perce Dodgson ia rejeta la pretia. Alga persones ia sujesta ce el ia teme predica, par causa de sua balbuta. Cisa el ia comensa duta la instruis de la Eglesa Anglican: el ia es interesada par formas alternativa de cristianisme e par relijios alternativa. Plu, sua jornales personal indica ce, a la comensa de la desenio de 1860, el ia es disturbada par un senti nonesplicable de peca e culpablia.

A la min cuatro volumes intera de sua jornales personal, e sirca sete pajes de testo, manca. On no sabe como la volumes ia es perdeda, e on no sabe ci ia estrae la pajes mancante. La plu scolores suposa ce membros de la familia ia sutrae la informas per conserva bon la reputa de la familia. On sujesta, per esemplo, ce Dodgson ia proposa a la Alisia joven ce los sposi. Ma en 1996, un rexercor ia descovre un paper vea ce descrive corta la contenida de du de la pajes mancante, e esta refere a rumores ce Dodgson cortea la instruor de la enfantes, o cortea Lorina, la sore plu vea de Alisia.

En 1856, Dodgson ia comensa ocupa se con la arte nova de fotografia, en cual el ia esele rapida. El ia crea sirca 3000 imajes, ma min ca 1000 survive oji. On calcula ce un dui de la fotografis survivente imaji fias joven, ma Dodgson ia fa ance multe fotos de fios, omes, femes, canes, popas, vistas, scultas e arbores. Par sua amias con fias joven, e sua manca parente de interesa a lias romantica con femes adulte, multe scolores ia divina ce Dodgson ia es pedofilica a alga grado.

An tal, un grupo de rexercores ia reesamina resente la indicas, e ia conclui ce multe de la "fatos" sur Dodgson es vera mitos. Los dise ce la jornales personal mostra ce el ia ave un interesa forte a femes adulte, e ia fa an relatas de ama scandalosa con los. Sua familia ia supresa referes a esta relatas, e la ilude pedofilica de Dodgson ia emerji como un resulta nonintendeda. Plu, la rexercores dise, en la eda victorian, fotografis de enfantes nuda ia es modosa e sosial asetable.