Educa

De Vicipedia
Scolores joven en Afganistan
Jan Steen (1672)

Educa es la prosede de instrui sabia, capasia, valuas, credes, e abituas. Metodos inclui naras, discutes, lesones, e rexerca. Educa aveni tipal su la gida de enseniores, ma aprendores pote ance instrui se mesma. Educa pote aveni en locas formal o nonformal e cualce esperia cual ave un efeto sur la modo en cual on pensa, senti, o ata pote es videda como educa. La metodos de educa es nomida pedagojia.

Educa formal es comun divideda en niveles como prescola, scola prima, scola media, e scola alta (universia o stajia). La direto per educa ia es reconoseda par alga governas e la Nasiones Unida. En la plu de locas, alga educa es obligante.

Istoria[edita | edita la fonte]

Educa ia comensa en preistoria, con adultas instrui la jovenes en la sabia e capasias regardada como nesesada en sua sosia. En sosias prealfabetiste, esta es atenida par parla e imita. Nara ia pasa sabia, valuas, e capasia de un jenera a la seguente. Cuando cultures ia comensa estende sua sabia ultra lo cual pote es aprendeda par imita, educa formal ia developa. Scolas ia esiste en Egipte a la eda de la Rena Media.

En Xina, Kongzi (o Confuzi, 551–479 aec) de la stato de Lu, ia es la filosofiste la plu influente de la pais. Sua vista de educa continua influe la sosias de Xina e visinas como Corea, Japan, e Vietnam. Kongzi ia colie disiplos e ia xerca sin susede per un renor ci ta adota sua ideales per bon governa. Ma sua Conversas ia es recordada par sua seguores e ia continua influe educa en Asia este a la eda moderna.

Plato ia fundi la Academia en Atina, la prima institui de educa alta en Europa. La site de Alexandria en Egipte, instituida en 330 aec, ia deveni la sentro nova pos Atina. Ala, la Biblioteca grande de Alexandria ia es construida en la sentenio tre aec. Sivilia european ta sufri un colasa de alfabetisme e organiza pos la cade de la Impero Roman en 476 ec.

Pos la cade de Roma, la Eglesa Catolica ia deveni la conservante solitar de eruditia en Europa ueste. La eglesa ia institui scolas de catedrales en la Edas Medieval temprana como sentros de educa avansada. Alga de esta instituis ia evolui ultima a universias medieval e la jenitores de multe de la universias moderne de Europa. En la Eda Medieval plu tarde, la Catedral de Chartres (pr "xartre") ia opera sua scola famosa e influente. Fundida en 1088, la Universia de Bologna (pr "bolonia") ia es la universia prima e la universia continuante operante la plu vea.

Ance en la Eda Medieval, siensa e matermatica ia flori su la Califia Muslim cual ia es instituida tra Asia sude-ueste e Africa norde. La reteni de la avansas elinica e roman par la sivilia muslim ta aida multe la reveni a sivilia avansada en Europa e ultima en la mundo intera.

La Renase en Europa ia trae un eda nova de labora siensal e inteletal e la reconose de la sivilias elinica e roman. Sirca 1450, Johannes Gutenberg ia developa la primador, cual ia permete ce obras de leteratur ta sperde plu rapida. La eda de imperos european ia vide ideas european de filosofia, relijio, artes, e siensas estendente tra la mundo.

Eruditas e misionores ia reveni con ideas nova de otra sivilias. La misiones de la Jesuita a Xina, per esemplo, ia ave un rol sinifiante en la transmete de siensa e cultur entre Xina e Europa, traduinte obras european como la Elementos par Euclid per eruditas xines e la Discutes par Kongzi per eruditas european. La Lumina ia vide la emerji de un vista plu secular de educa en Europa.

En la plu de nasiones oji, educa de tempo plen es obligada per tota enfantes. La resulta de esta, combinada con la crese de cuantia de popla, UNESCO ia calcula ce, en la 30 anios seguente, plu persones ta reseta educa formal ca en tota la istoria de umania asta aora.

Educa formal[edita | edita la fonte]

Educa formal aveni en un ambiente struturida de cual la intende clar es la instrui de studentes. Tipal, educa formal aveni en scolas con salas de clase de studiantes multiple, aprendente con lunlotra e con un ensenior capas e validida de la sujeto.

Prescolas furni educa de edas sirca tre a sete, dependente de la nasion, cuando la enfantes ta entra educa prima. Estas es ance conoseda como "salas de enfantes" o "jardines de enfantes".

Educa prima es composada de la prima sinco a sete anios de educa formal e struturida, comensante a la eda de sinco o ses, an si esta varia entre nasiones. Global, sirca 89% de enfantes de eda ses a des-du es enscriveda en educa prima, e esta proportio es cresente.

En a plu de sistemes moderne de educa en la mundo, educa media es composada de la educa formal cual aveni en adolese. Lo es marcada par un cambia de la educa prima obligada e completa de enfantes, a la educa plu elejable e nonobligada e educa alta (pd a universias) per adultes. Lo es refereda como scolas alta o liseos.

Educa alta es la nivel de educa cual es min obligada e plu libre. Esta inclui educa pregraduada e educa posgraduada, e ance inclui educa tecnical. Universias furni xef la educa alta. Persones ci completi la clases identifiada par la universia reseta jeneral documentos de autentica o diplomas, incluinte la diploma laural, la diploma mestral, e la diploma dotoral.