Alisia en la pais de mervelias

De Vicipedia
La aventuras de Alisia en la pais de mervelias
Alice's Adventures in Wonderland
Autor: Lewis Carroll
Pais: Rena Unida
Lingua: Engles
Traduor: Simon Davies
Data: 2010

La aventuras de Alisia en la pais de mervelias (engles: "Alice's Adventures in Wonderland"), comun cortida a Alisia en la pais de mervelias, es un novela per enfantes publicida en 1865 par la autor engles Charles Lutwidge Dodgson su la nom Lewis Carroll. Lo raconta sur un xica nomida Alisia (engles: Alice) ci cade tra un tunel de coneo e aveni en un mundo fantasin abitada par carateres strana e animales parlante. La nara es plenida con referes a la amis de Dodgson. Lo jua con lojica a modos cual fa ance ce adultes gusta lo. On regarda lo como un esemplo multe tipal de la jenero de leteratur asurda.

En 1862, Dodgson e Robinson Duckworth ia remi un barceta longo la Rio Thames per sinco milias de Oxford a Godstow, con la tre xicas joven de Henry Liddell, la decano de la scola Christ Church do Dodgson ia labora como matematiciste. La nomes de la xicas ia es Lorina, Alice, e Edith. Per pasa la tempo, Dodgson ia raconta a los un nara sur un xica ci vade per xerca un aventura. La xicas ia ama multe la reconta, e Alice ia demanda ce Dodgson scrive lo per los. Pos du anios el ia dona a Alice un manoscrito scriveda e ilustrada par sua propre mano. La novela ia es publicida en 1865, con imajes desiniada par Sir John Tenniel.

De sua publici prima, Alisia en la pais de mervelias ia para nunca es primida. On ia tradui lo a plu ce sento linguas, e ia crea multe teatrales e filmas de lo. La aventuras de Alisia ia continua en un libro du par Dodgson, nomida Tra la miror.

La libro ia es traduida par Simon Davies en 2010 e lo ia es publicida en 2012 esente la publica prima de un nara longa en elefen.

Lias esterna[edita | edita la fonte]