Un istoria corta de la lobotomia

De Vicipedia


La idea de sirurjia sur la serebro como un modo de boni la sania mental ia comensa sirca 1890, cuando Friedrich Golz, un rexercor deutx, ia estra partes de la lobos temporal de sua canes, e ia trova ce los ta deveni plu calma e min combatosa. Esta ia es pronto segueda par Gottlieb Burkhardt, la xef de un institui per dementes en Suiz, ci ia atenta sirurjias simil sur ses de sua pasientes scizofrenica. Cuatro ia deveni plu calma; du ia mori.

On ta pensa ce esta ta es la fini de la idea. Ma en 1935, Carlyle Jacobsen de la universia de Yale, ia atenta lobotomias frontal e prefrontal sur ximpanzes, e ia trova ce los ta deveni plu calma. Sua colaboror a Yale, John Fulton, ia atenta indui "neurose esperimental" en sua ximpanzes lobotomida par introdui siniales contradisente a los. El ia trova ce los ia es cuasi imune a la prosede.

Antonio Egaz Moniz

Lo ia nesesa un dotor portuges a la Scola de Medica a la Universia de Lisbon, Antonio Egaz Moniz, per prende la paso final. El ia es un rexercor multe produosa e ia inventa multe bonis sinifiante a la tecnicas de radiogrames per la serebro ante sua rexerca sur lobotomia. El ia servi ance como la ministro de casos stranjer e la ambasador a Espania. El ia es an un de la suscrivores de la Trata de Versailles, cual ia marca la fini de la Gera Mundal 1.

Dr. Walter Freeman (sinistra) e Dr. James W. Watts (destra)

El ia descovre ce talia la nervos cual core de la cortex frontal a la talamo en pasientes psicotica ci ia sufri de pensas repeteda ta resulta en un "sircuito corta" de la problem. Con sua asosior Almeida Lima, el ia developa un tecnica cual envolve la fora de du bucos peti a cada lado de la fronte, la inserta de un cotel sirurjial spesial, e la severa de la cortex prefrontal de la resta de la serebro, ta dona resultas bon en la vives de alga de sua pasientes. El ia nomi el leucotomia, ma lo es nomida aora la lobotomia.

Alga de sua pasientes deveni plu calma, alga no. Moniz ia consela cauta estrema en la usa de la lobotomia, e ia senti ce lo debe sola es usada en casos en cual cada otra metodo ia es atentada. El ia gania la Premio Nobel per sua labora sur la lobotomia en 1949. El ia jubila plu temprana pos cuando un pasiente vea ia paralise el par xuta el en la dorso.

Walter Freeman, un mediciste american, con sua colaboror James Watts, ia atenta sua lobotomia prima en 1936. El ia es tan sasiada par la resultas ce el ia comensa fa multe miles plu. En fato, el ia comensa un campania de propaganda per promove la usa de lobotomias. El ia es ance famosa per inventa cual es nomida lobotomia par picajelo. No pasiente con la metodos sirurjial difisil developada par Moniz, el ia trova ce el pote inserta un cotel simil a un picajelo supra cada oio de un paseinte, con sola anestese local, forsa lo tra la oso magra con un colpeta de un marteleta, pasa la picajelo de un lado a la otra como un frotador de paravento, e - ta-da! - un pasiente cual ia es difisil ier es pasiva aora.

Freeman ia recomenda la prosede per problemes de psicose a depresa a neurose a criminia. El ia developa cual otras ia nomi lobotomia de la cadena de construi, movente de un pasienta a la seguente con sua picajelo orida, an demandante ce sua aidores mesura sua rapidia per vide si el pote ateni recordos de rapidia per lobotomias. Lo pare ce alga sirurjistes esperiosa ia desmaia, e an Watts ia pensa ce Freeman ia esede la liminas de razona.

Entre 1939 e 1951, plu ca 18 000 lobotomias ia es fada en la la SUA, un multe plu en otra nasiones. Lo ia es comun usada sur prisonidas, e en Japan, lo ia es recomendada per usa sur enfantes "difisil". On ave ancora nasiones moderne cual permete la usa de la lobotomia, an si sua usa ia descrese dramosa. Interesante, la vea Uni Soviet ia proibi lo tan temprana como 1950, car lo ia es videda como nonmoral.

En la desenio de 1950, popla ia comensa deveni turbada sur la frecuentia de lobotomias. Protestas ia comensa, e rexercas seria ia suporta la protestores. La statisticas ia mostra ce sirca un tri de pasientes ia boni, un tri resta la mesma, e un tri deveni plu mal!

On ave alga casos famosa tra la anios. Per esemplo, Rosemary Kennedy, la sore de John, Robert, e Edward Kennedy, ia es lobotomida cuando sua padre ia cesa a dotores sur la interese nova embarasante en xicos ce la xica alga retardada ia comensa mostra. Sua padre ia informa nunca la resta de la familia sur cual el ia fa. Rosemary ia vive en un institui en Wisconsin e ia mori 7 janero 2005 con 86 anios. Sua sore, Eunice Kennedy Shriver ia funda la Olimpicas Spesial en sua onora en 1968.

Per aprende plu sur lobotomia, vide estas:

Jack Pressman, Last Resort (1998).
Elliot Valenstein, Great and Desperate Cures (1986).
Renato Sabbatini, "The History of Psychosurgery" (Brain and Mind, June 1997). Un elejeda de esta article es otenable de https://web.archive.org/web/20040803115918/http://www.epub.org.br/cm/n02/historia/lobotomy.htm.