Psicolojia cognisial

De Vicipedia


En la dui du de la sentenio de 1900, la ariva de la computador e la modo de pensa asosiada con lo ia condui a un orienta nova per psicolojia nomida la move cognisial. Multes espera ce esta ta deveni la model - la teoria uninte - per cual nos ia espeta. Lo es tro temprana per dise, ma la sinifia de psicolojia cognisial no pote es negada.

La radises de esta move es multe variada: Lo inclui la psicolojia de gestaltes, conduisme, e an umanisme: Lo ia asorbe la ideas de E. C. Tolman, Albert Bandura, e George Kelly; lo inclui pensores de linguistica, neurosiensa, filosofia, e injenia; lo envolve spesialistes en tecnolojia de informaticae la campo de intelijentia artifisal. On pote comensa par regarda tre teoristes de prosede de informa la plu famosa: Norbert Wiener, Alan Turing, e Ludwig von Bertalanffy.

Norbert Wiener[edita | edita la fonte]

Norbert Wiener

Norbert Wiener ia nase a 26 novembre 1897 en Columbia, Missouri. Sua padre ia es un profesor de linguas slavica ci ia desira no cosa plu ca ce sua fio ta es un jenio. Fortunosa, Norbert ia pote furni la desira. El ia leje cuando el ave 3 anios, ia comensa liseo con 9 anios, graduada con 11, reseta sua diploma laural con 14, e sua mestral de Harvard con 17, e la dotoral un anio plu en 1913, con un tese sur lojica matematical. Norbert ia es miope, ansia, torpe, nonsecur, e nonsosial - ma cadun gusta el en cualce caso.

Pos gradua, el ia vade a Cambridge per studia su la filosofiste grande Bertrand Russell, e alora a la Universia de Gottingen per studia su la matematiciste famosa David Hilbert. Cuando el reveni a la SUA, el ia instrui a Columbia, Harvard, e Maine Universia, ia spende un anio como scrivor per la Ensiclopedia Americana, un otra anio como un jornaliste per la Boston Herald, e (an si el ia es un pasiste) ia labora como un matematiciste per la armada.

Final, en 1919, el ia deveni un profesor de matematica a MIT, do es ta resta asta 1960. El ia sposi Margaret Engmann en 1926, e los ia ave du fias.

El ia comensa par studia la move de particulas e fisica de cuantos, cual condui el per developa un interesa en la transmete de informa e tecnicas de control. En laborante sur estas, el ia crea la terma "cybernetics", en lfn "sibernetica", de la parola elinica per pilote, per refere a cualce sistem cual ia es construida con tecnicas de coreti integrada. Conveninte, el ia labora sur aparatos de controla per la militar en la Gera Mundal 2.

En 1948, el ia publici "Sibernetica: o controla e comunica en la animal e la macina". En esta libro, el ia populari termas como (en engles) input, output, e feedback (enflue, esflue, e renuri).

Plu tarda, en 1964, el ia publici la libro "God and Golem, Inc." ("dio e golem, corporada" - golem ia es un om de arjila mitolojial) cual es ia sutituli "un comenta sur alga puntos do sibernetica intrui sur relijio". El ia es consernada ce, a alga tempo, la macinas ta pasa nos, sua creores. La mesma anio, el ia gania la Medalion Nasional de Siensa. Alga semanas plu tarda, Marte 18, el ia mori en Stockholm, Sveria.

La idea de renuri es multe vea, e es indiceta en la obras de Aristotele. Lo ia comensa deveni denova notada en la sentenio de 1700, en la forma de "la mano nonvidable", un idea introduida par Adam Smith en "La Ricia de Nasiones", cual algas vide como la radis de teoria de controla e teoria de juas. Renuri es un idea simple: Prende la esflue de un sistem e renuri lo como un influe, per ajusta la prosede. Per esemplo, omeostase (la prinsipe de la termostato) es un forma de renuri negativa: lo deveni fria en la casa, cual stimula la termostato, cual ensende la fornon. La sala deveni plu calda, e a un temperatur fisada, la termostato descomuta la fornon. Alora, lo deveni ancora tro fria, e la sircuito recomensa. La gol de tal sistem es ecuilibra, ma en realia, los es un prosede osilante o "xasante".

Renuri positiva aveni cuando la esflue informa la sistem per produi an plu de alga cosa. An si la parola "positiva" causa ce lo pare como un bon cosa, si lo no es suportada par renuri negativa, lo tende vade a ruina! Un esemplo de renuri positiva es bolas de economia, cuando alga cosa crese en valua (como tulpas en Nederland de la sentenio de 1600, o la dot-coms resente), cadun compra plu de la produi, cual crese la custas, condui a plu investores, asta final la tota colasa. Un otra esemplo es sangui: Si on sangui grave, la cor ta pompa plu forte, cual causa plu sangui, etc. Per esta razona, on debe para la sangui tan rapida como posible!

An si Wiener no ia "inventa" renuri, el ia es la person prima per reconose la sinifia grande de la idea.

Alan M. Turing[edita | edita la fonte]

Alan Turing

Alan Turing ia nase 23 junio 1912 en Paddington, London, la enfante du de Julius Mathison Turing e Ethel Sara Stoney. Sua jenitores ia encontra lunlotra en cuando sua padre e la padre de sua madre ia es servi en Madras, India, como parte de la Servis Sivil. El e sua frate ia es elevada en la casas de otra persones cuando sua jenitores ia continua sua vive en India.

Un punto seria en sua vive ia aveni cuando sua ami la plu bon a la scola a Sherborne, Christopher Marcom, ia mori en 1930. Esta causa ce el ia pensa sur la natur de esiste e esce lo fini a mori.

El ia vade a King's College a Cambridge en 1931, do el ia leje libros par von Neumann, Russell e Whitehead, Goedel, etc. El ia es envolveda en la promove pasiste a Cambridge, e en deveni plu comfortable con sua omosesalia. El ia reseta sua diploma en 1934, e ia resta ala con un donada per rexerca en 1935.

La Macina de Turing - sua descrive prima de cual ta deveni la computador moderna - ia es introduida en un paper en 1936, pos cual el ia parti a Princeton en la SUA. Ala, el ia reseta sua diploma dotoral en 1938, e ia reveni a King's College, vivente sur sua donada per rexerca.

El ia comensa laborante con la Intelijentia Brites sur la analise de la Codigo Enigma de la nazis par construi macinas per solve sifras. En 1944, el ia sujesta prima la idea de "construi un serebro".

Un nota a lado: Turing ia es un coror tra campania nonprofesal, e ia es prosima a core per Britan en la Olimpicas de 1948.

En 1944, el ia deveni la sudirijor per la laboreria de computa a la Universia de Manchester, do los ia es atentante construi la computador vera prima. En 1950, el ia publici un paper "Macinas computante e intelijentia" en la jornal "Mind". Turing ia vide la serebro umana como un "macina nonordinada" cual aprende tra esperia.

Nonfortunosa, el ia es arestada e litigada en 1952 per omosesalia. El no ia furni un defende, ma ia prende un ofre per evita prison si el ta aseta injetas de estrojen per basi sua libido suposada iperativa. El ia perde sua autoria de securia como un resulta de sua omosesalia ance.

El ia comensa rexerca la formi de motifes en biolojia - lo cual nos nomi aora la matematica de fratales - e sur mecanicas de cuantos. Ma a 7 junio 1954, el ia suiside par come sianido, e fa ce lo pare como un asidente per salva la sentis de sua madre. El ia ave 41 anios.

Oji, el es videda como la padre de la siensa de computa (pd informatica). Andrew Hodges, la biografiste e Turing, ia descrive la Macina de Turing:

Sua labora ia introdui un conseta de sinifia pratica enorme: la idea de la Macina Universal de Turing. La conseta de "la Macina de Turing" es como lo de "la formula" o "la egali"; on ave un infinita de macinas de Turing posible, cada corespondente a un "metodo definida" o "algoritmo" diferente. Ma imajina, como Turing, cada algoritmo spesifada scriveda como un colie de instruis en un forma normal. Alora la labora de interprete la instruis e prosede los es se mesma un prosede mecanica, e donce pote se mesma es corpida en un macina de Turing spesifada, pd la macina universal de Turing. Un macina universal de Turing pote es cargada per fa cual cualce otra macina de Turing spesifada pote fa, par furni lo con la forma normal descrivente acel macina de Turing. Un macina, per tota taxes.

Lo es difisil aora per no pensa de un macina de Turing como un program per un computador, e la taxe mecanica de interprete e obedi la program como cual la computador se mesma fa. Donce, la Macina Universal de Turing como la prinsipe esensal de la computador: un macina cual pote es ajustada per cualce taxe bon descriveda par es furnida con la program conveninte.

En ajunta, la Macina Universal de Turing astrata esplota natural lo cual ia es videda plu tarda como la conseta de la "program reservada" esensal a la computador moderna: lo corpi la intuida esensal de la sentenio de 1900 ce simboles cual representa instruis es no diferente en tipo ca simboles cual representa cuantias. Ma computadores, en esta sinifia moderna, no ia esiste en 1936. Turing ia crea esta consetas de sua imajina matematical. Sola 9 anios plu tarda, tecnolojia eletronica ta es atentada e probada sufisinte per lo es pratical per transfere la lojica de sua ideas a injenia real. En la entretempo, la idea ia vive sola en sua mente.

Quoted from Andrew Hodges’ “Alan Turing --- a short biography,” at http://www.turing.org.uk/turing/bio/part3.html

Ludwig von Bertalanffy[edita | edita la fonte]

Ludwig von Bertalanffy ia nase prosima a Wien a 19 setembre 1901. En 1918, el ia vade a la Universia de Innsbruck, e plu tarda ia transfere se a la Universia de Wien, do el ia studia la istoria de arte, filosofia, e biolojia. El ia reseta sua diploma dotoral en 1926, con un tese sur Gustav Fechner.

En 1928, el ia publici "Teorias moderna de developa", do el ia introdui la demanda de esce nos pote esplica biolojia en termas pur fisical. El ia sujesta ce nos pote fa lo, si nos pote vide viventes como donada con dinamicas auto-organizante

En 1937, el vade a la Universia de Chicago, do el ia dona sua leson prima sur la teoria de Sistemes Jeneral, cual el ia vide como un metodolojia per tota siensas. En 1939, el ia deveni un profesor a la Universia de Wien e ia continua sua rexerca sur la fisiolojia comparante de crese. El ia resoma sua obras en "Problemes de vive", publicida en 1940.

En 1949, el ia migra a Canada, do el ia comensa rexerca sur canser. Pronto, el ia rami a psicolojia cognisial, do el ia introdui un epistemolojia oliste cual el ia contrasta con conduisme.

En 1960, el ia deveni un profesor de biolojia teorial en la departe de zolojia e psicolojia a la Universia de Alberta. En 1967, el ia scrive "Robotes, umanas, e mentes", e en 1968, el ia scrive "Teoria de Sistemes Jeneral".

Ludwig von Bertalanffy ia mori de un ataca de cor a 12 junio 1972.

Un tempo multe pasada, lo ia es posible ce un individua briliante - un Aristotele o un da Vinci - sabe tota ce sua cultur ia ofre. Nos refere a veses ancora a persones ci ave un sabe spesial vasta como un "umana de la renase". Ma esta no es vera posible aora, car on ave tro multe informa en la mundo. Cadun deveni un spesialiste. Esta situa no es tota mal; ma lo sinifia ce la siensas variosa (e la artes e umanias ance) tende deveni isolida. Un idea nova en un campo resta en acel campo, an si lo pote sinifia un revolui per un otra campo. La tempo final en cual nos ia vide un transfere major de un siensa a otras ia es cuando Darwin ia introdui la teoria de evolui, cual ia es segueda par multe otra campos adota la idea (pe la developa de enfantes, la progresa de sivilias, la relatas internasional, etc), an si en multe casos noncoreta (pe darwinisme sosial).

La Teoria de Sistemes Jeneral ia es un proposa per un modo matematical e lojical per espresa ideas en cual nos nomi comfortable sistemes. Bertalanffy ia crede ce esta ia es la sola modo en cual nos pote uni la siensas, inclui biolojia, istoria, sosiolojia, e an psicolojia, e abri la porte a un tipo nova de siensiste ci es un jeneraliste en loca de un spesialiste. Esta jeneraliste, par usa esta modeles de sistemes comun, ta es capas per transfere intuis de un campo a un otra.

Bertalanffy ia prende consetas de sibernetica, informatica, la teoria de juas, la teoria de desides, topolojia, analise de fatores, injenia de sistemes, rexerca de operas, injenia umana, etc, e perfetida la "scema de flue" (en engles: "flow chart") cual nos aseta sin comenta oji. Sua inova la plu sinifiante ia es la idea de un sistem abrida - un sistem en la contesto de un sistem plu grande. Esta ia permete ce la teoria de sistemes es aplicada a animales en ambientes, per esemplo, o a persones en sua contestos sosiocultural. Plu spesifada, la idea de la sistem abrida ia dona la metafor vea de sosias-como-organisme un legalia siensal e un relasa a vive nova.

Noam Chomsky[edita | edita la fonte]

Noam Chomsky

En ajunta a la enflue de la rexercores de "intelijentia artifis", on ave un enflue de un grupo de siensistes en campos variosa ci ia pensa de se mesma como struturalistes - no aliante se con Wundt, ma interesada en la strutur de sua sujetos variosa. On pote nomi los "neostruturalistes", per manteni la distingui. Per esemplo, on ave Claude Levi-Strauss, la antropolojiste franses, ci ia analise la strutures de relatas familial e de la naras de mitolojia de cultures noneuropean. Ma la plu famosa es la linguiste Noam Chomsky.

Avram Noam Chomsky ia nase 7 desembre 1928 en Philadelphia, la fio de William Chomsky e Elsie Simonofsky. La padre ia es un esperta ivri, e Noam ia deveni tan bon en acel campo ce el ia pote edita la manoscritos de sua padre per cuando el ia es en liseo. Noam ia es ance pasionosa sur politica, spesial cuando lo ia conserna la potensia per un stato de Israel.

El ia reseta sua diploma laural de la Universia de Pennsylvania en 1949, e sposi un otra linguiste, Carol Schatz. Los ta ave tre enfantes. El ia reseta sua diploma dotoral en 1955, ance de la Universia de Pennsylvania.

En la mesma anio, el ia comensa instrui a MIT e ia comensa sua rexerca sur gramatica jenerante. Gramatica jenerante ia es fundida sur la demanda "como nos pote crea frases nova cual no es es produida a ante?" Como, en otra parolas, nos ia deveni tan creosa, tan jenerante? En considera esta demandas, el ia refamiliari se con lojica matematical, la psicolojia de pensa, e teorias sur macinas pensante. El trova se, a la otra lado, multe criticante de linguistica tradisional e psicolojia conduiste.

En 1957, el ia publici sua libro prima, "Strutures Sintatical". Esta introduinte sua gramatica jenerante, el ia ance introdui la idea de un capasia inata per aprende linguas. Chomsky sujestada ce nos ave, en nosa mentes a nase, un "gramatica universal", preparada per asorbe la detalias de cualce lingua presentada a nos a un eda joven.

Sua libro ia parla sur strutures surfas e strutures profonda e la regulas de muta cual governa la relatas entra los. La strutur surfas es esensal la lingua como nos sabe lo, linguas spesifada, con regulas de fonetica e gramatica spesifada. La strutur profonda es plu astrata, a la nivel de sinifias e la gramatica universal.

En la desenio de 1960, Chomsky ia deveni un de la criticores la plu vosal de la Gera Vietnam, e ia scrive "Potia american e la mandarines nova" un critica de la prosedes de deside par la governa. El es ancora a MIT, e el continua produi articles e libros sur linguistica - e politicas.

Jean Piaget[edita | edita la fonte]

Jean Piaget

Un otra neostruturaliste es Jean Piaget. Orijinal un biolojiste, el es aora plu recordada per sua obras sur la developa de cognisio. Multe ta sujesta ce el, plu ca cualce otra, es la creor de psicolojia cognisial. Si la mundo cual parla engles ta sola aprendeda alga franses, esta ta es vera, sin duta. Nonfortunosa, sua obras ia es sola introduida en engles pos 1950, e ia deveni bon conoseda sola en la desenio de 1960, xef par psicolojistes de developa.

Jean Piaget ia nase en Neuchatel, Suiz, a 9 agosto 1896. Sua padre, Arthur Piaget, ia es un profesor de leteratur medieval con un interesa en istorial local. Sua madre, Rebecca Jackson, ia es intelijente e enerjiosa, ma Jean ia trova el alga neurosica - un idea cual el ia dise ia condui el a sua interesa en psicolojia, ma a via de patolojia. La enfante la plu vea, el ia es multe autonom e ia deveni interesada temprana en natur, spesial en la colie de concas.El ia publicida sua "paper" prima cuando el ia ave 10 anios: un reporta de un paje sur sua vide de un pasaro albino.

El ia comensa publici seria en liseo sur sua sujeto favoreda, moluscos. El ia es spesial plaseda per gania emplea de tempo partal con la dirijor de la Museo de Istoria Natural de Neuchatel, senior Godel. Sua labora ia deveni bon conoseda entre studiantes european de moluscos, ci ia suposada ce el ia es un adulte. Tota de esta esperia temprana con siensa ia preveni el, el ia dise, de encontra "la demon de filosofia".

Plu tarda en adolese, el ia fasa un peti crise de fida: Corajida par sua madre per atende instrui relijiosa, el ia trova la ideas de relijio como enfantin. Par studia filosofistes variosa e aplica lojica, el ia dedica se a trova un "esplica biolojial de sabe". Ultima, filosofia ia fali aida el en sua xerca, donce el vade a psicolojia.

Pos liseo, el ia vade a la Universia de Neuchatel. Studiante e scrivente constante, el ia deveni debil e ia debe spende un anio en la montanias per recovre sua sania. Cuando el reveni a Neuchatel, el ia deside ce el ta scrive sua filosofia. Un punto fundal deveni sentral per sua laboras intera: "En tota campos de vive (organica, mental, sosial) lo esiste "interas" distinguida par la cualia de sua partes, e forsante sur los un organiza". Esta prinsipe ia formi la funda de sua filosofia struturaliste, en la mesma modo como per la gestaltistes, teoristes de sistemes e multe otras.

En 1918, Piaget ia reseta sua diploma dotoral en siensa de la Universia de Neuchatel. El labora per un anio a laborerias en Zurich e a la clinica de psiciatria famosa de Bleuler. En esta periodo, el ia es introduida a la obras de Freud, Jung, e otras. En 1919, el ia ensenia psicolojia e filosofia a la Sorbonne en Paris. Asi, el ia encontra Simon (de Simon-Binet) e ia rexerca la esamina de intelijentia. El no ia gusta la stilo de "coreta o no" forma de la esaminas, e ia comensa intervisa sua sujetos a un scola per xicos en loca, usante la tecnicas de intervisa psiciatriste el ia aprende la anio pasada. En otra parolas, el ia comensa demanda como enfantes razona.

En 1921, sua article prima sur la psicolojia de intelijentia ia es publicida en la Journal de Psychologie. En la mesma anio, el ia aseta un posto a la Institut J. J. Rousseau en Genev. Asi, el ia comensa con sua studiantes per rexerca la razona de enfantes en scola prima. Esta rexerca ia deveni sua 5 libros prima sur psicolojia de enfantes An si el ia vide esta labora como multe comensante el ia es surprendeda par la reata positiva par sua lejores jeneral.

En 1923, el ia sposi un de sua colaborores studiante, Valentine Chatenay. En 1925, sua fia prima ia nase; en 1927, fia du ia nase; e en 1931, sua fio ia nase. Los ia deveni pronto la foca de oserva intensa par Piaget e sua sposa. Esta rexerca ia deveni 3 plu libros.

En 1929, Piaget ia comensa emplea como la dirijor de la Ofisia Internasional de Educa, en colabora con UNESCO. El ia ance comensa rexerca grande con A. Szeminska, E. Meyer, e spesial Barbel Inhelder, ci ta deveni sua colaboror major. Alga de esta labora no ta estende a la mundo estra Suiz asta la fini de la Gera Mundal 2.

En 1940, el ia deveni la xef de Psicolojia Esperimental, la dirijor de la laboreria psicolojial, e la presidente de la Sosia Suiz de Psicolojia. En 1942, el ia presenta un serie de lesones a la Collège de France en la ocupa de Frans par la nazis. Esta lesones ta deveni "La psicolojia de intelijentia". A la fini de la gera, el ia es elejeda presidente de la comite suiz de UNESCO.

En 1949 e 1950, el ia publica sua sintese, "Introdui a Epistemolojia Jenetica". En 1952, el ia deveni un profesor a la Sorbonne. En 1955, el ia crea la Sentro Internasional per Epistemolojia Jenetica. En 1956, el ia crea la Scola de Siensas a la Universia de Genev.

El ia continua labora sur un teoria jeneral de strutures e lia sua laboras psicolojia a la biolojia per multe anios plu. Simil, el ia continua sua servi publica tra UNESCO. Par la fini de sua carera, el ia scrive plu ca 60 libros e sentos de articles. El ia mori en Genev, 16 setembre 1980, un de la psicolojistes la plu sinifiante de la sentenio de 1900.

Jean Piaget ia comensa sua carera como un biolojiste - spesifada, un moluscolojiste. Ma sua interesa en siensa e la istoria de siensa pronto pasa sua interesa en caracoles e bivalvos. En esamina plu profonda la prosedes de pensa en siensa, el ia deveni interesada en la natur de pensa mesma, spesial en la developa de pensa. Trovante poca rexerca, el ia ave la oportunia per dona a lo un eticeta: Epistemolojia jenetica, cual sinifia la developa de aprende.

El ia nota, per esemplo, ca an bebes ave alga capasias en regarda a la ojetos en sua ambiente. Esta capasias ia es serta simple, capasia sensorimotor, ma los dirije la modo en cual la bebe esplora sua ambiente e alora gania plu sabe de la mundo, e capasias de esplora plu sofistica. Esta capasias el ia nomi scemas.

Per esemplo, un bebe sabe como prende sua jueta favoreda e pone lo en sua boca. El ave acel scema bon en sua mente. Cuando el vide un otra ojeto - pe la orolojia de sua padre - el pote transfere fasil sua "prende e pone" scema a la ojeto nova. Esta es nomida (en franses) assimilation, la "asorbe" de un ojeto nova a un scema vea.

Cuando nosa bebe vide un otra ojeto denova - posible un bal per la plaia - el va atenta aplica sua scema vea de prende e pone. Natural, esta opera mal con la ojeto nova - lo es multe tro grande per pone en sua boca! Posible, en esta esemplo, un otra scema ta opera plu bon, como "presa e besa". Esta es (en franses) accomodation, la altera de un scema vea a un ojeto nova.

Asorbe e altera es du lados de aprende. Piaget ia vide ajusta como multe plu vasta ca la tipo de aprende ce lo cual la conduiste ia parla. El ia vide lo como un prosede fundal biolojial. Tota viventes ajusta, an los sin un sistem de nervos o un serebro.

Asorbe e altera opera como la pendulo a avansante nosa comprende de nosa mundo e nosa capasia en lo. Seguente Piaget, los es dirijeda a un ecuilibre entre la strutur de la mente e la ambiente, a un acorda entre la du, cual ta indica ce on aveni un bon (o sufisinte bon) model de la universo. Esta state ideal el ia nomi ecuilibra.

Continuante sua investiga de enfantes, el ia nota ce on ave periodos en cual asorbe domina, periodos en cual conveni domina, e periodos de ecuilibra relativa, e ce esta periodos ia es simil entre tota la enfantes cual el ia studia en sua natur e la tempos de aveni. E alora el ia developa la idea de fases de developa cognisial. Estas es un contribui durante a psicolojia.

Donald O. Hebb[edita | edita la fonte]

Tre otra psicolojistes ia ave roles sinifiante en la developa de psicolojia cognisial. Los es Donald Hebb, George Miller, e Ulric Neisser. On pote serta ajunta otras, ma esta tre es esensal.

Donald Olding Hebb ia nase en 1908 en Chester, Nova Scotia. El ia gradua de la Universia a Dalhousie en 1925, e ia atenta comensa un carera como un noveliste. Esta ia resulta en Hebb deveni un dirijor de un scola en Quebec.

El ia comensa como un studiante graduada a la Universia de McGill en Montreal. Asi, el ia deveni rapida desilude con conduisme e ia vade a la obras de Wolfgang Kohler e Karl Lashley. Colaborante con Lashley sur persepi en ratas, el ia reseta sua diploma dotoral de Harvard en 1936.

El ia reseta suporta finansial per rexerca con Wilder Penfield a la Institui Neurolojial de Montreal, do sua rexerca ia nota ce lesiones grande en la serebro ave frecuente efetos minima a la persepi, pensa, o condui de un person.

Pos move a Queens Universia, el ia rexerca la esamina de intelijentia de animales e umanas. El ia nota ce la ambiente ave un rol multe plu sinifiante en intelijentia ca jeneral suposada.

En 1942, el ia colabora con Lashley denova, esta ves a la Laboreria de la Biolojia de Primatas de Yerkes. Alora, el ia reveni a McGill como un profesor de psicolojia, e ia deveni la xef de la departe en 1948.

La anio seguente, el ia publici sua libro la plu famosa, "La organiza de condui: Un teoria neuropsicolojial". Esta ia es bon resetada e fa ce McGill deveni un sentro per neuropsicolojia.

La fundas de sua teoria pote es resomada par defini tre de sua termas. Prima, on ave la sinapse de Hebb: La ensende de un neuron causa la crese o cambias metabolal a la sinapse cual crese la efetosa de acel sinapse en la futur. Esta es comun nomida la teoria de solida, e es la esplica la plu asetada per aprende neuronal oji.

Du, on ave la asembla de selulas de Hebb: Grupos de neurones pote es tan interliada ce, cuando ativia comensa, lo va persiste longo pos la stimula orijinal ia fini. Oji, los es nomida redes neuronal.

E tre, on ave la segue de fase. Pensa es lo cual aveni cuando segues complicada de esta asemblas de selulas es ativida.

Hebb ia sujesta umil ce sua teoria es no plu ca un varia nova de la teoria de redes ("neuro-connectivism" en engles). Esta es la idea funda su la plu de modeles de funsiona neurolojial. On debe nota ance ce el ia es presidente de ambos APA (Asosia de Psicolojia American) e CPA (Asosia de Psicolojia Canadian). Donald Hebb ia mori en 1985.

George A. Miller[edita | edita la fonte]

George Miller ia nase en 1920, e ia comensa sua carera en universia como un studiante de parla e engles. En 1941, el ia reseta sua diploma mestral en parla de la Universia de Alabama. En 1946, el ia reseta sua diploma dotoral de Harvard e ia comensa studia psicolinguistica.

En 1951, el ia publici sua libro prima, "Lingua e comunica". En lo, el ia razona ce la tradision de conduisme no sufisi per la taxe de esplica lingua.

El ia scrive sua paper la plu famosa en 1956: "La numero majial sete, plu o min de: Alga limitas sur nosa capasia per prosede informa". En esta, el ia sujesta ce memoria de dura corta pote sola conteni sirca sete pesas de informa: sete parolas, sete numeros, sete imajes, etc. Esta es asetada ancora como coreta.

En 1960, Miller ia funda la Sentro per Studias Cognisial a Harvard con la psicolojiste de developa cognisial famosa, Jerome Bruner. En la mesma anio, el ia publici "Programes e la strutur de condui" (con Eugene Galanter e Karl Pribram, 1960), cual resoma sua conseta de psicolojia cognisial. Los ia usa la computador como sua model de aprende umana, e ia usa analojias como prosede de informa, codigi e retrae. Miller ia sujesta defini psicolojia de la studia de mente, como lo ia es definida ante la redefini de psicolojia par la conduistes como la studia de condui.

George Miller ia servi como la presidente de APA en 1969, e ia reseta la Medalion Nasional de Siensa en 1991. El ia mori en 2012.

Ulric Neisser[edita | edita la fonte]

Ulric Neisser ia nase en 1928 en Kiel, Deutxland, e ia migra con sua familia a la SUA cuando el ave 3 anios.

El ia studia fisica a Harvard ante cambia a psicolojia. Cuando ala, el ia es influeda par la obras de Koffka e par George Miller. En 1950, el ia reseta sua diploma laural, e en 1956, sua diploma dotoral. A esta punto, el ia es un conduiste, cual es fundal cual cuasi tota ia es alora.

Sua posto de instrui prima ia es a Brandeis, do Abraham Maslow ia es la xef de la departe. Asi el ia es corajida per continua sua interesa en cognisio. En 1967, el ia scrive la libro cual ta marca la comensa ofisial de psicolojia cognisial: conveninte, "Psicolojia Cognisial".

Plu tarda, en 1976, el ia scrive "Cognisio e realia", en cual el ia comensa espresa sua nonsasia con la model linial de psicolojia cognisial a acel tempo, e la depende esedente de esperimenta en loca de situas de vive real. Tra tempo, el ta deveni un criticor forte de psicolojia cognisial, e ia move en la dirije de la psicolojia ambiente de sua ami, J. J. Gibson.

El continua a la Universia de Cornell, do sua interesas de rexerca inclui memoria, spesial memoria per avenis en vive e en situas natural, intelijentia (spesial diferes en resultas individual e entre grupos), la sinifia sosial de la esaminas de IQ, e consetas de se mesma (spesial como fundida sur autopersepi). Sua obras plu resente inclui "La curva levante: Ganias de tempo longa en IQ e mesuras relatada" (1998) e, con L. K. Libby, "Recorda esperias de vive" (en E. Tulving e F. I. M. Craik "La manual de memoria de Oxford", 2000).

Conclui[edita | edita la fonte]

Lo no es posible per predise si psicolojia cognisial ta mostra ce lo pote es la psicolojia de la futur. Vera, an alga de sua suportores major ave sua dutas. Psicolojia cognisial es multe plu sofistica, filosofial, ca conduisme. Ma lo no ave tan multe sofistica cuando comparada con esistentialisme fenomenolojia. A la otra lado, lo ave la vantaje enorme de es liada con la tecnolojia cual es developante la plu rapida - la computador. Ma poca persones vide la computador como un bon model per umanas, en alga modos no an tan bon como la rata blanca, cual ia es a min vivente!