Cimica

Esta es la article supra cimica. La categoria Cimica conteni plu articles sur cimica.

Robert Boyle (1627-1691), la cimiciste moderna prima

La cimica es la siensa cual studia la composa, strutur e proprias de la sustantias material, e como los muta a lunlotra.

Cimica ocupa un loca media en la ierarcia de la siensas per un nivel reduinte de fisica e biolojia. Lo es a veses nomida la siensa sentral car lo furni un fundi per comprende ambos disiplinas siensal fundal e aplicada en un nivel fundal. Esemplos inclui cimica plantal (botanica), la forma de rocas magmal (jeolojia), como la ozon atmosferal es formida e como la contaminantes ambiental es degradada (ecolojia), la cualias de la solo en la luna (astrofisica) e como funsiona la medisines (farmacolojia).

Etimolojia

La parola "cimica" veni de la parola arabi al-kīmīā (الکیمیاء). Esta ia es emprestada de la elinica χημία o χημεία, cual pote veni de la egiptian antica Chemi o Kemi, cual es la nom antica de Misre en egiptian. Loance pote veni de χημεία cual sinifia "fusa".

Istoria

La istoria de cimica representa un estende de tempo de la anticia asta oji. En la 1000 aec, sivilias ia usa tecnolojia cual ta pote a fini forma la fundi de varia ramos de cimica. Esemplos inclui estrae metales de minerales, fa seramica e vitro, fermenta de bir e vino, estrae cimicales de plantas per medisines e parfum, fa sapon con gras e fa alias como bronze. La protosiensa de cimica, alcimica, ia no susede en esplica la natur de la materia e sua mutas. An tal, fante esperimentas e rejistrante la resultas, la alcimicistes ia prepara per la cimica moderna. La distingui ia comensa cuando un diferensia clar ia es fada entre cimica e alcimica par Robert Boyle en sua obra The Sceptical Chymist (1661). En cuando ambos alcimica e cimica conserna con la materia e sua mutas, la cimicistes aplica la metodos siensal a sua labora. Cimica es regardada como un siensa constituida con la labora de Antoine Lavoisier, ci ia developa la lege de conserva de masa cual ia demanda mesura cauta e oservas cuantial de fenomenos cimical. La istoria de cimica es entretexeda con la istoria de termodinamica, spesial tra la labora de Willard Gibbs.

Vide ance

• Elementos