Asida desosiribonucleal

De Vicipedia
ADN

Asida desosiribonucleal (ADN) es un moleculo composada de du cadenas cual enrola lunlotra e forma un spiral duple cual porta la instruis jenetical usada en la crese, developa, funsiona, e reprodui de tota organismes conoseda e de multe viruses. ADN e asida ribonucleal (ARN) es asidas nucleal; con protenas, lipidos, e carboidratos (polisacaridos), asidas nucleal es un de la cuatro tipos major de macromoleculos cual es esensial per tota formas de viventes.

La du ADN spirales es ance nomida polinucleotidos, car lo es composada de unias monomeral plu simple nomida nucleotidos (sitocina, guanina, adenina, o timina), un sucre nomida deoxiribosa, e un grupo fosfato. La nucleotidos es liada con lunlotra en un cadena par lias covalente entre la sucre de un nucleotido e la fosfato de la seguente, resultante en un spina de alternante sucre e fosfato. La bases nitrojenosa de la du spirales separada de polinucleotidos es liada, seguente la regulas de dupli de bases (adenina con timina, sitocina con guanina) con lias de idrojen per crea la spiral duple.

La bases nitrojenosa complemental es divideda en du grupos, pirimidinas e purinas. En ADN, la piramidinas es timina e sitocina; la purinas es adenina e guanina. Estas es cortida a T, C (per cytocine), A, e G.

Partes de ADN

Ambos spirales de ADN conteni la mesma informa biolojial. Esta informa es reproduida cuando la du spirales separa. Un parte grande de la ADN (plu ca 98% en umanas) es noncodiginte, pd esta sesiones no furni motifes per segues de protenas.

La du spirales de ADN core en dirijes oposante a lunlotra e donce es antiparalel. Ajunta a cada sucre es un de la cuatro tipos de nucleobases. La segue de esta cuatro nucleobases longo la spina cual codigi la informa jenetical. La spirales de ARN es creada usante la spirales de ADN como modeles en un prosede nomida transcrive. En la codigo jenetical, esta spriales ARN spesifia la segue de asidas amino cual composa protenas en un prosede nomida tradui.

Cromosomas

En selulas eucariotal, ADN es organizada en stutures longa nomida cromosomas. Ante divide de selulas tipal, esta cromosomas es duplida en la prosede de reprodui de ADN, furninte un colie completa de cromosomas per cada selula fial. Organismes eucariotal (animales, plantas, fungos, e protistes) reteni la parte major de sua ADN en la nucleo (selulal) de la selula como ADN nucleal, e alga en la mitocondrios como ADN mitocondrial. Contrastante, procariotas (baterias e arceas) reteni sua ADN sola en la sitoplasma, en cromosomas sirculo. En cromosomas eucariotal, protenas cromatinal, como istonas, compati e organiza la ADN. Esta strutures compata gida la interatas entre ADN e otra protenas, aidante en controla cual partes de la ADN es transcriveda.

ADN ia es prima isolida par Friedrich Miescher en 1869. Sua strutur moleculal ia es prima identifiada par Francis Crick e James Watson a la Laboreria Cavendish en la Universia de Cambridge en 1953. Sua construi de un model ia es gidada par datos de difrata par X-raios colieda par Rosalind Franklin e Raymond Gosling. ADN es usada par rexercores como un util moleculal per esplora la leges e teorias fisical, como la teorem ergodica e la teoria de elasticia. La cualias unica de ADN como un materia es atraente a siensistes e injenores de material en microfabrica e nanofabrica. Entre avansas notable en esta campo es origami de ADN e materias ibride de ADN.