Carlo la grande

De Vicipedia

Carlo la grande ia es la re de la francos. El ia uni la parte major de Europa ueste en la eda medieval temprana e ia crea la fundas per Frans e Deutxland moderna. El ia ateni la trono franca en 768 e ia deveni la re de Italia en 774. De 800, el ia deveni la imperor prima de la Impero Santa Roman – la person prima ci ia ateni la state de imperor pos la eda de la Impero Roman.

La stato franco cual el ia fundi ia es nomida la Impero Carolan. An si Carlo ia ateni sua rena sin la aida de la Pape, la reconose par la Pape ia dona un legalia divin en la mentes de sua contemporas.

El ia es la fio prima de Pepin la corta e Bertrada de Laon, e ia deveni la re en 768 pos la mori de sua padre. A la comensa, el ia es co-re con sua frate Carloman 1, ma par causa de la mori de sua frate en un situa nonesplicada, Carlo ia deveni la sola re.

Carlo ia continua la politica de sua padre a la Pape e ia deveni sua protejor. El ia elimina la controla par la langobardes en Italia norde, e ia condui invades en Espania muslim. El ia campania ance contra la saxones a sua este, cristianinte los su la menasa de moria, causante avenis como la masacra de Verden. Carlo ia ateni la culmina de sua potia en 800 cuando el ia es coronida como Imperor de la Romanes par Pape Leo 3 a natal a la basilica vea de San Petro.

Nomida la padre de Europa (pater Europae), Carlo ia uni la parte major de Europa ueste a la ves prima pos la Impero Roman. Sua rena ia stimula la Renase Carolan, un periodo de ativia cultural e inteleto en la eglesa. La monarcias de e Frans e Deutxland ia regarda sua propre reias como desendentes de la impero de Carlos.

Carlo ia mori en 814, pos rena como imperor per plu ca 13 anios. El ia es enterada en sua capitol Aachen en lo cual es aora Deutxland. Sua fio Luis la relijiosa ia erita la trono.