Medica e fisiolojia moderna

De Vicipedia
Jump to navigation Jump to search


Tecnolojia e la serebro[edita | edita la fonte]

En la sentenio de 1800, anatomia ia ateni un grado de sofistica cual permete artistes medical per crea desinias tan detaliosa ce sirurjistes moderna pote ancora usa los. Ma los ave un limita: Lo es un cosa per talia un serebro mor, e un otra per vide un serebro vivente operante. De la sentenio de 1800 tarda tra la sentenio de 1900, on pote vide alga atentas notable a esplora la serebro sin estrae lo de sua posesor: Prima, Wilhelm Konrad Roentgen ia inventa la radiograf en 1895. Un util eselente per medicistes e rexercores, lo es min usosa per vide la texedas mol de la serebro. En 1972, Godfrey Hounsfield ia ajunta un computador a la radiograf e ia developa tomografia computada, cual soma multe fotos per crea un imaje tre-dimensional.

En un modo multe diferente, Hans Berger ia developa la eletroensefalogram (EEG) en 1929. En 1932, Jan Friedrich Tonnies ia crea la forma moderna, con sua paper movente e penes vibrante. La EEG rejistra la pulsas eletrica coordinada e multe peti de un cuantia grande de neurones a la surfas de la cortex. Lo ia es sola un caso de tempo ante rexercores ta ajunta la computador a la sistem.

En 1981, la ecipo de Phelps, Hoffman, e TerPogossian ia developa tomografia de emete de positrones (plu comun, la PET, de la corti engles). Lo opera como esta: La dotor injeta glucosa radioativa (en acua) en la sistem de sangue de la pasiente. La aparato alora deteta la nivel relativa de ativia, indicada par la usa de la glucosa, de areas diferente de la serebro. La computador jeneral un imaje cual permete ce la rexercor vide cual partes de la serebro es la plu ativa cuando on fa operas mental variosa, como vide alga cosa, conta en sua testo, imajina alga cosa, o escuta musica.

En 1937, Isidor I. Rabi, un profesor a la Universia de Columbia, ia nota ce atomes revela se par emetente ondas de radio pos ce los ia es a ante sujestada a un campo magnetal potiosa. El ia nomi esta resona magnetal nucleal (NMR). Esta ia es pronto usada par siensistes per identifia sustantias cimical en la laboreria. Lo ta es multe anios plu tarde ce un Raymond Damadian ta reconose la potensia de la NMR per medica.

La "nondominable" - la MRI prima de Damadian

Damadian es un person interesante e controversa. El ia nase en New York City en 1936. Cuando el ia ave sola 8 anios, el ia es asetada a la Scola de Musica Juilliard. El ia es donada per studia a la Universia de Wisconsin a Madison, e alora vade a la scola de medica a la Universia de Yeshiva en la Bronx. El ia reseta sua diploma dotoral en 1960 cuando el ave 24 anios. De ala, el ia comensa rexerca medical a la Sentro Medical de Brooklyn.

Cuando el ia investiga tumores en ratas, el notada ce la siniales de la NMR de tumores canserosa ia es sinifiante diferente de la siniales de ratas sana. El ia ipotese ce la cuantia plu grande de moleculas de acua (e donce de atomes de idrojen) en esta tumores. Sua descovres ia es publicida en la jornal "Science" en 1971.

Comprendente ce esta ia es la funda per un modo nonsirurjial per deteta canser, el ia ave la idea per un aparato NMR plu grande ta pote rejistra la ondas de radio veninte de tota atomes en un umana. On ta debe crea un campo magnetal sufisinte grande.

En 1977, Raymond Damadian e sua studiantes ia construi un prototipo de la MRI (imaji par resona magnetal) cual los ia nomi la "Nondominable". El ia atenta usa lo, sin susede, sur se mesma, e alora sur un studiante graduada Larry Minkoff. La resulta ia es 106 puntos de datos (prima rejistrada con lapises colorida) cual descrive la texedas en la peto de Minkoff. La Nondominable es aora en la Museo Smithsonian en Washington.

La nara de Damadian ia continua con sua rejistra de un patenta e anios de litiga en cual el ia combate companias como Hitachi e General Electric, ci ia disputa sua patenta. El ia causa ance alga controversia par suportante la labora de "siensistes de crea" cual ia es en realia no plu ca cristianes ci reteni la crede ce Dio ia crea la universo en ses dias.

On ave alga otra siensistes ci ia studia NMR ci ia es movente en la mesma dirije como Damadian. Un person spesifada ci pote ave un declara legal per la descovre es Paul Lautenbur. El ia developa la idea de usante grados peti de la NMR per mapa la corpo cuando a la Universia de New York a Stony Brook. En 1973, el ia usa sua tecnica sur un tubo de proba plen de acua, e alora sur un bivalvo. Sua obra ia es publicida en la jornal Nature, e lo es sua tecnica cual es favoreda oji. Lautenbur e la rexercor brites Peter Mansfield ia gania la Premio de Nobel en 2003.

Un MRI opera como esta: ON debe crea un campo magnetal multe forte cual core tra la person de testo a pede. Esta causa la atomes jirante de idrojen en la corpo per ordina se en la dirije de la campo magnetal. Alora, on envia ondas de radio a un frecuentia spesial cual causa la protones de idrojen per jira en un otra dirije. Cuando on descomuta la ondas de radio, la protones va reveni a sua ordina con la campo magnetal, e los va relasa la enerjia estra cual los ia asorbe de la ondas de radio. Acel enerjia es sensada par la mesma spiral cual ia produi la enerjia, aora atante como un antena de tre dimensiones. Car texedas diferente ave cuantias de idrojen diferente en los, los dona un densia diferente de siniales de enerjia,cual la computador organiza en un imaje detaliosa en tre dimensiones. Esta imaje es cuasi detaliosa ca un foto anatomial.

A la lado plu ativa, stimula eletrical direta de la serebro de un person vivente ia deveni un arte bela en la sentenio de 1900. En 1909, Harvey Cushing ia mapa la cortex somatosensal. En 1954, James Olds ia produi un serco en la media cuando el ia descovre la "sentro de plaser" de la ipotalamo. Par la fini de la sentenio, la areas spesialida de la serebro ia es bon mapada.

Sirurjia de la serebro ia deveni ance plu efetosa. En la prosede de xerca per lejeri epilesia estrema par sirurjia, lo ia es descovreda ce talia la corpo calo cual junta la du emisferas de la cortex serebral ta boni multe la state de la pasiente. Roger Sperry ia pote descovre alora la diferes variosa entre la emisferas destra e sinistra en alga de la studias la plu interesante. El ia reseta la Premio Nobel per sua obras en 1981.

La otra aspeta de tecnolojia es sua usa en la atenta per remedia la sufri de persones con maladias mental. An si lo es multe controversa oji, la evidentes sujesta ce terapia par eletroxoca (acc terapia eletro-convulsante, o ECT), prima usada par Ugo Cerletti e Lucino Bini en 1938, pote es efetosa en la cura de pasientes multe depresada. Eletroxoca envolve la envia de un corente eletrical forte tra la serebro de un pasiente anesteseda. Cuando la pasiente velia, los no pote recorda alga oras de tempo ante la prosede, ma senti ance multe min depresada. Nos no es serta perce lo ave sua efetos.

Min efetosa e multe plu estrema es la lobotomia, prima usada sur umanas par Antonio Egaz Moniz de la Universia de Lisbon, ci ia gania la Premio Nobel en 1949. La lobotomia ia es presentada como un tecnica en la modo de un cadena de construi par Walter Freeman, ci ia completa la lobotomia prima en la SUA en 1936.

La esplode psicofarmacolojial[edita | edita la fonte]

Santiago Ramon y Cajal
Charles Sherrington

En la sentenio de 1800, la prinsipes fundal de la sistem de nervos ia es lente descovreda par rexercores como Galvani en Italia e Helmholtz en Deutxland. A la fini de la sentenio, biolojistes ia prosimi un comprende de la detalias. Spesial, Camillo Golgi (ci ia crede ce la sistem de nervos es un cosa singular) ia inventada un tecnica de tinje cual permete ce Santiago Ramon y Cajal demostra ce la sistem de nervos ia es vera composada de neurones individual. La du reseta la Premio Nobel en 1906.

La biolojiste brites Charles Sherrington ia nomi ja lo cual Ramon y Cajal ia vide: la sinapse. El ta gania la Premio Nobel per sua rexerca sur neurones con Edgar Douglas Adrian.

En 1921, la biolojiste deutx Otto Leowi ia completa la depinta par descovre asetilcolina e la idea de la neurotransmetador. Per sua descovre, el ia reseta la Premio Nobel, compartida con Henry Hallett Dale. Interesante, asetilcolina es un relata de muscarina - la ingrediente ativa en alga de la xampiniones ce alga de nosa asendentes ia gusta tan multe. En 1946, un otra biolojiste, Ulf von Euler, ia descovre norepinefrina, e gania la Premio Nobel. E, en 1950, Eugene Roberts e J. Awapara ia descovre GABA.

En la parte temprana de la sentenio de 1900, nos vide la comensa de psicofarmacolojia como un siensa medical, con la usa de bromido e idrato de cloral como calmintes. Fenobarbital ia aveni en 1912 como la barbiturica prima. En la dui du de la sentenio, con la mecanica fundal de la sinapse comprendeda, la developa de drogas psicoativa crese multe. Per esemplo:

En 1949, John Cade, un psiciatriste australian, ia trova ce litio, un metal lejera, pote redui la aspeta manica de la sindrom bipolal.

En 1952, un dotor en la marina franses, Henri Laborit, ia descovre un calminte cual inclui clorpromazina, cual ia es promoveda como la antipsicosica Torazina alga anios a pos.

Imipramina, la antidepresante trisicle prima ia es developada a Geigy Labs par R. Kuhn en la desenio temprana de 1950, en cuando el ia atenta trova un antiistamina plu bon.

En la desenio tarda de 1950, Nathan Klein ia studia la usa de reserpina en India en la sentenio de 1700, e ia trova ce el redui la sintomes de multe de sua pasientes psiciatriste. Triste, la efetos ladal ia es sever.

En 1954, la droga meprobamato, plu bon conoseda como Miltown, ia entra la mercato. Sua funda cimical ia es descovreda un desenio plu temprana par Frank Berger, en cuando el ia atenta descovre un antimicrobial nova. El ia trova un calminte en loca.

Iproniazido (un antidepresa de la familia MAOI) ia es developada en 1956 par la compania farmacolojial Hoffman-LaRoche, per pasientes con tuberculose. Lo pare causa ce los deveni plu felis! An si lo ia es proibida per sua efetos ladal, lo ia es la prima en un serie longa de antidepresantes.

Leo Sternbach ia es empleada ance par Hoffman-LaRoche, e ia descovre la droga Valium (diazepam) en 1959, e Librium (clordiazepoxido) la anio seguente - du de la drogas psicoativa la plu usosa e usada.

La progresa de psicofarmacolojia ia es aidada multe par la crese en sabe de la ativias a la nivel de la sinapse. John Eccles, Alan Lloyd Hodgkin, e Andre Fielding Huxley ia comparti la Premio Novel en 1963 per sua studias de la membrana de la neuron. E en 1973, Solomon Snyder e Candace Pert de Johns Hopkins ia descovre endorfina ("morfina interna") e la teoria de la clave e la securador, la mecanica fundal de drogas psicoativa, ia es confirmada.

En 1974, D. T. Wong a la laborerias de Eli Lilly ia descovre fluoxetina - Prozac - e sua efetos antidepresante. Lo ia es aprobada par la governa de la SUA en 1987. Esta sustantia e otras simil (inibador spesifada de recatura serotonina o ISRS) ta cambia dramosa la cura de persones con depresa, la sindrom de osese-compulsa, ansia sosial, e otra problemes.

En la desenio de 1990, nova drogas antipsicosica como clozapina ia es developada cual trata scizofrenia plu completa ca drogas plu vea como clorpromazina, e con min efetos ladal.

E como pare la futur, regardante psicofarmacolojia? Algas sujesta ce la avansas major no ta continua, e es no plu ca un caso de produi varias plu bon. Ma esta ia es diseda multe veses a ante. Biocimica es ancora progresante, e cada anio introdui algas nova. Nos pote sola espera ce plu e plu efetosa medisines va es trovada.

Jenetica e la jenom umana[edita | edita la fonte]

La siensa de jenetica comensa en la jardin de un monce osteraices nomida Gregor Mendel. En 1866, el ia publici la resultas de sua labora sujestante la esiste de "fatores" - dual nos ta nomi jenes - cual es la orijina de la cualias fisical de organismes.

Un profesor a la Universia Columbia, Thomas Morgan, ia furni la paso seguente en 1910 par descovre ce acel jenes es, en fato, portada en la strutures nomida cromosomas. E en 1926, Hermann J. Muller ia descovre ce el pote crea mutas en drosofila (un mosca peti cual gusta fruta) par esposa los a radia con raios X.

Final, en 1953, Rosalind Franklin e, autonom, James D. Watson]] e Francis Crick, ia descrive la strutur de la molecula de ADN (asida desosiribonucleal). E Sydney Brenner ia completa la sistem par descovre ARN (asida ribonucleal) e la prosedes fundal de la construi de protena.

La fase seguente de jenetica envolve la mapa de la ADN: Cual es la segue de alcalines (A, T. G. e C) cual composa ADN, e como esta segues relata a protenas e ultima a la cualias de organismes vivente? Du rexercores, Frederick Sanger e Walter Gilbert, descovreda separada un tecnica per "leje" efetosa la alcalines, e en 1977, un virus bateriofaje ia es la vivente prima cual ave sua jenom descriveda.

En la desenio de 1980, la Departe de Enerjia de la SUA ia revela un projeta per colie rexercores de tota mundo per aprende la jenom intera de umanas! La Institui Nasional de Sania ia junta, e elejeda James Watson como la dirijor de la Ofisia de Rexerca de la Jenom Umana.

En 1995, Hamilton Smith e J. Craig Venter ia leje la jenom de un bateria. En 1998, rexercores ia publici la jenom de un animal, un nematodo (verme ronda). En 2000, los ave la jenom de la drosofila. E en la mesma anio, rexercores ia ave la jenom de un planta.

En junio 2000, a un selebra a la Casa Blanca en Washington, ospitada par presidente Clinton, du grupos de rexercores - la Projeta de la Jenom Umana e la compania privata Celera Jenomicas - ia anunsia ce los ave la comensas de descrives de la jenom umana. En febrero 2001, la Projeta ia publici sua paper inisial en Nature e Celera ia publica sua paper inisial en Science. Los ia descrive sirca 90% de la jenom, an si siensistes sabe la funsiona de min ca 50% de la jenes descovreda.

On ave alga surprendes: An si la jenom umana es composada de plu ca 3 bilion alcalines, esta es sola un tri tan grande ca siensistes ia predise. E lo es sola du veses tan grande ca lo de la verme ronda. Lo ia es ance descovreda ce 99.9% de la segues es esata la mesma per tota umanas. Nos no es tan spesial como individuas como nos gusta pensa.

La descrive de la jenom umana no es sola un aveni inteletal: Sabe nosa jenetica ta permete ce nos trata maladias jenetica, desinia medisines par comanda, coreta mutas, trata plu efetosa e an cura canser, e plu. Esta es un susede cual suprapasa an la ateras a la luna.