Jenetica
Per plu, vide la categoria jenetica.
Jenetica, un sucampo de biolojia, es la siensa de jenes, erita e la varia de viventes. La parola veni de γενετικός en elinica antica, un forma ajetival de γένεσις ("orijina").
La fato ce viventes erita cualias de sua jenitores ia es usada de edas preistorial per boni plantas e animales par reprodui distinguinte. Ma la siensa moderna de jenetica, cual atenta comprende la prosedes de erita, comensa sola con la laboras de Gregor Mendel en la media de la sentenio 19. An si el no ia conose la funda fisical per erita, Mendel ia oserva ce viventes erita cualias par unias unica de erita, cual nos nomi aora jenes.
Jenes coresponde a areas en ADN, un molecula composada de un cadena de cuatro tipos de nucleotidos. La segue de esta nucleotidos es la informa jenetical cual viventes erita. ADN aveni natural en la forma de un cadena duple, con nucleotidos a cada lado de la cadena completinte lunlotra. Cada dui de la cadena pote funsiona como un model per la crea de un cadena nova completa. Esta es la metodo per crea copias de jenes cual pote es eritada.
La segue de nucleotidos en un jen es traduida par selulas per produi un cadena de aminoasidas, cual formi protenas. La ordina de aminoasidas en la protena coresponde a la ordina de nucleotidos en la jen. Esta relata entre la segue de nucleotidos e la segue de aminoasidas es nomida la codigo jenetical. La aminoasidas en un protena determina como lo plia per deveni un forma tridimensional. Esta strutur determina alora la rol de la protena en la selula. Protenas esecuta cuasi tota la roles nesesada par la selulas per vive. Un cambia a la ADN en un jen pote cambia la aminoasidas en un protena, cual cambia sua forma e rol. Esta pote fa un efeto dramosa en la selula e en la vivente tota.
An si jenetica ave un rol grande en la apare e condui de viventes, lo es la combina de jenetica con la esperia de la vivente cual determina la conclui ultima. Per esemplo, jenes ave un rol en determina la grandia de un vivente, ma la nuri e otra cosas ave ance un efeto grande.
