Psicolinguistica

De Vicipedia
Jump to navigation Jump to search

Psicolinguistica o la psicolojia de lingua es la studia de la interelata entre fatores linguistica e aspetas psicolojial. Lo studia ance la fatores psicolojial e neurobiolojial cual permete ce umanas oteni, usa, comprende, e produi lingua. La campo es xef consernada con la modo en cual lingua opera en la serebro. A la comensa, psicolinguistica ia foca sur filosofia e educa, xef car los ia es locada en departes estra la siensas aplicada. Rexerca moderna usa biolojia, neurosiensa, cognisio, linguistica, e informatica. La campo ave alga sucampos: Neurolinguistica foca sur la avenis neural cual es asosiada con langue; psicolinguistica de developa studia como enfantes aprende lingua; Patolojia de parla studia problemes consernante la parla e comprende de lingua.

La terma "psicolinguistica" ia es inventada en 1936 par Jacob Robert Kantor en sua libro An Objective Psychology of Grammar ("un psicolojia ojetal de gramatica"), e ia deveni plu comun pos un article de 1946, Language and psycholinguistics: a review ("Lingua e psicolinguistica: un revista") par sua studiante Nicholas Henry Pronko.

La studia pote es videda como un atenta a responde a esta demandas:

1. Como enfantes developa linguas?
2. Como persones prosede e comprende lingua?
3. Como persones produi lingua?
4. Como persones oteni un lingua nova?

La oteni de lingua[edita | edita la fonte]

On ave esensal du teorias sur como enfantes aprende lingua, e la debata es ancora continuante. La teoria prima es ce tota lingua debe es aprendeda par la enfante. La teoria du sujeste ce la sistem astrata de lingua no pote es aprendeda, ma ce umanas posese un capasia inata per lingua, o un asede a cual ia es nomida la gramatica universal.

La teoria ce lingua debe es aprendeda ia es popular ante 1960 e es representada par la teorias de Jean Piaget e Rudolf Carnap. Conduistes (pe B. F. Skinner) acorda ce lingua es un codui cual es formida par respondes reinforsada.

La perspetiva inatiste ia comensa on la revista multe critical de Skinner par Noam Chomsky. Esta ia aida la comensa de la "revolui cognisial" en psicolojia. Chomsky ia dise ce umanas ave un capasia spesial e inata per lingua, e ce capasias complicada de sintatica, como recurso, es "sircuitos permanente" en la serebro. Esta capasias es videda como ultra la teni de an la umanas la plu intelijente e sosial. Seguente Chomsky, enfantes oteninte un lingua ave un spasio vasta per esplora entre tota gramaticas umana posible, an si el no trova evidentes ce enfantes reseta enflue sufisinte per aprenda tota regulas de sua lingua. Donce, Chomsky dise, on debe ave alga otra mecanica inata per dona la capasia per lingua a umanas. Acel capasia es, seguente esta teoria, lo cual defina lingua umana e difere lo de an la formas la plu sofistica de comunica animal.

La campo de psicolinguistica pos Chomsky ia es definada par reatas a sua teoria, pro e con. La vista "pro" ancora crede ce la capasia per usa lingua difere en cualia de cualce capasia animal. Esta capasia es crededa como la resulta de un muta favorable o de un ajusta de capasia cual ia es evoluida per otra intendes. La vista ce lingua pote es aprendeda ia es resente reanimada, inspirada par emerjentisme. Esta defia la vista inata como nonfalsable, pd lo no pote es probada. Pos la desenio de 1980, la potia de computadores ia es tal ce rexercores ia pote simili la oteni de lingua usante modeles de redes neural. Esta modeles dona evidentes ce, posible, informa sufisinte es contenida en la influe per aprende lingua. Si sertida, la mecanica inata es no plu nesesada.

Comprende de lingua[edita | edita la fonte]

Un demanda en la area de comprende de lingua es como persones comprende frases cuando lejente. Rexercores ia developa alga teorias sur la mecanicas e arciteta de comprende de frases. Tipal, esta teorias foca sur la tipos de informa contenida en la frase cual la lejor pote usa per construi sinifia, e cuando la informa deveni otenable a la lejor. On ave du campos sur esta demanda: la model modulal e la model interatal.

Un vista modulal de prosede de frases suposa ce la grados asosiada en leje un frase opera autonom, en modulos separada. Estas modulos ave interata limitada con lunlotra. Per esemplo, un teoria influente, la teoria de la via de la jardin, dise ce la analise sintatical aveni prima. Su esta teoria, cuando la lejor es lejente la frase, el crea la strutur la plu simple per minima la labora e carga cognitiva. Esta es fada sin cualce enflue de analise semantica o informa cual depende de contesto. Donce, la frase "la evidentes esaminada par la avocato resulta como nonfidable", par la momento a cual la lejor ariva a la parola "esaminada", el ia promete a un leje de la frase en cual la evidentes es esaminada alga cosa, car lo es la analise la plu simple, esta promete es fada an ce la fato ce lo resulta en un situa nonprobable: nos conose de esperia ce evidentes pote rara o nunca esamina alga cosa. Su esta teoria de "sintatica prima", informa semantical es prosededa a un grado plu tarde. Lo es sola plu tarde ce la lejor ta reconose ce el nesesa revisa la analise prima a un en cual "la evidentes" es esaminada. En esta esemplo, lejores tipal reconose sua era par la momento a cual los veni a "par la avocato e debe reveni e reanalise la frase. Esta reanalise es cara e contribui a leje plu lenta.

Un teoria de interata de prosede de frases, como un teoria de parolas constrinjeda, cual suposa ce tota informa otenable continida en un frase pote es prosededa a alga momento. Su un descrive interatante, per esample, la semantica de un frase (como la posiblia de cual lo descrive) pote aveni temprana per aida la determina de la strutur de la frase. Donce, en la frase a supra, la lejor ta pote usa la informa sur posiblia per suposa ce "la evidentes" es la cosa esaminada, en loca la cosa cual esamina. On ave datos cual suporta ambos theorias, e cual es coreta es ancora debatada.

Produi la lingua[edita | edita la fonte]

La produi de lingua studia como persones produi parla o testos scriveda en un modo cual dona sinifias comprendable a otras. Un de la modos la plu efetosa per esplica la modo en cual persones represente sinifias par usa linguas governada par regulas, es par oserva e analise esemplos de eras de parla. Los incui comensas falsa, repete, reformula, e pauses constante entre parolas o frases, e ance "liscas de la lingua" como fusas, sustituis, intercambias (pe "spoonerismes"), e eras variosa de pronunsia. Esta eras dona implicas sinifiante sur la produi de lingua, car los refleta ce:

1. Parla es intendeda: eras como sustitui e intercambias mostra ce un person no desinia sua frase intera ante parla. En loca, sua capasia es usada constante en la produi de parla. Esta es suportada par la limita de memoria laborante. Spesial, eras de intercambia sujeste ce un person desinia sua frase, ma sola sur ideas sinifiante (pe, la parolas cual composa la sinifia sentral) e sola a alga estende de la frase.
2. Vocabula es organizada par semantica e fonolojia: eras de sustitui e pronunsia mostra ce la vocabula no es organizada sola par la sinifia ma ance par la forma.
3. Parolas morfolojial complicada es construida: eras de fusa en un parola refleta ce un regula governa la construi de parolas en produi (e ance probable en la vocabula mental). En otra parolas, parlores jenera la parolas morfolojial complicada par fusa morfemes e no par retrae los como pesones.

Lo es usosa per difere entre tre fases separada de produi: conseti (determinante cual on vole dise), formula (tradui la intende per dise alga a un forma linguistica), e esecuta (la desinia detaliosa de espresa e la espresa mesma). La plu de rexerca psicolinguistica ia es xef consernada con la studia per formula car la fase de conseti resta xef en un periodo evitante e misteriosa de developa.