Lege

De Vicipedia
Jump to navigation Jump to search
Justia, la diva sieca, un sculta a la corte de la Contia de Colby, Memphis, Tennessee, SUA

Per plu, vide la categoria lege.

Lege es la sistem de regulas cual un nasion o comunia reconose, cual regula la atas de sua membros, e cual determina la punis e la multas en casos de desobedi la lege. La parola veni de la parola latina lex (lege).

Lege es comun comprendeda como un sistem de regulas cual es creada e enforsada par instituis sosial o governal per regula condui, an si sua defini esata es un caso de debate continuante. Lo ia es variosa descriveda como la siensa o la arte de justia. Leges enforsada par la stato pote es creada par un legeria comunial o par un legor singular, resultante en leges en la formas de comandas e regulas, o instituida par judores tra presedentes, normal en sistemes de lege comun. Individuas privata pote crea contratas cual es legal obligante, incluinte acordas de arbitra cual pote eleje aseta arbitra como un alterna a la prosedes normal de juderias. La forma de leges mesma pote es influeda par un constitui, scriveda o implicada, e la diretos codigida a en. La lege formi politicas, economias, istoria, e sosia en modos diversa e servi como un reconsilior de relatas entre persones.

Sistemes de lege varia entre nasiones, con sua diferes analisada en lege comparativa. En sistemes de lege sivil, un legeria o otra corpo sentral codigi e solidi la lege. En sistemes de lege comun, judores pote fa leges de casos presedente, an si a veses leges de casos pote es inversada par un corte plu alta o par la lejeria. Istorial, lege relijiosa ia influe casos secular, e es ancora usada en alga comunia relijiosa. Lege xaria es fundida sur prinsipes muslim e es usada como la sistem de lege xef en alga nasiones, incluinte Iran e Arabia Saudi.

La estende de leges pote es divideda en du dominas. Lege publica conserna governa e sosia, incluinte lege de constitui, lege de dirije, e lege de crimin. Lege privata trata la desacordas legal entre individuas e/o organizas en areas como contratas, poseses, ofendes e danas, e lege comersial. Esta distingui es plu forte en nasiones con lege sivil, spesial los con un sistem separada de cortes de dirije. Par contrasta, la divide entre lege publica e privata es min forte en juderias de lege comun.

Lege furni un fonte de investiga par eruditas en istoria legal, filosofia de lege, analise economial, e sosiolojia. Lege ance investiga casos importante e complicada sur egalia e justia.