Posocratistes

De Vicipedia
Jump to navigation Jump to search


Sinicisme[edita | edita la fonte]

Un sculta de Antistene

Pos Platon e Aristotele, la interesas de la filosofistes ia move plu distante de metafisica, epistemolojia, e alga cosa cual sembla siensa moderna, e plu prosima a la ideas cual ia conserna la elinicas antica la plu: etica. Como on es virtuosa, ave carater de cualia, vive un bon vive, ave arete (nobilia).

Antistene (445-365) ia es la fio de un sitadan de Atina e un sclavo fema de Tracia. Pos funda sua propre scola, Antistene ia comensa comprende ce Socrate ia es plu saja ce el. El ia pone se su la mestre, con studiantes ance.

El ia es la fundor de sinicisme. La parola deveni de la parola elinica per can, orijinal car Antistene ia ensenia a un jinasio nomida la Cynosarges, o can-pex, cual ia es construida per la povre de Atina.

Sinicisme recomenda ce on abitua se a un vive simple, afin la spirito pote es librida. Lo es un filosofia de "reveni a natur", en la modo de san Fransesco de Asisi o la monces sever de India. Par elimina sua nesesas e poseses, on pote consentra plu bon a un vive de filosofia.

Sinicisme dise ce la sola bon e sola felisia vera es virtua. On no pote controla la mundo e la levas e cades de vive, donce on debe controla se mesma. "Me ta prefere dementi ca senti plaser!" Antistene ia dise. Sinicistes ia rejeta sivilia, e ia tende retira de sosia, an vivente en la deserto. En esta, los ia influe posible la monces iudi e cristian temprana.

Sinicisme no ia es tota negativa (de la vista de la valuas de oji): Los ia coraji forte individuisme, ia crede ce tota omes ia es frates, no ia aseta la nesesa de gera o sclavia, e ia crede en parla libre. Los ia crede ance ce suiside es asetable e, strana, en seso libre!

La sinicas la plu famosa ia es un studiante de Antistene nomida Diogene. El vide se como un sitadan de la mundo (un "cosmopolitan"), ma, per un periodo, ia abita un amfora grande cual ia es dejetada. On ave un narada famosa en cual Alexandro la grande, trovante Diogene dorminte en la sol, ia declara "me es Alexandro, la re grande!" Diogene ia responde "me es Diogene la can!" Alexandro ia demanda si el pote aida el en alga modo. Diogene ia responde par demanda ce Alexandro ta move car el ia preveni ce la sol brilia plu sur el.

Edonisme[edita | edita la fonte]

Aristupo

Aristupo (435-355) ia es ance un studiante de Socrate. Orijinal de Cirene a la costa norde de Africa, el ia reveni ala per fundi se propre scola, do el ia ensenia la filosofia de edonisme (de la parola elinica per plaser). Edonisme es multe simple: Cualce on fa, on fa lo per gania plaser o evita dole. Plaser es la sola bon, e la ateni de plaser es la sola virtua. Moralia es sola un caso de cultur, costumes, e leges, alga cosa cual nos nomi oji como relatisme etica. Plu, siensa, arte, e sivilia jeneral es bon sola si los es usosa per produi plaser.

Ma nota ce Aristupo ia ensenia ance ce alga plaseres es plu alta ca otras, e ce nos debe no es sclavos a cualce. El ia es egal de bon umor en oras bon e en povria, e el ia despeta mostras vana de ricia.

El es sua studiante ia vive como un parte de un scola-comunia, do tota pratica lo cual los predica, incluinte seso libre, plu ca 2000 anios ante Woodstock. Femes ia es la egales de omes, e no sola en un modo ipotesal: Sua fia Arete ia segue el como la xef de la scola-comunia, ia scrive 40 libros, e ia es onorada par la site de Cirene con la titulo "Lus de Elas".

Seticisme[edita | edita la fonte]

Piro de Elis

Seticisme es oji videda como un cosa bon - "no aseta cualce cosa sola par fida" pote es la slogan per multe filosofistes famosa. Ma orijinal, lo ia es alga plu estrema. Piro de Elis (365-275) es comun videda como la fundor de la scola de seticisme. On crede ce el ia viaja a India e ia studia con la "gimnosofistes" (amantes nuda de sajia), cual ia pote es cualce de multe setas indian. De ala, el ia retrae la idea ce no cosa pote es serta conoseda. La sensas es fasil trucida, e razona segue tro fasil nosa desiras.

Si on pote nunca conose serta cualce cosa, on ta pote suspende sua judi, pare disputa sur lo cual pote es nunca solveda, e atenta trova alga pas e calma en esta vive. Esta pas e calma el ia nomi ataraxia. Nota ce, an si on no pote conose serta cualce cosa, on pote sabe sufisinte multe cosas per vive. La sol va o no va leva doman - ma la probablia es bon ce lo va leva, e como usosa es ansia en cualce caso.

Simil, si no sistem es ultima suportable, per manteni pas, on pote adota simple cualce sistem es la plu comun do on abita aora. Piro ia vive adorante la dios de Elis, an si el ta aseta ce los ia es tan probable ce cualce otra dios, o an no dios. Un setica pote aseta multe ideas per conveni, an si no demostra ultima esiste.

An si, cuando prima videda, esta pare positiva, un de mea studiantes, Annie Lam, ia dise esta:

Si on usa la razona de Piro, sclavia ta esiste ancora oji car americanes african ta debe aseta sua rol como propria afin pas ta es mantenida en la comunia. La plu de sosias ordina se en sistemes ierarcial, donce acel grupos de individuas ci es plu basa en la ierarcia tipal esperia opresa, e en alga esemplos estrema ta es desumanida e savajida. Me acorda con la idea ce no cosa pote es serta conoseda; ma per esta razona, me crede ce disputas e debate debe aveni e no descorajida como Piro dise. Sola con la intercambia libre e respetosa de ideas persones pote developa sua valuas e credes personal en un modo instruida. Me opina ce, si nos sacrifia esta intercambia per ateni ataraxia, nos ta sacrifia ance nosa capasia per developa un identia vera car autorefleta - judi de se mesma e otras - no ta es corajida.

Seticas plu tarda ia deveni comun entre la studiantes en la academia de Platon. Un de los, Carneade de Cirene (214-129) ia es malfamosa per disputa per un caso oji e un otra doman. El ia dise "On ave asoluta no criterio per veria. Razona, la sensas, ideas, o cualce otras cual pote esiste, tota de los engana.

Stoicisme[edita | edita la fonte]

Zeno de Cition

"Sola la instruida es libre." - Epicteto

La fundor de stoicisme es Zeno de Cition (333-262) en Cipros. Lo es posible ce Zeno ia es fenisian o parte fenisian. El ia es un studiante de la sinicas, ma ia es ance influeda par Socrate. Sua filosofia ia es simil a lo de Antistenes, ma ia es moderada par razona. Fundal, el ia crede en es virtuosa, e ce virtua ia es un caso de sede a la vole de Dio. Como otra elinicas ci ia ave sola un dio, Zeno no ia difere multe entre Dio e natur. Donce, "sede a la vole de Dio" es no otra ca "vive seguente natur" (Zen kata physin").

La scola ia deriva se nom de la Portico Pintida (stoa poikile) en Atina, do Zeno ia studia. Paseante tra la coredores abrida, el instrui se studiantes sur la valua de apatea, la asente de pasion, un idea no multe diferente de la idea budiste de nonteni. Par pasion, Zeno ia intende emosia noncontrolada, spesial desira fisical. Sola par adota esta disposa, el ia crede, nos pote developa sajia e la capasia per aplica lo.

"Permete ce nun rompe tua vole!" el ia dise. Persones concista la mundo par developa un disposa noncurante a dole e plaser, pd par medita. Sajia aveni cuando razona controla pasion; malia aveni cuando pasion controla nos.

Un otra aspeta de stoicisme es sua crede es la developa de un stato universal, en cual tota persones es frates e sores. Stoicas ia crede en alga "diretos natural", un conseta cual nos no ta vide denova asta la sentenio 18. Los ia crede ance en la direto per suiside - un parte importante de la tradisiones cultural de la romanes.

La presenta la plu bon de stoicisme es lo par la sclavo elinica Epicteto (50-138 ec), ci ia scrive en la eda roman. On ave ance un libro peti, Meditas, par la imperor roman Marco Aurelio (121-180 ec).

Epicurisme[edita | edita la fonte]

Epicuro

"La dios no debe es temeda; mori no pote es sentida; la bon pote es ganiada; tota cual nos teme pote es vinseda". - Epicuro

Epicuro (341-270) ia es naseda sur la isola Samo en Ionia. Cuando el ave 19 anios, el ia vade a Atina per studia a la Academia. Ma lo pare ce el ia gusta la filosofia de Democrito plu bon. La scola ce Epicuro ia funda ia es spesial egaliste e ia aseta e femes e sclavos. Epicuro, lo es suposada, ia scrive 300 libros. Triste, sola pesetas survive.

Epicuro no ia ave multe pasientia per relijio, cual el ia vide como un forma de nonsabe. El ia es spesial zelosa per aida ce persones ta perde se teme de la dios. Ma el ia dise ance ce la dios esiste, an si los vive un distante grande a via en spasio e no ave multe interesa en la popla de tera. Ateisme, on debe comprende, ia es ancora nonlegal en Atina!

Un de la problemes la plu persistente consernante la crede en un dio es la problem de malia. La esplica de Epicuro es ancora convinsente:

Esce Dio vole preveni malia, ma no es capas? Alora, el no es omnipotente; Esce el capas, ma no vole? Alora, el es malvolente; Esce el e capas volente? Alora, de do malia veni? Esce el no capas e no volente? Alora, perce on nomi el Dio?

Epicuro ia crede ce debate sur metafisica no es usosa, ce un spirito cual survive mori no esiste, ce nos ariva a nosa state presente par evolui, e ce nos ave la capasia de vole libre.

On pote vide, cuasi, un materialisme moderna asi: Tota cosas - incluinte mentes - es composada de atomes e segue la leges natural; Tota sabe deriva de la sensas; Pensas e memorias es no plu ca sensas debil....

Per Epicuro, virtua ia es un media a un fini. La fini es felisia. Lo es bon si on senti plaser e evita dole, ma on debe aplica razona a sua vive. A alga veses, dole es nesesada per gania felisia. A otra veses, plaser indui nos a plu sufri ce lo merita.

Ance, on ave niveles de dole e plaser, felisias peti e grande. Amia, per esemplo, es un de la plaseres la plu grande. "Un saja ama sua amias como el ama se mesma", el ia dise, e "La dona es plu bon ca la reseta". E "Lo no es posible per vive plasente sin vive con sajia, onora, e justia; e lo no es posible ce on vive con sajia, onora, e justia sin vive plasente". El recorda on de Benjamin Franklin.

En epicurisme, sosia es videda como nesesada: Lo proteje on de nonjustas. El predise utilitarianisme par sujesta ce un sosia debe es ordinada per furni "la felisia masima a la plu de persones".

Ma la felisia ultima es pas, e Epicuro presta la parola de Piro per calmia: ataraxia. Sua slogan ia es lathe biosas - vive sin traente atende. El pote es considerada la umaniste vera prima, como atestada par esta sita: "Filosofia es un ativia cual usa razona e debate sever per promove la flori de umania"

La soma la plu bon de epicurisme es la poesia epica Sur la natur de cosas par la roman Lucretio (95-52)

Nota la similes pratical entre stoicisme e epicurisme, contra ce sua diferes teorial. Ambos ia es popular en la eda roman, stoicisme en la anios temprana de Roma e entre la sitadanes comun, e epicurisme (an edonisme) en privata, spesial a la niveles la plu alta de la impero plu tarda.

La eda eliniste[edita | edita la fonte]

Alexandro la grande

Alexandro la grande ia introdui la periodo de istoria nomida la eliniste: Sua impero ia porta ideas, arte, lingua, e abituas elinica a "la mundo", tan distante a este como India e sude a Egipte. Ma, con se mori (con sola 33 anios), sua impero ia comensa rompe, sua jenerales dividente lo entre se mesma, e la nasiones no tota concistada reclama sua autonomia. E un popla nova ia comensa domina la Mediteraneo: La romanes. La influe de la elinicas ta estende plu ca la impero de Alexandro, sua colasa, e an la romanes. Ma la mundo ia deveni un loca diferente, un loca de potias grande manobrante entre se mesmas, autorias sentrida simil a los en Asia, agregas enorme de comersia e mercatos, comun liada prosima a esta autorias. Un mundo como esta no es vera un bon loca per pensa e oserva individua.