Filosofia de la eda medieval

De Vicipedia
Jump to navigation Jump to search

Vide ance
Psicolojia

La eda medieval ia es multe plu ativa en siensa, filosofia, arte, etc, ca multe persones crede. Ma nos debe comensa con la eda a ante, un eda "oscur":

La edas oscur[edita | edita la fonte]

Alcuin de York

Pos la cade de Roma, la edas oscur ia aveni. La plu de Europa ia es desentrida, campanial, e parocial. La vive ia es reduida a la "leges de natur": La potiosa ia rena, en cuando los sin potia ia atenta sola survive. On no ave un senti de istoria o progresa. Superstisio e predeterminisme ia domina la mentes de la popla, rica e povre. La crede en la prosimia de la fini de la mundo ia es comun en cada sentenio. On pote ave un aprosima a la vive european en la eda oscur e la eda medieval temprana par oserva la nasiones povre de la mundo, an si on ta debe sutrae tota sinias de la milenio pasada de developa tecnical!

Alcuin de York (735-804) - la scolor xef de Carlo la grande - es un de poca nomes cual ia es pasada a nos de esta periodo. Estra sua cristianisme, un vista peti de sua realia pote es videda en esta sita: "Cual es un om? La sclavo de moria, un vagor pasante. Como es om poneda? Como un lampa en la venta".

An tal, Carlo la grande (768-814) ia furni un unia political en la forma de la Impero Franco, e la Pape ia furni un unia relijiosa, e un eda nova ia comensa lente. Ultima, la eglesa ia domina Europa, e la Pape ia sustitui per la imperor como la person la plu importante. Ante la fini de 1200, la Eglesa ia posese un tri de la area de Europa! La potia de la Eglesa e sua crede comun ia sinifia presas enorme per conforma, suportada par la teme de punis supranatural. Ma a la lado positiva, la Papia ia aida crea stablia e, ultima, ricia.

Aora, nos dirije a la eda medieval propre, aprosima de 1000 a 1400 ec.

La Universias[edita | edita la fonte]

La Universia de Bologna

Universias ia developa de la scolas de moncerias e catedrales - scolas cual nos ta vide como scolas prima, ma atendeda par adolesentes e conduida par monces e pretes. La prima universia ia es en Bolonia, fundida en 1088.

En esta scolas e universias, studiantes ia comensa (con la menasa sempre presente de flajeli!) con la trivium ("tre cosas") - gramatica (la arte de leje e scrive, con foca a la salmos e otra partes de la Biblia, e la leteratur latina clasica), retorica (pd la arte de parla), e lojica. Trivium es, natural, la orijina de la parola "trivia" - la cosas con cual comensores debe aprende.

Ultra la trivium, los ia studia la quadrivium ("cuatro cosas") - aritmetica, jeometria, musica, e astronomia. La trivium con la quadrivium ia composa la sete artes libre. La parola "libre" asi ia refere a la om libre, la om con alga propria, e la artes libre ia es contrastada a la artes pratical de la povres laborante (e tota femes).

La Problem de Universales =[edita | edita la fonte]

San Anselm de Canterbury

La problem major de filosofia de la eda ia es la natur de universales. Esta refere a la sinifia de un parola, pd a cual, en la mundo real, la parola refere. Esta es fasil solveda con nomes propre: Per esemplo, "Jorj" refere a la person ci scrive esta testo, pd me propre. Ma a cual la parolas plu comun refere? A cual, pe, la parola "gato" refere? Esta no ia es un problem nova en istoria, ma la filosofistes de la eda medieval ia comensa sin la vantaje de bon testos elinica.

San Anselmo de Canterbury (1033-1109) a es un neoplatoniste, e el es la plu bon conoseda per sua laboras a developa un demostra de la esiste de Dio . El ofre la demostra ontolojial: car nos pote pensa de un esente perfeta, el debe esiste, car perfeta implica esiste.

Regardante la problem de universales, el ia es un suportor de realisme. Esta debe no es confusada con la sinifia moderna de realisme (pd, ce on ave un persepi clar de realia). Realisme ia es la perspetiva de Platon: On ave un universal real o ideal (a alga loca) a cual un parola refere. Esta acorda normal bon con cristianisme: Si umania es real ultra la colie de umanas individua, nos pote parla sur la natur de umanas en tota, incluinte, per esemplo, la idea de peca orijinal (pd la nonobedi de Adam e Eva cual ia es transmeteda a tota umanes).

Simil, si Dio es un universal real, donce on no ave un noncoere lojical cuando on dise ce el es Padre, Fio, e Spirito Santa - tre esentes en un esente.

Sua razona no es sin problemes. Per esemplo, la universal ultima - Tota - es lojical plu grande ca Dio, car Tota debe inclui Dio e tota sua creadas. Ma cristianisme dise ce Dio e creada es separada e fundal diferente.

La slogan de Anselm ia es lo de Augustino: "Me crede afin me pote comprende" (credo ut intelligam): Crede es la nesesa asoluta, e es la funda de tota pensa. Veria es revelada par Dio; donce, on debe sede se a la eglesa.

Nominalisme[edita | edita la fonte]

Roselin de Compiegne (1050-1121), ia es la fundor de nominalisme, un otra vista de universales. Un universal, el ia dise, es no plu ca un flatus vocis (un sona vosal, pd un parola). Sol individuas esiste vera. Parolas, e la ideas cual los representa, refere a no cosa. Esta es multe acordante con materialisme e empiricalisme, ma no con cristianisme.

Nominalisme es ance no sin problemes. Si parolas es no cosa ma aira, donce razona (e filosofia), cual es la manipula de parolas, es no cosa ma sofla de aira (como multe studiantes crede!). E acel inclui, natural, la razona on ia usa per ariva a la conclui nominaliste.

Per la Eglesa, nominalisme sinifia ce lo es no plu ca la persones ci composa lo, e relijio es sola cual individuas pensa. E, si Dio es Padre, Fio, e Spirito Santa, donce nos no pote es monoteistes.

Pierre Abelard[edita | edita la fonte]

La tomba de Heloise e Abelard, a la semetero Le Pere Lachaise en Paris

Pierre Abelard (1079-1142) ia es un studiante de e Anselmo e Roselin. Un pensor briliante e un parlor e canon (prete regulada) de la Catedral de Nosa Dama, el ia deveni un instruor popular a la Universia de Paris.

En 1117, el (de 38 anios) ia encontra un xica de 16 anios nomida Heloise. Un orfan, la xica ia es elevada par sua tio Fulbert. El ia es spesial intelijente, e ance bela, e donce sua tio ia demanda de Abelard si el ta ensenia el per un sala e comes. Abelard mesma ia comenta ce esta situa es como confida un oveta a un lupo!

La instrui ia sufri alga. Abelard ia es plu probable composante poesias de ama ca lesones. Ma Heloise ia deveni ensinta e ia pare un fio cual el e Abelard ia nomi Astrolabe (como la strumento per mesura la loca de stelas). Sua tio ia es multe coler, ma Abelard ia promete sposi Heloise, si Fulbert ta manteni la sposi como un secreta. La sola modo en cual el ta pote deveni un prete cuando sposida ia es ce Heloise ta deveni un monce fema, un situa cual ia es nonasetable a ambos. Heloise ia es volente deveni sua concubina, ma Abelard ia convinse el per sposi secrete.

Alora, tio Fulbert resta disturbada par esta, e ultima el envia alga omes per ensenia un leson a Abelard: Los ia corti sua jenitales! La popla de Paris (ci ia es franses, an en la eda medieval) ia compati con sua eroe Abelard, ma Abelard mesma ia es multe embarasada. Heloise e Abelard ia deveni monces per paia per sua pecas. Los ia intercambia leteras per multe anios.

Abelard ia es convinseda continua instrui e scrive. Per esemplo, el ia razona ce la trinia refere no a la Padre, Fio, e Spirito Santa, ma a la potia, sajia, e ama de Dio. Con ideas como esta, el ia comensa irita alga de la persones con potia en la Eglesa. La Pape ia condena Abelard a silente eterna e restrinje a un monceria (la puni normal per eresia en esta eda). En cuando Abelard ia viaja a Roma per defende se, el mori a 63 anios. Heloise ia convinse sua abade per entera Abelard a sua monceria propre. 12 anios plu tarda, Heloise ia mori e ia es enterada a lado de el. Los es ancora con lunlotra a la semetero Pere Lachaise en Paris.

Abelard ia inventa sic et non - si e no, afirma e nega - en un libro con la mesma nom. Sic e non es un metodo socratal cual lista la razonas de du vistas oposada a lado de lunlotra per compara. Abelard es vera un razonaliste, e ia prende la slogan "me comprende per crede" (intelligo ut credam). El ia crede ce la veria de fida e razona debe acorda, como sua instruores, ma plu ce razona es plu importante. fida debe ajusta, pe la Eglesa debe reesamina la sinifia de sua instruis cuando los no adere a razona.

Per Abelard, etica es un caso de condui inspirada par un bon cor, bon vole, bon intendes. Si tu ave un bon consiensa, tu no pote fa mal (pd peca). Tu pote es no plu ca erante. El ia dise, per esemplo, ce, cuando la romanes mata cristianes (incluinte Cristo mesma), los ia ata sola seguente sua consiensa, e donce los no ia culpable de peca!

El es conoseda la plu per consetalisme, sua atenta a sintese e nominalisme e realisme. An si la cosa e sua nom ave un realia propre, universales esiste en la mente como ideas, el ia dise, cual refere a grupos o cosas e es representada par parolas. La mente crea astratas de cosas real par deteta similes. Donce la sinifia de la parola "gato" es la astrata mental nos crea par regarda gatos individua e nota ce tota ave cuatro gamas, pelo, oreas puntida, du oios con pupiles strana, ci miau, etc, etc. Esta teoria es ancora importante en psicolojia de conose moderna.

Esta responde a la demanda de universales es ancora no sin problemes. Nota ce nos suposa ce nos pote usa parolas como gamas, oreas, oios, etc. Ma a cual los refere? Los pote sola refere a la astratas mental ce nos fabrica de gamas, oreas, oios individua. E como nos pote sabe ce nos es regarda un gama? Oce, lo es un astrata mental cual nos fabrica de carne con un anca, un jeno, e un pede a la fini. E como es un jeno? Oce, los es.... A cual punto nos ariva a un cosa unica?

[Personal: Me crede ce esta astratas o cualias es fundida sur eras, pd situas en cual cosas individua es fasil confusada con lunlotra.]

La muslimes[edita | edita la fonte]

La restas de la Impero Roman en Asia sude-ueste e Africa norde ia cade tan distante ca cualce otra partes. Muhammad (570-632) ia trae Islam ("sede a Allah") a la mundo, e lo ia sperdeda como un foco savaje, e par la spada e par convinse. Donce, con Islam e la reuni su un serie de califias arabi, la eda oscur ia fini alga plu temprana ala. En Baghdad, Damashq, Qahirah, e an Sevilla en Espania, la filosofistes ia turna a la elinicas antica e ia comensa denova a razona e oserva. La securia, stablia, ricia, e tolera relativa de sua sosia ia inspira los a produi leteratur, incluinte filosofia, ce, par la milenio, los prosima la atenis de Elas antica.


Ibn Sina (o Avicenna)

Ibn Sina (980-1037) ia es un de esta pensores grande. El ia conose Aristotele, ma el ia resta un neoplatoniste e un gnostica, como lo pare ce tota filosofistes muslim debe resta per ance resta muslim. Jeneral, el crede ce razona e crede no pote desacorda, como la pensores cristian ia conclui ance. Ma el ia indiceta a eresia par sujesta ce tan cosas de crede como la paradiso fisical pos mori cual Muhammad ia promete sua seguores ia es nesesada per gania la popla simple, ma es no plu ca fables per la credor matur.

Ibn Rushd (1126-1198) ia es la plu grande de la filosofistes muslim. El ia comensa como un avocato e ia es la judor xef de Sevilla, e plu tarda de Cordoba. El ia es ance un mediciste, e ia servi como la mediciste de la corte en Murrakush. El ia es la prima person ci ia reconose ce, si un person survive variola, el ta es imune a pos. El ia descrive prima la usa de la retina. E el ia scrive un ensiclopedia de medica usada en universias e muslim e cristian.

Ibn Rushd (o Averroes), par Andrea di Bonaiuto, sentenio 14

Ibn Rushd ia comensa, natural, con Dio. Dio es lo cual susta realia. Dio es la ordina de la universo. Ma, el ia dise ance ce la crea de la mundo es sola un mito. La universo ia esiste sempre, e va esiste sempre.

La mente umana ave du aspetas: On ave la inteleto pasiva, cual es composada de la posible per pensa e inclui la detalias cual causa ce un personalia difere de un otra, psicolojial e fisical. Lo es un parte de la corpo e va mori con la corpo. On ave ance un inteleto ativa, cual enerji la inteleto pasiva. Lo es real la mesma en tota persones, e es la sola parte cual survive mori e es, en fato, Dio.

Ma la abri a filosofia par islam no dura. La amir de Baghdad ia comanda ce la libros par Ibn Rushd es ardeda, e sua esemplo ia es segueda par otra xefes la tota distante a Espania, la pais propre de Ibn Rushd. La mundo de islam ia ateni lo cual la mundo cristian ia fali a ateni: tota domina par relijio.

Par la media de Espania e Sisilia muslim, Ibn Sina e Ibn Rushd e otras inspira, en sua turna, la filosofistes e siensistes cristian de la universias nova de Europa.

San Tomaso[edita | edita la fonte]

San Tomaso de Aquino, par Jacopo del Cassentino, sentenio 14

En la eda medieval tarda (pd la sentenio de 1200), Aristotele ia stimula multe pensa en la monces e filosofistes de la universias. Esta neoaristotelistes ia es nomida "scolores", sinifiante eruditas. Par studia Aristotele e sua comentores muslim e iudi, los ia aprende pensa plu lojical, ma sua intendes ia es ancora teolojial. La "scolor" la plu grande ia es San Tomaso de Aquino (1225-1274).

De un familia de orijines deutx, el ia es la fio de la conte de Aquino, un vila entre Roma e Napoli. El ia atende la Universia de Napoli, do on ave interesa grande en filosofistes muslim e iudi e, natural, Aristotele. El ia deveni un monce de la ordina Dominican e ia vade a Paris per studia.

Sua madre ia es tan disturbada par sua deside ce el envia sua frates per fura el e trae el a casa. Oposante a cual on ta suposa, familias ia es no comun felis cuando sua fios e fias ta vade a via per deveni monces. Los lamenta comun per los como los ia mori! Ma Tomaso ia evade los e ia continua sua studias en Paris e otra locas.

El ia es conoseda como un om relijiosa e umil, con no aspiras per altis en la eglesa (como la multe aspirante Abelard!). El ia scrive multe, ma es la plu bon conoseda per la Summa Theologiae ("soma teolojial"), comun nomida simple "la Summa", un obra de 21 volumes en cual el usa la metodo de Abelard de sic e non per reconsilia Aristotele e cristianisme.

Tomaso ia crede ce la spirito es la forma de la corpo, como Aristotele ia dise, e dona vive e enerjia a lo. Ma la spirito e la corpo es liada tota con lunlotra. Esta no acorda con la ideas platoniste e neoplatoniste de la Padres de la Eglesa, e ia irita la plu la monces fransiscan mistica.

Tomaso ia ajunta ce la spirito sin la corpo no ta ave un personalia, car personalia veni de materia, no de spirito, cual representa la universal en nos. Per esta razona, la revive de la corpo es esensal en la idea de nonmortalia personal. La idea de Ibn Rushd ce sola un spirito nonpersonal ta survive mori ia es, pd, un era.

Tomaso ia proposa sinco capasias de la spirito:

1. La capasia vejetal, cual es envolveda en comeda, bevida, seso, e crese. 2. La capasia sensosa, pd nosa sensas e la sensa comun cual lia sensas con lunlotra. 3. La capasia de move, cual permete move. 4. La capasia volente, cual es composada de desira e vole. 5. La capasia inteletal, pe pensa e razona.

Per San Tomaso, razona es la tesoro la plu bon de umania, lo cual leva el supra la animales. Seguente consetalisme, el ia pensa ce la inteleto cual astrata la idea (forma o universal) de sua apare individua, donce an si esperia dial pote informa nos de la detalias de realia, sola razona o inteleto pote condui nos a la leges universal de la mundo fisical o an umana.

Ultima, nos nesesa sabe direta e intuosa de Dio. Razona depende de esperia sensal, e esperia sensal es de materia, no de spirito. Donce razona, como tota cosas umana, es nonperfeta e no pote comprende la perfeta cual es Dio. Fida es nosa refuja. Ma, el ia insiste, fida e razona no desacorda, car Dio no ia ta crea un mundo cual no ta coere ultima con veria revelada.

An con sua brilia clar, San Tomaso (como tota filosofistes en tota edas) ia es un om de sua eda. Per esemplo, el ia es tan sesiste como cualce de sua presedores regardante femes: El ia vide femes como inferior par natur (e par la desinia de Dio), e ia vide los como un menasa seria a la progresa moral de omes. El ia ance dedica un parte sinifiante de la Summa a anjeles e demones, ci el ia crede como tan real como umanas e animales. Entre otra cosas, el ia crede ce la anjeles move la planetas, ce los no ave corpos, ce los pote move direta, e ce cada person ave sua propre anjel gardante.

Sua ideas ia menasa multe en la Eglesa, spesial la Fransiscanes. Sua obras ia asentua tro multe la razona e tro poca la fida. El ia depende tro multe en paganes como Aristotele e Ibn Rushd. E el ia ensenia ce la spirito e la corpo ia es unida! Pos sua mori (a 49 anios), la Fransiscanes ia convinse la Pape per condena el e sua scrives. Ma la Dominicanes ia defende el e en 1323 Tomaso ia es santida.

En 1879, Pape Leo 13 ia anunsia ce Tomisme va es la filosofia ofisial de la Eglesa Catolica. Tomisme ia deveni un de la cuatro filosofias, con Marxisme, positivisme, e esistentialisme, la plu influente de la sentenio 20. Nun sabe cual filosofias va es la plu importante de la sentenio presente!

La comensa de la fini de la Eda Medieval[edita | edita la fonte]

John Duns Scotus

La Fransiscanes, como me ia dise, ia es la criticores prima de San Tomaso. Roger Bacon (1214-1294), un siensiste e monce fransiscan, ia sujesta ce razona no pote opera par sua mesma, ma nesesa la esperia per ave alga cosa como sua sujeto - un indiceta de empiricalisme en la Eda Medieval!

Ma la criticor la plu sever ia es John Duns Scotus (1265-1308), un monce fransiscan e profesor a Oxford, Paris, e Koln. El ia crede ce la autoria de la Eglesa ia es completa. La vole ia es suprema e inteleto es suordinada a lo. An si el ia es un consetaliste (como Tomaso), el crede ce, entre la cosa, la idea, e la nom, la cosa individua es la plu real.

Sua studiante William de Ockham en England (1280-1347), ance un monce fransiscan, ia crede ance ce, sin contata sensal con cosas, la universal no es consetable. Vera, el ia dise, universales es no plu ca la nomes cual nos dona a grupos de cosas - un reveni a la nominalisme de Roselin.

William es la plu bon conoseda per la prinsipe cual es nomida per el: la rasador de Ockham. "No multipli causas cuando no nesesada" es plu comun interpreteda como "la esplica la plu simple es la esplica la plu bon. Plu tarde en la istoria de filosofia e siensa, esta ia comensa sinifia "si on no nesesa un esplica supranatural (pe Dio), no usa lo!"

La resulta ultima de la pensas de William es seticisme: Sin universales, on no pote ave jeneralis, clasis, teorias, leges de natur, etc. On sola pote ave un colie de fatos sur cosas individua. Nos va vide esta denova en la filosofia de David Hume.

William de Occam; un fenetra de un eglesa en Surrey, England

William de Occam, an si el ia es un cristian fidosa, es comun videda como la punto de diverje de la vista relijiosa de la Eda Medieval a la vista de siensa de la Renase e la eda moderna.

On pote dise ce filosofia ia reposa per un periodo a esta punto, no per un asentia de ideas ma per plu ca 100 anios de Turbas. La popla ia sufri un famion grande de 1315-1317. La economia ia jira a su e la bancos ia colasa en la desenios prima de la sentenio de 1300. La Gera de 100 Anios ia comensa en 1337 e ia dura 120 anios (no 100!). La Moria Negra, un pesta cual ia es portada par la pulgas sur ratas, ia veni de Asia sude-ueste e ia mata plu ca un tri de la popla entre 1347 e 1352. Revoltas par campanianes en England, Frans, e otra locas ia es cruel supresada entre 1378 e 1382. La Eglesa, cual ia manteni la unia de Europa per sentenios, ia es fendeda entre du papes, un en Roma e un en Avignon, entre 1378 e 1417.

Ma esta avenis tan xocante ia ultima fini, e un esplode an plu grande de ativia inteletal ia comensa!