Un istoria corta de drogas psicoativa
Psicolojia
Drogas e medisines ia es sempre con nos. Do on ave plantas con cualias psicoativa, on ave persones ci vole usa los, per plaser o lejeri de dole, o per mata.
La eda antica
Istoria arcivida es plenida con descrives de sustantias psicofarmacolojial, ma alga ia es estracomun. Alcol ia es cuasi universal en sua usa, e ia es ja presentante se como un problem entre la elinicas e romanes antica. On ave reportas de la usa de canaba en Asia sude-ueste antica. Opio ia es conoseda par la anticas, ma lo pare es restrinjeda a usas medisinal. Conio ia es serta conoseda: Socrate ia es matada par un tas de conio.
Sustantias plu esotica ia es ance otenable. Un estrae de la planta beladona nomida atropina ia es usada de Roma a India como un venena - e como un sustantia de cosmetica: femes ta pone a veses un gota de disolve debil en sua oios per dilata sua pupiles, car lo ia crea un sinia de interesa sesal. Lo es usada oji per diagnose par oftalmolojiste.
Un otra favoreda ia es la estrae de la planta dijitale, ance nomida dijitale. Un venena potiosa, lo ia es ance usada per trata maladias variosa.
E xampiniones e otra fungos ia furni multe de nosa asendentes con esperias interesante de alusina (e maladias seria). Alga rexercores crede ce la bevida santa de la indoiranianes antica notada en la Vedas - soma - ia es un prepara cual inclui xampiniones.
La eda medieval
Alcol ia continua es usada con multe zelo en la eda medieval en Europa. Sirca 1250, europeanes ia developa la prosede de distila e ia ajunta coniac o otra distiladas a la ja popular vino e bir. La terma jeneral per esta produis distilada ia es aqua vitae - la acua de vive.
Temprana en la eda medieval, mercatores e gerores arabi ia introdui la usa de la papavera, e sua opio, a India e Xina. En Xina, lo ia es usada xef como un medisin. Ma en India, lo ia deveni un abitua vasta sperdeda de la rica, e soldatos ia usa lo per boni sua spirito de batalia. A esta eda, opio ia es usada xef como un bevida; a veses lo ia es comeda.
La eda de esplora
A la sentenio 16, alcol ia developa a un problem sosial seria. Grandes de Martin Luther a re James 1 de England ia condena enebria. Ma ancora la sosia jeneral ia continua vide alcol como un donada de Dio. Atentas per controla sua usa ia fali sempre, e autorias ia es limitada a regula lo e imposta sua vende.
Sirca 1650, un salta nova ia es fada par la Nederlandes en la forma de un gran distilada barata e flavoreda con la bacas de la arboreta juniper, cual los nomi genever. Lo ia es un susede pronto en England su la nom gin ("jin").
Formas nova de sustantias psicoativa ia veni a Europa de la tota mundo. Cafe, per esemplo, ia es introduida a Europa de Arabia, do los ia inventada la rosta de la bacas de la arboreta, ance nomida cafe, sentenios a ante. An ce autorias relijiosa en la mundo muslim ia condena lo, lo ia es tan popular entre muslimes como un sustitui per alcol (cual ia es proibida par Muhammad) ce lo ia es clamada "la vino de la arabis".
Cafe ia es videda par europeanes e arabis ambos como saninte. Lo ia deveni la foca de un institui sosial nova, la casa de cafe, acc la café. Lo ia es lodada spesial como un sustitui, longa xercada, per la malias de alcol.
En la parte tarda de esta eda, la Compania de India Este e otra companias comersial ia comensa importa te de Xina e India. Lo, ance, ia es lodada como un bevida medisinal, ma lo no ta compete con cafe per multe plu anios.
Un de la cosas prima ce Colombo es sua imitores ia descovre, pos ce los ia descovre America mesma, ia es tabaco. La semes prima ia es traeda a Europa par un aventuror franses nomida André Thevet. Lo ia es reputada un medisin potiosa, bon per multe maladias, spesial los cual envolve la pulmones, par dotor Jean Nicot de Frans - de ci sua nom es aora usada per la sustantia tan abituante, nicotina.
Semes per tabaco ia veni a England des anios plu tarda, e la usa ia sperde tra la clases alta tra la vendoria de Walter Raleigh. Lo ia es lodada como un sanitota, e ia deveni un cultiva major per la colonistes de Virginia e otra locas en la americas. En un atenta per controla sua usa, lo ia es impostada sever.
La fuma de tabaco ia sperde ance tra Asia, de Turcia a Xina. La responde ia es multe plu negativa ca en Europa: la vende de tabaco ia es punida par destesti en Xina, per esemplo, e la puni de mori en la Impero Osmanian. En Rusia, on pote es torturada e escluida per usa lo. E la pape ia comanda ce eglesores ci ia developa la abitua ta es punida par esclui.
No cosa de esta punis, natural, ia susede.
Un otra droga cual ia entra la mundo ueste en esta periodo ia es coca. Folias de la arbor coca ia es masticada per miles de anios en America Sude, spesial entre la incas. Pos cuando Pizarro ia destrui la Impero Inca en 1553, un aventuror espaniol nomida Monardes ia trae la planta a Europa, ma lo ia fali deveni popular - a acel punto.
La sentenio de 1800
En 1859, Dr Pablo Mantegazzo ia isolida cocaina de la folia de la coca e ia scrive sur sua potias merveliosa per combate fatiga, depresa, e nonpotentia. Alga desenios plu tarda, un mediciste de Wien con la nom Sigmund Freud ia loda la potias de cocaina como un anestesente e restorante. Con esta e multe otra suportores, cocaina ia deveni multe popular. Lo ia deveni an un parte de la formula per un bevida preparada en la SUA nomida Coca-Cola. Asta 1903, lo ia conteni 60 miligrames de cocaina per un tas tipal de 8 onsas. Pos ce lo ia causa alga moris par supradosa, lo ia es proibida par lege en 1914. Lo resta un droga multe popular oji.
Un problem plu seria en la sentenio de 1800 ia es opio. En 1820, la xines, en un atenta per para la sperde de la abitua de opio, ia proibi la importa de opio. La brites - ci ia prende la rol de la vil en multe de esta situas - ia declara un gera a Xina per proteje sua comersia profitosa de opio. Los ia fini con sua mercato en bon forma, e un pesa de Xina nomida Hongkong.
La usa de opio ia es recomendada par la dotores medical en Europa e America, e poca ia defia los. La problem ia es malida par un cuantia de novetas: Friedrick Serturner ia descovre morfina, un derivada de opio, en 1803; la pratica de fuma opio ia deveni plu comun ca bevi o come lo; e la ago ipodermal ia es inventada en 1853.
Opio es sua derivadas ia comensa reseta alga atende negativa bon meritada cuando la autor brites De Quincy ia scrive sua libro multe popular, Confesas de un usor engles de opio en 1822. A esta tempo, opio ia es otenable en la forma de sentos de medisines diferente cual no nesesa un prescrive, e ia es multe popular entre la clases alta e laborante.
En 1874, eroina ia es sinteseda de opio, e ia es declarada como min perilosa ca opio e morfina. La nom, en fato, refere a sua potiosa suposada como la eroe de medisines. En 1896, la Compania Bayer ia comensa vende eroina.
Alga otra drogas ia deveni otenable a la publica european e american en la sentenio de 1800. Laborores de India ia porta sua ganja a Jamaica, cual nos nomi aora canaba (o "mariajoana"). La Comite de Drogas de Canaba Indian ia pone sua marca de aproba sur canaba, disente ce sua usa ave cuasi no segues negativa, e la droga ia sperde entre la clase basa de Jamaica. Lo ia es otenable en la SUA e Europa, ma no ta deveni popular asta la sentenio seguente.
Amfetaminas, la droga sinteseda major prima, ia es descovreda en 1887. Sua usa como un stimulante ia sperde rapida. Lo ia es usada en la Gera Mundal 2 per stimula soldatos e laborores en industria.
Plu temprana, en la sentenio de 1700, eter ia es descovreda. Cuando sua efetosa como un anestese ia deveni conoseda en la desenio de 1840, enspira lo o misca alga gotas en acua ia deveni popular entre la jovenes de la clase alta en la SUA e Europa. Lo ta sperde plu tarda a la povre de Er e otra paises como un alternativa barata a alcol.
Final, Claude Bernard ia comensa esperimenta en 1856 con un venena de la junglas de la Amazona de America Sude nomida curare. Lo es usada aora en sirurjia sur la cor.
La sentenio de 1900
Drogas alusinal, o alusinojenes, ia es conoseda de la edas antica, como notada a supra. Ma no asta la sentenio de 1900, e spesial la desinia de 1960, cuando los ta deveni multe popular. Esta es un lista partal:
Scopolamina, un droga anticolinerjical, es trovada en Atropa Belladonna (beladona), Datura stramonium (stramonio), e Mandragora officinarum (mandragora).
Un cuantia grande de drogas moderna ave efetos simil a catecolaminas. La plu vea es peote (de la Lophophora williamsii), usada par la americanes orijinal de mexico. Mescalina es derivada de peote. On ave du drogas, myristina e elemisina, cual es trovada en muscada e masis. E on ave la metamfetaminas con sua inisiales sin fini (DOM, MDA, DMA, TMA, MDE, MDMA... la final plu bon conoseda como estasia).
Posible la alusinojenes la plu famosa es la drogas simil a serotonina. Alga ave orijinas antica: psilosibina e psilosina es derivada de la xapinion Psilocybe mexicana; ololiugui ia es usada par americanes orijinal de America Sentral e Sude, e es plu bon conoseda como la semes de la ipomea; harmina deriva de la planta de Asia sude-ueste nomida Peganum harmala; e bufotenina deriva de la secretes de la pel de la sapo "bufo" de America Sude.
En 1938, tota de estas ia comensa pali en compara con la descovre par Albert Hofman, un cimiciste suiz, de un deriva de ergote (un fungo de segal) cual el ia nomi dietilamida de asida liserjico, plu bon conoseda de sua inisiales deutx - LSD o "asida".
E final, nos ave la drogas anestesente alusinojen multe perilosa como fensiclidina, descovreda en 1956, e plu bon conoseda como PCP o la polvo de anjeles. Plu resente es cetamina, descovreda en 1962 e usada orijinal como un bon anestese en la Gera de Vietnam, ma cual es multe perilosa cuando usada estra la cura de un dotor. Ance, en 1960 la droga fentanil ia es descovreda. Un opioide sinteseda, o ia es orijinal usada como un anestese per persones con dole sever de canser, lo es ance usada aora como un droga alusinojen. Plu ca dui de la moris par supradosa par opioides es causada par fentanil.
© Copyright 2001, C. George Boeree